TELEŊ ya wa wɔsilaŋ la ŋɔmahiɔɔlu wo ya mɛɛlu hindɔɔ ni. O cho niŋ wɔsilaŋ 34 o lɛŋnde Kodivuaaleŋ niŋ. Nduyɛ hau bɛɛ, tuŋgoo ya cho wɔ ni. A teleŋ ya sina maa I cho lɛ hindɔɔ le wo, mi wanaa velu ya wa dɛɛniaa ya le mi tosa baalaa kekelee le halikpeŋ mi faŋa kɔllo o biŋgile nileŋ choo. Mi kumbi fondaŋ pisiaa nyɛm kuamaŋ naŋ dia woŋ o chiɛi naa lachi, nduyɛ mi kɛsi ndu o diandaa walaŋ. Mi wanaa piandaa ndaa hiŋ o fondaŋ nuu hoo tau.

Kɛ, baala kekelee wo tosaa siŋga sɔɔŋ kpou le. Tuŋgoo ya wa wɔ ni, nduyɛ le sɔɔŋ taaniŋndoŋ tosaa bɛɛ, mɛɛ mi yaa fafala. Mɛɛ wɔŋgulaŋ kɛsioo o naa filioŋnda cho naa yɛ. Le wanaa hiou ya bandei bɛmbɔɔ lediiŋnda ndaa toosiaa nyɛ o nyɛ fee ni. Mɔnɛi pila yaa bii le yapila ni. Kɛ mi sɔɔŋ siŋgaŋ teleŋ ya fuuluu wɔsilaŋ 14 wo.

Paale pile, mɛɛ waŋlaanduaa Chɛhowɛiya a ŋiɔɔŋ hiŋ piindoo o fondaŋ ni pisiaa, ma kandu Baabuiyo pɛɛkoo a ya. Mi keŋela saalɔŋ maa Chɛhowa sinaa, a sabu ndɔɔ cho nyɛ sɔvɛ mbo hiau biŋgile nileŋ. Mi keŋ mala ya tau. Mi Sam 73:​28 simnuŋ bolle Baabuile ya hɛnaŋ tau leŋ. Buŋgɛi tasei o bolle Baabuileŋ ndeŋ niŋ dimi aa, “Kɛ ya ya I che ndi bɔɔ suɛi kɛndɛ le waa Mɛlɛka o ibuŋ.”

O lepilɛ niŋ kpe, mi yuŋgu nuu kua Bokina Faso le challe, nduyɛ mi yoomu nuu siŋgaŋ vɛlɛ. O fondaŋ naŋ wa o Kodivuaa niŋndo, waŋnda ndaa sina ya o fondaŋ ni pisiaa maa wana biŋgioo ya cho ni. Kɛ miallo ya wa o fondaŋ sɛnɛi naŋ kuɛ wo ni. Nduyɛ mi kaamaa ndoo bii wanaa bɔɔbɔɔ a biŋgile nileŋ. Nuaa tuŋ ndaa nua ya ni. Le hei, mi kɛɛ fulaa o bɛɛ teleŋndo opum le lɔɔla bɔɔbɔɔ. Okoŋ, mi yiyaŋ mɛɛ i wa suɛi kɛndɛ le waa Chɛhowa o ibuŋ yɛ. Mi poonyial lɛuvii Seiyaa Chɛhowaa, nduyɛ mi Nani, ndepilɛnɔ kaa kɛndɛ hiŋ yooŋgu kɛndɔɔ dimioo o lɛŋnde leŋ niŋndo huŋ o ya lo o kandu pupul wana kɛsi peloŋ nyɛkɛndɛiyo choo.

Sioonde pila nɛilaŋ o fondaŋ naŋ cho wo nɔ ni, nduyɛ chulukaa pila la chuluka ni. Vɛlɛ loolioo pila la nɔ a sialteŋ ni. Delilaŋ pila Nani ndoo deli a kandu pupul ndɔɔ le ya hunɔɔ pɛɛkoo ni. Kɛ ndoo nɔ isiooŋ te. Nduyɛ mi ndoo kuɛ a ya o bɔŋaŋnda leKilisiɔŋndaŋ. Mi sina maa I cho fula o bɛɛ le mi biunuŋ woolu waŋnda cho wa a ya wo le kɔlaŋ o bɔŋaŋndaŋ ndaŋ. Le handɔɔ lechoo, mi sina maa te I hel pɛ mi chal o kandu pupullo hoo kɔɔli, o cho chɔɔlu lusul, mbo chɔɔlu simnɔŋ ikala le kiltaŋ a ndu. Kɛ a koŋ kpou, mi chɛl le kɔlaŋ. Nduyɛ mi kɛsiŋ o kɔl  buŋgɛi diiŋ nduɛi o bolle Baabuile ya hɛnaŋndeŋ niŋ. “Mɛlɛka Yaawɛɛ Kpuluŋguma bɛndoo ndu ya I tiindaŋ ni maa o nɔla mbo manda ya.”

Teleŋndaŋ lapum, mi Nani a ya kei delɔɔ o loolioo niŋ. Kɛ i wa bɔɔ suɛi kɛndɛ le kɔlaŋ o bɔŋaŋnda leKilisiɔŋndaŋ. Teŋgeŋndo wa bɔɔ hɔlaa mɛmɛlɛsɛɛyaa ndaa chɔm ya o Toŋgo leMasaa niŋnda tɛɛŋ a mɛɛ waŋnda ndaa woolu a biŋgile nileŋ o bɛɛ yɛ! O paŋguŋ ŋɔmahiɔɔlu kɔɔli, mi sɔla yiŋɔɔ.

Buŋgɛi yaa ve o bolle Baabuile ya hɛnaŋ tau leŋ niŋ dimi aa, “Nduyɛ I cho waŋnda kpou dimul a walta ndɔla kɔndɔfiltaŋ okɔɔ.” Yaa sina maa simul bɛndoo pila wali dimiaa yooŋgu kɛndɔɔ wa niŋ le ya ni. I loonuŋndɔ teleŋ tase ya kuɛ yooŋgu kɛndɔɔ dimioo chiɛiyo a chiɛiyo wo. Mi chuaambuaa a kaasoŋnda woolu a biŋgile nileŋ, ma wa ya balɔɔ kɔɔli, nduyɛ ma wa ya tuulaa mɛɛ ya kua yɛ. Mi hei tɛɛmbuu ya kɔllo tau. Kɛ mi hiau lachi a yapila loonɔŋndo lɔɔlɔɔ maa a yeema a Kpele Hɛnɛkiɔɔ tau a mɛɛ ya bɛɛ yeema ndu yɛ. Lelaŋ, mi lambaŋ nda yooŋgu kɛndɔɔ dimullo.

Le sɔɔŋ tosaa tɛtɛlɛ, mi sɔla nɛɛso peluŋ ŋgaa nda nyumbu a ba wo. Mi wana naŋ kua latulu yooŋgu kɛndɔɔ dimioo wo ndoo nyindu ya le pembei helɔɔ. Nduyɛ te ŋ wa pɛ pembei tolɔɔ, ndu bɛɛ huulu o chal o nɛɛsoo choo. Wali dimiaa yooŋgu kɛndɔɔ wa o kala o tase ndɔ, kɛ mbo simnuŋ nyɛ nyaale bɛndu. Nduyɛ mi hei tosa mi simnuŋ kɔɔfanɔ lɔɔlɔɔ wo o wɔsi 1998 ve niŋ.

Mi yaa tosa pɛɛkula Baabuilaŋ tau, nduyɛ mi wanaa ŋuɛɛnu o laŋ tɛɛŋ sɔla yiŋɔɔ. Mi naŋ kɔl mɛɛ pɔmbɔ nuu opilɛ chɛl vɛlɛ tonyaa! Tueiyɔɔ a hiouwɔɔ lachi acheleŋnda wa bɔɔ teleŋ kɔlkɛndɛ le ya. Mɛɛ naa ihueiyo wa ya saaŋgiaa paale pilɛ, mi sɔla yau fula Kodivuaa le ya wo. Po feleŋgɔnɔ wa sukuu bɛndoo tosaa Bokina Faso naŋ. Nduyɛ paale tasele ya komal ndu leŋ, mi kandu pɛɛku Baabuiyo tosaa a ndu. Mi dimul puaapilɛnɔɔ le ma hiou lachi a pɛɛkoo. Kɛ mi po sukuunɔɔ hoo kua Kodivuaa. I wa bɔɔ a kɔlkɛndɛ le tueiyɔɔ maa poo hoo simnuŋ puaapilɛnɔ yiŋndɔ le wo!

Yɛɛ ya cho yɛ tosaa le yapila malaa? Mi kɔɔna mala namtaa wo dimi le ya sɔndɔɔ pɛɛkoo. Mi chua pɛɛkaa opilɛ cha mɛɛ ya tosa wallo yɛ, nduyɛ mbo dimi aa, “Ŋ nɔ miŋ pɛɛku ndu sɛndaŋ toosiaa.” Nduyɛ ma pɛɛku ya. Mi toosiaa sɛŋma tuaaŋ a ma cheleŋndaŋ o yalo bɛɛ. Waŋnda yeema sɛŋma niaŋ, nduyɛ ma dimul wanaa cheleŋnda a maŋ okɔɔ. Mi soliŋ kandu pupul ni peluŋ ŋgaa wo kpeku le kɔlaŋ a maŋ o waŋnda lo.

Mi tambu kɔl tau o wɔsi 2004 niŋ. Mɛɛ paa kɔɔ ni sakaŋ paandu wo hiou lachi a ya nɛiyo tau, mi mal kɔɔfale lɔɔlɔɔ leŋ. Kɛ a koŋ kpou, I cho wali dimiaa yooŋgu kɛndɔɔ tosaa kekelee.

Waŋnda dimi maa a sina ya le hɔlaa niaa mɛmɛlɛsɛɛ wa. I nɔ saboo tau le waa a kɔlkɛndɛ kanifuule, I che ndi bɔɔ suɛi kɛndɛ le waa Mɛlɛka o ibuŋ.—Bundɛi Sela Maiga ve.