Iwɔsi o iwɔsi, miŋ toosiaa yaula Baabuilaŋ o miiliɔŋndaŋ niŋ le waŋnda piɔuwo. Miŋ taŋgul fondaŋnda naŋ tosa wallo laŋ, a la naŋ toosiaa yaulaŋndo chieeŋndo balɔɔ silɔ. Kundalaŋ o waalaŋ niŋ bɔɔŋiaŋ le Mɛlɛka piɛiyo o Toŋgola leMasalaŋ niŋ ni. La cho kpɛdɛ, kɛ naŋɔɔ pila la naŋ ni. Nɛɛ paawa yɛ le wallo hoo kpou tosaa?

Baala naa kpou cho o toolaŋ a mɛɛ naŋ kɛɛsiaŋ o kɔllɛ. (Kɔliŋtiaŋ Diiŋ Ndɔɔ 9:7) O wɔsi 1879 niŋ, mi Bandu Mɛŋgɛlaa naa pilɛ dimi aa, “Ŋ laalaŋ maa CHƐHOWA cho naa baa amakɔɔ ni. Lelaŋ, fɛɛŋ fɛɛŋ bɛɛ ŋ piɛi wana ɔɔ miŋ nyɔɔlu wana o wana le nyɛsɔlaa le.” A tonya, ŋ feŋaŋndɔ o nyɛ naŋ dimi hoo wo choo le.

O lɛuve sakpo nda yɔŋ chuuŋgiaalaŋ ndaŋ ni, ɔɔ o kɔfu cho o Toŋgola leMasa kɛ kɛ niŋndo nda duau laŋ ni. Kɛ ŋ kilul wana nyɛsɔlaa le walta naalaŋ ɔɔ yaula naalaŋ te. Yooŋgu kɛndɛ leMasa naŋ dimi wo ni, pɛɛku naŋ pɛɛku waŋnda o kundaa niŋndo ni, ɔɔ toŋgola lepiɛi naŋ taŋgultaŋ kpou, a sala naa le laŋ te. Le handɔɔ lechoo, mi Chiisu dimi aa, “Fondo nya sɔla ni, la yɔŋgu fondo.” (Maatiu 10:8, NW) Wana o wana cho o wali Mɛlɛkaa hoo niŋ, wanaa cho o lɛuve wa ni, a cho naa lebolla wa ni, mbo kɔ bii a Dialii Kuumbaŋ Choo Seiyaa Chɛhowaa kpou, a cho sala chua le.

Ŋ soliŋ vɛlɛ nyɛsɔlaa waŋnda chuuŋgiaa hoo wo kpeku le wanaa kpundɛlaŋ la komalla malaa. Kilisiɔŋnda sindɛ ndaa naŋ kɔl tau le balaŋ dɔuwɔɔ diompilɛ le wanaa kpundɔɔ komalla malaa. (Luomaŋnda 15:26) Naa bɛɛ hau, miŋ mala wanaa kpundɔɔ komalla le chiɛila ndalaŋ a fondaŋnda ndala lepiɛilaŋ miŋgioo taŋgullo. Miŋ ke nda nyɛdiaa, nyɛ chuɛiyaŋndo, a dandaa dɔuwɔɔ.