WANAA bɔɔbɔɔ sina maa Chiisu ndoo nɔ kiilaa 12. Kɛ lepum, a sina maa waŋ laanduaa bɛɛ wa buɛiyaa nduaa le, a ndaa wa ndu machɛlu kpɛɛluŋ nda. Nduyɛ Chohana wa waŋndo opilɛ o waŋ laanduaa kaŋ tɛɛŋ.—Maa. 27:55; Luku 8:3.

Yɛɛ Chohana ndoo tosa yɛ o wali poli Chiisoo niŋ, nduyɛ yɛɛ tamasi ndɔɔ pɛɛku yɛ naa?

Lanɔɔ Chuusa Chohana wa ni, “po ndu oo manda nyɛm Masaa Hɛlɔɔ woŋ ndo.” Kɛlɛŋgaa ndu wa nyɛm Hɛlɔɔ Aŋtipaa woŋ kpou bolleŋ ni. Chohana wa waŋndo opilɛ o waŋ laanduaa Chiisu chiɔuwa tɛɛŋ. Chohana, a waŋ laanduaa cheleŋnda wa Chiisu balɔɔ kɔɔli a buɛiyaa nduaa latulu.—Luku 8:1-3.

Mi Chuuwaa ndaa pɛɛku waŋnda a sawala Mɛlɛkalaŋ okɔɔ wa yiyaŋ maa waŋ laanduaa nɔ ma tosa chaŋyɛi a waŋ piaanduaa cho wanayaŋ nda le wa le, kɛlɛŋgaa niŋ te ma kuɛ kelaa a nda. Waŋ piaanduaa maChuuwa ndaa nɔ pɛŋ ma hiu isɔɔ a waŋ laanduaa le. Mi Chiisu kɛsi naamula ndalaŋ ikɛi, okoŋ, mbo chɛl Chohana a waŋ laanduaa laalaŋaa cheleŋnda le nda liilaa.

Chohana ndoo sina maa o cho simnɔŋ wana fondoo fuu sim lachiaa lepiɛiya tɛɛŋ, yuŋgu ndɔɔ, a chaŋyaŋ ndɔŋ le mɛɛ o tosa chaŋyɛi a Chiisu nda buɛiyaa nduaa yɛ. Wanaa ndaa tol Chiisu kɔɔli wa kpou ndaa nɔ ma tosa yɛlɛmiaalaŋ o yoomu ndaa niŋ lepaa o lepaa. Mi Chiisu dimi a wanaa tol ndu haa kɔɔli wa aa, “Wanaa tuei diom Mɛlɛkaa, nduyɛ ma tosa nyɛ o dimi wo wa, nda cho kalaa niaa ni. Nduyɛ, nda cho pɔmbuaa niaa ni.” (Luku 8:19-21; 18:28-30) Baa a sɔla kɔl dɛɛniaa le sinaa maa Chiisu nɔ chaŋyɛi kpɛɛluŋnde a wanaa soliŋ sala le ndu tolɔɔ kɔɔli wa le?

Chohana a waŋ laanduaa cheleŋnda wa Chiisu a buɛiyaa nduaa tɔ a ŋiɔɔŋnda “malaa a nyɛ o nyɛ fee ni.” (Luku 8:3) Mi wana poonyiaa pilɛ dimi aa, “O cho dimul te Luku wa waŋnda maa mi waŋ laanduaa haa yau nyɛdiaa, ma tuei hɛŋgɛilaŋ, nduyɛ ma bɛɛndiaa nyɛla ndalaŋ te. Kɛlɛŋgaa mi ndaa tosa hei . . . , kɛ Luku dounuŋ keŋ kona le.” Naapum, mi waŋ laanduaa haa ndaa soliŋ kanniŋ ndaŋ, ɔɔ nyɛmkɛŋ ndaŋ kpeku le chaaŋaa ndaa malaa.

Chiisu nda kiilaa nduaa luei laba o wali cheleŋ tosaa niŋ teleŋ nda wa yooŋgu kɛndɔɔ balɔɔ dimioo wo le. Kɛlɛŋgaa ndaa nɔ ikani le nyɛdiaa a nyɛm cheleŋ ndaa hau ba woŋ piondɔɔ le ŋwaŋ 20 te. Mi che bɛɛ naa mi waŋnda tosal Chiisu nda kiilaa nduaa kɛndɛi, kɛ ndaa nɔ kɔfu “kɛsiaa ŋkanioo.” Koŋ chɔm  ni maa, o cho ko waŋnda le ndaa tiindaŋ le nda kɛndɛi tosallo le. (Chɔŋ 12:6; 13:28, 29) Mi Chohana nda waŋ laanduaa cheleŋnda ndaa chuuŋgiaa nyɛsɔlaa le babawɛila cheleŋndaŋ solioo.

Apum sɛɛŋgiaa maa wana lanɔ Chuunɔɔ ndoo nɔla nyɛ sɔla a ba ndɔ le. Kɛ yaula nda poonyiaa a teleŋ koŋ ndaŋ la chɔm maa, wana lanɔ Chuunɔɔ ndoo sɔla nyɛmkiɔŋ o nɛilaŋ ndaŋ niŋ, (1) nyɛmkɛŋ finya ndɔ mɛi yoŋ te o vilu wana pɔnɔ le, (2) nyɛmkɛŋ nda ke ndu woŋ, (3) kaniŋ o nɔ kuee mbo sɔla woŋ te o yɔŋ pɛ mi pɔnɔ ndɔ kɛɛ ndu, (4) nyɛmkɛŋ pɔnɔ ndɔ mɛi yoŋ, ɔɔ (5) nyɛmkɛŋ o sɔla a ba ndɔ woŋ.

A tonya, mi buɛiyaa Chiisuaa chuuŋgiaa o ndaa tiuba le sɔlaa wo. Waŋ laanduaa ndaa nɔ nyɛsɔlaa wa wa o buɛiyaa nduaa haa tɛɛŋ. Mi waŋnda apum dimi maa Chohana ndoo nɔ nyɛsɔlaa, kanifuule, lanɔɔ po ndoo manda nyɛm Masaa Hɛlɔɔ woŋ ndo o wa ni. Kɛlɛŋgaa wana lanɔ cheleŋ maa ndu ke Chiisu doma baa kala ndoo wounuŋ ndo ni. Mi wana poonyiaa pilɛ dimi a doma koŋ okɔɔ maa, “laanduaa wanaa yɔɔyaa ndaa nɔla doma koŋ sɔla le.”—Chɔŋ 19:23, 24.

Baabuiyo dimi kpeekpei naa maa mi Chohana yɔŋgu toolu ŋkanioo le. Kɛ mbo tosa nyɛ o tiuba wo. Nduyɛ, ŋ nɔla miŋ pɛɛku tamaseliiyo o hei niŋ. Ŋ yɔŋgu tooloo le wali leMasa Mɛlɛkaa hivioo lachi, ŋ yɔŋgu le, o lo a naa. Nyɛ Mɛlɛka yeema kinɛiyo cho ni, le miŋ tosa nyɛ naŋ tiuba wo a kɔl kɛndɛ.—Maa. 6:33; Maki 14:8; 2 Kɔliŋ. 9:7.

O kpeekpei niŋ, Chohana a waŋ laanduaa cheleŋnda wa o hɔlndɔ teleŋ nda dii Chiisu wo. “Waŋ laanduaa haa nda wa Chiisu kɔɔli ni mi nda aa mala ndu a nyɛ o nyɛ ndu oo hau ba lɔɔ o wa o lɛŋnde Kalilileŋ niŋ ndo. Waŋ laanduaa cheleŋ a hiŋ hɔlaa tulu a ndu Chulusɛlɛm nda bɛɛ a wa loŋ tau.” (Maki 15:41) Mɛɛ nda faŋa dialuŋ Chiisoŋ o suŋgbule yɔmndo choo le muŋ kumbɔɔ, “waŋ laanduaa chɛŋ Kalili mi nda aa tual Chiisu kɔɔli wa” wa loŋ. Mi waŋ laanduaa haa “cha mɛɛ nda yambu dialuŋ Chiisoŋ” o sɛiyo niŋ yɛ. “O koŋ kɔɔli, ma miiŋgu o chiɛila ndalaŋ. Ma kɔ toofiaa siɛndiima nda suu wanaa vilɛiya waŋ a chuɛima chuŋ kɛndiaŋ le ma huŋ suu o dialuŋ Chiisoŋ.” Waŋ laanduaa Luku wa haa suɛi a nda okɔɔ wa cho, “Meele Maŋgaliŋ ni, a Chohana, a Meele, kalaa Chemisi.” Mɛɛ paale pɛŋgiaale Chuuwa le hiou, ma miiŋgu o la ndalo. Nduyɛ, ma cha maalikɛiyaa dimul nda a fulasɛiniŋ Chiisoo okɔɔ wo.—Luku 23:55–24:10.

I cho tonya maa Chohana wa a buɛiyaa Chiisuaa latulu, kalaa Chiisu, a pɔmbuaa Chiisuaa o Chulusɛlɛm niŋ le bɔŋaŋndo biyɔɔ o paale Pɛŋtikɔɔsi leŋ choo, o wɔsi 33 ve niŋ boondii Chiisu ve. (Walta. 1:12-14) Waŋnda apum dimi maa, Chohana ke Luku yooŋgulaŋ a Hɛlɔɔ Aŋtipaa okɔɔ ni. Kanifuule, pɔnɔ ndɔ wa wallo o chiɛi Hɛlɔɔ wo niŋ. Nduyɛ, Luku koni poonyiaa a Chohana okɔɔ ni.—Luku 8:3; 9:7-9; 23:8-12; 24:10.

Bundɛi Chohana ve pɛɛku naa sɔɔŋ kɛndɔŋ tau. Mbo mala Chiisu a nyɛ o nyɛ fee o tiuba. Kɛlɛŋgaa o wa a kɔl kɛndɛ tau le mɛɛ kaniŋ ndɔŋ mala Chiisu, kiilaa nduaa tɔ a ŋiɔɔŋnda, a buɛiyaa nduaa cheleŋnda, le kɔlaŋ yooŋgu kɛndɔɔ dimioo diompilɛ yɛ. Mi Chohana mala Chiisu, nduyɛ mbo lo ndu kɔɔli tei ma dii ndu. Waŋ laanduaa Kilisiɔŋnda nɔ ma tol kaa iMɛlɛkaya Chohana wo kɔɔli.