1, 2. (a) Le yɛɛ ŋ laalaŋ yɛ maa Chɛhowa kaala wanaa nduaa? (b) A yeemɛi yɛɛ waŋchieeya kpou toosiaŋ yɛ?

LE YƐƐ ŋ laalaŋ yɛ maa Chɛhowa kaala wanaa nduaa? Tuupa ma muli nyunaa hoo, tofa wɔ tamaseliiyo hoo. Le wɔsiŋ bɔɔbɔɔ, chaaŋaa naa laalaŋnda wa ndepilɛnɔɔ diolaŋ Tailɛŋ dimullo a lebɛɛ maa o nɔ mbo tosa kɛɛsiaa sɔviɔɔ, maa o nɔ mbo tosa nyɛ o fuulaŋ laba le wo le. Mi ndepilɛnɔɔ hoo dimi aa, “Te Chɛhowa ndoo kaala ya le, o ve ya wa silaa lɔɔlɔɔ le.” Mɛɛ pɔnɔɔ Bilijiti vi, mbo mɛi ndu a chuauwa a ŋiɔɔŋ. Mbo dimi aa, “Chuauwa mandaa numpilɛ o chieeŋ Setanaa hoo niŋ cho suɛi bɛɛŋ bɛɛŋ te. Kɛ I tiindaŋ kaala Chɛhowa nɔ le ya wo. Mbo ke ya nɛi chɔmaa teleŋ mɛmiaŋ ma wa ya o hɔl mi kɔl nuu wa mɔnɛi biyɔɔ wo. Nduyɛ o chɛl mi tɔɔndaŋ ya nɔla biunɔŋ te wo komalla le.” (1 Kɔliŋ. 10:13) Ndepilɛnɔɔ diolaŋ Sandila bɛɛ wa fafalaa a naa siŋgu le wo. O bɔŋaŋ bɛndu pilɛ, mi lanɔɔ puaapilɛnɔ waŋnda sina tau wo chɔm ndu kaala teŋgeŋndo. Mi pɔnɔɔ Sandila dimi aa, “Mi che bɛɛ naa ŋ sina ndepilɛnɔɔ hoo le, kɛ yeemɛi o chɔm o naa niŋnde ke naa bɔɔ kɔl kɛndɔɔ. Nduyɛ, o wa bɛɛ kaalaa o pɔmbuiinii puaapiliaa a ndepiliaa chɔm ya ni, I nɔla mi che mɛɛ kpɛ Chɛhowa kaala naa yɛ.”

 ² Waŋchieeya ndaa toosiaŋ a yeemɛi le ma kaaliaŋ vellaa velle. Te suɛi naŋ ve kɔl te ve komal naa pɛ, mɛɛ kɔl tambɛiyo, kɛndiaa, a nyɛsɔlaa lepɛŋndo, ɔɔ batiuwaa kiɔɔ sɔlaa o wali pollo niŋ cho naa yɛ, o wa tɛtɛlɛ le miŋ tambu kɔl te waŋndo chɔm naa kaalaa le. Te o wa pɛ miŋ kandu yiyaŋndo maa Chɛhowa kaala lɛ naa le, o bɛnda miŋ yiyaŋ maa wanaa sɔviaa naŋ cho le ndu ni. Mɛlɛka ‘cho naa mandaa’ mbo wa naa malaa wo o cho ni. Nduyɛ, te o wa pɛ miŋ dɔu tiindaŋ naa o ndu niŋ, o puɛɛnuŋ a naa le.—Aisaya 41:13; 49:15.

3. Yɛɛ mala yɛ naa mi tiindaŋ naa kendu maa kaala Chɛhowa nɔ le naa wo nɔ la mɛɛlu le?

³ Wanaa naŋ soo a nda okɔɔ o pɛl tasoo niŋnda laalaŋ kɛsɛ maa Mɛlɛka wa latulu a nda teleŋ nda wa o tɔɔndaŋndo bɛŋgu wo. Naa bɛɛ nɔ miŋ nɔ tiindaŋndo maa Mɛlɛka cho latulu a naa. (Sam 118:6, 7) Buŋgɛi hei cho isɔɔ a mɛɛ kaala Mɛlɛkaa cho kpendekele o (1) nyɛm o toosiaa woŋ, (2) Diom ndɔɔ, (3) piɛileŋ, nduyɛ (4) o sala baŋaa niŋ yɛ. Yiyaŋndo o nyɛm kɛndɛŋ Chɛhowa tosa woŋ choo nɔla mbo mala naa le balika melaa chɔmndo le kaala ndɔ nɔ la mɛɛlu le wo.—Nuawɔ Sam 77:11, 12.

4. Te ŋ yiyaŋ pɛ o nyɛm Chɛhowa toosiaa woŋ choo, yɛɛ naŋ saaluŋ yɛ?

⁴ Ŋ nɔla pa miŋ che kaala Chɛhowa nɔ la mɛɛlu le wo o nyɛm o toosiaa woŋ niŋ? Ei, ŋ nɔla miŋ che. Kani fondole, nyɛm Mɛlɛka toosiaa woŋ chɔm kaala o nɔ wo. (Luomaŋ. 1:20) O toosiaa chieeŋndo a nyɛm cho lechoo woŋ le halikpeŋ miŋ wa achal lechoo nyɛkɛndɛi. Kɛ, o cho ko le waa achal kinɛi le o toosiaa naa le. Ŋ nɔ miŋ wa nyɛdiaa dioo le waa yoomu. Mi Chɛhowa tosa a sabu le mi chieeŋndo nɔ tɔlɔɔla suu o suu naŋ soliŋ kpeku le nyɛdiaa kɛndɔɔ toosiaa. Nduyɛ, mbo tosa nyɛdiaa dioo teleŋ nyaale bɛndu! (Ikili. 9:7) Ndepilɛnɔɔ diolaŋ Katiliŋ hɛnaŋ bɔɔ a nyɛm Mɛlɛka toosiaa woŋ mɛɛndaŋndo, taama taama a Nyaakuɛiyo o lɛŋnde Kanadaleŋ niŋ. Mbo dimi aa, “I cho bɔɔ suɛi kaamaa bɛndu le chɔɔ mɛɛ Mɛlɛka toosiaa nyɛ o nyɛ fee yɛ, mɛɛ peeŋgelaŋ la pusa a teleŋ ndɔɔ yɛ, a mɛɛ youwa miiŋgu o fondaŋnda ndalaŋ yɛ. Nduyɛ, o wundɛi (finɛɛtilo) naa yauwaa niaa, mi sɛsɛŋkollo hiŋ nyɛdiaa nuuviaa o bil lapeeŋgoo choo. Chɛhowa kaala naa le nyɛm nɛŋi naa kɔllo woŋ kioo.” Finya naa kaalaa o choo choo niŋ hɛnaŋ a nyɛm o toosiaa woŋ, nduyɛ o yeema mi naa bɛɛ tuei muŋ yeela.—Walta. 14:16, 17.

5. Vɛɛ naŋ cha yɛ kaala Chɛhowaa a mɛɛ o toosiaa waŋchieeya yɛ?

⁵ Chɛhowa toosiaa naa a suiliŋndo le wali chuu naa tɔnɔɔ o yoomu naa niŋndo tosaa. (Ikili. 2:24) Sabu ndɔɔ wa ni, le mi waŋchieeya pei chieeŋndo, mbo wa nda o ba bɛŋgu, nduyɛ ma wa suuwa, youwa, a nyɛm yoomaŋ cheleŋndoŋ choo masaa. (Chɛ. 1:26-28) Chɛhohowa chɔm naa bɔɔ kaalaa le naa kioo suiliŋnda mala naa le tolɔɔ tamasi ndɔɔ kɔɔli laŋ!—Ɛfi. 5:1.

6. Le yɛɛ naŋ nɔ yɛ miŋ chɔm balika melaa a kɔl naa fau le Diom Mɛlɛkaa?

⁶ Mɛlɛka chɔm bɔɔ kaalaa le naa Diom ndɔɔ kioo. Diom ndɔɔ chɔm naa nyɛ naŋ nɔ le sinaa a ndu okɔɔ wo, vɛlɛ a mɛɛ o bii waŋchieeya yɛ. Le tamaseliiyo, Baabuiyo dimul naa mɛɛ o bii Isɔluɛiyaa wa ndu nilakalulaŋ tosallo lɔɔlɔɔ wa yɛ. Sam 78:38 dimi aa, “Mi Mɛlɛka tuiinuŋ nda inyiɛɛ, mbo mal nda le yɔŋnda ndala wɔɔŋndaŋ, o diu nda kpou le. Le teleŋnda ka ka, mbo pɔlul kɔllo, o doonuŋ tumbe, mbo hiou ndu o kɔl kɔɔli le.” Te a yiyaŋ pɛ o bolle Baabuileŋ ndeŋ choo, le cho num mala ma che mɛɛ Chɛhowa kaala num, mbo buulaŋ le  num yɛ. Nɔ tiindaŋndo maa wana sɔviɔɔ ŋ cho Chɛhowa o hɔl ni.—Nuawɔ Pitɛ Tasoo 5:6, 7.

7. Le yɛɛ naŋ ke yɛ Baabuiyo bɛɛle yiŋgoloŋ ndeŋ?

⁷ Ŋ nɔ kuee miŋ chɔm bɛɛleŋ tau le Baabuiyo kanifuule, ndu cho nyɛ tase Mɛlɛka soliŋ kpeku le suɛi o naalo wo ni. Suukaŋ kɛndɔɔ yeemaŋ kalaŋ chuauwa tɛɛŋ a chuauwaa ndaa. Hei mala nda le laalaŋndo nɔɔ o ndapila niŋ, nduyɛ ma nɔ yeemɛi le kaaliaŋndo vellaa velle. Kɛ Chɛhowa niŋ yɛ? Mi che bɛɛ naa ŋ chi wɔ ndu ɔɔ miŋ tuei ndu diom te, kɛ o cho “suɛi” o naalo o Diom ndɔɔ niŋ. Nduyɛ, ŋ nɔ miŋ yaŋ nilaŋ. (Aisaya 30:20, 21) Chɛhowa yeema mbo chɔm wanaa yɔŋguŋ o ndu lo wa nɛiyo, nduyɛ le mbo kuuna suɛi wɔɔŋnde naa komallo. O yeema naa miŋ sina ndu, nduyɛ miŋ dɔu tiindaŋ naa o ndu niŋ.—Nuawɔ Sam 19:7-11; Pulɔwaa 1:33.

8, 9. Yɛɛ Chɛhowa yeema yɛ miŋ sina? Chɔmndɔ tamaseliiyo o Baabuiyo niŋ.

⁸ Chɛhowa yeema miŋ sina maa o kaala naa. Nduyɛ maa o cho ko hakila naalaŋ te o mɛɛndaŋ te, kɛ i kɛndɛi o tofa naa o ŋdial ni. (2 Kolo. 16:9) Le tamaseliiyo, mbo tosa hei a Masaa Chɛhosiafati o lɛŋnde Chudaleŋ niŋ. O teleŋ pilɛ niŋ, mi Chɛhosiafati tosa diɔmnde le Ehabi, Masaa le lɛŋnde Isɔluɛileŋ liilaa le ma kɔ del puaa chɔuwaa Siiliaŋnda choo a sɔŋgɔɔ le ma puu Luamɔti Kiliadi. Mi che bɛɛ naa mi wanaa lachoowaa suaa le Mɛlɛka wa 400  dimul Ehabi dɛnɛ wɔɔŋ maa a cho batiuwaa sɔla, kɛ mi Makaya ndoo suaa le Chɛhowa wo dimi maa a cho batiuwaa sɔla le. Ma dii Ehabi o chɔu koŋ, nduyɛ Chɛhosiafati bɛɛ ma bianduŋ le ndu diyɔɔ. Mɛɛ Chɛhosiafati miiŋgu Chulusɛlɛm, mbo sɔla silaa le mɛɛ o chɛl Ehabi diom yɛ. Kɛ a koŋ kpou, mi Chɛhu, po Hanani dimi kpalolaŋndo dimul Chɛhosiafati aa, “A tosa sɔɔŋ ŋ tiŋ mi ŋ bɛnda.”—2 Kolo. 18:4, 5, 18-22, 33, 34; 19:1-3.

⁹ O masale ndɔleŋ kandɔŋndo, mi Chɛhosiafati dimul chuauwaa masaa, Livaitiiya, a wanaa suaa le Mɛlɛka wa, le kɔlaŋ o chiee o chiee wa o lɛŋnde Chudaleŋ niŋ le waŋnda pɛɛkoo a Sawa Chɛhowaa okɔɔ. Mi fulamakɔɔli kɛndɔɔ yɔŋnuŋ o hei tosaa niŋ. Mi waŋnda o lɛŋii balu nda ve niŋ kpou kandu siooŋii Chɛhowɛi nɔɔ. (2 Kolo. 17:3-10) Mi che bɛɛ naa mi Chɛhosiafati bianduŋ, kɛ Chɛhowa puɛɛnuŋ a sɔɔŋ kɛndɛŋ o tosa woŋ te. Bundɛi Baabuiye hei loonuŋ naa maa, mi che bɛɛ wanaa lahakiaa naŋ cho ni, Chɛhowa cho naa chɔm kaala nɔ la mɛɛlu le wo, te o yɔŋ pɛ miŋ tosa hɛnaŋ ndɔɔ a kɔl naa kpou.

10, 11. (a) Le yɛɛ naŋ nɔ yɛ miŋ che piɛileŋ maa ke teŋgeŋ Chɛhowaa le cho ni? (b) Vɛɛ Mɛlɛka muli yɛ piɛile naaleŋ? (Tofa fotueiyo o peele naŋ kandu leŋ choo.)

¹⁰ Mi finya kaalaa nɔ teleŋndo le chuauwaa nduaa nilaŋ yaŋɔɔ te a yeema pɛ suɛi o ndu lo. O yeema mbo sina buulaŋnda ndalaŋ kanifuule, o buulaŋ a nyɛ cho nda o kɔllo. Mi Chɛhowa, Finya naa o choo choo niŋ yaŋ naa nilaŋ, te ŋ soliŋ pɛ di sɔvɛ o ke naa le piɛileŋ ndo kpeku.

¹¹ Ŋ nɔla miŋ piɛi o Chɛhowa lo a teleŋ o teleŋ. O kuuna naa le hei tosaa le. Chaaŋ naa o cho ni, nduyɛ o cho o bɛɛndiaŋ lɔɔlɔɔ le naa nilaŋ yaŋɔɔ. Mi Tailɛŋ naŋ soo suŋ a ndu okɔɔ wo dimi aa, “A nɔla ma dimul ndu nyɛ o nyɛ fee.” Te ŋ dimul pɛ Mɛlɛka nyɛ cho naa o kɔllo niŋ di wo, o nɔla mbo soliŋ bolle Baabuileŋ kpeku, buŋgɛi ipum o yaula naalaŋ niŋ, ɔɔ diomnde kɔl dɛɛniaa le chaaŋ naa laalaŋndo le naa mulioo kioo. Mi Chɛhowa yaŋ piɛile naaleŋ nilaŋ, nduyɛ o nɔ sinapɛŋgoo a bahawɛi naa okɔɔ mbo hiau wana o wana. Mɛɛ o muli piɛile naaleŋ yɛ chɔm maa, o nɔ kaala nɔ la mɛɛlu le wo le naa.

12. Le yɛɛ naŋ nɔ yɛ miŋ loonuŋ piɛile kɛ kɛ cho o Baabuiyo niŋ? Chɔm tamaseliiyo.

¹² Ŋ nɔla miŋ pɛɛku tau o piɛile kɛ kɛ cho o Diom Mɛlɛkaa niŋ. Nduyɛ lepum, miŋ sɔla tɔnɔɔ tau te ŋ nua pɛ ndi a teleŋ pɛɛku leyuŋgoo. Te ŋ wa pɛ yiyaŋndo a mɛɛ buɛiyaa Chɛhowaa o sindɔɔ niŋ piɛi Mɛlɛka a kɔl ndaa kpou yɛ, o mala naa le piɛiyo nyɛkɛndɛi. Le tamaseliiyo, yiyaŋndɔ a piɛile Chonaleŋ okɔɔ teleŋ o wa suu bɛndoo o dembe wo. (Chona 1:17–2:10) Miŋgi wɔ vɛlɛ hɔlteŋ keeku o piɛile Sɔlɔmɔŋndeŋ choo teleŋ nda wa maaŋ Mɛlɛkaa kumbioo wo. (1 Masaa. 8:22-53) Yiyaŋndɔ a piɛile Chiisu pɛɛku buɛiyaa nduaa le tɔnɔ naa wo. (Maa. 6:9-13) I hiou kpou ve cho ni, piɛi Mɛlɛka le ‘nyɛ ŋ hau ba le ndu wo.’ Nduyɛ fulamakɔɔlioo cho ni, “kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo nɔla mbo manda kɔlta nyalaŋ, a yiyaŋnda nyalaŋ.” Hei tosa miŋ chɔɔlu balika melaa nɔ le kaala Chɛhowa nɔ la mɛɛlu le wo.—Filipi. 4:6, 7.

13. Di yɛɛ waŋchieeya sɔla yɛ le sala baŋaa Mɛlɛka ke nda wo?

¹³ Nyɛ cho tosa “mi ŋ sɔla yoomu kpeekpeiyo” wo cho kɛndɛi kaalɛi sala baŋaa Chiisu ve ni. (1 Chɔŋ 4:9) Mi kiilanɔɔ Pɔɔl poonyiaa a kaala bɛndu Mɛlɛka chɔm hoo wo okɔɔ aa, “Mi Kiliti wu le naa wanaa wɔɔŋnda. Boondii keŋ naa ŋ nɔla naa pila soli leniŋ te. Mbo sɔla piɔmndo a teleŋ Mɛlɛka pila kɛɛsiaa wo. O cho suɛi kala kpoke le mi waŋndo chɛl le mbo vi le wana  sim hoo o kala kala o nyɛ sawalaŋ la dimi wo tosaa niŋ ndo. Kɛ nduyɛ naa pum mi waŋndo chɛl le mbo vi le wana nɔ nyiɛɛyii waŋnda chieeya wo. Kɛ Mɛlɛka ndu ndu, mbo chɔm naa kaala bɛndu o kaala naa wo. Kani fondole, ŋ wa wɔ wanaa wɔɔŋ mi Kiliti wu le naa.” (Luomaŋ. 5:6-8) Kaala bɛndu Mɛlɛka chɔm hoo wo ke waŋchieeya dioo le simnda kɛndɛlaŋ sɔlaa a Chɛhowa ni.

14, 15. Yɛɛ sala baŋaa sim yɛ le (a) Kilisiɔŋaa pɔyaŋnda? (b) wanaa nɔ tiindaŋndo le waa o lɛŋndeŋ choo wa?

¹⁴ Waŋnda nyɛɛmbɔ koni cho kaala Chɛhowa nɔ la mɛɛlu le wo tueiyɔɔ yeela o nɛi teŋgeŋndo choo ni. (Chɔŋ 1:12, 13; 3:5-7) Mɛɛ waŋnda haa sɔla pɔyaŋndo a nyinaa Mɛlɛkaa, ma simnuŋ “chuauwaa Mɛlɛkaa.” (Luomaŋ. 8:15, 16, NW) Mi Pɔɔl suaa a Kilisiɔŋaa pɔyaŋnda haa okɔɔ maa, ‘mi Mɛlɛka miŋgi nda yoomu nda ndaa, nduyɛ, mbo kɛsi nda Chiisu Kiliti ikɛi o fondaŋ Mɛlɛkaa.’ (Ɛfi. 2:6) Le mɛɛ Mɛlɛka chua buŋgɛi le nda nyina ndɔɔ kioo yɛ nda sɔla fondaŋ ndɔɔ ni. Ndu cho yɛ ‘nyɛ Mɛlɛka kɛsul nda o fondaŋ ndɔɔ wo’ ni.—Ɛfi. 1:13, 14, NW; Kolo. 1:5.

¹⁵ Nɛiyo cho o kumbiaa le wanaa faŋga bɛndu cho tiindaŋndo dɔuwɔɔ o sala baŋaa niŋnda le ma simnuŋ chaaŋaa Chɛhowaa. Nduyɛ, apum cho simnɔŋ chuauwaa Mɛlɛkaa, mi apum wa achal o kpele hɛnɛkiɔɔ niŋ o chieeŋndo choo lefafɛɛŋ. Lelaŋ Chɛhowa soliŋ sala baŋaa kpeku le waŋchieeya kaala ndɔɔ chɔmndo ni. (Chɔŋ 3:16) Te ŋ nɔ pɛ tiindaŋndo le waa achal o lɛŋndeŋ choo lefafɛɛŋ, nduyɛ miŋ hiou lachi a Chɛhowa piɛiyo o laalaŋndo choo, ŋ nɔ tiindaŋndo maa o cho tosa miŋ wa a kɔl kɛndɛ o chieeŋ sɛnɛiyo niŋ. Lelaŋ, o bɛnda bɔɔ miŋ che sala baŋaa maa nɛi sɔvɛ bɛndu Mɛlɛka chɔm naa kaala ndɔ nɔ la mɛɛlu le wo o cho ni!

16. Yɛɛ yiyaŋndo o nɛila bɔɔbɔɔ Chɛhowa chɔm naa kaala laŋ choo tosal lɛ naa?

¹⁶ Chɛhowa chɔm naa kaala ndɔ nɔ la mɛɛlu le wo o nɛila bɔɔbɔɔ niŋ. Nduyɛ, ŋ tiuba laŋ chɔm kpou le. Mi wana ŋChondoo Deeve dimi aa, “Te yiyaŋnda numndaŋ laa wa nyɛ ya ii nɔla chɔm pɛ, la cho sɛlɛ haaa, la hiou bɛɛ mɛɛ siooŋnde cho nuaa o pioo kɔŋgɔ yɛ.” (Sam 139:17, 18) Ŋ nɔ kuee miŋ chɛl diomnda Deeve laŋ ndaŋ le miŋ nɔ kaalaa le Chɛhowa o kɔllo niŋ di le mɛɛ o cho naa mandaa nyɛkɛndɛi yɛ. Lelaŋ, ŋ kindiŋ o nɛi o nɛi niŋ le ndu piɛiyo a kɔl naa fau.

17, 18. O nɛila kuɛɛ choo naŋ chɔm yɛ kaalaa le Mɛlɛka?

¹⁷ Nɛilaŋ la cho tau le kaala naa chɔmndo le Chɛhowa. Le tamaseliiyo, ŋ chɔm kaala naa le Chɛhowa a chaaŋaa naa waŋchieeya, te ŋ wa pɛ yooŋgu kɛndɛ leMasaa dimioo a dialuŋ fulaa. (Maa. 24:14; 28:19, 20) Ŋ nɔla miŋ chɔm kpeekpei maa ŋ kaala Chɛhowa te ŋ wa pɛ tɔɔndaŋnda naŋ sɔla o ndu piɛiyo niŋndaŋ biuwɔŋndo, miŋ chɔm pimbi simiaa naa. (Nuawɔ Sam 84:11; Chemisi 1:2-5.) Te tɔɔndaŋndaŋ la hiu pɛ naa ŋɔwɔɔ, ŋ kɛsiŋ o kɔl maa Mɛlɛka sina nyɛkindilaa naŋ cho lebɛŋgu wo, nduyɛ, o cho naa mala. Kanifuule, wanaa sɔviaa naŋ cho le ndu ni.—Sam 56:8.

¹⁸ Kaala naŋ nɔ le Chɛhowa wo nyindu naa ni le yiyaŋndo o nyɛm o toosiaa woŋ choo, a sɔɔŋ kɔndɔfiliŋ cheleŋ o tosa woŋ. Ŋ nɔla miŋ chɔm maa ŋ kaala Mɛlɛka a Diom ndɔɔ tau, te ŋ wa pɛ Baabuiyo pɛɛkoo nyɛkɛndɛi. Kaala naŋ nɔ le Chɛhowa wo tosa miŋ naŋnuŋ ndu ikɛi o piɛileŋ niŋ. Nduyɛ, kaala naa le Mɛlɛka chɔɔlu yiŋgila te ŋ wa pɛ yiyaŋndo a sala baŋaa o yɔŋgu le hakila naalaŋ ndo. (1 Chɔŋ 2:1, 2) Sabulaŋ la tiŋ la cho laŋ ni le Chɛhowa kaala naa chɔmndo, le mɛɛ o nɔ kaala nɔ la mɛɛlu le wo le naa yɛ.