1, 2. (a) Buulaŋnda kuɛɛ kalaŋ chuauwa apum nɔ yɛ te chuauwaa ndaa hiou pɛ wɔsilaŋ tɔ? (b) O nɛila kuɛɛ choo Kilisiɔŋaa feleŋguaa kindiŋ yɛ o feleŋgɔyɛi ndɛi niŋ?

TE KALAŊ chuauwaa Kilisiɔŋnda che pɛ chua ndaa yiŋɔɔ, a ve a nyaale tau le. Mi Bɛlɛnisɛ, o chuauwaa nduaa hiɔɔluaa sɔla yiŋɔɔ tuupa ma fuuluu wɔsioŋ 14 wo dimi aa, “Miiyo wa naa bɔɔ. Kɛ miŋ mel Chɛhowa balikaa le mɛɛ chuauwaa naa ndaa yeema ndu piɛiyo yɛ.” Mbo chɔɔlu dimi aa, “Miŋ sina vɛlɛ maa a wɔsiŋ chuauwaa naa fuuluu muŋ ndoŋ, a cho simultaŋ komal puɛɛ.” Te chua numndo wa niŋ pɛ kpasu ɔɔ mbo wa niŋ le sulɔɔ kaasoŋnɔ, a cho sina le sabu Bɛlɛnisɛ dimi suɛi heiyo.

² Ŋ nɔ miŋ sina maa simullo pila feleŋguaa a wanaa velu nda wa sɔla ni. Mi wana pɛɛkaa pilɛ a chuaambuaa okɔɔ dimi aa, “Feleŋgɔyɛi cho teleŋ ‘laseema’ ɔɔ ‘ichuaambɔya’ le. Kɛ teleŋ waŋndo yiyaŋ tau wo i cho ni, teleŋ o yeema chaŋyaŋndo, a teleŋ o yiyaŋ le sɔɔŋ tosaa a ba ndɔ wo.” Mi chuauwaa numnda kila chaŋyɛi sɔvɛi nda Chɛhowaa tɛɛŋ teleŋ nda wa o chuaambɔyɛi ndɛi niŋndo. Ma kila kpeleŋndaŋ le wali dimiaa yooŋgu kɛndɔɔ, ma chua chilaŋ le yɔŋgɔŋndo o Mɛlɛka lo, nduyɛ ma lo lechoo. Ma che maa teleŋ kɛndɔɔ pila feleŋgɔyɛi ndɛi cho le hiouwɔɔ lachioo tosaa o  Mɛlɛka piɛiyo niŋ ni. Nduyɛ ndi koni Chiisu bɛɛ tosa ni teleŋ o wa feleŋgɔnɔ wo. (Nuawɔ Luku 2:52.) Num kala chuaa, yɛɛ ŋ nɔ yɛ ma tosa o wɔsila kalalaŋ ndaŋ bɛŋgu? Ŋ soonuŋndɔ a tuma Chiisu sul kaasoŋnɔɔ wo, mɛɛ ndoo chɔm kaalaa, tuisiŋndo, a taasioo yɛ. Vɛɛ suiliŋndaŋ ndaŋ la mala yɛ num le chua numndo pɛɛkoo mbo piɛi Chɛhowa?

3. Le yɛɛ Chiisu ndoo veelu yɛ kiilaa nduaa aa chaaŋaa nduaa?

³ Mi Chiisu chɔm kaalaa a lo lechoo wo o chaaŋaa nduaa lo. (Nuawɔ Chɔŋ 15:15.) O teleŋ masindɔɔ niŋ, masanɔɔ ndoo chɔm buɛiyaa nduaa yiyaŋnda ndɔlaŋ te. Kɛ, mi Chiisu ndu chɔm maa masanɔɔ a chaaŋ o kiilaa nduaa dɔu tiindaŋndo o ndu niŋnda o cho ni. Ndoo nɔ teleŋndo le nda yiyaŋnda ndɔlaŋ chɔmndo, nduyɛ mi ndoo yaŋ nilaŋ yekeŋ te ndaa wa pɛ nyɛ cho nda o kɔllo dimioo. (Maki 6:30-32) Mi suukaŋ kaalaa waa naa tosa chaŋyɛi i tuu kpɛi Chiisu tɛɛŋ a kiilaa nduaa. Nduyɛ mi hei bɛɛndiaa nda le kalaŋndaŋ chuaa o chilaŋ niŋ o Mɛlɛka iɛiyo niŋ.

4. Vɛɛ ŋ looku yɛ chaŋyɛi tosa a chua numndo, nduyɛ ma wa vɛlɛ wali numndo tosaa maa kala chua? (Tofa fotueiyo o peele naŋ kandu leŋ choo.)

⁴ Maikɛl ndoo nɔ chuauwa a ŋiɔɔŋ. Mbo dimi aa, “Mi che bɛɛ naa kalaŋ chuauwa simnuŋ sulaŋaa chuauwaa naa le, kɛ ŋ nɔla miŋ wa chaaŋaa ndaa.” Mi wanaa cho o chaŋyɛi niŋnda nɔ teleŋndo le bɔŋaa diompilɛ. Piɛi le yɛlɛmiaa tosaa o wali numndo niŋ, ɔɔ sɔɔŋ cheleŋ le teleŋndo nɔɔ le chuauwaa numnda. Mi wanaa cho o chaŋyɛi niŋnda suukaŋ a yeemaŋ ndaŋ okɔɔ. Lelaŋ, kindiŋ ma hɛnaŋ nyɛm chua numndo yeema woŋ, nyɛchaa o hɛnaŋndo, vidueilaŋ, ɔɔ pisulta o hɛnaŋ ndaŋ. Mi Ilaliaa o lɛŋnde Itali leŋ niŋ dimi aa, “Mi wanaa velu ya wa hɛnaŋ a nyɛchaa ya yaŋ nilaŋndo. Mi finya nuu simnuŋ chaaŋ ni kɛndɛ kɛndɛ. Nduyɛ a sɔɔŋ lasiomboŋ okɔɔ bɛɛ, i wa fɛɛsɛŋ le suɛi o ndu lo.” Te a tosa pɛ chaŋyɛi a chuauwaa numnda nduyɛ ma mala nda le chaŋyɛi kpɛɛluŋnde tosaa a Chɛhowa, koŋ chɔm naa maa a nɔ ma mal wali ŋ nɔ le tosaa o yuŋgoo niŋndo lɛŋ te. (Sam 25:14) O baa pilɔɔ choo, chɔm nda kaalaa a bɛɛleŋ, nduyɛ ma wa fɛɛsɛŋ le suɛi o nda lo. O hei niŋ, naapum nda bɛɛ cho num dimul a bahawɛila ndalaŋ okɔɔ.

5. Vɛɛ Chiisu mala yɛ buɛiyaa nduaa le ma sina maa nyaaloo cho o wali Chɛhowaa tosaa niŋ?

⁵ Chiisu ndoo kaala buɛiyaa nduaa nduyɛ chaaŋaa nduaa nda wa ni. Ndoo yeema le ma sina maa nyaaloo cho o wali Chɛhowaa tosaa niŋ. Lelaŋ, yeemɛi nduɛi wa ni, le ma fula ŋdial o walta iMɛlɛkaya laŋ tosaa niŋ. A tonya, Chiisu ndoo yeema nda le mi ndaa siiŋguu waŋnda buɛiyaa ndɔ a dialuŋ fulaa! Nduyɛ mbo ke buɛiyaa nduaa tiindaŋndo maa o cho nda mala le ma tiuba.—Maa. 28:19, 20.

6, 7. Le yɛɛ kalaŋ chuauwaa kɛndiaa nɔ yɛ ma kila sɔɔŋ iMɛlɛkayaŋ tosaa nduyɛ ma lo lechoo?

⁶ A yeema mi chuauwaa numnda wa kɛndiaa o Mɛlɛka piɛiyo niŋ. Nduyɛ Mɛlɛka yeema num ma pɛɛku chuauwaa numnda ‘pɛɛkula Masanɔɔ Mɛlɛkalaŋ, nduyɛ ma sila nda silala ndɔlaŋ.’ (Ɛfi. 6:4) Lelaŋ, soliŋ kalaŋ Mɛlɛka ke numndo kpeku le pɛɛku iMɛlɛkayaa kandɔɔ, nduyɛ ma lo lechoo. Le tamaseliiyo, ma dimi maa chuauwaa numnda nɔ ma pɛɛku kaŋgalaŋ kanifuule, pɛɛkoo hoo cho nyɛ sɔvɛ le nda. Nduyɛ a nɔ tiindaŋndo maa a cho nda kaalaa tɔlɔɔ o kɔl le pɛɛkoo. Lende koni kalaŋ chuauwaa kɛndiaa nɔ ni ma sina maa chuauwaa ndaa cho tɔnɔɔ sɔla o “pɛɛkula Masanɔɔ Mɛlɛkalaŋ” niŋ o bɔŋaŋnda leKilisiɔŋndaŋ, a pɛɛkula iMɛlɛkaya cheleŋ. Le mɛɛ pɛɛku iMɛlɛkayaa cho nyɛ sɔvɛ yɛ, kindiŋ ma tɔl chuauwaa numnda kaalaa o kɔl le sɔɔŋ iMɛlɛkayaŋ, a kɔlhiniaa le taasioo sɔlaa. (Pulɔ. 24:14) Nuuviaa nɛiyo le chuauwaa numnda malaa mɛɛ  Chiisu mala buɛiyaa nduaa yɛ. Le ma sɔla ba tiuwaa o wali pollo niŋ, mɛɛ ma tɔl nda kaalaa o kɔl le Diom Mɛlɛkaa pɛɛkoo, nduyɛ ma mala nda ma lo o kɛɛsiaa ndaa choo le wali pollo.

⁷ Vɛɛ sɔɔŋ iMɛlɛkayaŋ tosaa lɔɔlɔɔ mala yɛ chuauwaa numnda? Mi Ɛliŋ o lɛŋnde Saut Afilikaleŋ niŋ dimi aa, “Mi naa chuaambuaa chaŋ lɔɔlɔɔ, nduyɛ miŋ ŋɔɔchiaŋ le pɛɛku Baabuiyo, kɔlaŋ o bɔŋaŋndaŋ, a yooŋgu kɛndɔɔ dimioo. Lepum miŋ tɛɛmbuu pɛɛku leyuŋgoo a siɛlɛi fuu, kanifuule ŋ yeema ndu tosa le. Kɛ wanaa velu naa wa vi ŋdial a ndi le.” Mi Ɛliŋ chɔɔlu dimi aa, “Pɛɛku koŋ mala ya le biuwɔŋ vilɛiyo nɔɔ ni. Kɛ suŋ suŋ niŋ, te I lo o kɛɛsiaa nuu choo le sɔɔŋ iMɛlɛkayaŋ te, I dounuŋ tamalaa le miiŋgoo lechoo le. I laalaŋ maa yaa nɔ niŋ yeemɛi waa naa le, te wanaa velu ya wa ndaa sim o peloŋ choo le sɔɔŋ iMɛlɛkayaŋ te. Te ndaa vi ŋdial pɛ, a tonya, I wa ndi chɔ hau tɛtɛlɛ le bɔŋaŋnda leKilisiɔŋndaŋ biondɔɔ, ɔɔ sɔɔŋ iMɛlɛkayaŋ cheleŋ.”

8. (a) Vɛɛ Chiisu ndoo sina yɛ naa ba ndɔɔ kunduŋnda? (b) Vɛɛ tamasi tuisiaŋ Chiisoo ndoo piiliaŋ yɛ buɛiyaa nduaa?

⁸ Mi che bɛɛ naa Chiisu ndoo nɔ haki le, kɛ a tuisiŋndo, mbo sina naa ba ndɔɔ kunduŋnda, nduyɛ Chɛhowa ndoo tiindaŋ ni. (Nuawɔ Chɔŋ 5:19.) Baa buɛiyaa Chiisuaa ndaa ke ndu lebɛɛ le mɛɛ o tuisiŋ yɛ le? Sako bɛɛ. Kɛ mɛɛ ndoo hiau lachi a Chɛhowa tiindaŋndo fau, lende koni buɛiyaa nduaa wa hiouwɔɔ lachi a ndu tiindaŋndo ni. Okoŋ kɔɔli, ma tual tamasi ndɔ tuisiaŋndo kɔɔli.—Walta. 3:12, 13, 16.

9. Te a tuisiŋ pɛ le mal hakioo dimioo, nduyɛ ma sina naa ba numndo kunduŋ nda, vɛɛ hei piiliaŋ yɛ chuauwaa numnda?

⁹ Naa ba naa kunduŋ nda cho tau. Ŋ cho walaŋ maa Chiisu le. Le hei, miŋ benduŋ. Tuisiŋ ma sina maa o cho sɔɔŋ fau le ŋ tiuba le tosaa le, nduyɛ ma chɛl maa ma benduŋ. (1 Chɔŋ 1:8) O koŋ kɔɔli, nɛɛ ŋ ke yɛ bɛɛleŋ tau? Wana num bana chɛl maa o benduŋndo, ɔɔ o dimi mal haki le wo? Te chua numndo tuei num pɛ mal hakioo dimioo le biondɔŋnda numndaŋ, o cho hiouwɔɔ lachi a num bɛɛleŋ kioo. Ndu bɛɛ cho pɛɛku le biondɔŋnda ndɔlaŋ chɛlɔɔ. Mi Losmeele nɔ chuauwaa sulaa a yaa wo dimi aa, “Mi naŋ chɛl biondɔŋnda naalaŋ, nduyɛ keŋ tosa ni mi chuauwaa naa wa fɛɛsɛŋ le naa hahawɛila ndalaŋ dimullo. Naŋ sina naa ba naa kunduŋ nda, miŋ pɛɛku chuaa naa fondaŋ nda nɔ ma muliŋ le bahawɛila ndalaŋ solioo wo. Te ndaa yeema pɛ malaa, mi naŋ dimul nda lɔɔlɔɔ le nuaa o yaula Baabuilaŋ niŋ, nduyɛ mi naŋ piɛi latulu.”

10. Vɛɛ Chiisu ndoo chɔm yɛ tuisiŋndo mɛɛ o wa buɛiyaa nduaa sɔɔŋ dimullo?

¹⁰ Chiisu ndoo nɔ kpaayaa le buɛiyaa nduaa sɔɔŋ dimullo. Kɛ a tuisiŋndo, lɔɔlɔɔ mi ndoo chɔm nda sabu o dimi suɛi keŋ ndo. Le tamaseliiyo, o dimul ko buɛiyaa nduaa le ma landuŋ ndɔ fɛŋ kɔl le Masale Mɛlɛkaleŋ a sandii Mɛlɛkɛi le, kɛ mbo dimi vɛlɛ aa, “Nyɔɔŋ ŋ tɔɔŋ bɛɛ fau Mɛlɛka nɔla mbo ke nya.” Mɛɛ Chiisu dimi aa, “Wana o wana la kilul wana iyama le,” mbo chɔm saboo aa, “Koŋ tosa ni, Mɛlɛka kilul nya iyama le. Kani fondole, mɛɛ nya kilul chaaŋnda yamaŋ yɛ, lende koni Mɛlɛka kilul nya yamɛi ni.”—Maa. 6:31–7:2.

11. Te o bɛnda pɛ, le yɛɛ o wa yɛ suɛi taasi le mi kala chuaa chɔm sabulaŋ le sawa o dɔu wo ɔɔ kɛɛsiaa o tosa wo?

¹¹ Te o bɛnda pɛ, tɛɛsiaa le sabu ŋ dɔu sawaa wo, ɔɔ kɛɛsiaa ŋ tosa wo. Te chua numndo sina pɛ yiyaŋ numndo o suɛi ŋ dimi ve choo, o nɔla mbo diikuŋ num a kɔllo wulee. Mi Bali ndoo manda chuauwa a hiɔɔlu wo dimi aa, “Chuauwaa numnda sabulaŋ chɔmndo mala nda ma tiindaŋ o num niŋ. Kanifuule, a cho chɔ maa a tosa ko kɛɛsiaalaŋ le tosaa leŋ te, kɛ maa taasioo cho o laŋ niŋ.”  Te chuaambɔɔ wa hindɔɔ o kaasoŋyɛi niŋ pɛ, o hɛnaŋ mbo tosa sɔɔŋ a ba ndɔ. (Luomaŋ. 12:1) Mi Bali tɛɛsiaa aa, “Chuaambuaa nɔ ma pɛɛku le kɛɛsiaala nɔ saboo laŋ tosaa a taasi, kɛ o cho la yiyaŋ ndaa nyindu nda le tosaa laŋ te.” (Sam 119:34) Te o yɔŋ pɛ ma chɔm sabulaŋ le kɛɛsiaala ŋ tosalaŋ, chua num feleŋgɔnɔɔ cho sina maa a nɔ bɛɛleŋ le ndu le mɛɛ o cho sulɔɔ kaasoŋnɔ yɛ, nduyɛ ndu bɛɛ nɔla mbo pɛɛku le kɛɛsiaala ndɔlaŋ tosaa a ba ndɔ.

12. Vɛɛ Chiisu ndoo chɔm yɛ taasioo le Pitɛ malaa?

¹² Mi Chiisu chɔm taasioo a sina pɛŋgoo o naa buɛiyaa nduaa ndaa yeema malaa wa. Le tamaseliiyo, kiilanɔɔ Pitɛ ndoo nɔ yiyaŋ wɔɔŋ te mɛɛ o dimul Chiisu maa o chɛl mi i waa lende yɔŋnuŋ ndu le ma dii ndu le. Kɛ mi Chiisu sina maa nyɛ Pitɛ dimi wo cho yiyaŋ kɛndɛ le. Le mbo mala Pitɛ a buɛiya apiliaa, mi Chiisu sila ndu o tuu kpɛi, mbo chɔm fulamakɔɔli wɔɔŋ naŋ sɔla wo te ŋ soliŋ sala le, a salala naŋ sɔla laŋ te ŋ soliŋ pɛ sala. (Maa. 16:21-27) Mi Pitɛ pɛɛku nyɛ o hei niŋ.—1 Pitɛ 2:20, 21.

13, 14. (a) Yɛɛ chɔm yɛ lepum maa tiindaŋ chua numndo nɔ o Mɛlɛka niŋndo cho kpeŋgelaŋ kpeŋgelaŋ? (b) Vɛɛ ŋ soliŋ yɛ taasioo kpeku le chua numndo ɔɔ po numndo sinaa nduyɛ ma mala ndu?

¹³ Piɛi o Chɛhowa lo mbo ke num taasioo le ma sina naa chua numndo yeema malaa wa. (Sam 32:8) Le tamaseliiyo, yɛɛ chɔm yɛ maa tiindaŋ chua numndo nɔ o Mɛlɛka niŋndo cho kpeŋgelaŋ kpeŋgelaŋ? Kɛlɛŋgaa nyaale ndɔɔ cho dɔɔnaŋndo, ɔɔ o kandu sɔɔŋ wɔɔŋndoŋ dimioo a chaaŋaa nduaa laalaŋnda okɔɔ, ɔɔ o kandu num sɔɔŋ viŋndo. Keleŋa yamɛi kioɔɔ maa o haki wɔɔŋ wɔɔŋndo niŋ koni le o cho le. * O baa pilɔɔ choo, pɛɛsa sɔɔŋ waa naa le, ɔɔ ma faŋa kɔllo o sɔɔŋ o cho tosaa o ba ndɔɔ choo woŋ te.

¹⁴ Maa Chiisu, nyuuniaa chua numndo nyɛkɛndɛi a lebɛɛ. Te o wa pɛ ma naŋ mɛŋndaŋ o kɔlɔŋndo niŋ a kalaŋ, ma chuuŋuŋndaŋ ma hiau. Lende koni, te o yɔŋ pɛ ma chiŋalaŋ chua numndo, a cho teleŋ numndo tɛɛmbuu le sinaa yiyaŋnda ndɔlaŋ a tuula ndɔlaŋ. (Nuawɔ Pulɔwaa 20:5.) Mi Ilaliaa  naŋ soo suŋ a ndu okɔɔ wo dimi aa, “Teleŋ ya wa feleŋgɔnɔ wo, mi luɛi o yɔm tɛndaa tɛɛŋ. Yaa yeema le kɔlaŋ o nɛi tonyaa choo, nduyɛ a teleŋndo chuaa le waa latulu a chaŋaa niaa o sukuu. Mi hei pala kɔl nuu tau, nduyɛ mi wanaa velu ya wa cha ya ndi o lahɔl. Ichɔl pilɛ, ma dimul la maa a cho ya chɔɔ tiŋ a kɔl tambɛiyo, okoŋ ma nyuna ya le nyɛ yɔŋnuŋndo. Mi kisu yeelaŋ. Mi chɔm nda nyɛ cho ya palaa wo, nduyɛ mi nyuna nda le malaa. Ma kɔmaŋ ya, ma dimul la maa a bii bila, nduyɛ maa a cho ya mala.” Mi wanaa velu Ilaliaa wa mala ndu chɔ chɔ le mbo kandu chaŋyaŋ kɛndɔŋ kilaa o kunda leKilisiɔŋndo niŋ.

15. Tɛɛsiaa wɔ mɛɛ Chiisu ndoo soliŋ taasioo kpeku le tofaa o kɛndɔɔ acheleŋnda o ŋdial lɛ.

¹⁵ Mi Chiisu chɔm vɛlɛ taasioo le chɔɔ naa buɛiyaa nduaa ndaa yeema malaa wa, a o kɛndɛ nda wa tosaa wo. Le tamaseliiyo, mɛɛ po ndoo nɔ diolaŋ aa Nataniɛl lo tuei maa Naasaluɛi Chiisu fula ni, mbo dimi aa, “Naasaluɛi? Wana waa loŋ nɔla mbo tosa suɛi waŋnda sɔla tɔnɔ leniŋ?” (Chɔŋ 1:46) Te a yiyaŋ pɛ a suɛi Naataniɛl dimi hei ve, wana maa vɛɛ ŋ wa yɛ ndu chɔ? Maa wana wɔɔŋndo? Wana hɛliaa lekaa wo? Wana nɔ tiindaŋ te wo? Mi Chiisu chɔm taasioo le mbo tofa Naataniɛl o kɛndɔɔ o ŋdial. Mi Chiisu dimi a ndu okɔɔ aa, “Isɔluɛinɔ kpeekpeiyo cho hoo ni, o hui wana o wana le wo.” (Chɔŋ 1:47) Chiisu ndoo nɔla mbo che nyɛ cho waŋnda o lakɔllo, nduyɛ mbo soliŋ ke o nɔ koŋndo kpeku le mbo tofa le o kɛndɔɔ acheleŋnda o ŋdial.

16. Vɛɛ ŋ looku yɛ chua numndo mala le suiliŋnda kɛndɛlaŋ nɔɔ?

¹⁶ A nɔla ma che nyɛ cho waŋnda o lakɔllo le. Kɛ a mala Mɛlɛkaa, a nɔla ma soliŋ taasioo kpeku. A nɔla pa ma soliŋ ke ŋ nɔ koŋndo kpeku le o kɛndɔɔ nuaa chua numndo o ŋdial? Wana o wana yeema ma veelu ndu aa “wana mɛliaa ŋsɔɔ” le. O wa o yiyaŋ numndo niŋ ɔɔ o suɛi ŋ dimi ve niŋ ni, veelu chua numndo ɔɔ po numndo aa “wana nila kaloo” ɔɔ “wana mɛliaa ŋsɔɔ” le. O yɔŋ bɛɛ mi chua numndo nɔ kaala waa lende, tosa mbo sina maa a cho chɔɔ o kɛndɔɔ ndu o ŋdial, maa o nɔ yeemɛi le o kɛndɔɔ tosaa. Kindiŋ ma sina sɔɔŋ kɛndɛŋ o tosa woŋ, nduyɛ ma chandu ndu. Te o bɛnda pɛ, chɔɔlu ndu kalaŋndo ke le ndu malaa mbo nɔ suiliŋnda kɛndɛlaŋ. Mi Chiisu tosa keŋ a buɛiyaa nduaa. Teleŋ Chiisu komal Naataniɛl lo (diola ndɔlaŋ la wa vɛlɛ Batɔlɔmiu ni), wɔsioo opilɛ a tɛndaa tɛɛŋ ndoo hiou ni. Mi Chiisu hɛli ndu le waa kiilanɔɔ, nduyɛ mi Naataniɛl chɔm maa Kilisiɔŋnɔ nɔ dialuŋ fulaŋndo o cho ni. (Luku 6:13, 14; Walta. 1:13, 14) Chandɔɔ numndo, a dɛɛniaa ŋ cho wa chua numndo wo cho ndu mala le mbo yiyaŋ maa, Kilisiɔŋnɔ Chɛhowa nɔla mbo soliŋ kpeku wo o cho ni. O cho wana kɛɛ le o kɛndɔɔ tosaa lɔɔlɔɔ wo le.

17, 18. Te a lambaŋ pɛ chua numndo malaa le Chɛhowa piɛiyo, yɛɛ cho yɛ wa fulamakɔɔlioo?

¹⁷ Te a wa pɛ chuauwaa numnda mandaa, ma yiyaŋ lepum maa kiilanɔɔ Pɔɔl, o ndoo simnuŋ finyaa le wanaa bɔɔbɔɔ o mala le Mɛlɛka piɛiyo wa. Mi Pɔɔl tambu kɔllo hɔlɔbi le kaala ndoo nɔ tau tau le chuauwaa nduaa o pɛɛku tonyaa Kɔliŋ nda. (2 Kɔliŋ. 2:4; 1 Kɔliŋ. 4:15) Mi Vitɔɔ suli puaa a ŋiɔɔ a chuaambɔɔ wo dimi aa, “Wɔsiŋ ya chua le nda solioo leniŋndo ŋ ve kpɛdɛ le. Kɛ teleŋnda kɛndɛlaŋ la hiou poloŋ a simulta naŋ sɔla laŋ. A mala Chɛhowaa, miŋ tuɛi chaŋyɛi kpɛɛluŋnde yeela a chuauwaa naa.”

¹⁸ Hiou lachi a wallo tosaa le chuauwaa numnda mandaa le Chɛhowa piɛiyo. Mɛɛ ŋ chɔm kaala yiŋgoloŋndo le nda fau, maa sɔla nyaale hiuwaŋ mɛŋndo fɔ, le nda chɔɔ tonyaa chuaa, nduyɛ ma lo chuauwaa cho “kɔlaŋ o tonya cho a Mɛlɛka okɔɔ wo choo.”—3 Chɔŋ 4.