Wanaa cho o chaŋyɛi niŋnda suukaŋ ndapila tɛɛŋ le mi chaŋyɛi ndɛi wa nyɛkɛndɛi. Lelaŋ Mɛlɛka bɛɛ dimul naa le suɛi o ndu lo ni, le halikpeŋ mi chaŋyɛi tuu kpɛiye wa naa ndaa tɛɛŋ. Mɛlɛka dimi aa, “La huŋ niŋ naa ya chua, mi la huŋ piɛi ya le nyɛ nya hau ba wo, nduyɛ mi muli nya diom.” (Chɛluimaya 29:​12) Te a soo pɛ o Mɛlɛka lo, a cho ndu ‘sɔɔŋguu . . . ikɛi. Ndu bɛɛ cho num sɔɔŋguu ikɛi.’ (Chemisi 4:​8) Baabuiyo ke naa tiindaŋndo maa Chɛhowa ‘cho o bɛɛndiaŋ teleŋ o teleŋ le wanaa nyuna ndu diom nda malaa.’ (Sam 145:​18) Mɛɛ naŋ hiau lachi fau a Mɛlɛka piɛiyo, lende koni chaŋyɛi nɛi naa ndaa hiau lachi ni.

Mi Chiisu dimi aa, “Nya cho finyaa mi la nɔ chuauwa wa kinɛi, ɔɔ wana cho nya tɛɛŋ, te po ndɔɔ o piɛi ndu beediiyo pɛ, o ke ndu pouwo wo? Kɛlɛŋgaa wana cho nya tɛɛŋ, te po ndɔɔ piɛi ndu suuwo pɛ, o ke ndu kɛuwo wo? Wana bɛɛ. Naa nya . . . sina wɔ le chuauwaa nyaa nyɛm kɛndɔŋ kioo, la ke nda ŋ wɔɔŋndoŋ te, Mɛlɛka Finya nya cho o choo choo wo yɛ? Kioo o ke wanaa piɛi ndu wa nyɛm kɛndɔŋ ni.” (Maatiu 7:​9-11) A tonya, Mɛlɛka dimul num le ma piɛi ndu kanifuule, ‘ndu manda num ni.’ Nduyɛ o yeema le num malaa. (Pitɛ Tasoo 5:​7) O dimul num pɛɛŋ le ma kuɛ a bahawɛila numndaŋ o ndu lo. Baabuiyo dimul naa aa, “La nɔ buulaŋ o isɔɔ o isɔɔ niŋ te. Nduyɛ, isɔɔ o isɔɔ nya wa Mɛlɛka piɛiyo le ndi pɛ, la chɔm ndu nyɛ nya hau ba le ndu wo. Nduyɛ, pɛŋgu o pɛŋgu nya wa ndu nyunaa le nyɛ o nyɛ pɛ, la mel ndu balikaa.”—Filipiaŋnda 4:​6.

Wanaa pɛɛku a kaa wanachioo okɔɔ wa che maa waŋnda o miiliɔŋndaŋ niŋ nɔ yeemɛi le Mɛlɛka piɛiyo. Nduyɛ wanaa laalaŋ o Mɛlɛka niŋ te wa bɛɛ apum nɔ yeemɛi le piɛileŋ. * Hei chɔm kpendekele ni maa a yeemɛi hei Mɛlɛka toosiaa waŋchieeya ni. Mi Chiisu dimi aa, “Nyaaloo cho le wanaa landuŋ kɔl le suɛi Mɛlɛkɛi ya.” (Maatiu 5:​3, NW) Nɛiyo opilɛ, o naŋ peelu yeemɛi keŋndo cho piɛileŋ o Mɛlɛka lo teleŋ o teleŋ ni.

Te ŋ chɛl pɛ dimul Mɛlɛka dimul naa le piɛileŋ naa ndu cha wo, tɔnɔla kuɛɛ naŋ wa yɛ kɔl?