Baa diɔmnde i cho ni le yiyaŋndo maa wanaa vi wa cho miiŋgu yoomu? Kiilanɔɔ Pɔɔl ndoo yiyaŋ lende le. Mi Mɛlɛka dimul ndu le mbo poonyiaa aa, “Te o wa pɛ maa le yoomoo lɛŋ naŋ kinɛi naŋ dɔu tiindaŋndo o Kiliti niŋ ni, mɛɛ naa mɔnɛi i hiau niŋ biyɔɔ a wana o wana. Kɛ, i cho tonya maa Kiliti miiŋgu yoomu, kɔmnde taseleŋ le wana o wana vi.” (Kɔliŋtiaŋ Tasoo 15:19, 20, NW) Nyɛ kpeekpeiyo Pɔɔl ndoo che fulasɛiniŋndo ni. Fulasɛiniŋ Chiisoo ke naa tiindaŋndo ni maa nyɛ kpeekpeiyo fulasɛiniŋndo cho ni. * (Walta Wanaa Chiisuaa 17:31) Le sabu koŋ Pɔɔl veelu Chiisu ni maa “kɔmnde taseleŋ.” Kanifuule, ndu fɛŋ sɔla fulasɛiniŋndo le yoomu fafɛɛŋndo sɔlaa. Te Chiisu wa pɛ wana tasoo, mɛɛ acheleŋnda bɛɛ cho fulasɛiniŋndo sɔla.

Mi che vɛlɛ sabu cheleŋ le tiindaŋ numndo dɔuwɔɔ o fulasɛiniŋndo niŋ. Mɛlɛka tonyaa Chɛhowa cho ni. O dimi lachoo le. (Taitɔɔ 1:2) Kani bɛɛ Chɛhowa dimi wɔ lachoo le, nduyɛ fɛɛŋ bɛɛ o dimi niŋ lachoo le. Chɛhowa ke naa pa tiindaŋ fulasɛiniŋndo, mbo chɔm mɛɛ o cho hei tosa yɛ, okoŋ mbo simnuŋ choolaŋ? Keŋ yɔŋnuŋ te!

Le yɛɛ Chɛhowa kɛɛsiaa yɛ fulasɛiniŋndo o chilaŋ niŋ? Le mɛɛ o nɔ kaalaa yɛ. Mi Choobu nyuna aa, “Te wana chioo vi niŋ pɛ baa o miiŋgu lɛ pa yoomu? I sina maa o wa niŋ o lepaa niŋ mi kɔllo del num o ya lo. O koŋ, ma veelu ya mi muli num diom.” (Choobu 14:14, 15, naapila piimiaa ndu diki diki ni) Choobu ndoo nɔ tiindaŋndo maa Finya ndɔ kaalaa o choo choo niŋ nɔ yeemɛi le ndu miŋgioo yoomu. Baa Mɛlɛka siŋgaŋ pa? “Ya cho Mɛlɛka Yaawɛɛ ni, . . . Mɛlɛka feŋaŋ o diom ndɔɔ choo le wo.” (Malakai 3:6) Mɛlɛka nɔ yeemɛi kɛ le waŋvilɛiya miŋgioo yoomu ma wa kɛndiaa nduyɛ a nyaale. Hei finya kaalaa kɛ kɛ yeema ni le chua ndɔ vi wo chɔɔ vɛlɛ yoomu. Kɛ teŋgeŋndo cho ni maa Chɛhowa ndu ndu nɔ kpaayaa le tosaa nyɛ o yeema wo.—Sam 135:6.

 Waŋnda apum bii niŋ mɔnɛi le mɛɛ wanaa nda kaala wa vi yɛ. Kɛ Chɛhowa cho Po ndɔɔ kpaayaa ke le mbo chuu waŋnda haa nyaale hiuwaŋ mɛŋndo. Vɛɛ Chiisu yiyaŋ yɛ a fulasɛiniŋndo okɔɔ? Tuupa mbo miŋgi Lasalɔɔ yoomu, mbo cha yemaa Lasalɔɔ wa, a chaaŋaa nduaa mɔnɛi biyɔɔ, nduyɛ ‘mi mɛmiaŋ ma tual ndu kpasu kpasu.’ (Chɔŋ 11:35) A teleŋ pilɛ vɛlɛ, mi Chiisu komal chua vii pɔnɔɔ wo o chioo Neŋ. Mi pole pilɛ le chuaa hoo le wu. Mɛɛ Chiisu che ndu, “mi nyiɛɛye bii ndu tau le ndu.” Mbo dimul ndu aa, “Mei chaŋndo.” O foofo koŋ choo o miŋgi po ndɔɔ yoomu ni. (Luku 7:13) Lelaŋ, nyɛiye pila bii Chiisu ni te waŋndo vi pɛ mi waŋnda wa mɔnɛi biyɔɔ. Nuawɔ se mɛɛ Chiisu wa niŋ a kɔlkɛndɛ yɛ te o huŋ miŋgi pɛ mɔnɛi o nyaaloo chieeŋndo balɔɔ silɔ!

Kani bɛɛ suɛi imɔnɛi komal num niŋ pa? Ma yiyaŋ maa naa nɔ makoŋgo loo piɔmndo cho ni. Kɛ o nɔ koowaŋ. Maŋ ma cho ni, Mɛlɛka cho hunɔɔ Po ndɔɔ kpeku soliŋ le waŋvilɛiya solioo o sɛilaŋ niŋ. Loonuŋ maa Mɛlɛka yeema num ma che mɛɛ o cho keŋ tosa yɛ. O yeema num ma wa loŋ le ma demul vɛlɛ wanaa numaa kaalaa. Yiyaŋndɔ mɛɛ nya wa niŋ tuulaŋ tosaa diompilɛ le chila fafɛɛŋ ndaŋ yɛ! Fɛɛŋ fɛɛŋ bɛɛ wana dimi lɛ niŋ naa aa idiiyoo le.

Mi Lioonɛɛ naŋ soo a ndu okɔɔ wo loonuŋ a nyɛ yɔŋnuŋ ndu paandu wo okɔɔ, mbo dimi aa, “Suŋ suŋ ya pɛɛku niŋ a fulasɛiniŋndo okɔɔ ni. O tase ndɔɔ, i wa ya ikala o ba kpoke le laalaŋndo. Nduyɛ wana o wana ndoo dimulla pɛ a ndi okɔɔ, I laalaŋ ndu le. Kɛ, I nua o Baabuiyo niŋ mi saaluŋ maa tonyaa i cho ni! Yeemɛi cho ya tau le chɔɔ vɛlɛ finya ni mamaa.”

A yeema ma chɔɔlu sina? Seiyaa Chɛhowaa wa a kɔl kɛndɛ tau le num chɔmndo o Baabui numndo niŋ le sabu nda laalaŋ a fulasɛiniŋndo o chilaŋ niŋndo. *