SUƐI LEBOLLE O KƆƆ | A NƆLA MA SƆƆŊGUU MƐLƐKA IKƐI KPƐƐLUŊ
A Yiyaŋ pa maa A Cho Mɛlɛka Ikɛi Kpɛɛluŋ?
“Te a nɔ pɛ chaŋyɛi kpɛɛluŋ a Mɛlɛka, nyɛ o nyɛ wɔɔŋ komal num te, a sinaŋ maa a nɔ bahawɛi le, nduyɛ nyɛ o nyɛ hiiluu num te. Mii yɔŋnuŋ maa Mɛlɛka cho num hɔlteŋ choo lɔɔlɔɔ le num o kɛndɔɔ tosallo.”—KILISOFA, POOMBƆ FELEŊGƆNƆƆ O LƐŊNDE KANALEŊ NIŊ.
“Mi Mɛlɛka che num o nyɛ num palaa niŋ. Mbo chom num kaalaa tau, hɔlaa muliaa, mbo hiou bɛɛ mɛɛ ŋ nyuna ndu yɛ.”—HANA, CHUAAMBƆ WƆSIŊ 13 WO, O LƐŊNDE ALASKALEŊ NIŊ, U.S.A.
“Icho suɛi sɔvɛ, nduyɛ suɛi kɔl hiniaa le sinaa maa a cho o chaŋyɛi niŋ nya Mɛlɛka kpɛɛluŋ!”—CHINA, CHUA CHAMAIKAŊNƆƆ O WƆSILA 40 NIŊ.
O cho ko Kilisofa, Hana, a China le nɔ yiyaŋ waa naa le. Waŋnda tau chieeŋndo balɔɔ silɔ laalaŋ kpeekpei maa Mɛlɛka che nda maa chaaŋaa ndɔ. Num yɛ? A yiyaŋ pa maa a cho Mɛlɛka ikɛi kpɛɛluŋ? Ɔɔ a yeema pa ma sɔɔŋguu ndu ikɛi, ɔɔ ikɛi kpɛɛluŋ? Kɛlɛŋgaa, mi kɔndɔfillo bii num ma nyunaŋ aa, ‘Baa icho pa tonya kpeekpei le mi wanachioo nɔ chaŋyɛi kpɛɛluŋ a Mɛlɛka Kpaaya Kpouwo? Nduyɛ te o wa lende pɛ, vɛɛ i yɔŋnuŋ yɛ?’
A NƆLA MA SƆƆŊGUU MƐLƐKA IKƐI KPƐƐLUŊ
Baabuiyo chɔm maa, icho tonya le chaŋyɛi nɔɔ kpɛɛluŋ a Mɛlɛka. Baabuiyo dimi maa, mi Mɛlɛka veelu Ebilaham, wana yuŋgu lebollo aa, “chaaŋ nuu.” (Aisaiya 41:8, NW) Kɛsiŋ vɛlɛ o kɔl veelu kɛndɛ cho o Chemisi 4:8 niŋndo. “La sɔɔŋguu Mɛlɛka ikɛi. Ndu bɛɛ o cho nya sɔɔŋguu ikɛi.” Lelaŋ, icho kpendekele maa, tonya icho ni le chaŋyɛi nɔɔ kpɛɛluŋ a Mɛlɛka. Kɛ mɛɛ naŋ chi Mɛlɛka le yɛ, vɛɛ naŋ looku yɛ miŋ sɔɔŋguu ndu ikɛi, nduyɛ miŋ tuei chaŋyɛi kɛndɛi yeela a ndu?
Le nyuna koŋ mulioo, tofawɔ nyɛ yɔŋnuŋndo te chaŋyɛi wa pɛ kilaŋndo waŋnda tɛɛŋ. I kanduŋ fɛŋ a ndapila diolaŋ siiniaŋndo. Mɛɛ nda hiau lachi a suukaŋndo o yeemaŋ ndaŋ choo fau, a kɔlkalulaŋ kenaŋndo, lende koni chaŋyɛi ndɛi hiau lachi a kaloo ni. Nduyɛ te a kindiŋ pɛ le ndapila sɔɔŋ tosallo vellaa velle, mi chaŋyɛi ndɛi kendu poŋ. Nyɛ pilɛ koŋ kpe cho o chaŋyɛi kilaa a Mɛlɛka ni. Ŋ tofaŋndɔ mɛɛ hei yɔŋnuŋ yɛ.
Naapum a Yeema Dɔɔ Vɛlɛ
BANDU MƐŊGƐLAA
A Sina pa Diola Mɛlɛkalaŋ, Ma Wa Laŋ Soliŋndo Kpeku?
O cho maa Mɛlɛka cho naa diola ndɔlaŋ chɔmndo aa, “Ya cho Chɛhowa ni. Diola nilaŋ la cho laŋ ni.”
