Baa kaamaa bii num niŋ pa te yoomu cheleŋ cho pɛ o hoo kɔɔli, ɔɔ le pisultaŋ, wallo, challe o nɔɔ, chuauwa mandaa, nduyɛ miŋ yuuwa ko naŋ cho achal ni? (Choobu 14:1, 2) Baabuiyo chɔm maa, kaamaa bii niŋ wanaa nɔ taasioo wa a hei okɔɔ.—Nuawɔ Ikilisiaatii 2:11.

Baa yoomoo nɔ pa saboo? I tasei peŋ, ŋ nɔ miŋ nyuna aa, ‘Vɛɛ yoomoo kanduŋ yɛ?’ Te ŋ tofa pɛ mɛɛ hulma naŋ a dialuŋ naŋ kpou bɛɛndiaŋ yɛ, waŋnda tau dimi maa Wana Toosiaa taasioo tosa muŋ kpou ni. (Nuawɔ Sam 139:14.) Te lende i cho ni, mɛɛ le saboo o toosiaa naa ni! Yoomu naa nɔ bɛɛleŋ tau, te ŋ pɛɛku pɛ a sabu koŋ okɔɔ.

Mi Mɛlɛka duau Adama nda Ifi sala, nduyɛ mbo ke nda wali sɔviɔɔ le tosaa. Sabu Mɛlɛkaa wa ni, le mi ndaa pei chieeŋndo, ma siiŋguu ndu kpele hɛnɛkiɔɔ, nduyɛ ma wa achal lefafɛɛŋ.—Nuawɔ Chɛnɛsee 1:28, 31.

Mi sabu Mɛlɛkaa ndoo lɛŋgɛla mɛɛ waŋchieeya kɛɛ masale ndɔleŋ. Kɛ Mɛlɛka kɛɛ naa le. Nduyɛ, o siŋga sabu ndɔɔ le naa a chieeŋndo le. Baabuiyo ke naa tiindaŋndo maa Mɛlɛka cho wallo tosaa le wanaa dɔu tiindaŋndo o ndu niŋnda. Nduyɛ, sabu ndɔɔ le chieeŋndo cho peelɔŋ! Lelaŋ, Mɛlɛka yeema num ma tuei yoomoo yeela mɛɛ o yeema yɛ! (Nuawɔ Sam 37:29.) Pɛɛku o Baabuiyo niŋ mɛɛ sabu Mɛlɛkaa ke num tɔnɔɔ yɛ.