SUƐI LEBOLLE O KƆƆ
Vɛɛ Mɛlɛka che yɛ chɔuwo?
Vɛɛ ŋ cho yɛ nyuna koŋ muli? Wanaa bɔɔbɔɔ yiyaŋ maa Mɛlɛka chɛl chɔuwo. A dimi maa mbo dimul wanaa wa ndu piɛiyo o sindɔɔ niŋnda apum le ma tosa chɔuwo. Nduyɛ Baabuiyo dimul naa a hei okɔɔ. Kɛ, wanaa cheleŋnda sina maa mi Chiisu, Po Mɛlɛkaa, pɛɛku buɛiyaa nduaa le ma kaala wanaa tul nda leyɛ wa. (Maatiu 5:
Yɛɛ cho yɛ yiyaŋ numndo? Baa Mɛlɛka chɛl chɔuwo tosaa? Te lende i cho ni, nɛɛ yaa Mɛlɛka sim yɛ hau kɔɔli o chɔulaŋ niŋ? Te a sɔla pɛ mulilaŋ le nyunalaŋ ndaŋ, la cho yiyaŋ numndo piiliaŋ a mɛɛ ŋ nɔ ma che chɔuwo yɛ. Le tamaseliiyo, te o wa pɛ ma sina maa Mɛlɛka chɛl ko chɔuwo le, kɛ maa o cho vɛlɛ tooloo wanaa ŋ cho kɔɔli o chɔu koŋ niŋnda, ma naŋ kɔl tau le hei. Nduyɛ ma laalaŋ maa wanaa ŋ cho tooloo wa cho chɔu koŋ yomɔɔ. O baa pilɔɔ choo, vɛɛ ŋ cho yɛ yiyaŋ te a tuei pɛ maa Mɛlɛka cho wanaa ŋ sim kɔɔli o chɔu koŋ niŋ te wa tooloo? A tonya, yiyaŋ numndo cho siŋgaŋ a hei okɔɔ.
Suɛi sɔvɛ bɛndu cheleŋ cho o hei kɔɔli. Sinaa mɛɛ Mɛlɛka che chɔuwo yɛ nɔla mbo piiliaŋ yiyaŋ numndo a Mɛlɛka okɔɔ. Chɔuwo yɔŋul niŋ waŋnda o miiliɔŋndaŋ niŋ. Nduyɛ te a wa pɛ waŋnda haa tɛɛŋ, mɛɛ a nɔ ma sina muli nyunaa hoo. A mɛɛ waŋnda apum laalaŋ yɛ, baa wana mɛli waŋnda chɔulaŋ tɛɛŋndo Mɛlɛka cho ni, ɔɔ ndu toolu nyɛpalaa chɔulaŋ la tuisi waŋnda choo wo ni, ɔɔ o nɔ buulaŋ le wanaa cho o nyɛkindilaa bɛŋgu wa le?
Kaamaa cho num biyɔɔ le sinaa maa muli Baabuiyo cho bɔɔ teŋgeŋ a yiyaŋnda waŋnda nɔ lepum ndaŋ. Le handɔɔ lechoo, chɔŋ o sindɔɔ niŋ, mbo huŋ bii a hau, mɛɛ Mɛlɛka che chɔuwo yɛ siŋgaŋ ndɔ le. Ŋ yaasiaŋndɔ nyɛ Baabuiyo dimi a mɛɛ Mɛlɛka ndoo che chɔuwo o sindɔɔ niŋ, o wɔsiŋ kɛmɛ tasoŋ niŋ, a teleŋ Chiisu ndoo balu o lɛŋndeŋ choo wo yɛ. Hei cho naa mala miŋ sina mɛɛ Mɛlɛka che chɔuwo hau yɛ, nduyɛ te chɔuwo wa niŋ pɛ waŋchieeya choo o chilaŋ niŋ.