1, 2. Yiyaŋ yɛɛ apum nɔ yɛ a Mɛlɛka okɔɔ?

WANAA bɔɔbɔɔ yiyaŋ maa nyɛɛmbɔ koni nyɛ nda cho tosaa wo chɛɛliaŋ a nyɛ Mɛlɛka cho tosaa wo ni. Nduyɛ, apum laalaŋ maa Mɛlɛka nɔ iyeema o nyɛ cho waŋchieeya yɔŋnɔŋndo wo niŋ te. Mɛɛ hueiyii wɔɔŋ wɔɔŋnde hɔŋ o lɛŋnde Filipiŋndeŋ niŋ a Bɛŋgufɔnɔɔ, 2013 ve, mi masa ibuŋgaa o lɛŋnde leŋ niŋ dimi aa, “Mbɔ naa cheleŋ Mɛlɛka cho ni.”

² Mi wanaa cheleŋ yiyaŋ maa Mɛlɛka tiuba mbo che sɔɔŋ nda wa tosaa woŋ te. (Aisaya 26:​10, 11; 3 Chɔŋ 11) A cho ko mɛɛ wanaa Pɔɔl dimi maa “a kɛɛ le Mɛlɛka chuaa maa ndu cho Mɛlɛka ni” wo. Maa waŋnda haa “sɔɔŋ wɔɔŋndoŋ kposoŋ koni ŋ cho nda o lakɔl ni, sɔɔŋ dɛnɛ wɔɔŋndoŋ, a hɔlteŋ le nyɛm pilaŋ, a yɛle tulaaleŋ.”—Luomaŋ. 1:​28, 29.

3. (a) Nyunala yɛɛ naŋ nɔ yɛ miŋ nyuna a Mɛlɛkaa okɔɔ? (b) Te Baabuiyo wa pɛ suɛi a “ba” Chɛhowaa okɔɔ, yɛɛ o sim yɛ?

³ Kɛ naa yɛ? O fulawɔ o wanaa naŋ soo haa a nda okɔɔ o pɛl tasoo a o diiŋndɔɔ niŋnda, ŋ sina maa Chɛhowa cho chɔɔ nyɛ o nyɛ naŋ cho tosaa. Kɛ ŋ sina vɛlɛ pa maa o nɔ yeemɛi o naa niŋ, nduyɛ mi ba ndɔɔ wa naa choo? Okoŋ kɔɔli, baa ŋ cho pa wanaa Chiisu dimi maa a cho hunɔɔ Mɛlɛka chɔ wa tɛɛŋ? (Maa. 5:​8, NW)  Le sinaa nyɛ keŋ simndo, ŋ tofaŋndɔ fɛŋ tamaseliilaŋ o Baabuiyo niŋ a wanaa che maa ba Mɛlɛkaa wa nda choo wa, a wanaa kɛɛ le chɔɔ wa. Nduyɛ hei cho naa pɛɛku mɛɛ naŋ looku miŋ che ba Mɛlɛkaa walaŋ o yoomu naa niŋ a hɔlta nɔ tiindaŋndo laŋ yɛ. Te ŋ wa pɛ sɔɔŋ muŋ yaasiaa, kɛsiŋ o kɔl maa Baabuiyo soo daandi daandi a “ba” Mɛlɛkaa te o wa pɛ suɛi a kpaaya ndɔ o soliŋ kpeku le buɛiyaa nduaa malaa, nduyɛ mbo tiu yaamɔɔwaa nduaa ba wo.—Nuawɔ Ditɔnɔmii 26:​8.

4. Le yɛɛ yaamɔɔwaa Isɔluɛiya kɛɛ yɛ le chɔɔ ba Mɛlɛkaa?

⁴ O bundɛi Isɔluɛiya kandɔŋndo, waŋnda ndaa nɔ fondaa le chɔɔ a tueiyɔɔ sɔɔŋ Mɛlɛka tosa le Isɔluɛiya woŋ. Mi Chɛhowa tosa kaamaa le wanaa nduaa solioo po Ichipi, nduyɛ ma cha mɛɛ o wa masaa faaŋiaa yɛ. (Chɔɔ. 9:​3, 9, 10) Kɛ a nyɛ masaa wa Chɔɔdaŋ ba paaleŋ le dello ndaa che ma tuɛi kpou wo, “ma chal diom pilɛ ma chuuŋgiaa sovɛiyaa ndaa naa pilɛ le kɔlaŋ sɔŋgɔɔ a Chɔɔsuaa nda Isɔluɛiya.” (Chɔɔ. 9:​1, 2) Okoŋ kɔɔli, mɛɛ masaa haa kandu chɔulabaa, ndaa nɔ sabulaŋ le ba Mɛlɛkaa chɔɔ. A nɛi chɔmaa Chɛhowaa, “mi paaleŋ le sim yi, nduyɛ paŋgei bɛɛ i feŋaŋ naa i wa wa le. Mbo lo lende haaa mi Isɔluɛiya chii yaamɔɔwaa ndaa yomɔɔ.” (Chɔɔ. 10:​13) Kɛ Chɛhowa “pila ndu oo kindi waŋnda haa bolle ni le sɔŋgɔɔ a Isɔluɛiya.” (Chɔɔ. 11:​20) Mi yaamɔɔwaa Isɔluɛiya kɛɛ le sinaa maa Mɛlɛka wa chɔulabaa le Isɔluɛiya ni, nduyɛ hei tosa ni ma yam nda.

5. Yɛɛ Masa dɛnɛ wɔɔŋndo Ehabi kɛɛ yɛ le sinaa?

⁵ Okoŋ kɔɔli, Masaa Ehabi dɛnɛ wɔɔŋ bɛɛ ndoo nɔ fondaa le chɔɔ ba Mɛlɛkaa o sɔɔŋ niŋ. Mi Ilaicha dimul ndu aa, “Mɔmndo bɛɛ o chuchu lɛŋ te haaa, mɛɛ mbo loo koŋ mi dimi maa piɔɔ sia malaŋ o sia.” (1 Masaa. 17:​1) Chɛhowa wa diomnda Ilaicha dimi laŋ ndaŋ kɔɔli ni, kɛ mi Ehabi kɛɛ kpoŋ le tonyaa chɛlɔɔ. Okoŋ kɔɔli, mi Ehabi cha yiŋndeŋ fulaa o choo choo niŋ mi le huŋ lom sala Ilaichaa o lepilɛ niŋ kpe teleŋ o piɛi o Mɛlɛka lo wo. Mi Ilaicha dimi vɛlɛ maa Chɛhowa cho tosa mi valoo mɛɛlu. Mbo dimul Ehabi aa, “Kɔ niko ma kɔ dio nyɛ diaa fallo. I tuei piɔɔ yimndo.” (1 Masaa. 18:​22-45) Mi Ehabi cha sɔɔŋ muŋ kpou yɔŋnɔŋndo, kɛ a koŋ fau, mbo kɛɛ le sinaa maa Mɛlɛka cho kpaaya ndɔɔ chɔmndo ni. Tamaseliiyo hoo, a la naŋ chɔm o buŋgɛi kandɔŋndo wo pɛɛku naa suɛi sɔvɛi pila. Maa ŋ nɔ miŋ sina maa ba Chɛhowaa cho wallo tosaa.

6, 7. Yɛɛ waŋnda apum sina yɛ walaŋ o teleŋ Chɔɔsuaa wo niŋ?

⁶ Kɛ waŋnda apum ve maa masaa dɛnɛ wɔɔŋaa kaŋ te. Mi nda cha ba Mɛlɛkaa, mi che bɛɛ a wa o bahawɛiyo niŋ maa masaa naŋ soo haa a nda okɔɔ wa. Le tamaseliiyo, o fulawɔ o kayii bɔɔbɔɔ chɔulaba Isɔluɛiya o teleŋ Chɔɔsuaa wo niŋndo, mi waŋnda Kibiɔŋ tosa kɔlnyuloo a Isɔluɛiya. Le yɛɛ nda tosa yɛ keŋ? Ma dimi aa, “Lɛŋnde naa ŋ chɛŋ ndeŋ le cho levil fallo. Kani fondole ŋ tuei a nyɛ . . . Mɛlɛka nyaa Yaawɛɛ o tosa wo. Nyɛ o nyɛ o tosa o lɛŋnde Ichipileŋ niŋ, mi ŋ tuɛi.” (Chɔɔ. 9:​3, 9, 10) Ma sɔla taasioo le sinaa maa Mɛlɛka tonyaa wa Isɔluɛi kɔɔli ni.

⁷ Mi Luehabi bɛɛ cha ba Chɛhowaa o sɔɔŋ wa yɔŋnɔŋndo o palɛi nduɛi niŋndoŋ. Mɛɛ o tuei a mɛɛ Chɛhowa piŋi wanaa nduaa yɛ, mbo dimul suaŋ suaŋaa ŋiɔɔŋaa Isɔluɛiya aa, “I sina niŋ maa Mɛlɛka Yaawɛɛ o chii nya lɛŋndeŋ ndeŋ ke.” Mi che bɛɛ naa kpundɔɔ wa o simnda o chualaŋ ndaŋ kɔɔli, ndoo nɔ tiindaŋndo maa Chɛhowa nɔla mbo piŋi ndu nda yuŋgu ndɔɔ.—Chɔɔ. 2:​9-13; 4:​23, 24.

8. Vɛɛ Isɔluɛiya apum ndaa sina yɛ ba Chɛhowaa?

 ⁸ O fulawɔ o Masa dɛnɛ wɔɔŋndo Ehabi kɔɔli, mi Isɔluɛiya apum cha mɛɛ Chɛhowa muli piɛile Ilaicha leŋ a yiŋndeŋ yɛ. Ma sina maa ba Mɛlɛkaa wa o sɔɔŋ niŋ. Mɛɛ nda che yiŋnde fula o choo choo niŋndeŋ salaa lomɔɔ, ma dimi aa, “Mɛlɛka Yaawɛɛ ndu cho Mɛlɛka kpeekpeiyo ni.” (1 Masaa. 18:​39) Le nda nda, i cheleŋ ve lɛ o keŋ kɔɔli le!

9. Vɛɛ naŋ cha yɛ hau Chɛhowa a ba ndɔɔ?

⁹ Tamaseliila kɛndɛlaŋ a la wɔɔŋnda naŋ yaasiaa laŋ ndaŋ la mala naa le sinaa nyɛ o sim le Mɛlɛka chɔɔ wo, ɔɔ ba ndɔɔ chɔɔ o sɔɔŋ niŋndo. Nduyɛ te ŋ sina ndu pɛ, naa bɛɛ nɔla miŋ che ba ndɔɔ. Kanifuule, ŋ che suiliŋnda ndɔlaŋ pɛɛŋ a hɔlta kɔl naa nduyɛ a sɔɔŋ o tosa woŋ. (Ɛfi. 1:​18) A tonya, ŋ yeema miŋ wa maa waŋnda o sindɔɔ niŋ, a haa o teleŋ naa niŋ, a che kpendekele mɛɛ Chɛhowa cho wanaa nduaa malaa yɛ. Kɛ, ŋ nɔ pa saboo kɛsɛ kɛsɛ maa Mɛlɛka cho hau wanaa nduaa malaa?

10. Tamasi kuɛɛ chɔm yɛ maa Chɛhowa cho hau waŋnda malaa? (Tofa fotueiyo o peele naŋ kandu leŋ choo.)

¹⁰ Ŋ nɔ sabulaŋ tau le laalaŋndo maa Chɛhowa cho hiouwɔɔ lachi a wanaa nduaa malaa. O teleŋnda bɔɔbɔɔ niŋ, ŋ tuei niŋ sɔɔŋ a mɛɛ waŋnda apum piɛi le mala Mɛlɛkaa sɔlaa yɛ, nduyɛ ma sɔla ndu. (Sam 53:​2) Mɛɛ Alaŋ wa yooŋgu kɛndɔɔ dimioo chiɛiyo a chiɛiyo o Filipiŋ niŋ o lɛŋnde mɛŋndaŋ ma balu leŋ niŋ, mbo komal chuaa, nduyɛ mi chuaa hoo kandu chaŋndo. Mi Alaŋ dimi aa, “Chuaa hoo piɛi fɛŋ idii koŋ o Chɛhowa lo le mi Seiyaa Chɛhowaa hiŋ o ndulo. Chuaa hoo ndoo pɛɛku niŋ paandu Baabuiyo a Chɛhowɛiya teleŋ o wa feleŋgɔnɔ wo. Kɛ mɛɛ o chal o nɔɔ o lɛŋnde mɛŋndaŋ ma balu leŋndeŋ niŋ, o seeluŋ lɛ Chɛhowɛiya le. Mi Mɛlɛka muli piɛile chuaa hoo chɔ chɔ nduyɛ mi hei yusa ndu kɔllo.” O wɔsi pilɛ koŋ niŋ, mi chuaa hoo yɔŋgu yoomu ndɔɔ o Chɛhowa lo.

11, 12. (a) O nɛila kuɛɛ niŋ Chɛhowa cho yɛ buɛiyaa nduaa malaa? (b) Chɔmndɔ suɛi yɔŋnuŋ wana ndoo sɔla mala Mɛlɛkaa wo.

¹¹ Wanaa Mɛlɛkaa a bɔɔbɔɔ che niŋ mala Mɛlɛkaa le batiuwaa nda sɔla le kaala wɔɔŋndaŋ malɔɔ wo. Mɛɛ sikɛɛtiiyo a taaŋ wɔɔŋndo kolɔɔ cho naa yɛ, kooma wana ve o numpila niŋ te waŋ chuaa, ɔɔ fotueilaŋ a wunduma tum fonduaŋ nuaa. Apum dimi maa a wa kindiŋndo lɔɔlɔɔ le kaalaŋ malɔɔ a banda, kɛ a tiuba le. Kɛ mɛɛ nda muliŋ o Chɛhowa lo le malaa, mbo ke nda “kpaaya bɛndu” ndɔɔ. Nduyɛ, o mɛɛlulaŋ kpɔŋ, ma tiuba le kaala ndala wɔɔŋndaŋ malɔɔ.—2 Kɔliŋ. 4:​7; Sam 37:​23, 24.

¹² Chɛhowa mala niŋ wanaa bɔɔbɔɔ le biuwɔŋndo bahawɛila ndalaŋ. Le tamaseliiyo, Ami wa fafalaa teleŋ nda yɔŋ ndu le Toŋgo leMasaa taŋgullo a chiɛi wanaa fula o lɛŋii cheleŋ niŋ le yooŋgu kɛndɔɔ dimioo wa o lɛŋnde pɔmbɔle mɛŋndaŋ ma balu leŋ niŋ. Mbo dimi aa, “O chiɛi pɔmbɔ nda yiya mialla wo niŋ naŋ wa ni. Nduyɛ lepaa o lepaa, o mɛŋndaŋ niŋ naŋ kei ni le kɔlaŋ o naa balaa.” Ndoo nɔ vɛlɛ mbo tosa yɛlɛmiaalaŋ a naamulaŋ okɔɔ. Nduyɛ o cho lepaa o lepaa le yiŋnde chɛnɛwɛileŋ a mɛŋndaŋ ma wa le. Mi Ami dimi vɛlɛ aa, “Mi sɔɔŋ chɔɔlu le wɔu, mɛɛ ya sɔŋga a ndepilɛnɔ naŋ wa wallo latulu wo. Mi kua o bɛɛ a yiyaŋndo maa I bumba. O chiɛi nda yiya koŋ mialla wo niŋ o nyumndaŋ niŋ, mi tɛi kɔl nuu o Chɛhowa lo o piɛileŋ niŋ le malaa.” Mɛɛ yiŋnde chɛnɛwɛileŋ le hiŋ ichɔl koŋ, mi Ami chua Bandu Mɛŋgɛlaa o ndoo nɔ buŋgɛi soo a sukuuwo Kiliad ve. Nduyɛ mi buŋgɛi keŋ suaa a sɔɔŋ o wa fafalaa woŋ kpou. Naamu sɛnɛiyo, yeemɛi wanaa numnda, a mɛɛ ŋ nɔ ma bii wanaa ŋ sina paandu le wa yɛ. Mbo dimi aa, “Mi sina maa Chɛhowa wa suɛi o ya lo ichɔl koŋ ni. Mi Bandu Mɛŋgɛlaa koŋ  mala ya le hiouwɔɔ lachi a wallo tosaa o viomɔɔ nuu bɛŋgu.”—Sam 44:​25, 26; Aisaya 41:​10, 13.

13. Tamasi yɛɛ naŋ nɔ yɛ le chɔmndo maa Chɛhowa cho wanaa nduaa tooloo le mi yooŋgu kɛndɔɔ “sim o kala yi”?

¹³ Nyɛ chɔm maa ba bɛndu Chɛhowaa cho Seiyaa nduaa choo wo cho batiuwaa nda cho sɔlaa le yooŋgu kɛndɔɔ ‘simioo o kala yi’ wo ni. (Filipi. 1:​7) Masɛi ipum kindiŋ niŋ le wali wanaa Mɛlɛkaa kuunaa maa o hiu lɛ lachi le. Kɛ te ŋ tofaŋ pɛ amakɔɔ, miŋ che maa Seiyaa Chɛhowaa sɔla niŋ dilaŋ 268 o toŋgola kialaa ŋyamala bɛndaŋ niŋ. Nduyɛ chɔŋ a wɔsi 2000 nde, a sɔla niŋ dilaŋ 24 o Toŋgo Kialaa Ŋyama Yulopiaŋnda niŋ. I cho kpendekele maa wana o wana nɔla ba Mɛlɛkaa biyɔɔ le.—Aisaya 54:​17; Nuawɔ Aisaya 59:​1.

14. Vɛɛ ŋ cho yɛ ba Chɛhowaa chɔɔ o wali naa dimiaa yooŋgu kɛndɔɔ niŋ, a diompilɛ naŋ cho tueiyɔɔ yeela wo?

¹⁴ A mala Chɛhowaa koni yooŋgu kɛndɔɔ nɔla mbo dimiŋ chieeŋndo balɔɔ silɔ ni. (Maa. 24:​14; Walta. 1:​8) Diompilɛ cho wanaa Chɛhowaa tɛɛŋndo, a fula o sɔɔŋ maŋgalaŋ yɛ yiɔɔŋ niŋnda chɔm vɛlɛ ni maa Chɛhowa cho nda malaa. Chieeŋndo nɔla nda tuula le. Le saboo hoo wanaa cho o kɔɔnaa hoo niŋ te wa dimi ni aa, “Tonya kpeekpei, Mɛlɛka cho nya tɛɛŋ.” (1 Kɔliŋ. 14:​25) Nduyɛ, naa kpou nɔ sabulaŋ tau la chɔm maa Mɛlɛka cho wallo le wanaa nduaa wo. (Nuawɔ Aisaya 66:​14.) Kɛ, num yɛ? A cho pa ba Chɛhowaa chɔɔ walaŋ o yoomu numndo niŋ?

15. Tɛɛsiaa wɔ le sabu naŋ chi walaŋ ba Chɛhowaa lepum o yoomu naa niŋ te wo?

¹⁵ Ɔɔ sabulaŋ lapum la tosa ŋ chi ba Mɛlɛkaa walaŋ o sɔɔŋ naŋ tosa woŋ niŋ te? Mi simulta naŋ sɔla o yoomoo niŋndaŋ la mel naa kpuluku. Te hei yɔŋnuŋ pɛ, miŋ puɛɛnuŋ le kɔllo handɔɔ o mala Chɛhowa ke naa niŋ paandu wo choo. Ilaicha bɛɛ mɛɛ Masaa Chɛsibɛɛ kɔŋgɔlaŋ ndu le ndu diyɔɔ, mbo puɛɛnuŋ o teleŋ koŋ bɛŋgu a mɛɛ Mɛlɛka ndoo mala ndu paandu yɛ. Mi Baabuiyo dimi a Ilaicha okɔɔ maa mbo dimul Mɛlɛka maa o yeema mbo vi. (1 Masaa. 19:​1-4) Vɛɛ bahawɛi Ilaicha wo ndoo looku yɛ mbo  fula? Ndoo nɔ mbo tofa Chɛhowa le ndu dɛɛniaa.—1 Masaa. 19:​14-18.

16. Yɛɛ naŋ nɔ yɛ miŋ tosa le Mɛlɛka chɔɔ maa Choobu?

¹⁶ Mi kɔl landɛi bɛndoo kɛɛlu Choobu sɔɔŋ chɔɔ o nɛi Mɛlɛkaa choo. (Choobu 42:​3-6) Maa Choobu, naa bɛɛ nɔ kuee miŋ kindiŋ kpoke le Mɛlɛka chɔɔ. Vɛɛ naŋ looku yɛ keŋ tosa? Ŋ nɔ miŋ soliŋ Diom Mɛlɛkaa kpeku le yiyaŋndo a sɔɔŋ balu naa woŋ. Te ŋ sina dɔɔ pɛ mɛɛ Chɛhowa cho naa malaa yɛ, o nɔla mbo simnuŋ waŋndo kpeekpei le naa. Nduyɛ maa Choobu, ŋ nɔla miŋ dimi aa, “Paandu tueiyɔɔ koni ya ii tuei a num okɔɔ ni Mɛlɛka, kɛ I che niŋ num a hɔlte nileŋ pɛɛŋ.”

17, 18. (a) O nɛila kuɛɛ niŋ naŋ sina yɛ maa Chɛhowa cho naa malaa? (b) Tamaselii kuɛɛ chɔm yɛ maa Mɛlɛka cho naa hau malaa?

¹⁷ Vɛɛ naŋ looku yɛ ba Chɛhowaa chɔ? Ma che tamaseliilaŋ lapum. Kɛlɛŋgaa ma yiyaŋ dɔɔ lepum maa mɛɛ ŋ looku tonyaa sɔla yɛ chɔm walaŋ maa Mɛlɛka tosa ni ma sɔla ndu. A kuɛ niŋ pa o bɔŋaŋnda leKilisiɔŋndaŋ, ma tuɛi suɛi ipum, nduyɛ ma dimi aa, “Nyɛ yaa yeema wo kɛsɛ wa hoo ni”? Ɔɔ a che niŋ mɛɛ piɛile numndeŋ le sɔla mulioo yɛ. Kɛlɛŋgaa ma kɛɛsiaa le wali poli numndo chɔɔloo, nduyɛ mi kaamaa bii num a mɛɛ Chɛhowa mala num le hei tosaa yɛ. Ɔɔ a mal niŋ pa baalaa le sabu Mɛlɛkaa hivioo lachi nduyɛ ma cha diomnde tonyale Mɛlɛkaleŋ ndeŋ o peelɔŋndo, “I mel nya nya kpeele le”? (Hibu. 13:​5) Te ŋ wa pɛ yekeŋ o Chɛhowa piɛiyo niŋ, ŋ nɔla miŋ sina mɛɛ o mala naa o nɛila bɔɔbɔɔ niŋ yɛ.

¹⁸ Mi Sela o lɛŋnde Kenyaleŋ niŋ dimi aa, “Mi piɛi le wana ya wa Baabuiyo pɛɛkoo wo, o yaa yiyaŋ maa o cho saalaŋ pɛɛkoo le wo. Mi nyuna Chɛhowa te I mal pɛ pɛɛku kalaa. Mɛɛ ya dimi dɔɔ aa ‘Amiina,’ mi tuɛi veeloo o foŋndo choo. Pɛɛku Baabui ya wa piɛileŋ a ndu okɔɔ wo veelu ya ni, le ya nyunaa te ŋ kɔ pɛ latulu o bɔŋaŋ naa leKilisiɔŋndo! Sondo suaa bɛɛ ve ya le!” Te a wa pɛ yekeŋ, num bɛɛ cho chɔ nɛila Mɛlɛka cho num malaa o yoomu numndo niŋndaŋ. Mi ndepilɛnɔɔ o lɛŋnde Eesiaa leŋ niŋ diolaŋ Lona dimi aa, “Mɛɛ ma wa wana taasi le sinaa nɛi chɔmaa Chɛhowaa. Kɛ te o wa pɛ ma tosa lende, kaamaa cho num biyɔɔ le chɔɔ mɛɛ kpɛ Chɛhowa nɔ yeemɛi o naa niŋ yɛ!”

19. Yɛɛ cheleŋ yeemaŋ yɛ le waa wanaa che Mɛlɛka wa tɛɛŋ?

¹⁹ Mi Chiisu dimi aa, “Nyaaloo cho le wanaa kɔl ndaa cho sakpo wa. Kani fondole, a cho hunɔɔ Mɛlɛka chɔ. ” (Maa. 5:​8, NW) Vɛɛ ‘kɔl naa wa yɛ sakpo’? Ŋ nɔ kuee miŋ wa walaŋ o dialuŋ naŋ niŋ nduyɛ miŋ pɛŋgi kaala wɔɔŋndaŋ tosaa. (Nuawɔ Kɔliŋtiaŋ Diiŋ Ndɔɔ 4:​2.) Te ŋ kindiŋ pɛ le kaa iMɛlɛkaya kɛndɛ kɛndɔɔ sɔlaa, nduyɛ miŋ chɔm kaa sakpoo, mɛɛ ŋ cho wa wanaa cho Mɛlɛka chɔɔ wa tɛɛŋ. Buŋgɛi cho lachi ve cho yaasiaa nyɛ mala naa le chɔɔloo sinaa walaŋ hɛnaŋ Chɛhowaa o yoomu naa niŋndo. Nyɛ koŋ cho yɛ tiindaŋ naa ni.