I tasei, sɔla kɔl dɛɛniaa o tonya dimiŋ hoo wo niŋ. Ndu cho ni maa, Mɛlɛka cho chɔɔ nyɛpalaa cho hau o chieeŋndo choo wo, nduyɛ o tuu le isɔɔ tosa a ndu okɔɔ. (Sam 72:13, 14) Mɛlɛka dimi o Diom ndɔɔ niŋ, Baabuiyo maa “o cho naa nyɛ palaa koŋ faŋa choo.” Lɔɔ kuɛɛ? “Boondii Masanɔɔ Chiisu cho chɔnɔŋ ɛchɛnɛ latulu a kiilaa nduaa mi Mɛlɛka chɔm ndu o ŋwaŋnda chiee lo ve, boondii keŋ o cho hunɔɔ suɛi hei tosa ni. . . . O koŋ, wanaa kɛɛ Mɛlɛka wa ni a wanaa kɛɛ le nyɛ yooŋgu kɛndɔɔ hoo dimi wo tosaa wa, ndu yɔŋnuŋ ni maa Masanɔ naa Chiisu yooŋgoo a ndu okɔɔ, wanaa kaŋ o cho nda hunɔɔ nyɛ palaa tuisi choo.” (Tɛsaloniaŋ Diiŋ Ndɔɔ 1:7, 8) Hunɔɔ Chiisoo hoo cho yɔŋnɔŋ o chilaŋ niŋ, o Baabuiyo veelu aa ‘paale bɛnduleŋ’ ndo. “Leŋ le yɔŋnuŋ ni maa, Mɛlɛka nɔ kpaayaa kpou wo, paale ndɔleŋ.” Paale leŋ le nɔ vɛlɛ diolaŋ ni aa Amakɛdɔŋ.—Sɔɔŋ Chɔɔmaŋndoŋ 16:14, 16.

O cho waŋchieeya le Mɛlɛka cho soliŋ kpeku o chilaŋ niŋ o chɔu koŋ niŋ te, kɛ Chiisu Kiliti Po ndɔ, a nyaa yoomaa kpaayaa bɛnduaa o toosiaa o inyinaya wa o cho soliŋ kpeku le wanaa dɛnɛ wɔɔŋnda chɔulabaa ni. Nyaa yoomaa cho o choo choo niŋnda cho hunɔɔ dɛnɛ wɔɔŋ suu o suu faŋa.—Aisaya 11:4; Sɔɔŋ Chɔɔmaŋndoŋ 19:11-16.

Chɔŋ o sindɔɔ niŋ mbo huŋ bii a hau, mɛɛ Mɛlɛka che chɔuwo yɛ siŋgaŋ ndɔ le. O che wɔ chɔuwo maa nɛi sɔviɔɔ cho koŋ ni le wanaa tuisi acheleŋnda nyɛkindilaa choo wa tɛɛmboo a dɛnɛ wɔɔŋndo. Kɛ i cho maa chɔŋ o sindɔɔ niŋ mbo huŋ bii a hau, Mɛlɛka ndupilɛ kpe chɔm teleŋ chɔu waa naa nɔ mbo tosaŋndo ni, a wanaa nɔ ma tosa ndu wa. A mɛɛ naŋ che  yɛ, Mɛlɛka chii niŋ kɛɛsiaa maa chɔu cho dɛnɛ wɔɔŋndo faŋa nduyɛ mbo miŋgi maa le wanaa cho o nyɛkindilaa bɛŋgu wa cho wa o chilaŋ niŋ. Nduyɛ Chiisu Kiliti Po ndɔ, cho chɔu koŋ tosa ni. Hei chɔm ni maa Mɛlɛka chɛl chɔula cho hau tosaŋndo o chieeŋndo choo laŋ te, o yɔŋ bɛɛ mi sabu nda cho laŋ tosaa wo wa o sɔvɛ.

Le tamaseliiyo, yiyaŋndɔ a pɔmbɔɔ a bɛndoo okɔɔ, a kandu chɔulabaa tuma finya nda cho o bɛɛ le wo. Ma pɛŋgi tiŋ chɔulabaa le finya nda veeloo o foŋndo choo. Mi opilɛ bii seiyo maa chaaŋ ndɔ kandu ndu chɔulabaa ni, mi chaaŋ ndɔ bɛɛ dimi maa ndu tosal ndu suɛi wɔɔŋnde ni. Nda ŋiɔɔŋ kpou bii seiyo o finya nda lo, nduyɛ o kɛ kɛ yeema mi finya nda sim ndu kɔɔli o sɔŋgɔ koŋ niŋ. Kɛ mɛɛ finya nda tuei nyɛ nda dimi wo, mbo dimul nda maa a pɛŋgi chɔulabaa nduyɛ ma chum ndu le sɔŋgɔɔ bɛɛndiaa te o hiŋ pɛ o bɛɛ. Mi nda ŋiɔɔŋ kpou chum le teleŋ biŋgi. Kɛ o viu bɛɛ le ma kandu vɛlɛ chɔulabaa. Mɛɛ finya nda hiŋ o bɛɛ, o niŋ kɔl a nyɛ nda tosa wo le, nduyɛ mbo luaa nda kpou le mɛɛ nda kɛɛ ndu nilaŋ yaŋɔɔ yɛ.

Hau bɛɛ, lɛŋii cho chɔulaŋ tosaa ve cho Mɛlɛka nyunaa lɔɔlɔɔ le nda tooloo. Kɛ Mɛlɛka cho hau lelɛŋ o lelɛŋ kɔɔli o chɔulaŋ niŋ te. O dimi kpendekele o Baabuiyo niŋ aa, “A yɔŋ bɛɛ mi waŋndo tosa i wɔɔŋnde a nya, la miŋgul ndu a i wɔɔŋ te.” Nduyɛ “la wa wanaa miŋgiaa maa le.” (Luomaŋnda 12:17, 19) Le handɔɔ lechoo, Mɛlɛka dimul waŋchieeya maa a nɔ ma biunuŋ ma chum ndu. Ndu cho hunɔɔ chɔulaba o paale Amakɛdɔŋ ndeŋ choo ni. (Sam 37:7) Te kaalaŋ la kɛɛ pɛ le Mɛlɛka chumndo, nduyɛ mi la luei balaŋ o chɔulaŋ niŋ, o cho chɔulaŋ ndaŋ chɔɔ maa kaa heelaŋ niilu latanda o kɛɛ wo. Lelaŋ, Mɛlɛka cho kɔl ndɔ tuuwo chɔm o chɔu Amakɛdɔŋndo, nduyɛ mbo chii sɔŋgɔlaŋ o kaalaŋ niŋ kpou lefɛɛŋ a fɛɛŋ. O “cho tosa mi chɔulaŋ la chuu ba o ba fee o chieeŋndo choo.” (Sam 46:9; Aisaya 34:2) A tonya, Amakɛdɔŋ cho wa chɔu cho hunɔɔ chɔulaŋ kpou chiiyo ni.

Mɛɛlula chɔulaŋ cho nɛiyo opilɛ le tɔnɔla bɔɔbɔɔ Masale Mɛlɛkaleŋ ni. Mi Chiisu suaa a masale leŋ okɔɔ tau o piɛileŋ niŋ aa, “Wa niko masa ŋwaŋnda chiee choo kpou. Tosa a sabu maa waŋnda kpou o chieeŋndo choo a tosa nyɛ ŋ hɛnaŋ ndo, mɛɛ nyɛ ŋ hɛnaŋ ndo o tosaŋ o ɛchɛnɛ yɛ.” (Maatiu 6:10) O cho ko chɔulaŋ kpou le Masale Mɛlɛkaleŋ le cho hunɔɔ faŋa le, kɛ le cho tɛɛmbuu nyɛ cho hunɔɔ a chɔuwo, a dɛnɛ wɔɔŋndo wo. * (Sam 37:9, 10, 14, 15) Mɛɛ maa le saboo hoo buɛiyaa Chiisuaa cho lehɔl o nɛi le tɔnɔla Masale Mɛlɛkaleŋ ni.—Pitɛ Diiŋ Ndɔɔ 3:13.

Kɛ le vɛɛ kpɛ naŋ nɔ yɛ miŋ chum le mi Masale Mɛlɛkaleŋ le faŋa saŋgaa kpou, nyɛ kindilaa, a dɛnɛ wɔɔŋndo? Bolii Baabui peeluŋnde chɔm maa o “palɛi mɛɛlɛi” chieeŋ dɛnɛ wɔɔŋndo hoo niŋ naŋ cho ni. (Timoti Diiŋ Ndɔɔ 3:1-5) * Masale Mɛlɛkaleŋ le cho suŋ hunɔɔ palɛi mɛɛlɛi hei faŋa o chɔu Amakɛdɔŋndo.

A mɛɛ naŋ che o tase ndɔ yɛ, wanaa cho tambei sɔla o chɔuwo hoo niŋnda cho wanaa kɛɛ yooŋgu kɛndɔɔ a Masanɔɔ Chiisu okɔɔ wa ni. (Tɛsaloniaŋ Diiŋ Ndɔɔ 1:8) Kɛ loonuŋ maa, Mɛlɛka niŋ kɔl a piɔm wana o wana le, o wa bɛɛ aa wana dɛnɛwɔɔŋndo. (Isikiaa 33:11) Le mɛɛ o “hɛnaŋ mi wana o wana huŋ wa o tɛɛmbaa” o chɔu mɛɛlaa hoo niŋ te yɛ, o cho tosaa a sabu le mi waŋnda dimi yooŋgu kɛndɔɔ a Masanɔ naa Chiisu okɔɔ “ba o ba fee o chieeŋndo choo” tuupa mi mɛɛlulaŋ la fuuluu. (Pitɛ Diiŋ Ndɔɔ 3:8, 9; Maatiu 24:14; Timoti Tasoo 2:3, 4) Tonya, wali dimiaa yooŋgu kɛndɛ Seiyaa Chɛhowaa cho tosaa ba o ba fee o chieeŋndo choo wo ke waŋnda dioo le Mɛlɛka sinaa, le ma chɛl yooŋgu kɛndɔɔ a Chiisu okɔɔ, nduyɛ ma wa achal le chɔɔ paale chɔu ve lɛ niŋ kposoŋ te wo.