1. Vɛɛ tiindaŋndo cho yɛ nyɛ sɔvɛ? (Tofa fotueiyo o peeleŋ ndeŋ choo)

A YIYAŊ niŋ pa aa, ‘I cho pa wana suu Chɛhowa yeema mbo piŋi teleŋ nyɛpalaa bɛndoo wo, okoŋ, mbo luei ya o chieeŋ sɛnɛiyo niŋ?’ Tonya i cho ni maa sɔɔŋ cho chalaŋ o pioŋɔɔ sɔlaa niŋ. Kɛ mi kiilanɔɔ Pɔɔl dimi suɛi sɔvɛi bɛnduei ipilɛ. Ndi cho ni, “Le wana o wana ma nɔla ma nɛŋi Mɛlɛka kɔl mɛɛ ma nɔ tiindaŋndo o ndu niŋ.” (Hibu. 11:​6) Miŋ yiyaŋ dɔɔ maa le wana o wana hei cho ni. Kɛ tonyaa cho ni maa, “o cho waŋnda fau le a dɔu tiindaŋndo o Mɛlɛka niŋ te.” (2 Tɛs. 3:​2) Bolii Baabuiye hei mala naa le sinaa mɛɛ i cho suɛi sɔvɛ le tiindaŋndo nɔɔ o kala poŋ yɛ.

2, 3. (a) Yɛɛ naŋ pɛɛku yɛ Pitɛ o ba a tiindaŋndo okɔɔ? (b) Nyuuniaala yɛɛ naŋ cho yɛ hunɔɔ yaasiaa?

² Mi kiilanɔɔ Pitɛ muli hɔllɔ o tiindaŋndo a mɛɛ o cho nyɛ sɔvɛ yɛ. Mbo suaa a ndu okɔɔ maa mɛɛ mbo keeku o tofaa bɛŋgu, nduyɛ maa “la cho chandɔɔ sɔla, a naŋɔɔ bɛndoo, a bɛɛleŋ Mɛlɛka o ba.” (Nuawɔ Pitɛ Tasoo 1:​7.) Mɛɛ paale nyɛpalaa bɛndoo le cho niŋ naa kpɛɛluŋ yɛ, ŋ yeema miŋ tosa a sabu le wanaa cho chandɔɔ sɔla le tiindaŋ ndaa wa waa tɛɛŋ, te Masaa Kiliti chɔɔmuŋ pɛ ŋwaŋnda chiee le? A tonya kpeekpei, ŋ yeema miŋ wa “wanaa nɔ tiindaŋndo o Mɛlɛka niŋ mbo piŋi nda wa” waa tɛɛŋ. (Hibu 10:​39) A kpeleŋndo hoo o kɔl, naa bɛɛ nyɔɔlu maa po dimi hoo wo aa, “Mala ya mi nɔ laalaŋndo tau.” (Maki 9:​24) Te koŋ te, miŋ dimi mɛɛ kiilaa Chiisuaa dimi yɛ aa, “Mala naa mi ŋ chɔɔlu tiindaŋndo sɔla.”—Luku 17:​5.

³ Yeemɛi le chɔɔloo tiindaŋndo nɔɔ hiŋ a nyuuniaalaŋ lapum.  Vɛɛ naŋ taŋgullɛ suiliŋndo hoo? Vɛɛ naŋ chɔm yɛ maa ŋ nɔ tiindaŋndo? Tiindaŋ yɛɛ naŋ nɔ yɛ maa nyuna naŋ nyuna le tiindaŋndo chɔɔloo sɔlaa wo cho mulioo sɔla?

4. Tamasi nɛɛ yaa nyindu yɛ naa le tiindaŋ naa kindioo?

⁴ “Nyɛ o nyɛ poonyiaŋ sindɛ o yau Mɛlɛkaa niŋ, a poonyiaa ndu le naa pɛɛkoo.” Le hei, ŋ nɔla miŋ pɛɛku a tamaseliila bɔɔbɔɔ okɔɔ o Baabuiyo niŋ. (Luomaŋ. 15:​4) Te ŋ nua pɛ o Baabuiyo niŋ a waŋnda haa okɔɔ mɛɛ Ebilaham cho naa yɛ, Sela, Isaki, Chekɔpu, Muuse, Luehabi, Kidiɔŋ, Belaki, a acheleŋnda, mi bundɔŋ ndaŋ nyindu naa le tiindaŋndo o naa yaasiaa. (Hibu. 11:​32-35) Le handɔɔ lechoo, te ŋ nua pɛ konala puaapiliaa a ndepiliaa naa o teleŋ naa hoo niŋ, a chɔm tiindaŋ kala kalaa wa, hoo nyindu naa le miŋ tosa wallo kekelee le tiindaŋ naa kindioo. *

5. Vɛɛ Ilaicha chɔm yɛ maa o nɔ tiindaŋndo o kala poŋ o Chɛhowa niŋ, nduyɛ a yɛɛ okɔɔ tamasi ndɔɔ nyindu yɛ naa le miŋ yiyaŋ?

⁵ Nuawɔ tamaseliiyo o Baabuiyo niŋ a wana ndoo suaa le Mɛlɛka wo okɔɔ Ilaicha. Tofawɔ sɔɔŋ yɔŋnuŋ ndu woŋ le chɔmndo maa ndoo nɔ tiindaŋndo o Chɛhowa niŋ o kala poŋ. Mɛɛ Chɛhowa dimi maa o cho tosa mi valoo wa piɔɔ se le, mi Ilaicha dimul Masaa Ehabi a kɔllo kpou aa, “Mɛlɛka Yaawɛɛ, . . . Mɛlɛka cho yoomu le fɛɛŋ a fɛɛŋ ndo, . . . o dimi maa . . . o cho wɔ piɔɔ siaa le, kɛ mɔmndo bɛɛ o chuchu lɛŋ te haaa, mɛɛ mbo loo koŋ mi dimi maa piɔɔ sia malaŋ o sia.” (1 Masaa. 17:​1) Ilaicha ndoo laalaŋ maa Chɛhowa cho ndu a wanaa cheleŋ ke nyɛ yeemaŋndo a boondii valoo. (1 Masaa. 17:​4, 5, 13, 14, 21) Mbo tiindaŋ Chɛhowa maa O nɔla mbo miŋgi poombɔ vi wo yoomu. Kiisaŋ ve ndu maa Chɛhowa cho yiŋndeŋ yɔŋ mi le lom sala o soli o Pembii Kamɛlle choo ve le. (1 Masaa. 18:​24, 37) Mɛɛ teleŋndo fuuluu le mi Chɛhowa faŋa valoo, tuupa mi tamasioo chɔmnuŋ maa piɔɔ nɔ le siaa, mi Ilaicha dimul Ehabi aa, “Kɔ niko ma kɔ dio nyɛ diaa fallo. I tuei piɔɔ yimndo.” (1 Masaa. 18:​41) Vɛ, konala suu waa naa la tosa miŋ yaasiaŋ naapila le chɔɔ mɛɛ kpɛ tiindaŋ naa kendu yɛ le?

6. Yɛɛ naŋ yeema yɛ Chɛhowa o ba le tiindaŋndo taŋgullo?

⁶ Ŋ nɔla miŋ taŋgul tiindaŋndo a kpaaya naa le. Tiindaŋndo cho opilɛ o suiliŋnda nyina Mɛlɛkaa mala naa le sɔlaa laŋ tɛɛŋ. (Kalee. 5:​22) Lelaŋ, i wa suɛi taasi le sila Chiisoo tolɔɔ kɔɔli le piɛiyo miŋ chɔɔlu suliŋ koŋ sɔla. Kanifuule, Chiisu ke naa tiindaŋndo maa Finya ndɔ “yɔŋgu nyina ndɔ diandaa o wanaa piɛi le ndu wa” lo.—Luku 11:​13, NW.

7. Chɔmndɔ tamaseliiyo mɛɛ naŋ kɛsi tiindaŋ naa o kala poŋ yɛ.

⁷ Te tiindaŋ naa kilaŋ pɛ, ŋ nɔ miŋ hiou lachi a ndu kɛmɛ kɛmiaa. Tiindaŋ naa cho ko mɛɛ ŋ chiŋa naa yiŋndeŋ yɛ. Te a chiŋa pɛ yiŋndeŋ, mi le yim kuluŋ a sandei wule wule. Kɛ te a tosa nyɛ a leŋ okɔɔ le, le cho lo sandei tei mi le simnuŋ dɛŋgultaŋ, okoŋ, mi dɛŋgultaŋ bɛɛ la simnuŋ pultaŋ. Kɛ te a lambaŋ pɛ leŋ beeŋgoo nduyɛ ma chɔɔlu yɔmnde, le cho wa hiouwɔɔ lachi kɛ a sandei. Mɛɛ lende ko tiindaŋ naa bɛɛ cho wa yoomu ni, te ŋ lambaŋ pɛ ndu beeŋgoo a Diom Mɛlɛkaa. Ŋ wa pɛ Baabuiyo pɛɛkoo o pɔmpɔmbɔ, kaala ndɔɔ cho naa luɛiyɔɔ o kɔl a Wana Toosiaa ndu wo. Nduyɛ, hoo cho chiiye ni le chɔɔloo tiindaŋndo sɔlaa.

8. Yɛɛ mala yɛ naa le tiindaŋ naa taŋgullo nduyɛ miŋ manda ndu?

⁸ Yɛɛ ŋ nɔ yɛ ma chɔɔlu tosa le ma taŋgul  tiindaŋ kendu wo nduyɛ ma manda ndu? Yiyaŋ naa maa nyɛ ŋ pɛɛku tei ma huŋ sɔla yiŋɔɔ wo cho letuu le. (Hibu. 6:​1,2) Yiyaŋ a sɔɔŋ dimiŋ o Baabuiyo niŋ miŋ peeluŋ ndoŋ. Kanifuule, ŋ nɔla miŋ ke num sabu sɔviɔɔ o tosa ma nɔ tiindaŋndo wo. A soliŋ vɛlɛ Diom Mɛlɛkaa kpeku maa yɔm tuwaa le sinaa te tiindaŋ numndo cho pɛ kpeŋ kpeŋ a nyɛ yeemaŋ wanaa nɔ tiindaŋndo o kala poŋ nda o ba wo.—Nuawɔ Chemi. 1:​25; 2:​24, 26.

9, 10. Vɛɛ sɔɔŋ muŋ mala yɛ naa le tiindaŋ naa taŋgullo, (a) chaŋyaŋ kɛndɔŋ? (b) bɔŋaŋnda leKilisiɔŋndaŋ (c) wali pollo?

⁹ Mi kiilanɔɔ Pɔɔl dimul chaaŋaa nduaa Kilisiɔŋnda le ma dɛɛniaŋ vellaa velle. (Luomaŋ. 1:​12) Ŋ wa pɛ holiaŋndo a chaaŋaa naa laalaŋnda, ŋ nɔla miŋ taŋgul tiindaŋnda naalaŋ vellaa velle, o bii fau te ŋ wa pɛ latulu a wanaa tiindaŋ ndaa keeku niŋ paandu o tofaa bɛŋgu wa. (Chemi. 1:​3) Chaŋyaŋ wɔɔŋndoŋ tɛɛmbuu tiindaŋndo, kɛ chaŋyaŋ kɛndɔŋ taŋgul ndu. (1 Kɔliŋ. 15:​33) Saboo opilɛ cho hoo ni le nyɛ Diom Mɛlɛkaa sila naa maa naŋ “malnuŋ chuuŋgiaŋndo diom pilɛ” le wo. Kɛ ŋ “dɛɛniaŋ vellaa velle.” (Nuawɔ Hibuluiya 10:​24, 25.) Saboo opilɔɔ cho ni maa nyɛ naŋ pɛɛku o chuuŋgiaŋnda naalaŋndo tosa mi tiindaŋ naa kendu poŋ. Hoo chɛlaŋ a nyɛ Pɔɔl dimi wo aa, “Lelaŋ yooŋgu Mɛlɛkaa tueiyɔɔ ndu huŋ a tiindaŋndo dɔuwɔɔ o Mɛlɛka niŋ ni.” (Luomaŋ. 10:​17) Ŋ cho pa chɔmndo maa ŋ cho bɔŋaŋnda leKilisiɔŋndaŋ biyɔɔ lɔɔlɔɔ o yoomu naa niŋ?

¹⁰ Te ŋ wa pɛ o wali pollo niŋ, o cho ko tiindaŋ wanaa cheleŋ te naŋ taŋgul te, kɛ naapila bɛɛ mi tiindaŋ naa hiou lachi. Maa Kilisiɔŋnda sindɛ, ŋ nɔ miŋ pɛɛku le tiindaŋndo dɔuwɔɔ o Chɛhowa niŋ nduyɛ miŋ soo a kɔl sikpaa o teleŋ o teleŋ bɛŋgu.—Walta. 4:​17-20; 13:​46.

11. Le yɛɛ Kelɛb nda Chɔɔsuaa ndaa nɔ yɛ tiindaŋ kalaa, nduyɛ vɛɛ naŋ wa yɛ maa nda?

¹¹ Te ŋ che pɛ mɛɛ Chɛhowa cho naa malaa o yoomu naa niŋ yɛ vɛlɛ a mɛɛ o muli piɛile naaleŋ yɛ, tiindaŋ naa hiau lachi a kaloo. Hei wa tonya a Kelɛbi nda Chɔɔsuaa. Tiindaŋndo dɔuwɔɔ o Chɛhowa niŋ tosa ni ma kɔ mɛɛŋndaŋ Lɛŋnde Mɛiyaa leŋ. Kɛ okoŋ kɔɔli, mɛɛ nda che mɛɛ Chɛhowa wa nda nɛi chɔmaa kioo o yoomu ndaa niŋ yɛ, mi tiindaŋ ndaa chɔɔlu kalu. Mɛɛmaa le saboo hoo Chɔɔsuaa soo o Isɔluɛiya lo a dialuŋ fulaa ni aa, “Nyɛ o nyɛ kɛndɛ Mɛlɛka Yaawɛɛ ndu oo chuel nya sindɛ buŋgɛi . . . o pilɛ bɛɛ o mɛi ndu mbo kɛɛ ndu tosa le.” Mi ndoo dimi vɛlɛ aa, “Lelaŋ la ke Mɛlɛka Yaawɛɛ bɛɛleŋ, mi la saaŋgial ndu a kɔlta nyalaŋ kpou o nɛi sakpoo choo. . . . Kɛ ya a yuŋgu nuu kpou o yalo chiɛi niŋ naa Mɛlɛka Yaawɛɛ naa ŋ cho sooluu ni.” (Chɔɔ. 23:​14; 24:​14, 15) Te ŋ dembi pɛ kɛndɛi Chɛhowɛi, naa bɛɛ tiuba miŋ nɔ kɔl sikpa waa naa.—Sam 34:8.

12. Yɛɛ Chemisi chɔm yɛ a tiindaŋndo okɔɔ maa o yeemaŋ?

¹² Vɛɛ naŋ chɔm yɛ maa ŋ nɔ tiindaŋ cho yoomu wo? Mi kiilanɔɔ Chemisi muli nyuna koŋ aa, “I cho tiindaŋ ya nɔ wo chɔm sanaa a sɔɔŋ kɛndɛŋ ya cho tosaa woŋ.” (Chemi. 2:​18) Nyɛ naŋ tosa wo cho chɔm ni maa ŋ nɔ tiindaŋ kpeekpeiyo. Ŋ tofaŋndɔ tamaseliilaŋ lapum.

13. Vɛɛ wali dimiaa yooŋgu kɛndɔɔ mala yɛ naa le tiindaŋ naa chɔmndo?

¹³ Kɔlaŋ o wali pollo niŋ cho bɔɔ nyɛ sɔvɛ le chɔmndo maa ŋ nɔ tiindaŋndo. Le yɛɛ naŋ dimi yɛ lende? Wallo hoo chɔm maa ŋ nɔ tiindaŋndo o teleŋ Mɛlɛka tuu le mɛɛlula chieeŋndo hoo wo niŋ. Nduyɛ ŋ laalaŋ maa ‘i dounuŋ niŋ tamala le yɔŋnɔŋndo le.’ (Haba. 2:​3) Nɛiyo opilɛ o naŋ tuu tiindaŋ naa wo cho ni, tofaa mɛɛ kpɛ naŋ nɔ yeemɛi le chɔɔloo tosaa o wali pollo niŋ yɛ. Ŋ cho pa tosaa o nɛi o nɛi niŋ le chɔɔloo yɔŋgɔŋndo o wali pollo niŋ? (2 Kɔliŋ. 13:​5) A tonya, tiindaŋ naa chɔɔmuu wo o waŋnda lo cho nɛi  sɔviɔɔ ni le chɔmndo maa ŋ nɔ tiindaŋndo o kɔl.—Nuawɔ Luomaŋnda 10:​10.

14, 15. (a) Vɛɛ naŋ chɔm yɛ tiindaŋndo o yoomu naa niŋ? (b) Tamaselii kuɛɛ chɔm yɛ maa tiindaŋ kala kalaa cho wallo?

¹⁴ Ŋ chɔm vɛlɛ tiindaŋndo te ŋ wa pɛ simultaŋ o yoomoo niŋ chɔulabaa. Naa komal naa, kɔl tambɛiyo, kuɛi, ɔɔ sɔɔŋ kindilaa cheleŋndoŋ. Ŋ nɔ tiindaŋndo maa Chɛhowa a Po ndɔɔ “mala naa boondii naa ŋ yeema malaa ve.” (Hibu. 4:​16) Ŋ chɔm tiindaŋ waa naa te ŋ wa pɛ piɛileŋ a nyɛm cheleŋndoŋ okɔɔ, mbo ve bɛɛ a sɔɔŋ iMɛlɛkayaŋ okɔɔ le. Mi Chiisu dimi maa ŋ piɛi a nyɛm dialloŋ yeema woŋ okɔɔ. “Nyɛ diaa naa ŋ dia lepaa o lepaa wo” bɛɛ cho leniŋ. (Luku 11:​3) Konalaŋ o Baabuiyo niŋ ke naa tiindaŋndo maa Chɛhowa nɔla mbo ke naa nyɛ naŋ hau ba wo. Teleŋ valoo kinduŋ o Isɔluɛi niŋndo, mi Chɛhowa ke Ilaicha nyɛdiaa a mɛŋndaŋ. “Pee pɔmbɔ koŋ wa pee ndɔ kolaa ni. Nduyɛ, lepaa o lepaa, beediiyo a visioŋ basabasakuendiaa nda aa chuu ndu ni, a chuu ndu pɛ idii a chuu ndu ichɔl,” a mɛɛ Chɛhowa ndoo chɔm yɛ. (1 Masaa. 17:​3-6) Ŋ nɔ tiindaŋndo maa Chɛhowa tiuba mbo miŋgi sɔɔŋ o nɛiyo opum choo le mi naa bɛɛ sɔla nyɛ naŋ hau ba wo.

¹⁵ Ŋ nɔ tiindaŋndo maa dɔuwɔɔ silala Baabuiyo o wali niŋ mala naa mi nyɛdiaa wa chiɛi niŋ. Mi Lubeka cho o nɔɔ Eesiaa wo cha hei tonya a yuŋgu ndɔɔ okɔɔ. Mi yuŋgu ndɔɔ duau o wali niŋ nyɛ dimiŋ o Maatiu 6:​33 a Pulɔwaa 10:​4 niŋndo o yoomu ndaa niŋ. Ma kɛsiŋ fɛŋ Masale Mɛlɛkaleŋ nyɛ tase nduyɛ a mɛɛ nda wa wanaa wali bɛndu yɛ. Mi Lubeka dimi maa teleŋndo opum mi pɔnɔ ndɔ yiyaŋ maa wali o tosa wo nduyɛ a kindila o cho sɔla o wallo niŋndo cho chaŋyɛi nduɛi nda Mɛlɛka tɛɛŋ luei o kpundɔɔ niŋ. Le hei, mbo mal wali koŋ. Kɛ, ndaa nɔ chuauwa a hiɔɔlu le nda baloo dɔuwɔɔ. Mi Lubeka dimi nyɛ yɔŋnuŋndo. “Miŋ kandu nyɛm nimi nimi pɔmpɔmbɔŋ toosiaa le pisioo. O wɔsila naŋ wa baloo nuuviaa o nɛiyo hoo choo wo kpou, miŋ cha maa Chɛhowa mel naa le. Paale pilɛ bɛɛ ŋ lɔl a mayi le.” Num bɛɛ tiu niŋ pa ba le laalaŋ numndo chɔmndo maa Baabuiyo ke waŋchieeya nɛi chɔmaa sɔviɔɔ hau ni?

16. Yɛɛ cho yɛ wa fulamakɔɔlioo te ŋ tiindaŋ pɛ Chɛhowa?

¹⁶ Fɛɛŋ bɛɛ ŋ kiisaŋ maa te ŋ tol pɛ nɛi  chɔmaa Chɛhowaa kɔɔli, ŋ sɔla niŋ dɛnɛ kɛndɛ le le. Mi kiilanɔɔ Pɔɔl keeku sondoo o diomnda Habakuku dimi laŋ choo aa, “Wana duau tiindaŋ ndɔɔ o Mɛlɛka niŋ ndo, ndu Mɛlɛka siiŋguu wana sakpo Mɛlɛka o hɔl ni, nduyɛ mbo wa yoomu kpeekpei.” (Kalee. 3:​11; Haba. 2:​4) Lelaŋ, i cho suɛi sɔvɛ le miŋ dɔu tiindaŋndo o Wana mala naa kpeekpeiyo niŋ. Mi Pɔɔl loonuŋ naa maa Mɛlɛka “nɔla ni nyɛ o nyɛ naa ŋ nyuna ndu le ndu, mbo tosal naa ndu mbo hiou bɛɛ mɛɛ naa ŋ nyuna ndu yɛ, nduyɛ mbo hiou bɛɛ nyɛ naa ŋ tuunuŋ o kɔllo poloŋ poloŋ bɛndu. A kpaaya ndɔ cho wallo o naa niŋndo sanaa Mɛlɛka tosa muŋ kinɛi ni.” (Ɛfi. 3:​20) Buɛiyaa Chɛhowaa tosa nyɛ o nyɛ nda nɔla le hɛnaŋ Mɛlɛkaa tosaa. Kɛ a sina kpeleŋ ndaa. O Chɛhowa niŋ nda duau tiindaŋ ndaa ni le mbo dɔu fulamakɔɔlioo sala. Vɛ, ŋ niŋ kɔllo le sinaa maa Mɛlɛka naa cho a naa latulu le?

17. (a) Vɛɛ piɛile kiilaa le tiindaŋndo sɔla yɛ mulioo? (b) Le yɛɛ naŋ dimi yɛ maa piɛile naaleŋ le chɔɔloo tiindaŋndo sɔlaa cho mulioo sɔla?

¹⁷ Te ŋ yiyaŋ pɛ a nyɛ naŋ laŋga yaasiaa wo, mi naa bɛɛ dimi mɛɛ kiilaa dimul Masanɔɔ yɛ aa, “Mala naa mi ŋ chɔɔlu tiindaŋndo sɔla.” (Luku 17:​5) Mi piɛile kiilaa le sɔla mulioo, taama taama a Pɛŋtikɔɔsi 33 boondii Chiisu ve, teleŋ nyina diandaa tol nda choo wo. Nduyɛ, ma sɔla sina pɛŋgu yiŋgoloŋndo o sabu Mɛlɛkaa niŋ. Mi hei kindi tiindaŋ ndaa. Yɛɛ wa yɛ fulamakɔɔlioo? Ma chua balle le yooŋgu kɛndɔɔ dimioo a teleŋ koŋ. (Kolo. 1:​23) Te ŋ piɛi pɛ le miŋ chɔɔlu tiindaŋndo sɔla, ŋ nɔ pa o kɔl maa ŋ cho mulioo sɔla? Baabuiyo ke naa tiindaŋndo maa ŋ sɔla mulioo te ŋ “nyuna ndu le nyɛ o nyɛ pɛ, nduyɛ mbo wa o hɛnaŋ ndɔɔ niŋ.”—1 Chɔŋ 5:​14.