SUƐI LEBOLLE O KƆƆ | A NƆLA MA SƆƆŊGUU MƐLƐKA IKƐI KPƐƐLUŊ
A Sina pa Diola Mɛlɛkalaŋ, Ma Wa Laŋ Soliŋndo Kpeku?
A yiyaŋ pa a chaaŋ num ŋ kaala wo, kɛ a sina ndu ladio le? Sako bɛɛ. Mi chua pilɛ diolaŋ Ɛluina o lɛŋnde Bɔlkeliaaleŋ niŋ dimi aa, “O wa ikala kpoke le ma sɔɔŋguu Mɛlɛka ikɛi te a sina diola ndɔlaŋ te.” A mɛɛ naŋ pɛɛku o buŋgɛi naŋ hiou ve niŋ yɛ, maa Mɛlɛka yeema num ma sɔɔŋguu ndu ikɛi. Le sabu koŋ o soliŋ Baabuiyo kpeku ni le mbo chɔm naa diola ndɔlaŋ. Mbo dimi aa, “Ya cho Chɛhowa ni. Diola nilaŋ la cho laŋ ni.”—Aisaiya 42:8, NW.
Mɛlɛka soliŋ Baabuiyo kpeku le num diola ndɔlaŋ chɔmndo aa, “Ya cho Chɛhowa ni. Diola nilaŋ la cho laŋ ni.”—Aisaiya 42:8, NW
Baa o cho mako Chɛhowa le, te a soliŋ pɛ diola ndɔlaŋ kpeku, ɔɔ ma soliŋ ndaŋ bɛɛ kpeku le? Yiyaŋndɔ a hei okɔɔ. Diola Mɛlɛkalaŋ la wa la poonyiaa o chomulta maHibuluilaŋ niŋ sindɛ ma veelu laŋ aa, Tɛtɛlaklametiŋ. Nduyɛ, la cho la poonyiaa o yaula tasela maHibuluilaŋ niŋ le 7,000. Diolaŋ ndaŋ la hiou poonyiaŋ o Baabuiyo niŋ a diola kɛ kɛ. Hei chɔm kɛsɛ ni maa Chɛhowa yeema naa miŋ sina diola ndɔlaŋ, nduyɛ miŋ soliŋ ndaŋ kpeku. *
Le mi chaŋyɛi kanduŋ waŋnda a ŋiɔɔŋ tɛɛŋ, mɛɛ ma chɔɔmaŋ fɛŋ diolaŋ. A sina pa diola Mɛlɛkalaŋ?
Mi waŋnda apum yiyaŋ maa le mɛɛ Mɛlɛka cho wana diandaa, nduyɛ mbo wa Mɛlɛka kpaaya kpouwo yɛ, maa o ve lebɛɛ le diola ndɔlaŋ kpekoo soliŋndo le. Tonya, o bɛnda miŋ soliŋ diola Mɛlɛkalaŋ kpeku o nɛi wɔɔŋndo choo le. Lende koni icho a chaaŋ num ŋ kaala wo ni, a yeema ma tɛɛmbuu diolaŋ ndɔlaŋ te. Kɛ, sabu Chɛhowaa cho ni, le mi wanaa kaala ndu wa ke diola ndulaŋ bɛɛleŋ, nduyɛ le ma tosa mi diola ndulaŋ la sinaŋ. (Chondei 69:30, 31; 96:2, 8, NW) Loonuŋ maa, mi Chiisu dimul buɛiyaa nduaa le ma piɛi aa, “Mɛlɛka Finya naa o choo choo niŋ, maa waŋnda ke diola numndaŋ bɛɛleŋ.” Ŋ nɔla miŋ tosa wallo i kpeŋgi nɛi choo le diola Mɛlɛkalaŋ bɛɛleŋ kioo, nduyɛ miŋ tosa mi waŋnda sina laŋ. Te ŋ tosa lende pɛ, ŋ nɔla miŋ naŋnuŋ Mɛlɛka ikɛi kpɛɛluŋ.—Maatiu 6:9, NW.
Baabuiyo chɔm maa, Mɛlɛka yɔŋgu nile yaŋaale teŋgeŋndeŋ o “wanaa loonuŋ a diola ndɔlaŋ nda lo.” (Malakai 3:16, NW) Mi Chɛhowa mɛi lediom le wana koŋ aa, “I cho ndu manda le mɛɛ o sina diola nilaŋ yɛ. O cho ya veelu, nduyɛ mi tuei ndu diom. I cho wa a ndu latulu teleŋ o cho wa o nyɛpalaa bɛŋgu wo.” (Chondei 91:14, 15, NW) Te ŋ yeema pɛ miŋ tuei chaŋyɛi kpɛɛluŋnde yeela a Chɛhowa, ŋ nɔ miŋ sina diola ndɔlaŋ, nduyɛ miŋ soliŋ ndaŋ kpeku.
^ pɛl. 4 Icho suɛi imɔnɔ le sinaa maa wanaa hiviaa Baabuiya tau faŋa diola Mɛlɛkalaŋ o Baabuiyo niŋ, mi che bɛɛ la cho o fondalaŋ tau o yaula maHibuluilaŋ niŋ, la nda veelu o puuluei niŋ hau aa, “Old Testament” ndo. Kɛ a koŋ fau, ma soliŋ diomnda cheleŋ kpeku mɛɛ “Masanɔɔ” ɔɔ “Mɛlɛka” cho naa yɛ, le sɔŋgɔ diola ndɔlaŋ. Le chɔɔloo sinaa a hei okɔɔ, tofa pei 195-197 o yauwo hoo niŋ, Yɛɛ kpeekpei Baabuiyo Pɛɛku Yɛ? Seiyaa Chɛhowaa soli ndu ni.
Naapum a Yeema Dɔɔ Vɛlɛ
BANDU MƐŊGƐLAA
A Cho pa Suukaŋndo a Mɛlɛka?
O piɛileŋ niŋ naŋ suukaŋ a Mɛlɛka ni, kɛ vɛɛ naŋ yaŋ yɛ ndu nilaŋ?
