1. Le yɛɛ o bɛnda yɛ miŋ mel Chɛhowa balikaa?

 “NYƐM kɛndɛ kɛndɛŋ naŋ sɔla woŋ kinɛi” Chɛhowa ke naa muŋ ni. Lelaŋ ŋ nɔ miŋ mel ndu balikaa. (Chem 1:17) Mɛlɛka cho naa mandaa a kaalaa ni. O cho naa biyɔɔ yɛlɛkɛlɛɛ mbo wa bahawɛila naalaŋ ŋdialtaŋ, a la iMɛlɛkayalaŋ kpou solioo. (Chon. 23:1-3, NW) O chɔm maa o tiuba le naa “mandaa a naa kɔlta simulaalaŋ kioo,” o bii fau o teleŋ nyɛpalaa niŋ! (Chon. 46:1, NW) A tonya, ŋ nɔ sabulaŋ tau le chɛlɔɔ a kɔllo kpou nyɛ wana ŋchondu pum poonyiaa wo aa, “La mel Chɛhowa balikaa, kani fondole, o cho wana kɛndɛ. Nduyɛ kaala ndɔɔ cho lefafɛɛŋ.”—Chon. 106:1, NW.

2, 3. (a) Kpundɛla yɛɛ cho yɛ te ŋ chue salala naalaŋ nyɛ sɔvɛ le? (b) Ɔɔ nyuuniaala naŋ cho yaasiaa o buŋgɛi hei niŋndaŋ?

² Le yɛɛ o cho yɛ suɛi sɔvɛ le miŋ soo a balika melaa okɔɔ? Baabuiyo dimi maa o palɛi mɛɛlɛi hei niŋ, wanaa sina ikɛndɛ le wa cho kuiyo lɔɔlɔɔ. (Tim. Diiŋ Ndɔɔ 3:2) Wanaa bɔɔbɔɔ chi salala nda nɔlaŋ nyɛ sɔvɛ le. Nyɛm waŋnda o miiliɔŋndaŋ niŋ cho chɔɔ o chieeŋ leyulaa hoo niŋndo nda cho hau kiltaŋ kɔɔli  ni. Lelaŋ, a nɔ kɔl hiniaa le nyɛm nda nɔ woŋ te. Naa bɛɛ mi kaa waa naa piiliaŋ naa. Maa Isɔluɛiya sindɛ, miŋ kɛɛ balikaa malɔɔ, a kɔl hiniaa nɔɔ le chaŋyɛi sɔvɛi naŋ nɔ a Chɛhowa ve, a salala naŋ sɔla laŋ.—Chon. 106:7, 11-13, NW.

³ Lelaŋ, ŋ yaasiaŋndɔ nyɛ yɔŋnuŋndo te ŋ wa pɛ o nyɛpalaa bɛndoo bɛŋgu. A teleŋnda laŋ, miŋ yiyaŋ maa hei hiou naa mayoomu, okoŋ, miŋ puɛɛnuŋ a tɔnɔla naŋ sɔla laŋ. (Chon. 116:3; NW) Kɛ, vɛɛ naŋ kindiŋ yɛ le balikaa malɔɔ lɔɔlɔɔ? Nduyɛ yɛɛ mala yɛ naa miŋ nɔ yiyaŋ kɛndɔɔ o nyɛpalaa bɛŋgu? Ŋ tofaŋndɔ.

4. Vɛɛ naŋ kindiŋ yɛ le balikaa malɔɔ lɔɔlɔɔ?

⁴ Le miŋ nɔ kɔl balikaa nduyɛ miŋ lo lechoo, mɛɛ miŋ nɔ sina pɛŋgoo nduyɛ miŋ nɔ kɔl hiniaa le salala Chɛhowa ke naalaŋ. Vɛlɛ, miŋ yiyaŋ a kaala kpeekpei o nɔ le naa wo. Mɛɛ wana soliaa ŋchondoo tosa lende, mi sioonde bii ndu a nyɛm kɔndɔfiliŋ bɛndu Chɛhowa toosiaa woŋ.—Nuawɔ Chondei 40:5; 107:43, NW.

5. Tamasi kuɛɛ kiilanɔɔ Pɔɔl kɛsullɛ naa a balika melaa okɔɔ?

⁵ Ŋ nɔla miŋ pɛɛku tau kiilanɔɔ Pɔɔl o ba a balikaa malɔɔ okɔɔ. O kpeekpei niŋ, mbo yiyaŋ o salala ndɔlaŋ choo, nduyɛ lɔɔlɔɔ o wa balikaa malɔɔ a kɔllo kpede. Pɔɔl ndoo sina walaŋ maa “mi ndoo tɛɛmbuu diola Mɛlɛkalaŋ, mbo tuisi buɛiyaa Chiisuaa nyɛpalaa choo, nduyɛ mbo yiou nda.” Kɛ, a sɔɔŋ wɔɔŋ o tosa paandu woŋ kpou, mbo mel Mɛlɛka nda Kiliti balikaa le mɛɛ nda tuinuŋ ndu inyɛi, nduyɛ ma ke ndu wallo tau le tosaa o wali pollo niŋ yɛ. (Nuawɔ Timoti Tasoo 1:12-14, NW.) Mi Pɔɔl hini vɛlɛ kɔl le chaaŋaa nduaa Kilisiɔŋnda, nduyɛ mbo mel Chɛhowa balikaa le kaala kɛndɛla nda nɔlaŋ, a wali kɛndɛ nda wa tosaa wo. (Fil. 1:3-5, 7; Tɛs. Tasoo 1:2, 3) Mɛɛ simulta kala kalaŋ la komal Pɔɔl, mbo mel Chɛhowa balikaa chɔ chɔ le dɛɛniaa o sɔla puaapiliaa nduaa laalaŋnda o ba wo. (Walta Wa. 28:15; Kɔl. Diiŋ Ndɔɔ 7:5-7) Lelaŋ Pɔɔl poonyial Kilisiɔŋnda ni mbo dɛɛniaa nda aa, “La nɔ mi la mel Mɛlɛka balika le nyɛ o tosa le nya wo . . . , mi la dɛɛniaŋ vellaa velle a chondoŋ, mi la saŋgala Mɛlɛka, nduyɛ mi la mel ndu balikaa a chonduŋ cho o yau ndɔɔ niŋndoŋ.”—Kol. 3:15-17, NW.

6. Le yɛɛ kpeekpei ŋ mel lɛ Chɛhowa balikaa?

⁶ Vɛɛ naŋ tuallɛ tamasi Pɔɔllo kɔɔli le kɔl balikaa nɔɔ, nduyɛ miŋ chɔm ndu? Maa Pɔɔl, ŋ nɔ miŋ yiyaŋ yiŋgoloŋ o nyɛ Chɛhowa tosal naa wo choo. (Chon. 116:12, NW) Te a nyuna num pɛ aa, ‘Salala kuɛɛ Chɛhowa dɔu yɛ num ma mel ndu balikaa?’ vɛɛ ŋ cho yɛ muli? A cho chɔm chaŋyɛi sɔvɛ ŋ nɔ nya Chɛhowa tɛɛŋ nde? Ɔɔ malɔɔ haki ŋ sɔla le mɛɛ ŋ dɔu tiindaŋndo o sala soliaŋ Kiliti wo niŋ yɛ? A cho puaapiliaa, a ndepiliaa diolaŋ piɔlɔɔ a wa num machɛlu o teleŋnda nyɛpalaa niŋndaŋ? Chɔm bɛɛ nyɛm cheleŋ kpou, a puɛɛnuŋ wana ŋ kaala mi la chal o nɔɔ niŋndo, ɔɔ chuaa numaa sɔviaa le. Te a chua pɛ teleŋndo ma yiyaŋ yiŋgoloŋ o salala kɛndɛla Finya naa kaalaa Chɛhowa cho naa kioo laŋ choo, a cho chɔɔlu kɔl hiniaa sɔla, nduyɛ hei nyindu num ma mel ndu balikaa lɔɔlɔɔ.—Nuawɔ Chondei 92:1, 2, NW.

7. (a) Le yɛɛ naŋ nɔ yɛ miŋ mal balikaa o piɛileŋ niŋ? (b) Tɔnɔ yɛɛ ŋ sɔla yɛ te a mel Chɛhowa balikaa pɛ o piɛileŋ niŋ?

⁷ Te ŋ kɛsi pɛ yiyaŋ naa a kɔl naa kpou o salala naalaŋ choo, ŋ wa lɔɔlɔɔ a toosiaŋ le miŋ mel Chɛhowa balikaa o piɛileŋ  niŋ. (Chon. 95:2; 100:4, 5, NW) Wanaa bɔɔbɔɔ che piɛileŋ maa nɛiyo cho koŋ ni le Chɛhowa nyunaa le nyɔɔŋ. Kɛ, naa naa, ŋ sina niŋ maa mi Chɛhowa naŋ kɔl te ŋ mel ndu balikaa le nyɛm naŋ nɔ woŋ pɛ. Tamasilaŋ la cho o Baabuiyo niŋ tau a wanaa mal balikaa o piɛileŋ niŋ a kɔl ndaa kpou wa. Mɛɛ Hana nda Hɛsikaya cho naa yɛ. (Sam. Tasoo 2:1-10; Ais. 38:9-20, NW) Lelaŋ, la tol tamasila wanaa laalaŋnda haa kɔɔli. Mel Chɛhowa balikaa o piɛileŋ niŋ le salala ŋ nɔ laŋ. (Tɛs. Tasoo 5:17, 18) Tɔnɔlaŋ la cho puɛɛ le hei tosaa. A cho chɔɔlu yoomuaŋ sɔla, ma kaala Chɛhowa, nduyɛ ma chɔɔlu ndu sɔɔŋguu ikɛi kpɛɛluŋ.—Chem. 4:8.

8. Yɛɛ tosa miŋ kɛɛ kɛndɛi sinaa le nyɛ o nyɛ Chɛhowa tosal naa?

⁸ Le yɛɛ naŋ nɔ yɛ miŋ wa yekeŋ le kiɔɔ balikaa chɔmndo le kɛndɛi Chɛhowɛi? Kanifuule, wanaa lahakiaa naŋ cho ni, nduyɛ miŋ yiyaŋ le kiɔɔ kɛndɛi sinaa. Tofawɔ, mi Mɛlɛka ke finya naa a kala naa mamaa, Adama nda Ifi, kpele hɛnɛkiɔɔ Idɛŋ. Ma sɔla nyɛ o nyɛ ndaa yeema, nduyɛ ndaa nɔ dioo le waa achal lefafɛɛŋ o kɔl nyuloo niŋ. (Kan Ch. 1:28) Kɛ a hini kɔl a salala nda sɔla laŋ te. Ma luɛi hɔlteŋ le chɔɔloo sɔlaa ɛ. Nduyɛ fulamakɔɔlioo wa ni, mi nyɛ o nyɛ ndaa nɔ hialuŋ nda. (Kan Ch. 3:6, 7, 17-19) Le mɛɛ naŋ cho o chieeŋ nɔ hoo balika le wo niŋ yɛ, mi naa bɛɛ kandu pɛɛsaa nyɛm Chɛhowa tosal naa woŋ kpou. Okoŋ, miŋ kandu chaŋyɛi nɛi chuaa a Mɛlɛka nyɛ taaniŋ. Lepum, miŋ kɛɛ kɔl hiniaa chɔmndo le dikeŋnaŋ naŋ nɔ le waa puaapiliaa naa tɛɛŋ chieeŋndo balɔɔ silɔ wo. Miŋ luei vɛlɛ balaŋ le nyɛm kiɔɔŋ chieeŋ cho suŋ hunɔɔ tambei sɔla wo nuuviaa. (Chɔŋ Tasoo 2:15-17) Le kiɔɔ nɛi waa naa tolɔɔ kɔɔli, mɛɛ miŋ wa yiyaŋndo yiŋgoloŋ o salala naalaŋ choo, nduyɛ miŋ wa Chɛhowa balikaa mello lɔɔlɔɔ le di naŋ sɔla le waa wanaa ndɔ wo.—Nuawɔ Chondei 27:4, NW.

9. Le yɛɛ naŋ nɔ yɛ miŋ yiyaŋ o salala naalaŋ choo te nyɛpalaa wɔɔŋ wɔɔŋndo komal naa pɛ?

⁹ Kɔl balikaa nɔɔ mala naa miŋ biunuŋ nyɛpalaa wɔɔŋ wɔɔŋndo. Lepum, mi nyɛpalaa woolu naa o yoomoo niŋ, sondo suaa bɛɛ ŋ nɔ ndu le. Mɛɛ wana nya cho o nɔɔ niŋndo kiɔɔ num cho naa yɛ, naa ŋkɔŋyaa, te wana naŋ kaala wo vi pɛ, ɔɔ te kpundɛ wɔɔŋ wɔɔŋndo yɔŋnuŋ pɛ.  O teleŋnda waa naa bɛŋgu, ŋ nɔla miŋ sɔla kɔl dɛɛniaa a kɔl sikpaa, te o wa pɛ miŋ yiyaŋ o salala naalaŋ choo. Ŋ yaasiaŋndɔ sɔɔŋ yɔŋnuŋ waŋnda apum ndoŋ.

10. Vɛɛ Ilina ndoo sɔla yɛ tɔnɔɔ mɛɛ o yiyaŋ o salala ndɔlaŋ choo?

¹⁰ Mi kɔɔfanɔ lɔɔlɔɔ wo Amɛlika Baluaŋndo diolaŋ Ilina a, chal o nɔɔ bɛndu kundaa o ba. Kɛ mi pɔnɔ ndɔ kɛɛ ndu a chuauwa. Yɛɛ ndoo mala yɛ Ilina le Chɛhowa piɛiyo a laalaŋndo? Mbo dimi aa, “I mel Chɛhowa balika le mɛɛ o cho ya mandaa yɛ. Yiyaŋndo o salala nilaŋ choo lepaa o lepaa mala ya ni mi cha kpendekele maa, Finya mandaa o choo choo niŋ sina ya, nduyɛ o kaala ya. I sina maa pɛ pɛ bɛɛ o mel la le.” Mi che bɛɛ naa mi Ilina sɔla nyɛpalaa tau o yoomu ndɔɔ niŋ, kɛ mi nyaale ndɔɔ hiau lachi a ndu malaa, nduyɛ tamasi ndɔɔ cho acheleŋnda dɛɛniaa.

11. Yɛɛ mala yɛ Kiyɔŋ-suku le mbo biunuŋ naa ŋkɔŋyaa?

¹¹ Mi Kiyɔŋ-suku, o cho o lɛŋnde Eesiaaleŋ niŋndo tosa kɔɔfaleŋ nda pɔnɔ ndɔ le wɔsioŋ 20. Mɛɛ nda saaluŋ ndu pauwo o yemndoŋ niŋ ma dimul ndu maa o cho niŋ achal le paŋgoŋ ŋɔmpum, mbo woolu wawa. Mi che bɛɛ naa ndu nda pɔnɔ ndɔ sɔla niŋ nyɛpalaa suu o suu, kɛ buulaŋ ve nda a kɛndiaa ndaa okɔɔ le. Mbo dimi aa, “Naa nda saaluŋ ya hoo wo tɛɛmbuu ya bɔɔ kɔllo. Mi yiyaŋ maa I nii chuu, nduyɛ sioonde wa ya bɔɔ.” Yɛɛ ndoo mala yɛ Kiyɔŋ-suku mbo biunuŋ? Mbo dimi aa, “Chɔŋ a paale leŋ, ichɔl o ichɔl tuupa mi lɔl, mɛɛ mi hel o naa pɛŋgiaa o chiɛi naa le mi piɛi kpeleŋ o Chɛhowa lo le ndu balikaa mello le nyɔɔŋ sala ŋuɛɛnu. Okoŋ mi kɔllo hini ya fɛɛ, nduyɛ mi hei nyindu ya le kaala nuu chɔmndo o Chɛhowa lo.” Vɛɛ Kiyɔŋ-suku sɔla yɛ tɔnɔɔ o piɛile ichɔlteŋ ndeŋ niŋ? Mbo dimi aa, “Hei mala ya mi sina maa mi Chɛhowa mala naa le miŋ biunuŋ teleŋnda nyɛpalaa, nduyɛ salala naŋ sɔla o yoomu naa niŋndaŋ la hiou poloŋ a nyɛpalaa.”

12. Vɛɛ Chasiŋ ndoo sɔla yɛ kɔl dɛɛniaa mɛɛ laa ndɔ vi?

¹² Chasiŋ cho baalaa o lɛuve o Afilika niŋ. O cho o wali lɔɔlɔɔ Mɛlɛkaa niŋ o hiou niŋ wɔsioŋ 30. Mbo dimi aa, “Laa nuu vi niŋ le wɔsioŋ ŋɔmmɛu, nduyɛ hei tɛɛmbuu wana kɔllo tau. Te I wa pɛ yiyaŋndo mɛɛ o saŋga teleŋ o wa naa pauwo chɔulabaa wo, mi kɔllo chɔɔlu ya tambu tau.” Yɛɛ mala yɛ Chasiŋ le mbo biunuŋ? Mbo dimi aa, “Lepum, mi yaa yiyaŋ a teleŋ kɛndɛ ya tosa naa laa nuu latulu wo, nduyɛ mi yaa mel Chɛhowa balikaa o piɛileŋ niŋ le yiyaŋndo a hei okɔɔ. Mi kɔllo hini ya, okoŋ, mi kandu Chɛhowa balikaa mello lɔɔlɔɔ le yiyaŋnda kɔl kɛndɛ waa naa nɔɔ. Kɔl hiniaa nɔɔ siŋga yoomu nuu ni. Suŋ suŋ bɛɛ mɔnɛi piɔm ndɔɔ cho wɔ ya paaliaŋndo. Kɛ I cho Chɛhowa balikaa mello le mɛɛ o ke ya nɔ kɛndɔɔ yɛ. Mi di ya sɔla le ndu piɛiyo naa wana kaala ndu a kɔllo kpou wo bɛɛ mala ya tau.”

13. Yɛɛ mala yɛ Shɛlil teleŋ hueiyii wɔɔŋ wɔɔŋnde dii wanaa bɔɔbɔɔ o yuŋgu ndɔɔ niŋndo?

¹³ Mɛɛ hueiyii bɛnduei diolaŋ “Haiyan” hɔŋ o lɛŋnde Filipiŋndeŋ niŋ o wɔsi 2013 mɛɛlulaŋ, mi nyɛ o nyɛ Shɛlil ndoo nɔ tambu. A teleŋ koŋ wɔsilaŋ 13 kinɛi o wa ni. Mbo dimi aa, “Mi chiɛi nuu tambu, nduyɛ mi wanaa bɔɔbɔɔ o yuŋgu nuu niŋ sɔla piɔmndo.” Finya ndɔ, kala ndɔ, yeema ndɔ, a pɔmbuaa nduaa ŋiɔɔŋnda hueiyii bɛnduii keŋ dii ni. Yɛɛ mala yɛ Shɛlil mbo biunuŋ nyɛpalaa koŋ o hiu kɔl tambu le? Kɔl balika melaa o nɔ wo, a kɔl o handu o salala o nɔ laŋ choo wo. “Mi cha nyɛ o nyɛ  puaapiliaa a ndepiliaa tosa le wanaa wa o bahawɛiyo niŋnda malaa a nda dɛɛniaa wo. Mi sina maa puaapiliaa chieeŋndo balɔɔ silɔ wa piɛileŋ le ya.” Mbo chɔɔlu dimi aa, “I naŋ bɔɔ kɔl le mɛɛ Chɛhowa cho Mɛlɛka nuu yɛ. O cho naa kioo lɔɔlɔɔ nyɛm naŋ hau ba woŋ.” Tonya, kɔllo handɔɔ o salala naalaŋ choo tosa ni kɔl tambɛiyo mil naa le. Nduyɛ, kɔl balikaa nɔɔ mala naa miŋ hiou lachi a nyɛpalaa suu o suu komal naa biuwɔŋndo.—Ɛfi. 5:20; nuawɔ Filipiaŋnda 4:6, 7.

14. Suɛi kɔl kɛndɛ kuɛɛ cho yɛ naa chumndo? (Tofa fotueiyo o peele naŋ kandu leŋ choo.)

¹⁴ Kani masindɛ, mi wanaa Chɛhowaa dɔunuŋ nyaale le salala nda nɔlaŋ. Le tamaseliiyo, mɛɛ Isɔluɛiya sɔla pioŋɔɔ Felo nda puaa nduaa chɔuwa o ba o Pee Mɛŋma Siaŋaa, ma saŋgala Mɛlɛka, ma mel ndu balikaa a chondoŋ. (Ɛs. 15:1-21) Hau bɛɛ, o salala naŋ nɔlaŋ tɛɛŋ, ŋ nɔ tiindaŋndo le pioŋɔɔ o nyɛ o nyɛ nɛiyaa niŋ a kɔl tambɛiyo. (Chon. 37:9-11; Ais. 25:8; 33:24, NW) Yiyaŋndɔ mɛɛ kɔllo naŋ niŋ naa yɛ, te Chɛhowa tɛɛmbuu pɛ yaamɔɔwaa nduaa kpou, mbo luei naa o chieeŋ sɛnɛi nɔ niŋ kɔl nyuloo a sandeiyo niŋ. Nuawɔ paale balika melaa se!—Chɔɔmɔŋndo 20:1-3; 21:3, 4.

15. Yɛɛ ŋ tuu yɛ le tosaa o wɔsioo hoo niŋ?

¹⁵ Ŋ yeema mi Chɛhowa dɔu naa sala tau o wɔsioo hoo niŋ le hɛnaŋ ndɔɔ tosaa. Kɛ, simultaŋ lapum la cho naa komal. Kɛ o kɛ kɛ komal naa pɛ, ŋ sina maa Chɛhowa mel naa le. (Dut. 31:8; Chon. 9:9, 10, NW) O cho naa wa kioo nyɛ o nyɛ naŋ yeema le ndu piɛiyo o laalaŋndo choo. Lelaŋ, maa ŋ nɔŋnuŋ kɔllo sikpa maa wana ndoo suaa le Mɛlɛka wo, Habakɔɔ. Mbo dimi aa, “A yɔŋ bɛɛ mi fikiiyaŋ ma ve lɛ komɔɔ le, ɔɔ kilepiiyaŋ ma pɛŋgi komɔɔ, a yɔŋ bɛɛ mi yɔmii ɔlifiiye i ve lɛ komɔɔ le, nduyɛ, mi nyɛ o nyɛ ve lɛ naŋɔɔ o chiɔɔŋ niŋ te, saa chuu bɛɛ kpou, kɛlɛŋgaa mi chɔlu o chɔlu ve le o naa mandaa la chɔluaa le, I wa a nyaaloo a Mɛlɛka Chɛhowa, I wa a kɔl kɛndɛ a Mɛlɛka kiindiaa ya wo.” (Hab. 3:17, 18, NW) Lelaŋ, tei mi wɔsioo hoo chuu, maa ŋ waŋnuŋ yiyaŋndo o salala naalaŋ choo miŋ dɔunuŋ nyaale. Nduyɛ, miŋ hiou lachi a tosaa sila bolle Baabuileŋ le wɔsioo hoo ke naa wo. “La mel Chɛhowa balikaa, kani fondole, o cho wana kɛndɛ.”—Chon. 106:1, NW.