MULI BAABUIYO: “Teleŋ cho fuuluu mi wanaa vilɛiya o sɛila loonaŋ ndaŋ niŋ kpou a tuei diom [Chiisoo] okoŋ, ma fula.”—Chɔŋ 5:28, 29, NW.

Mi Chiisu dimi maa o Masale ndɔleŋ bɛŋgu o chilaŋ niŋ, sɛilaŋ la cho wa fondo. Mi Fanaŋndo naŋ soo a ndu okɔɔ o buŋgɛi naŋ hiou ve niŋndo dimi aa, “Mɛɛ ya nua Chɔŋ 5:28, 29 o tase ndɔ, mi kɔndɔfillo bii ya. Mi bolle Baabuileŋ ndeŋ le ke ya tiindaŋ kpeekpeiyo, nduyɛ mi kandu yiyaŋ kɛndɔɔ nɔɔ a chilaŋ o kɔɔ.”

O sindɔɔ niŋ, mi Choobu ndoo nɔ tiindaŋndo o Mɛlɛka niŋndo wa chumndo maa te o vi pɛ, Mɛlɛka cho ndu miŋgi yoomu. Mi Choobu nyuna aa, “Te wana chioo vi niŋ pɛ baa o miiŋgu lɛ pa yoomu?” Mbo muli a tiindaŋndo aa, “Mi che bɛɛ mi nyɔɔ wa ya kindilaa, kɛ I cho biunɔŋ mi chum, [“o sɛiyo niŋ,” NW] haaa mbo lo o koŋ mi wana huŋ faŋa ya ndu choo. Mɛlɛka, num toosiaa ya ni. I sina maa o wa niŋ o lepala niŋ mi kɔllo del num o ya lo. O koŋ, ma veelu ya mi muli num diom.”—Choobu 14:14, 15.

Fulasɛiniŋndo ve suɛi sɛnɛi le Mata le, yemaa Lasalɔɔ. Mɛɛ Lasalɔɔ vi, mi Chiisu dimul Mata aa, “Ya cho wana miŋgi waŋnda yoomu wo ni. Nduyɛ, ya tosa ni mi waŋnda a wa yoomu kpeekpei. Wana o wana dɔu tiindaŋ ndɔɔ o ya niŋ pɛ, a yɔŋ bɛɛ mbo vi o cho [“miiŋgu,” NW] yoomu.” (Chɔŋ 11:23-25) Lelaŋ, mi Chiisu tosa mi Lasalɔɔ miiŋgu yoomu chɔ chɔ. Suɛi nyaale ndii yɔŋnɔŋ hei ve chɔm naa mɛɛ fulasɛiniŋndo wa niŋ o chilaŋ niŋ yɛ. Yiyaŋndɔ a mɛɛ fulasɛiniŋnda suu waa naa la yɔŋnuŋ niŋ o chieeŋndo choo silɔ yɛ!

MULI BAABUIYO: Diom Mɛlɛkaa chɔm maa fulasɛiniŋ Chiisoo wa teŋgeŋ a fulasɛiniŋnda ŋɔmaa Baabuiyo soo laŋ. Mi wanaa ŋɔmaa wa haa sɔla fulasɛiniŋndo o lɛŋndeŋ ndeŋ choo. Kɛ Baabuiyo dimi a fulasɛiniŋ Chiisoo aa, “Chiisu . . . hel o Ɛchɛnɛ mbo kɔ wa o fondaŋ lebɛɛ bɛndoo o ba kɛndɛ Mɛlɛkaa choo.” (Pitɛ Tasoo 3:21, 22) Baa Chiisu koni sɔla fulasɛiniŋndo le kɔlaŋ o choo choo niŋ ni? Mi Chiisu dimul buɛiyaa nduaa o tase ndɔ aa, “Nduyɛ, te I kɔ chii yiyalaŋ bɛɛndiaa pɛ, I cho miiŋgu mi I huŋ kɔ a nya le mi ŋ wa naa nyaa naa ya I wa niŋ nda.”—Chɔŋ 14:3.

Mi Chiisu miiŋgu o choo choo niŋ, nduyɛ mbo kɔ bɛɛndiaa fondaa le buɛiyaa nduaa apum. Waŋnda 144,000 cho fulasɛiniŋndo sɔla ni le kɔlaŋ o choo choo niŋ. (Sɔɔŋ Chɔɔmaŋndoŋ 14:1, 3) Kɛ, yɛɛ buɛiyaa Chiisuaa haa cho yɛ lakɔ tosa loŋ?

 A cho wa wallo kekelee! Baabuiyo dimul naa aa, “Wanaa wa niŋ o kunda tase koŋ niŋ mi Mɛlɛka miŋgi nda yoomu wa, a pɛl tɔnɔɔ. Nduyɛ, le Mɛlɛka nda cho niŋ ni. Nduyɛ nda nda, piɔm diiŋ ndɔ waŋnda sɔla niŋ ndo, o nɔla nda nyɛ o nyɛ yɔŋ te. Mɛlɛka nda Kiliti, wanaa ndaa soliaa lasalaa nda wa niŋ ni. A cho wa lamasa nda Kiliti waa le wɔsilaŋ waa o pilɛ.” (Sɔɔŋ Chɔɔmaŋndoŋ 20:6) Wanaa cho haa sɔla fulasɛiniŋndo le waa o choo choo niŋnda cho wa masaa soliaa salaa nda Kiliti waa o lɛŋndeŋ choo.

MULI BAABUIYO: Baabuiyo soo a suɛi kiilanɔɔ Pɔɔl ndoo yɔŋgu ve aa, “Waŋnda haa cho lehɔl o nɛi maa wana o wana vi, a cho vɛlɛ miiŋgu yoomu, wanaa sandu wa, a wanaa sendu le wa.”—Walta Wanaa Chiisuaa 24:15.

Nɛɛ yaa cho yɛ wa “wanaa sandu” wa a Pɔɔl soo haa a nda okɔɔ wa? Nuawɔ tamaseliiyo hoo. Mi Mɛlɛka dimul Daaniɛɛ ndoo lo o tiindaŋ ndɔɔ choo haaa wo aa, “A cho hunɔɔ wu. Kɛ te palɛi le chieeŋndo i huŋ fuuluu pɛ, a cho miiŋgu yoomu nduyɛ ma sɔla fonda cho le numndo.” (Daaniɛɛ 12:13) Kuɛɛ Daaniɛɛ cho yɛ tiondɔɔ o lɔma piɔmndaŋ? “Wanaa cho sakpo Mɛlɛka o hɔl la nda, a cho wa o lɛŋnde Mɛlɛka chua buŋgɛi leŋ niŋ le fɛɛŋ a fɛɛŋ.” (Sam 37:29) Mi Chiisu dimi aa, “Nyaaloo cho le wanaa cho mɔɔsɔlɔɔ wa. Kanifuule, Mɛlɛka cho nda lɛŋndeŋ ke.” (Maatiu 5:5, NW) Daaniɛɛ, a wanaa laalaŋaa cheleŋ cho fulasɛiniŋndo sɔla le waa o lɛŋndeŋ choo vɛlɛ lefafɛɛŋ.

Nɛɛ yaa cho yɛ wa “wanaa sendu” le wa a Pɔɔl soo haa a nda okɔɔ wa? Nda cho wanaa sina tonya cho o Baabuiyo niŋ te wa ni. Waŋnda haa cho o biiliɔŋndaŋ niŋ. Nduyɛ a wa yoomu ma wu. Nda bɛɛ nɔ le hunɔɔ fulasɛiniŋndo sɔlaa ma pɛɛku le Chɛhowa * sinaa a Chiisu. (Chɔŋ 17:3) Wanaa hɛli le Mɛlɛka piɛiyo wa kpou cho wa achal lefafɛɛŋ mɛɛ Chɛhowa pila bɛɛ cho achal le fɛɛŋ a fɛɛŋ yɛ.

MULI BAABUIYO: Mɛlɛka “o cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa, kani fuule, nyɛ o nyɛ paandu chuu faŋaŋ.” (Sɔɔŋ Chɔɔmaŋndoŋ 21:4) “Waŋnda a taŋgul niŋ chiɛila ndalaŋ . . . mi nda pila waŋnuŋ o chiɛila ndalaŋ niŋ. A tosa niŋ kpelela ndala makilepiilaŋ, ma de kilepiima ndaŋ.”—Aisaya 65:21.

Nuawɔ teleŋ kɛndɛ bɛndu le waa latulu a wanaa num aa kaalaa sɔla fulasɛiniŋndo wa! Kɛ nyunaa cho niŋ hoo ni, Vɛɛ ŋ looku yɛ niŋ sina maa fulasɛiniŋndo cho yɔŋnɔŋ?