Kilisiɔŋnda cho niŋ dunyɛi violɔŋ Chiisoo tosaa le lɔɔ levil. Kɛ mi kɔndɔfillo bii naa a naamula waŋnda soliŋ kpeku le dunyɛi hei tosaa wo te i chiɛɛliaŋ pɛ kpeekpei a violɔŋ Chiisoo.

Waŋnda sina kpeekpei a Santa Claus okɔɔ le. Kɛ hau, ma che mi Santa doviŋ a siɛyii humbuei, nduyɛ a nyɛla siaŋalaŋ le dunyɛi violɔŋ Chiisoo keelaa. Nduyɛ, o wɔsi 1931 ve niŋ kɔɔna toosiaa muɛiyaŋ kpeŋgii baluaŋndo o Amɛlika niŋndo kandu hei tosaa ni. A wɔsi 1950 ve, mi Bilasiliaŋnda apum kindiŋ le Santa Claus siŋgaa a Kɛkɛ Bɛndu nɔ tɔɔ o Indiaa niŋndo. Yɛɛ wa yɛ fulamakɔɔlioo? Kɛ mi Kalɔs E. Fantinati dimi maa o cho ko Kɛkɛ Bɛndu Indiaŋnda le Santa Claus ndoo hiou le, kɛ “mbo hiau vɛlɛ Chiisu wa chɛlɛkpɛ wo, nduyɛ mbo simnuŋ dunyɛi kpeekpeiye le paŋgii Yindimiiyo 25.” Kɛ Santa Claus waŋnda ndaa sina le wo koni cho bahawɛiyo le violɔŋ Chiisoo ni? Le mulioo sɔlaa, ŋ soonuŋndɔ a Kilisiɔŋaa tasiaa okɔɔ.

Yau nɔ diolaŋ aa “Encyclopedia Britannica” wo dimi aa, “Mi Kilisiɔŋnda o wɔsiŋ kɛmɛ lediiŋ tasoŋ niŋ sɔla tɔɔndaŋ kala kalaa le mɛɛ nda kɛɛ dunyaŋ palɛi vialaŋnde tosaa le wanaa sɔla piɔm sala soliaŋndo wa, nduyɛ Chiisu bɛɛ.” Le sabu yɛɛ? Kilisiɔŋnda ndaa che dunyaŋ palɛi vialaŋnde maa naamu wanaa ndaa piɛi Mɛlɛka le wa ŋ cho ni, ŋ naŋ nɔ miŋ kpakpala woŋ. Nduyɛ, ŋ seeluŋ pɛŋ paale Chiisu veluŋndeŋ o Baabuiyo niŋ te.

Mi che bɛɛ naa mi Kilisiɔŋaa tasiaa kɛɛ le dunyaŋ palɛi vialaŋnde tosaa o wɔsiŋ kɛmɛ le hiɔɔloŋ niŋ boondii Chiisu ve, kɛ mi kaŋnde Katolikiiya kandu dunyɛi violɔŋ Chiisu ve tosaa. Katolikiiya ndaa yeema ma bii foofo ndaa kpiŋ. Le hei, ma faŋa kpɔkɔsi bɛndu nda wa sɔlaa wanaa ndaa piɛi Mɛlɛka o Luom niŋ te wa o ba wo a dunyaŋ ndaŋ. Mi “Christmas in America,” yau Pɛnɛ L. Luɛstad poonyiaa wo dimi maa “mi Luomaŋnda a bɔɔbɔɔ ndaa tosa dunyaŋ, pisultaŋ, yelelaŋndaŋ, balɔɔ a kpeŋjoo, a dunyaŋ cheleŋndoŋ le mɛlɛkaa piɔmnda biiloo.” Iwɔsi o iwɔsi, kanduŋ a paŋgii Yindimiiyo 17 mbo kɔ bii a paŋgii Tɛɛkpaa 1 ndaa tosa hei ni. Nduyɛ a Yindimiiyo 25, mi Luomaŋnda ndaa tosa dunyɛi le violuŋ Mɛlɛka lePaa Wo biiloo. Mi kaŋnde Katolikiiya dimul Luomaŋnda a sondo yeelɛiyo le ma kandu dunyɛi violɔŋ Chiisoo tosaa o paale leŋ choo le nda kɛɛloo mɛlɛka lepaa wo piɛiyo. Mi che bɛɛ naa mi Kilisiɔŋndeŋ le faŋa dunyaŋ wanaa ndaa piɛi Mɛlɛka le wa, kɛ Luomaŋnda “wa wɔ hiouwɔɔ lachi a dunyaŋ ndaŋ tueiyɔɔ yeela,” a mɛɛ yau Kɛli Bola poonyiaa a Santa Claus okɔɔ wo dimi yɛ. O kpeekpei niŋ, mi che bɛɛ naa a wa nda dimullo le ma faŋaŋ dunyaŋ muŋ kɔɔli, kɛ ma “hiau lachi a dunyaŋ ndaa tosa paandu woŋ biiloo.”

Ŋ che niko kpendekele maa o sallo choo nda chua dunyɛi violɔŋ Chiisoo ni. O yauwo hoo niŋ “The Battle for Christmas,” mi Stiiviŋ Nisɛnbom dimi a violɔŋ Chiisoo okɔɔ maa, “o cho dunyɛi leKilisiɔŋ te dunyɛi violɔŋ Chiisu ve i cho le.” Lelaŋ, dunyɛi violɔŋ Chiisoo ke Mɛlɛka a Po ndɔɔ, Chiisu Kiliti lebɛɛ le. Baa suɛi taaniŋnde cho hei ni? Baabuiyo nyuna aa, “La che niŋ tonyaa nda kafalaŋ ma biilaŋ? La biilaŋ te. Lende koni, nyɛ wawoŋndo nda nyumndaŋ a muuliaŋ te.” (Kiliŋtiaŋ Diiŋ Ndɔɔ 6:14) Mɛɛ yɔmndo hindu naa o tundaŋ yɛ, lende koni dunyɛi violɔŋ Chiisoo cho i tundaŋ ni, ‘wana nɔla ndi siɛndi le.’—Ikilisiaatii 1:15.