1. Suiliŋ bɛndu kuɛɛ Mɛlɛka nɔ yɛ, nduyɛ vɛɛ ŋ yiyaŋ yɛ a ndu okɔɔ le hei sinaa?

DIOM Chɛhowaa, Baabuiyo dimul naa maa “wana kaalaa Mɛlɛka cho ni.” O dimul naa maa kaalaa cho ko suilaŋnda kɛndɛla Mɛlɛkalaŋ opilɛ le, kɛ maa “wana kaalaa Mɛlɛka cho ni.” (1 Chɔŋ 4:8, NW) Ndu cho suiliŋ ndɔ sɔvɛ sɔvɛ bɛndoo ni. O cho ko kaalaa le Chɛhowa nɔ le, kɛ kaa ndɔɔ kɛsɛ o cho ni. I cho bɔɔ suɛi kɛndɛ le sinaa maa Wana Toosiaa choo choo a lɛŋndeŋ ndo, a nyɛ o nyɛ yoomaa wo cho Mɛlɛka kaalaa ni! A kaalaa o tosa nyɛ o nyɛ fee ni.

2. Tiindaŋ yɛɛ kaala Mɛlɛkaa ke yɛ naa? (Tofa fotueiyo o peeleŋ ndeŋ choo.)

² Kaala tuu kpɛi Mɛlɛka nɔ le nyaa yoomaa o toosiaa wa wo, ke naa tiindaŋndo maa o cho sabula ndɔlaŋ kpou peelu o nɛi bɛnda wo choo le waŋchieeya. Nduyɛ hei cho hunɔɔ a tɔnɔ kɛndɛ bɛndoo le wanaa cho wa o masale ndɔleŋ bɛŋgu wa. Le tamaseliiyo, le kaala Chɛhowa nɔ wo, “o hɛli paaleŋ le kɔɔsɔɔ a waŋnda kpede o chieeŋndo niŋ. Nduyɛ, kɔɔsɔ ndɔɔ o nɔ lakafa le. O hɛli wana pilɛ” le kɔɔsɔɔ hoo tosaa. Wana koŋ cho yɛ Chiisu Kiliti ni. (Walta. 17:31) Ŋ nɔ tiindaŋndo maa hei cho hunɔɔ yɔŋnɔŋ. Kɔɔsɔɔ hoo cho hunɔɔ a salaa o chilaŋ niŋ le waŋchieeyaa cho sakpo  ma diikuŋnda. Nduyɛ salaa hoo cho wa lefɛɛŋ a fɛɛŋ.

3. Vɛɛ yoomoo wa yɛ simnɔŋ te Mɛlɛka ndoo kaalaa waŋchieeŋya le?

³ Yiyaŋndɔ mɛɛ yoomoo wa simnɔŋ yɛ te Mɛlɛka ndoo nɔ kaalaa le waŋchieeya le. Ŋ nɔ miŋ tofa sɔɔŋ yɔŋnuŋ niŋ waŋchieeya o masɛi waŋchieeya bɛŋgu wo, a Setana Nyina Wɔɔŋ kɔl tuu nɔ kaala le wo cho soliŋndo kpeku wa. (2 Kɔliŋ. 4:4; 1 Chɔŋ 5:19; nuawɔ Sɔɔŋ Chɔɔmaŋndoŋ 12:9, 12.) Hei chɔm naa mɛɛ chilaŋ laa wɔu niŋ yɛ te kaala Mɛlɛkaa ndoo ve o chieeŋndo choo le.

4. Le yɛɛ Chɛhowa chɛllɛ nila kalulaŋ o masale ndɔle sandaa leŋ bɛŋgu?

⁴ Mɛɛ Nyina Wɔɔŋndo tosa nila kalulaŋ o masale Chɛhowaleŋ bɛŋgu, mbo nyindu Adama nda Ifi le ma tosa nyɛ pilɔɔ kpe. Mbo simul di Mɛlɛka nɔ le waa masa wo a sandii nduɛi. Okoŋ, mi Setana luaaŋ ibuŋ maa masale ndɔleŋ le hiou bɛnda a Wana Toosiaa nyɔɔŋndo. (Chɛ. 3:1-5) Mi Chɛhowa chɛl le mi Setana wa masaa waŋchieeya choo le teleŋ biŋgi. Chɛlɔɔ Chɛhowa chɛl a taasi ndɔ bɛndoo mi boondei bandu wo chɔm kpendekele maa masale kɛ kɛ bɛnda mi le hiau le ndɔleŋ te. Sɔɔŋ wɔɔŋ cho yɔŋnɔŋndo waŋchieeya woŋ chɔm maa waŋchieeya ni, Setana ni, a nɔla ma ke naa masale kɛndɛle naŋ yeema leŋ te.

5. Yɛɛ bundɛi waŋchieeya chɔm yɛ kpendekele?

⁵ O wɔsila 100 la hiou laŋ niŋ, waŋnda hiouwɔɔ miiliɔŋndaŋ 100 nda dii o chɔula lelɛŋndaŋ niŋ ni. Hau, chieeŋndo cho hiouwɔɔ ba a wɔuleŋ. Hei Diom Mɛlɛkaa dimi ni maa i cho yɔŋnɔŋ o “palɛi mɛɛlɛi” chieeŋndo hoo niŋ. “Wanaa dɛnɛ wɔɔŋnda a wanaa lachoowaa a hiau niŋ lachi a dɛnɛla wɔɔŋndaŋ tosaa mbo hiou maa paandu.” (2 Timo. 3:1, 13) Bundɛi waŋchieeya chɔm kpendekele tonya Baabuiyo dimi hoo wo aa, “Oo Chɛhowa, le wanachioo ndu, I sina kɛsɛ kɛsɛ maa o tiuba mbo chɔm ndupila nɛiyo le. O tiuba pɛŋ mbo sina foofo o cho pelii nduɛi handɔɔ wo le.” (Chɛlui. 10:23, NW) Kposoŋ bɛɛ Chɛhowa toosiaa waŋchieeya a dioo le sɔɔŋ tosaa a banda le.

6. Le sabu yɛɛ Mɛlɛka chɛllɛ dɛnɛ wɔɔŋndo le teleŋ biŋgi?

⁶ Ŋ che maa nyɛ fondoo fuu masale waŋchieeya cho ni. Nduyɛ chɛlɔɔ Mɛlɛka chɛl vɛlɛ dɛnɛ wɔɔŋndo le teleŋ biŋgi wo chɔm sabu cheleŋ o chilaŋ niŋ pɔ. O chɔm maa masale Mɛlɛkaleŋ leŋ pilɛ kpe bɛnda ni. Chɛhowa cho dɛnɛ wɔɔŋndo faŋa nduyɛ mbo tɛɛmbuu wanaa cho ndu tosaa wa. Nduyɛ te wana o wana simul niŋ pɛ masale kaalaa le Chɛhowaleŋ, sabu cho lɛ wa le mi Mɛlɛka chɛl simul koŋ te. O nɔla mbo soliŋ bundɛi waŋchieeya kpeku maa saboo le wanaa nila kaluaa waa naa faŋaa chɔ chɔ. O cho lɛ nda chɛlɔɔ le ma kandu vɛlɛ dɛnɛ wɔɔŋndo tosaa le.

7, 8. O nɛila bɔɔbɔɔ kuɛɛ choo Chɛhowa ndoo chɔm yɛ kaala ndɔ bɛndoo?

⁷ Chɛhowa chɔm niŋ kaala ndɔ bɛndoo o nɛila bɔɔbɔɔ niŋ. Le tamaseliiyo, yiyaŋndɔ a mɛɛ choo choo a lɛŋndeŋ cho nyɛ kɔndɔfili bɛndu yɛ. Looŋ cho a kundalaŋ o biiliɔŋndaŋ niŋ, nduyɛ kunda kɛ kɛ nɔ looŋ o biiliɔŋndaŋ niŋ, a fondala cheleŋ. O Looŋ Kundaŋ le chieeŋ naa, paaleŋ le cho luei ipilɛ o looŋ muŋ tɛɛŋ. Nduyɛ te paale ve le, nyaa yoomaa cho o chieeŋndo choo wa nɔla ma wa achal te. Nyɔɔŋ muŋ kpou cho chɔmndo maa Chɛhowa Mɛlɛka toosiaa muŋ ni, nduyɛ maa o nɔ kpaayaa, taasioo, a kaalaa. A tonya, “chɔŋ a boondii Mɛlɛka toosiaa chieeŋndo ve waŋnda sina pɛŋgu walaŋ maa kpaaya Mɛlɛkaa nyɛ cho le fɛɛŋ a fɛɛŋ ndo o cho ni. Nduyɛ a sina walaŋ maa Mɛlɛka lekɛndɛi o cho ni. Lelaŋ mi che bɛɛ sɔɔŋ cho muŋ a Mɛlɛka okɔɔ woŋ ŋ cho sɔɔŋ wana che le ni, kɛ nduyɛ waŋnda nɔla ma sina a muŋ okɔɔ walaŋ.”—Luomaŋ. 1:20.

 ⁸ Chɛhowa toosiaa nyɛ o nyɛ fee o chieeŋndo choo le tɔnɔ nyaa yoomaa o toosiaa le waa o chieeŋndo choo wa. Mbo toosiaa kpele kɛndɛ kɛndɔɔ le waŋchieeya nduyɛ mbo ke nda kɔl iyama walaŋndo a dialuŋ nda nɔla ma wa achal lefafɛɛŋndo. (Nuawɔ Sɔɔŋ Chɔɔmaŋndoŋ 4:11.) Le handɔɔ lechoo, “nyɛ o nyɛ cho nyɛ yoomaa, ndu ke nda kpou nyɛ diaa ni. Kaala ndɔ cho le teleŋ o teleŋ ndo, cho le fɛɛŋ a fɛɛŋ.”—Sam 136:25.

9. O fulawɔ o kaalaa kɔɔli, yɛɛ Chɛhowa chɛllɛ teleŋndaŋ lapum, nduyɛ le yɛɛ?

⁹ Chɛhowa cho chɔmndo maa Mɛlɛka kaalaa o cho ni. Nduyɛ mbo wa vɛlɛ chɔmndo maa o tul iwɔɔŋnde leyɛ. Le tamaseliiyo, Sam 5:4-6 dimi a Chɛhowa okɔɔ aa, “Num Mɛlɛka a niŋ kɔl a sɔɔŋ wɔɔŋ waŋnda tosa woŋ te. . . . Wana o wana cho wana dɛnɛ wɔɔŋ a tul nda leyɛ.” Mbo peelu aa, “Wanaa diu waŋnda wa, a wanaa leyalaa, a tul nda leyɛ.”

10, 11. (a) Vɛɛ Chɛhowa cho yɛ wanaa dɛnɛ wɔɔŋnda biyɔɔ? (b) Fanda yɛɛ Chɛhowa cho yɛ wanaa sandaa ke?

¹⁰ Le mɛɛ Chɛhowa cho Mɛlɛka kaalaa mbo tul dɛnɛ wɔɔŋndo leyɛ yɛ, lelaŋ o kɛɛsiaa ni maa o cho dɛnɛ wɔɔŋndo faŋa ba o ba fee o chieeŋndo choo a teleŋ masale ndɔleŋ le cho hunɔɔ wo. Diom Mɛlɛkaa dimi aa, “Wanaa duau tiindaŋ ndaa o Mɛlɛka Yaawɛɛ niŋ nda, nda o ke lɛŋnde o chua buŋgɛi leŋ ni. Kɛ wanaa tosa sɔɔŋ wɔɔŋndoŋ nda, Mɛlɛka cho nda soli po. O bendu lɛ niŋ te, mi Mɛlɛka tosa mi wanaa dɛnɛ wɔɔŋnda a lo pɛ. . . . Yaamɔɔwaa Mɛlɛka Yaawɛɛ wa a cho lo pɛ, mɛɛ bil lapeeŋgoo o lo nuaa yɛ, a cho lo mɛɛ kumnde i lo nuaa wana chi lɛ ndi le yɛ.”—Sam 37:9, 10, 20.

¹¹ O baa pilɔɔ choo, mi Diom Mɛlɛkaa dimi vɛlɛ aa, “Wanaa cho sakpo Mɛlɛka o hɔl la nda, a cho wa o lɛŋnde Mɛlɛka chua buŋgɛi leŋ niŋ le fɛɛŋ a fɛɛŋ.” (Sam 37:29) Wanaa sakpuaa haa “wa niŋ o kɔl nyuloo niŋ, nduyɛ, ma de nyɛm kɛndɛŋ Mɛlɛkaŋ tɔnɔ.” (Sam 37:11) Hei cho hunɔɔ yɔŋnɔŋ kanifuule, i kɛndɛi Mɛlɛka kaalaa tosa lɔɔlɔɔ le buɛiyaa nduaa dɔu tiindaŋndo o ndu niŋnda ni. Baabuiyo dimul naa aa, “O cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambei le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa, kani fuule, nyɛ o nyɛ paandu chuu faŋaŋ.” (Sɔɔŋ. 21:4) Nuawɔ chila kɛndɛla cho naa kpou chumndo laŋ se, naŋ cho kɔl hiniaa kpeekpeiyo chɔmndo le kaala Chɛhowaa, nduyɛ miŋ wa ndu diikɔŋndo maa Masa naa wo!

12. Nɛɛ yaa naŋ nɔ yɛ miŋ chua maa “wanaa kɛndiaa”?

¹² Diom Chɛhowaa dimul naa aa, “Kɛ tofa wɔ a wanaa kɛndiaa okɔɔ, mɛɛndiaŋ ndɔ a wanaa cho sakpo wa okɔɔ, nduyɛ, a wanaa kɔl nyuluaa. Kɛ wanaa tosa sɔɔŋ wɔɔŋndoŋ nda kinɛi, a cho nda diu.” (Sam 37:37, 38) “Wanaa kɛndiaa” cho Chɛhowa a Po ndɔɔ sinaa, nduyɛ ma wa hɛnaŋ Mɛlɛkaa tosaa a diikɔŋndo. (Nuawɔ Chɔŋ 17:3.) Wanaa waa ndoo che maa nyɛ Chɔŋ Tasoo 2:17 dimi wo cho tonya. O dimi aa, “Chieeŋndo cho chuwɔɔ a yeemaŋ cho le niŋ ndoŋ fau. Kɛ wana o wana tosa nyɛ Mɛlɛka hɛnaŋ ndo pɛ, o cho wa yoomu le fɛɛŋ a fɛɛŋ.” Le mɛɛ mɛɛlula chieeŋndo hoo cho naŋnɔŋndo kpɛɛluŋ yɛ, i cho suɛi sɔvɛ le miŋ ‘dɔu tiindaŋndo o Mɛlɛka Yaawɛɛ niŋ, nduyɛ miŋ tosa nyɛ sawala ndɔlaŋ la dimi wo.’—Sam 37:34.

13. Kaala bɛndu kuɛɛ Mɛlɛka chɔm yɛ le wanaa lahakiaa?

¹³ Mi che bɛɛ naa wanaa lahakiaa naŋ cho ni, ŋ nɔla miŋ ‘tol nɛi Mɛlɛkaa kɔɔli.’ Ŋ nɔla vɛlɛ miŋ nɔ chaŋyɛi kpɛɛluŋnde a Chɛhowa le kaala ndɔ bɛndu o chɔmndo. Mbo yɔŋgu Chiisu Kiliti maa sala baŋaa, o kumbul wanaa diikaŋnda nɛiyo le ma sɔla malɔɔ hakioo a piɔm nda sɔla o Adama niŋndo. (Nuawɔ  Luomaŋnda 5:12; 6:23.) Mi Chɛhowa duau tiindaŋ ndɔɔ kpou o Po ndɔ pilɔɔ niŋ kpe, o ndoo nɔ tiindaŋndo o ndu niŋ o choo choo niŋ le wɔsila bɔɔbɔɔ wo. Maa Finya kaalaa, mi Mɛlɛka sinaŋ nyɛ nɛiyaa a dɛnɛ wɔɔŋ nda tosal Chiisu teleŋ o wa o chieeŋndo choo wo. Kɛ, mi Chiisu lo o laalaŋ ndɔɔ choo le kpuluŋgumayɛi Mɛlɛkɛi tooloo, nduyɛ mbo chɔm maa wana walaŋndo tiuba mbo lo o laalaŋndo choo o Chɛhowa lo o yɔŋ bɛɛ mi tɔɔndaŋ nda wɔɔŋ wɔɔŋndaŋ la komal ndu.

14, 15. Yɛɛ piɔm Chiisoo tosa yɛ?

¹⁴ Mi Chiisu lo o pimbi ndɔ simiaa choo nduyɛ mbo toolu kpuluŋgumayɛi Chɛhowɛi o tɔɔndaŋnda kala kalalaŋ bɛŋgu. Nduyɛ mbo wu maa buɛi nɔ tiindaŋndo o Finya ndɔ niŋndo. Ŋ naŋ bɔɔ kɔl le piɔm Chiisoo kanifuule, ndu baŋa vɛlɛ waŋchieeya o hakioo niŋ a piɔmndo ni. Nduyɛ mbo kumbi nɛiyo le yoomu fafɛɛŋndo sɔlaa o chieeŋ sɛnɛi Mɛlɛka dimi le naa kioo wo niŋ ni! Mi kiilanɔɔ Pɔɔl chɔm maa kaala bɛndoo pila Chɛhowa nda Chiisu chɔm naa ni. Mbo dimi aa, “Mi Kiliti wu le naa wanaa wɔɔŋnda. Boondii naa ŋ nɔla naa pila soli leniŋ te. Mbo sɔla piɔmndo a teleŋ Mɛlɛka pila kɛɛsiaa wo. O cho suɛi kala kpoke le mi waŋndo chɛl le mbo vi le wana sim hoo o kala kala o nyɛ sawalaŋ la dimi wo tosaa niŋ ndo. Kɛ nduyɛ naa pum mi waŋndo chɛl le mbo vi le wana nɔ nyiɛɛyii waŋnda chieeya wo. Kɛ Mɛlɛka ndu ndu, mbo chɔm naa kaala bɛndu o kaala naa wo. Kani fondole, ŋ wa wɔ wanaa wɔɔŋ mi Kiliti wu le naa.” (Luomaŋ. 5:6-8) Mi kiilanɔɔ Chɔŋ poonyiaa  aa, “Nɛi Mɛlɛka chɔm naa kaala o kaala naa wo wo, ndu cho hoo ni. Mbo viam Po ndɔ pilɔɔ kpe o chieeŋndo niŋ le mi ŋ sɔla yoomu kpeekpeiyo a ndu. Nyɛ cho kaala kpeekpeiyo wo cho hoo ni, maa o cho mi ŋ kaala Mɛlɛka le, kɛ nduyɛ mi ndu kaala naa, nduyɛ mbo viam Po ndɔɔ o chieeŋndo niŋ, le waa maa salaa le yɔŋnda naala wɔɔŋndaŋ faŋaa.”—1 Chɔŋ 4:9, 10.

¹⁵ Mi Chiisu dimi a kaala Mɛlɛkaa okɔɔ aa, “Mɛlɛka kaala waŋnda chieeya. O koŋ, mbo yɔŋgu Po ndɔ pilɔɔ kpe le nda, maa wana o wana dɔu tiindaŋ ndɔɔ o Po ndɔ pilɔɔ hoo niŋ pɛ, wana koŋ o vi lɛ le. Yoomu kpeekpeiyo o nɔ la mɛɛlu le wo, ndu o sɔla ni.” (Chɔŋ 3:16) Kaala Mɛlɛka nɔ le waŋchieeya wo cho bɔɔ. Lelaŋ, o nɔla mbo yɔŋgu nyɛ o nyɛ le nda o kɛndɔɔ tosallo. Kaala ndɔɔ nɔ la mɛɛlu le. Ŋ nɔla miŋ tiindaŋ kaala koŋ le lɔɔlɔɔ. Mi Pɔɔl poonyiaa aa, “I sina kpendekele maa nyɛ o nyɛ nɔla mbo faŋa naa o kaala Mɛlɛkaa bɛŋgu le. Ŋ wa yoomu, kɛlɛŋgaa ŋ wu, koŋ feŋa naa kaala o kaala naa wo bɛŋgu le. Kpaayalaŋ choo choo ni a laŋ o chieeŋndo bɛŋgu, laŋ bɛɛ la nɔla le. Nyɛ o nyɛ Mɛlɛka tosa, nyɛ o nyɛ cho o muŋ niŋ mbo nɔla naa faŋa o kaala Mɛlɛkaa bɛŋgu le, ndu yɔŋnuŋ ni maa kaala o chɔm naa o Masanɔ naa Chiisu Kiliti niŋ ndo.”—Luomaŋ. 8:38, 39.

16. Yɛɛ cho yɛ Masale Mɛsayaleŋ, nduyɛ nɛɛ Chɛhowa handu yɛ Masaleŋ ndeŋ o choŋgu?

¹⁶ Kaala Mɛlɛkaa le waŋchieeya cho kpendekele o kɛɛsiaa o tosa le Masale Mɛsayanɔɔ wo. Chɛhowa ke niŋ Po ndɔɔ masaleŋ ndeŋ, o nɔ kaalaa le waŋchieeya nduyɛ mbo suiliŋ tau le waa masaa wo. (Pulɔ. 8:31) Te ŋwaŋ 144,000 cho wa latulu a Chiisu o Masaleŋ choo wa sɔla pɛ fulasɛiniŋndo ma hel o choo choo niŋ, a cho sina bahawɛila cho waŋchieeya choo laŋ. (Sɔɔŋ. 14:1) Masaleŋ le wa suɛi lebolii kpeekpeiye o pɛɛku Chiisoo niŋ ni, nduyɛ mi ndoo pɛɛku buɛiyaa nduaa le ma piɛi aa, “Mɛlɛka finya naa o choo choo niŋ, waŋnda kpou ke diola numndaŋ bɛɛleŋ. Masale numndeŋ le huŋ. Hɛnaŋ numndo tosaŋ o chieeŋndo choo mɛɛ o cho tosaŋndo o choo choo niŋ yɛ” (Maa. 6:9, 10, NW) Piɛileŋ ndeŋ le cho bɔɔ hunɔɔ a tɔnɔla kɛndɛlaŋ le waŋchieeyaa diikaŋnda!

17. Teŋgeŋ yɛɛ cho yɛ masale Chiisuleŋ tɛɛŋ a masɛi waŋchieeyaa lahakiaa?

¹⁷ Nuawɔ se teŋgeŋ bɛndu cho masale kaalaale Chiisuleŋ o choo choo niŋ tɛɛŋ a masale waŋchieeya wo, le diu niŋ waŋnda o miiliɔŋndaŋ niŋ o chɔulaŋ niŋndo! Chiisu kaala bɔɔ wanaa o cho wa masaa choo wa, nduyɛ o cho suiliŋnda kɛndɛla Mɛlɛkalaŋ chɔmndo, taama taama kaalaa. (Sɔɔŋ. 7:10, 16, 17) Mi Chiisu dimi aa, “Wana o wana cho o yɔkpaa a nyɛ palaa, la huŋ naa ya chua. I nɔla mi soli nya o dɛnɛla palaalaŋ niŋ. La simnuŋ buɛiyaa ni, mi la sɔla pɛɛkoo ya o ba bɛŋgu. Kani fondole, I cho wana chaa ŋwaŋnda chiee biyɔɔ. Nduyɛ wana tuisiaŋndo ya I cho ni. Nduyɛ, la nɔla mi la sɔla pɛŋgioo o kɔlta nyalaŋ niŋ. Kani fondole, pɛɛkula nilaŋ la kindu chua le. Nduyɛ, walta ya I ke nya laŋ, la pala tosa le.” (Maa. 11:28-30) A kaalaa kɛsɛ o ke naa tiindaŋndo hoo ni!

18. (a) Yɛɛ Masale Mɛlɛkaleŋ le cho yɛ tosaa chɔŋ a teleŋ le kanduŋndo? (b) Yɛɛ naŋ cho yɛ yaasiaa o buŋgɛi cho lachi ve niŋ?

¹⁸ Baabuiyo chɔm maa a wɔsi 1914 ve Masale Mɛlɛkaleŋ le kanduŋ o choo choo niŋ ni, teleŋ tamasilaŋ la kandu yɔŋnɔŋndo le hunɔɔ Kilitioo wo. Chɔŋ a wɔsi koŋ, Mɛlɛka cho chuuŋgiaa wanaa nɔ le waa o masaleŋ choo a Chiisu latulu o choo choo niŋnda, a wanaa ‘faŋa bɛndu bɛnduaa’ cho kindaa sɔla o mɛɛlula chieeŋndo hoo ma luɛi o chieeŋ sɛnɛiyo niŋnda. (Sɔɔŋ. 7:9, 13, 14) Vɛɛ kpɛ faŋga bɛndu bɛndoo hoo cho yɛ? Yɛɛ yeemaŋ yɛ faŋga bɛndu bɛndoo hoo o ba? Buŋgɛi cho lachi ve cho nyunalaŋ ndaŋ muli.