1. (a) Wali suu kuɛɛ Mɛlɛka ndoo ke yɛ Adama? (b) Chɔŋ a teleŋ koŋ, vɛɛ wanaa Mɛlɛkaa cho yɛ ke nda nɔ le suɛi maŋgalɛi dimioo wo soliŋndo kpeku?

CHƐHOWA MƐLƐKA toosiaa nyaa yoomaa kɔlkaluaa a kioo le suukaŋndo. Mɛɛ Mɛlɛka kɛsi Adama o kpeloo niŋ, mbo ke ndu wali ndoo nɔ mbo soo wo. Ndoo nɔ mbo ke visiaa diolaŋ. Mi Adama soliŋ ke o nɔ wo, a kɔlkalu ndɔɔ kpeku le visi kɛ kɛ diola bɛnda laŋ kioo. (Chɛ. 2:19, 20) Chɔŋ a teleŋ koŋ, wanaa Mɛlɛkaa cho hiouwɔɔ lachi a ke nda nɔ le suɛi maŋgalɛi dimioo wo soliŋndo kpeku le Chɛhowa saŋgalaa, a wanaa cheleŋnda sabu ndɔɔ chɔmndo. O wɔsiŋ laŋga hiou woŋ niŋ, nɛi sɔvɛ bɛndoo opilɛ le suɛi maŋgalɛi soliŋndo kpeku le piɛile tonyaleŋ hivioo lachi cho Baabuiyo hivioo ni.

2. (a) Kpeleŋnda kuɛɛ Kunda hivi “New World Bible Translation” ndo tollɛ kɔɔli le wali ndaa tosaa? (b) Yɛɛ naŋ cho yɛ yaasiaa o buŋgɛi hei niŋ?

² Sɔɔŋ maŋgalaŋ o waalaŋ niŋ Baabuiyo cho o hiviaa ni. Kɛ teŋgeŋndo cho a mɛɛ Baabui tasoo ndoo hiviŋ o sɔɔŋ maŋgalaŋ cheleŋ niŋ yɛ. O wɔsi 1940 ve niŋ, mi Kunda hivi “New World Bible Translation” ndo kila kpeleŋ nda nɔ ma tol kɔɔli le Baabuiyo hivioo wo. Nduyɛ kpeleŋ koŋ nda tol kɔɔli le Baabuiyo hivioo o sɔɔŋ maŋgalaŋ hiouwɔɔ 130 niŋ ni. Le sabula nda tosa heiyo cho ni, (1) Le diola Mɛlɛkalaŋ saŋgalaa nduyɛ ma miŋgi laŋ naa la wa la  poonyiaa o Diom Mɛlɛkaa niŋnda. (Nuawɔ Maatiu 6:9.) (2) Le Diom Mɛlɛkaa hivioo diomndo a diomndo naa o bɛnda pɛ. Nduyɛ naa o bɛnda le, a hivi mɛɛ naŋ looku miŋ bii bila yɛ. (3) Le suɛi maŋgalɛi tɛtɛlɛ dɛɛniaa naa le diomndaŋ veeloo ve. * (Nuawɔ Nɛhimaya 8:8, 12.) Ŋ tofaŋndɔ mɛɛ nda tol kpeleŋndaŋ ndaŋ kɔɔli o “New World Translation” sɛnɛi nda soli o Iŋkilisiiye niŋ o wɔsi 2013 ve niŋ, a o sɔɔŋ maŋgalaŋ cheleŋndoŋ niŋ yɛ.

3, 4. (a) Yaula masindɛla kuɛɛ nɔ yɛ Tɛtɛlaklametiŋ? (b) Yɛɛ nda tosa yɛ a diola Mɛlɛkalaŋ o Baabuila bɔɔbɔɔ nda hivi laŋ niŋ?

³ Wanaa pɛɛku yaula Baabuila masindɛlaŋ o Hibuluiye niŋndo, mɛɛ yau nda saaluŋ o Pee Nyɛ Yoomaa Cho Leniŋ Te Wo cho naa yɛ, laa nɔ Tɛtɛlaklametiŋ leniŋ tau, chomulta hiɔɔlula sim le diola Mɛlɛkalaŋ ndo. O ve ko o yaula maHibuluila masindɛlaŋ niŋ te diola Mɛlɛkalaŋ la wa le, kɛ la wa vɛlɛ o yaula “Septuagint” maKilikiilaŋ lapum niŋ, chɔŋ a wɔsi kɛmɛ lediiŋ ndo tuupa mi Chiisu vialuŋ mbo huŋ bii a wɔsi kɛmɛ tasoo boondii Chiisu ve.

⁴ A tamaseliila chɔm ndaŋ kpou maa diola Mɛlɛkalaŋ la cho o Baabuiyo niŋndo, mi wanaa hiviaa bɔɔbɔɔ bii kɔllo le kiɔɔ diola diandaala Mɛlɛkalaŋ poonyiaa o Baabuiyo niŋ. Nduyɛ, mɛɛ nda soli “New World Translation of the Christian Greek Scriptures” o wɔsi  1950 ve niŋ, o wɔsilaŋ la tiɔɔŋ kɔɔli vɛlɛ, ma soli “Revised Standard Version.” Ma kɛɛ diola Mɛlɛkalaŋ poonyiaa o Baabui koŋ niŋ, mi che bɛɛ naa la wa la poonyiaa o “American Standard Version” nda soli o wɔsi 1901 ve niŋndo. Le yɛɛ nda tosa yɛ hei? Wanaa hivi “Revised Standard Version” koŋ nda dimi o Baabui koŋ niŋ aa, “O bɛnda kposoŋ le mi kunda leKilisiɔŋ tiindaŋ o Mɛlɛka niŋndo soliŋ diola kpeekpeila Mɛlɛkalaŋ kpeku le.” Le saboo hoo Baabuiyo ndoo nɔ mbo hiviŋ vɛlɛ o Iŋkilisiiye niŋ, a o sɔɔŋ maŋgalaŋ cheleŋndoŋ niŋ ni.

5. Le yɛɛ o cho yɛ suɛi sɔvɛ miŋ soliŋ diola Mɛlɛkalaŋ kpeku o Baabuiyo niŋ?

⁵ Lɛ yɛɛ naŋ nɔ yɛ miŋ sina a diola Mɛlɛkalaŋ poonyiaa ɔɔ kiɔɔ laŋ poonyiaa okɔɔ? Wana hiviaa kɛndɔɔ sina yiyaŋ sɔvɛ wana poonyiaa yau ndɔɔ wo nɔ wo. Sinapɛŋgu waa naa piiliaŋ kɛɛsiaala bɔɔbɔɔ o hivioo niŋ. Bolii Baabuiye tau chɔm maa diola Mɛlɛkalaŋ la cho la sɔvɛ, nduyɛ maa la nɔ mi la sɔla saŋgalaa. (Chɔŋ 17:6, 26; Walta. 15:14, NW; Ɛsɔ. 3:15; Sam 83:18; 148:13; Aisaya 42:8; 43:10) Chɛhowa Mɛlɛka poonyiaa Baabuiyo ni. Nduyɛ mbo dimul wanaa o vem le ndu poonyiaa wa le ma wa hɛnɛkɛ le diola ndɔlaŋ soliŋndo kpeku. (Nuawɔ Isikiaa 38:23.) Kiɔɔ hivioo diola Mɛlɛkala cho la poonyiaa o waalaŋ niŋ o yaula masindɛlaŋ niŋndaŋ, chɔm maa a ke wana poonyiaa Baabuiyo wo lebɛɛ le.

6. Le yɛɛ diola Mɛlɛkalaŋ la chɔɔluŋ yɛ o fondaŋndaŋ la ŋɔmpum o “New World translation” sɛnɛi nda soli wo niŋ?

⁶ Diola Mɛlɛkalaŋ o Baabuiyo niŋ feŋaŋndɔ lechoo le, kɛ la cho handɔŋndo lechoo. “New World Translation” sɛnɛi nda soli o wɔsi 2013 ve niŋndo nɔ diola Mɛlɛkalaŋ bɛmbɔɔ 7,216. Nduyɛ bɛmbɔɔ le 6 diolaŋ ndaŋ la handuŋ lechoo ni. Ŋ saaluŋ ndaŋ bɛmbɔɔ le ŋuɛɛnu o bolii Baabuiye hei niŋ, Saamiɛɛ Tasoo 2:25, NW; 6:3; 10:26; 23:14, 16. O yau simbulaa Pee Nyɛ Yoomaa Cho Leniŋ Te Wo niŋ nda saaluŋ bɛmbɛ le ŋuɛɛnoo hoo ni. Yau simbulaa nda saaluŋ o Pee Nyɛ Yoomaa Cho Leniŋ Te Wo wa yaula maHibuluilaŋ bɛndu le wɔsilaŋ 1,000. Nduyɛ diola Mɛlɛkalaŋ la wa o bolii Baabuiye hei niŋ. Bɛmbɛ le ŋɔmpumndo cho o Chɔɔchiaa 19:18, NW niŋ, o nda saaluŋ o yaula masindɛlaŋ pɛɛkoo niŋndo.

7, 8. Diolaŋ ndaŋ Chɛhowa, yɛɛ la sim yɛ?

⁷ Nyɛ sɔvɛ bɛndoo pila diola Mɛlɛkalaŋ la cho le kilisiɔŋaa tonyaa ni. Yooŋgula  Chɔɔlaalaŋ o “New World Translation” sɛnɛi nda soli o wɔsi 2013 ve niŋndo nɔ sɔɔŋ sɛnɛiyoŋ a diola Mɛlɛkalaŋ okɔɔ. Mi Kunda hivi “New World Bible Translation” ndo sinapɛŋgu maa diolaŋ ndaŋ la fula o diom maHibuluiyo hoo niŋ, “ha·wah.ʹ “ Diom koŋ sim ni, “O cho simnɔŋ wana o yeema mbo simnuŋndo.” * Yaula naalaŋ la tɛɛsiaa niŋ nyɛ diomndo hoo simndo o Ɛsɔdɔɔ 3:14 niŋ. Bolle Baabuileŋ ndeŋ le dimi aa, “I cho simnɔŋ wana ya yeema mi wa wo.” Hoo chɔm nyɛ dimiŋ o “New World Translation” nda soli o wɔsi 1984 ve niŋndo, o dimi maa diolaŋ ndaŋ la sim maa Mɛlɛka “siiŋguu ndupila nyɛ o yeema wo le mi nyɛ o dimi wo yɔŋnuŋ.” * Kɛ mi Yooŋgula Chɔɔlaalaŋ A4 o “New World Translation” sɛnɛi nda soli hoo o wɔsi 2013 ve niŋndo dimi aa, “Te o wa yɛ pɛ aa naa diola Mɛlɛkalaŋ la tɛɛsiaŋ ni, mɛɛ o cho ko nyɛ ndupila yeema mbo wa wo le, kɛ nyɛ o yeema mbo yɔŋnuŋ a nyɛm o toosiaa woŋ okɔɔ, vɛlɛ a sabu ndɔɔ peelɔŋndo wo.” (Tofa vɛlɛ Yau Mala Naa le Diom Mɛlɛkaa Pɛɛkoo Wo o pɛl mɛɛlaa niŋ o peele 5 choo.)

⁸ Chɛhowa siiŋguu nyɛm o toosiaa woŋ nyɛ o yeema wo. Le chɔmndo nyɛ diola ndɔlaŋ la simndo, mi Mɛlɛka siiŋguu Nuuwaa wana taŋgulaa dɛndɔɔ, mbo siiŋguu Bɛsalɛɛ wana sialaa kɛndɛ kɛndɛ, mbo siiŋguu Kidiɔŋ kuubanɔ chɔuwo, nduyɛ mbo siiŋguu Pɔɔl kiilanɔɔ le kaalaŋ. A tonya, diola Mɛlɛkalaŋ la nɔ bɔɔ saboo le wanaa Chɛhowaa. Nduyɛ Kunda hivi “New World Bible Translation” ndo dɔɔniaa diola Mɛlɛkalaŋ ɔɔ mbo faŋa laŋ o Baabuiyo niŋ te.

9. Le sabu yɛɛ Dialii Kuumbaŋ Choo Seiyaa Chɛhowaa kɛsi yɛ Baabuiyo hivioo nyɛ tase o sɔɔŋ maŋgalaŋ cheleŋndoŋ niŋ?

⁹ “New World Translation” cho diola Mɛlɛkalaŋ bɛɛleŋ kioo, nduyɛ o cho niŋ o sɔɔŋ maŋgalaŋ niŋ hiouwɔɔ 130. Sɔɔŋ maŋgalaŋ muŋ feŋa diola Mɛlɛkalaŋ o bolii Baabui la cho la poonyiaa laŋ niŋ te. (Nuawɔ Malakai 3:16.) O baa pilɔɔ choo, a siŋga diola Mɛlɛkalaŋ a “Masanɔɔ” laŋ, ɔɔ mɛlɛka waŋnda apum piɛiyo o Baabuila nda cho hau hivioo laŋ niŋ. Le saboo hoo Dialii Kuumbaŋ Choo Seiyaa Chɛhowaa muli hɔlla le Baabui ke diola Mɛlɛkalaŋ bɛɛleŋ ndo hivioo ni, le halikpeŋ mi wanaa bɔɔbɔɔ sɔla ndu.

10, 11. Simulta kuɛɛ wanaa hivi “New World Translation” o sɔɔŋ maŋgalaŋ cheleŋndoŋ niŋndo sɔla yɛ?

¹⁰ Bahawɛiyo pila i wa le Diom Mɛlɛkaa hivioo o sɔɔŋ maŋgalaŋ cheleŋndoŋ niŋ ni. Le tamaseliiyo, o sindɔɔ niŋ, mi “New World Translation” wa o Iŋkilisiiye niŋndo tual tamasi Baabuila cheleŋnda wa o Iŋkilisiiye niŋndaŋ kɔɔli. Baabuilaŋ ndaŋ la soliŋ diomndo hoo “Sheol” kpeku o Ikilisiaaitii 9:10 niŋ. Bolle Baabuileŋ ndeŋ le dimi aa, “Fondole [“Sheol,” NW] naa ŋ cho kɔlaŋ nda, kpeku soliaa cho loŋ te, yiyaŋndo a nyɛ o nyɛ okɔɔ o cho loŋ te, sina a nyɛ o nyɛ okɔɔ o cho loŋ te.” Mi wanaa hivi Baabuiyo o sɔɔŋ maŋgalaŋ cheleŋndoŋ niŋnda cha ndi ikala kpoke le diomnda waa naa hivioo. Wanaa veelu diomndaŋ o Baabuiyo niŋ o sɔɔŋ maŋgalaŋ cheleŋndoŋ niŋnda sina diomndo hoo “Sheol” te. A nɔla ma saaluŋ diomndo hoo o yau tɛɛsiaa diomndaŋ ndo niŋ te, nduyɛ a yiyaŋ ko maa diola fondaa diomndo hoo cho ni. Le saboo hoo nda chɛlaŋ ni le diomndo hoo “Sheol,” a diom maKilikiiyo “Hades” hivioo maa “Sɛiyo” le mi waŋnda bii diomndaŋ ndaŋ bila.

¹¹ O sɔɔŋ maŋgalaŋ pum niŋ, mɛɛ diom maHibuluiyo “neʹphesh” a o maKilikiiyo “psy·kheʹ” hiviŋ o Iŋkilisiiye niŋ aa “yoomoo,” mi hei huŋ a kɛɛ sinapɛŋgoo. Le yɛɛ? Kanifuule, wanaa bɔɔbɔɔ yiyaŋ maa diomndo hoo “yoomoo” sim le nyɛ taaniŋ cho wanachioo niŋndo. Le kɛɛ sinapɛŋgoo  hoo kpakpalaa, ma ke wanaa hiviaa dioo le ma hivi diomndo hoo “yoomoo” a nyɛ o wa suɛi okɔɔ wo. Nduyɛ nyɛ diomndaŋ ndaŋ la simndo cho niŋ o tɛɛsiaa o yooŋgula chɔɔlaalaŋ o “New World Translation of the Holy Scriptures—With References” niŋ. Nduyɛ le sɔɔŋ pum keŋelaa biyɔɔ bila o diomndaŋ veeloo niŋ, mi ndaa poonyiaa diomnda tɛɛsiaalaŋ daandi daandi o peeleŋ bɛŋgu.

12. Siŋgaŋnda kuɛɛ nda tosa yɛ o “New World Translation” sɛnɛi nda soli o wɔsi 2013 ve niŋndo? (Tofa vɛlɛ suɛi lebolle hei o Bandu Mɛŋgɛlaa hoo niŋ, “New World Translation” Sɛnɛi Nda Soli o Wɔsi 2013 ve niŋndo.”)

¹² Mi nyunala wanaa hiviaa huŋ a kɛɛ sinapɛŋgoo. Lelaŋ, a Tapioo, 2007 ve, mi Dialii Kuumbaŋ Choo ve ke wanaa hiviaa dioo le siŋgaŋndaŋ tosaa o “New World Translation” cho o Iŋkilisiiye niŋndo. Ma miŋgi hɔlteŋ keeku o nyunalaŋ choo o waalaŋ niŋ teleŋ nda wa siŋgaŋndaŋ ndaŋ tosaa wo. Ma siŋga diomnda ndaa soliŋ kpeku o Iŋkilisiiye niŋ te laŋ. Ma kindiŋ kpoke, nduyɛ a wa yekeŋ le Baabui sɛnɛiyo hoo tosaa tɛtɛlɛ le halikpeŋ mi waŋnda bii ndu bila. Nyɛ nda tosa le Baabuiyo hivioo o sɔɔŋ maŋgalaŋ cheleŋndoŋ niŋndo nda tol kɔɔli ni. Nduyɛ hei chiɛɛŋa Baabuiyo hoo o IŋKilisiiye niŋ ni.—Pulɔ. 27:17.

13. Yɛɛ wanaa bɔɔbɔɔ dimi yɛ a Baabui sɛnɛi nda soli o wɔsi 2013 ve niŋndo okɔɔ?

¹³ Fulamakɔɔli yɛɛ “New World Translation” sɛnɛi nda soli hoo o Iŋkilisiiye niŋndo hiŋ yɛ? Waŋnda poonyiaa niŋ yaulaŋ o waalaŋ niŋ le balikaa malɔɔ o fondaŋnda lebolta Seiyaa Chɛhowaa o Bulukiliŋ niŋ. Mi ndepilɛnɔɔ dimi yiyaŋ wa acheleŋnda o kɔllo aa, “Kɔfu nɔ pouta baa kala kalalaŋ tau leniŋndo Baabuiyo cho ni. Le diomnda Chɛhowalaŋ veeloo walaŋ o Baabui sɛnɛi nda soli hoo o wɔsi 2013 ve niŋndo cho machuaa mɛɛ ŋ mɛɛndiaŋ pou o pou baa kala yɛ. Nduyɛ ma hɛnaŋ mɛɛ pou koŋ cho yɛ, kɔɔle ndɔleŋ, a naŋɔɔ ndɔɔ. Baabui nda hivi hoo o suɛi maŋgalɛi tɛtɛlɛi niŋndo mala ya le Chɛhowa sinaa nyɛkɛndɛi, o cho maa finya kɔmaŋ ya mbo wa ya diomnda ndɔla kɔl dɛɛniaa laŋ veelullo wo.”

14, 15. Vɛɛ “New World Translation” o sɔɔŋ maŋgalaŋ cheleŋndoŋ niŋ piiliaŋ yɛ waŋnda?

¹⁴ O cho “New World Translation” sɛnɛi nda soli o Iŋkilisiiye niŋndo le piiliaŋ waŋnda le. Mi po dialuŋ kala pilɛ o Sofia niŋ, o lɛŋnde Bɔkeliaaleŋ niŋ dimi a Baabui nda soli o Bɔkeliaŋnde niŋndo okɔɔ aa, “I veelu niŋ diomndaŋ o Baabuiyo niŋ le  wɔsilaŋ la bɔɔbɔɔ, kɛ I veelu wɔ diomndaŋ o Baabui kindu hoo bila biyɔɔ nduyɛ mbo pilaŋ waŋndo kɔllo wo niŋ te.” Mɛɛ ndepilɛnɔ Alibeniaŋnɔɔ sɔla “New World Translation” o Alibeniaŋnde niŋ, mi ndu bɛɛ dimi aa, “Nuawɔ se mɛɛ Diom Mɛlɛkaa naŋ o Alibeniaŋnde niŋ yɛ! Nuawɔ dikeŋnaŋ bɛndu le mi Chɛhowa soo o naalo o suɛi nɛi maŋgalɛi niŋ!”

¹⁵ Baabuilaŋ la kendu baa o lɛŋii bɔɔbɔɔ niŋ, nduyɛ la sɔlaŋ te. Lelaŋ, sala bɛndoo pila i cho le Baabuiyo sɔlaa ni. Mi kona fula o lɛŋnde Luwaŋnda leŋ niŋndo dimi aa, “Le wɔsila bɔɔbɔɔ, puaapiliaa wa pɛɛku Baabuiyo tosaa a waŋnda kɛ a ve hiouwɔɔ lachi tosa le. Kanifuule, wanaa nda wa pɛɛkoo wa ndaa nɔ la Baabui le. Ndaa nɔla piondɔɔ Baabuila kaaŋii cheleŋnde nɔlaŋ te. Nduyɛ ndaa bii vɛlɛ bolii Baabuiye ipum bila le. Hei ndii kuuna nda hiouwɔɔ lachioo tosaa ni.” Mɛɛ nda sɔla “New World Translation” o suɛi ndɛi maŋgalɛi niŋ, mi sɔɔŋ siŋgaŋ. Mi yuŋgu pilɛ o Luwaŋnda niŋ, o nɔ chuaambuaa kpasuaa a hiɔɔlu wo dimi aa, “Ŋ yil bɔɔ Chɛhowa balikaa, a buɛi cho sakpo, nduyɛ mbo wa buɛi kɔlkalu wo le naa Baabuiyo hoo kioo. Wanaa ikɔɔwa pila naŋ cho ni, nduyɛ ŋ nɔla Baabuilaŋ piondɔɔ le wana o wana fee o yuŋgu naa niŋ te. Kɛ wana o wana nɔ niŋ Baabuiyo o ndɔɔ. Le balika melaa naa chɔmndo o Chɛhowa lo maa leyuŋgu, miŋ veelu diomndaŋ lepaa o lepaa o Baabuiyo niŋ.”

16, 17. (a) Yɛɛ Chɛhowa yeema yɛ le wanaa nduaa? (b) Kɔl sikpa yɛɛ naŋ nɔ yɛ kuee miŋ nɔ?

¹⁶ O chilaŋ niŋ, “New World Translation” sɛnɛiyo cho wa o sɔɔŋ maŋgalaŋ cheleŋ niŋ. Setana cho kindiŋndo le hei kuuna, kɛ ŋ nɔ tiindaŋndo maa Chɛhowa yeema mi wanaa nduaa kpou yaŋ ndu nilaŋ le mbo soo o ndalo o suɛi maŋgalɛi nda bii bila ve niŋ. (Nuawɔ Aisaya 30:21.) Teleŋndo cho fuuluu “mɛɛ mɛŋndaŋ ma cho nuaa tau tau o pee mɛŋma ihɛllo yɛ, lende sina pɛŋgu waŋnda nɔ niŋ a Mɛlɛka Yaawɛɛ okɔɔ wo o wa niŋ tau tau o chieeŋndo niŋ ni.”—Aisaya 11:9.

¹⁷ Maa ŋ waŋnuŋ a kɔllo sikpa le nyɛ o nyɛ Chɛhowa cho naa kioo soliŋndo kpeku, mɛɛ Baabui nda hivi mbo ke diola ndɔlaŋ bɛɛleŋ ndo cho naa yɛ. Maa o soliŋ Diom ndɔɔ kpeku le suɛi o numndo lepaa o lepaa. O nɔla mbo yaŋ nilaŋ o piɛile wana o wana. Suukaŋ waa naa nɔla mbo mala naa le Chɛhowa sinaa nyɛkɛndɛi nduyɛ mi kaala naŋ nɔ le ndu wo hiou lachi a hindɔɔ.—Chɔŋ 17:3.