1-3. (a) Le yɛɛ suɛi maŋgalɛi Mɛlɛka dimi ve cho yɛ filioŋ a i waŋchieeya? (b) Yɛɛ naŋ cho yɛ yaasiaa o buŋgɛi hei niŋ?

MƐLƐKA cho lefafɛɛŋndo toosiaa nyaa yoomaa kɔlkaluaa ni le ma wa a kɔlkɛndɛ maa ndu. (Sam 36:9; 1 Timo. 1:11) Mi kiilanɔɔ Chɔŋ veelu chaŋyɛi tasei le Mɛlɛka aa, “Diomndo” a kandɔŋndo le nyɛ o nyɛ fee Mɛlɛka toosiaa. (Chɔŋ 1:1; Sɔɔŋ. 3:14) Mi Chɛhowa Mɛlɛka ndoo suukaŋ a Po tasoo hoo a yiyaŋnda ndɔlaŋ okɔɔ. (Chɔŋ 1:14, 17; Kolo. 1:15) Mi kiilanɔɔ Pɔɔl suaa a ‘sɔɔŋ kiilaa Mɛlɛkaa choo choo a dimi woŋ’ okɔɔ. Nduyɛ ŋ cho filioŋ a sɔɔŋ maŋgalaŋ waŋchieeya dimi woŋ.—1 Kɔliŋ. 13:1.

² Chɛhowa sina nyaa yoomaa kɔlkaluaa o toosiaa o biiliɔŋndaŋ niŋnda nyɛkɛndɛi, haa o choo choo niŋ a haa o chieeŋndo choo. Le teleŋ o teleŋ, wanaa faŋga chuu chɔm te wa cho piɛileŋ o ndu lo o sɔɔŋ maŋgalaŋ bɔɔbɔɔ niŋ. O cho ko nilaŋ yaŋɔɔ o piɛile o kɛ kɛ le, kɛ o cho nda vɛlɛ nɛi chɔmaa kioo. Nduyɛ o cho vɛlɛ suukaŋndo a nyaa yoomaa cho o choo choo niŋnda. Le hei tosaa, mɛɛ mi yiyaŋ ndɔɔ, suɛi maŋgalɛi nduɛi, a mɛɛ o suaa yɛ wa filioŋ a o waŋchieeya. (Nuawɔ Aisaya 55:8, 9.) A tonya, te Chɛhowa wa pɛ suukaŋndo a waŋchieeya, mbo soliŋ diomnda tɛtɛlɛ laŋ kpeku le halikpeŋ ma bii bila.

³ Ŋ cho niko hunɔɔ yaasiaa mɛɛ Mɛlɛka taasi bɛndoo suukaŋ a waŋchieeya nyɛkɛndɛi yɛ, chɔŋ o sindɔɔ niŋ mbo huŋ bii a hau.  Ŋ cho vɛlɛ chɔ mɛɛ ndoo siŋga suukaŋ ndɔɔ a teleŋndaŋ lapum yɛ.

4. (a) Suɛi maŋgalɛi yɛɛ Chɛhowa ndoo soliŋ yɛ kpeku le suukaŋndo a Muuse, Saamiɛɛ, a Deeve? (b) Sɔɔŋ kuɛɛ cho yɛ o Baabuiyo niŋ?

⁴ Mi Chɛhowa soliŋ suɛi maŋgalɛi wanachioo dimi ve kpeku le suukaŋndo a Adama o kpeloo Idɛŋ niŋ. Kɛlɛŋgaa o Hibului masindɛi niŋ Mɛlɛka ndoo suaa o ndu lo ni. Mi Mɛlɛka chɔm yiyaŋnda ndɔlaŋ o wanaa ndaa dimi Hibuluiye, nduyɛ ma poonyiaa Baabuiyo wa lo. Mɛɛ Muuse, Saamiɛɛ, a Deeve wa naa yɛ. Ma poonyiaa yiyaŋnda Mɛlɛkalaŋ mɛɛ nda yeema yɛ nduyɛ a mɛɛ nda bii bila yɛ. O fulawɔ o sɔɔŋ Mɛlɛka pila dimul nda sakpo woŋ poonyiaa kɔɔli, kɛ ma chɔm vɛlɛ chaŋyɛi wa Mɛlɛka tɛɛŋ nda wanaa nduaa ve. Ma suaa a tiindaŋ wanaa Mɛlɛkaa okɔɔ, a kaala ndaa nɔ le ndu wo. Ma chɔm vɛlɛ biondɔŋnda ndalaŋ, a laalaŋ nda kɛɛ dɔuwɔɔ o Mɛlɛka niŋndo. Tɔnɔ bɛndoo pila sɔɔŋ muŋ kpou cho hau le naa ni.—Luomaŋ. 15:4.

5. Baa Chɛhowa ndoo baŋ pa maa Hibuluiye kinɛi wanaa nduaa ndaa nɔ ma soliŋ kpeku ni? Tɛɛsiaa wɔ.

⁵ Mɛɛ sɔɔŋ siŋgaŋ, o cho ko o Hibuluiye niŋ te Mɛlɛka ndoo suukaŋ a waŋchieeya le. Mɛɛ Babiloniaŋnda fula o chɛleŋ niŋ, mi Alamaikiiye simnuŋ suɛi maŋgalɛi wanaa Mɛlɛkaa apum ndaa dimi lɔɔlɔɔ ve. Kɛlɛŋgaa le chɔmndo nyɛ ndoo nɔ le yɔŋnɔŋndo o chilaŋ niŋndo, Chɛhowa dimul Daaniɛɛ, Chɛluimaya a wana soliaa salaa Ɛsilua ni, le ma poonyiaa yaula Baabuilaŋ lapum o Alamaikiiye niŋ.—Ɛsi. 4:8; 7:12; Chɛlui. 10:11; a Daan. 2:4.

6. O fula wɔ o Hibuluiye kɔɔli, vɛɛ Diom Mɛlɛkaa ndoo looku yɛ wa o sɔɔŋ maŋgalaŋ cheleŋ niŋ?

⁶ Okoŋ kɔɔli, mɛɛ Alɛkisanda Bɛndoo yem chieeŋ masindɔɔ a chɔuwo, mi Kilikii tɛtɛlɛ ndii nɔ diolaŋ aa Kuɛnee ve simnuŋ suɛi maŋgalɛi waŋnda ndaa dimi tau o chieeŋndo choo ve. Mi Chuuwaa bɔɔbɔɔ kandu suɛi maŋgalɛi keŋ dimioo. Hei tosa ni ma hivi Yaula maHibuluilaŋ o Kilikiiye niŋ. Wanaa hiviaa 72 ndaa tosa hivi koŋ ni. Nduyɛ yaula nda hivi laŋ ndaa veelu ni aa “Septuagint.” Hivi tase sɔvɛ bɛndoo wa hoo le Baabuiyo ni. * Mi wanaa bɔɔbɔɔ hivi Baabuiyo diomndo a diomndo, kɛ acheleŋnda tosa lende le. Kɛ mi Chuuwaa ndaa dimi Kilikiiye wa, a Kilisiɔŋnda cha yau ndaa veelu koŋ aa “Septuagint” ndo maa Diom Mɛlɛkaa.

7. O suɛi maŋgalɛi kuɛɛ niŋ Chiisu ndoo suukaŋ yɛ dɔɔ a buɛiyaa nduaa?

⁷ Teleŋ Po tase Mɛlɛkaa hiŋ o chieeŋndo choo wo, kɛlɛŋgaa mi ndoo dimi Hibuluiye ɔɔ mi ndoo pɛɛku waŋnda leniŋ. (Chɔŋ 19:20; 20:16; Walta. 26:14) Alamaikiiye ndii hiou Kilikiiye mayoomu o wɔsiŋ kɛmɛ tasoŋ niŋ. Lelaŋ, Chiisu ndoo kɛɛ dɔɔ diomnda Alamaikiilaŋ soliŋ kpeku le. Kɛ, ndoo sina vɛlɛ Hibului masindɛi i Muuse a wanaa ndaa suaa le Mɛlɛka wa ndaa dimi ve, i ndaa veelu diomndaŋ o lɔɔ o lɔɔ bɛŋgu o chiɛi Mɛlɛkaa niŋndo. (Luku 4:17-19; 24:44, 45; Walta. 15:21) Le handɔɔ lachoo, Kilikiiye a Latiŋnde ndaa dimi o Isɔluɛi niŋ ni. Ko mi Chiisu ndoo dimi sɔɔŋ maŋgalaŋ muŋ? Diom Mɛlɛkaa suu a keŋ okɔɔ le.

8, 9. Le yɛɛ nda poonyiaa yɛ yaula Baabuilaŋ lapum o Kilikiiye niŋ, nduyɛ yɛɛ hei pɛɛku yɛ naa a Chɛhowa okɔɔ?

⁸ Buɛiyaa tasiaa Chiisuaa ndaa sina Hibuluiye. Kɛ mɛɛ Chiisu vi, sɔɔŋ maŋgalaŋ cheleŋ buɛiyaa nduaa ndaa dimi ni. (Nuawɔ Walta Wanaa Chiisuaa 6:1.) Mɛɛ Kilisiɔŋndeŋ le wa kuiyo, o Kilikiiye niŋ Kilisiɔŋnda ndaa suukaŋ ni. O Kilikiiye niŋ pɛŋ ndaa piɔu yaula soo a  nyɛ Chiisu ndoo pɛɛku waŋnda nduyɛ mbo tosa wo ni. Laŋ la cho yau Maatiu, Maki, Luku, a o Chɔŋ poonyiaa wo ni. Lelaŋ, Kilikiiye buɛiyaa Chiisuaa a bɔɔbɔɔ ndaa hiou dimi a Hibuluiye. * O Kilikiiye niŋ kiilanɔɔ Pɔɔl ndoo poonyiaa vɛlɛ yaula ndɔlaŋ a la cheleŋnda Mɛlɛka poonyiaa laŋ ni.

⁹ I cho suɛi sɔvɛ le sinaa maa Yaula maHibuluilaŋ wanaa poonyiaa Yaula maKilikiila Kilisiɔŋnda laŋ ndaa soliŋ kpeku ni. Nduyɛ o yau “Septuagint” ndo niŋ ndaa nua ni. Lepum, o ve diomndo a diomndo le ndaa hivi bolii Baabui cho hau o Diom Mɛlɛkaa niŋnde le. Kɛ, mi wali wanaa hiviaa lahakiaa haa simnuŋ Diom Mɛlɛkaa. Hei pɛɛku naa maa Mɛlɛka chue naamoo mbo hiou o cheleŋ te, kɛlɛŋgaa niŋ te suɛi maŋgalɛi.—Nuawɔ Walta Wanaa Chiisuaa 10:34.

10. Yɛɛ suukaŋ Chɛhowaa a waŋchieeya pɛɛku yɛ naa?

¹⁰ Nyɛ naŋ yaasiaa hoo a suukaŋ Mɛlɛka tosa a waŋchieeya wo pɛɛku naa maa a teleŋ bɛnda wo Chɛhowa suukaŋ a nda ni. Mɛlɛka beŋ naa maa mɛɛ miŋ pɛɛku suɛi maŋgalɛi ipilɛ kpe malaŋ naŋ sina ndu ɔɔ sabula ndɔlaŋ te. (Nuawɔ Sɛkalaya 8:23; Sɔɔŋ Chɔɔmaŋndoŋ 7:9, 10.) Chɛhowa chɔm wanaa poonyiaa Baabuiyo wa nɛiyo ni. Kɛ mbo chɛl le ma soliŋ diomnda ndalaŋ kpeku.

11. Le yɛɛ sɔɔŋ maŋgalaŋ yɛ yɔŋ kuuna Chɛhowa le suukaŋndo a waŋchieeya le?

¹¹ Baa sɔɔŋ maŋgalaŋ yɛ yɔŋ kuuna pa Mɛlɛka le suukaŋndo a waŋchieeya? Sako bɛɛ. Le tamaseliiyo, kɛlɛŋgaa diomndaŋ nyɛɛmbɔ koni naŋ sina o suɛi maŋgalɛi Chiisu ndoo dimi ve niŋ ni. (Maa. 27:46; Maki 5:41; 7:34; 14:36) Kɛ, mi Chɛhowa tosa a sabu le mi yooŋgu Chiisoo hiviŋ o Kilikiiye niŋ, a o sɔɔŋ maŋgalaŋ cheleŋ niŋ. Okoŋ kɔɔli, Kilikiiya a Kilisiɔŋnda wa poonyiaa daandi daandi yaula Baabuilaŋ le laŋ mandaa. Nduyɛ ma hivi vɛlɛ yaulaŋ ndaŋ o sɔɔŋ maŋgalaŋ bɔɔbɔɔ niŋ. Mi Chɔŋ Kilisotɔm o wɔsiŋ kɛmɛ le hiɔɔloŋ a kɛmɛ le ŋuɛɛnoŋ niŋ boondii Chiisu ve dimi maa o palɛi nduɛi niŋ, ma hivi pɛɛkula Chiisulaŋ o sɔɔŋ maŋgalaŋ Siiliaŋnda, Ichipiaŋnda, Indiaŋnda, Paasiaŋnda, Itoopiaŋnda, a o sɔɔŋ maŋgalaŋ wanaa bɔɔbɔɔ dimi woŋ niŋ.

12. Vɛɛ Baabuiyo ndoo sɔla yɛ simullo?

¹² O wɔsi 303 ve niŋ boondii Chiisu ve, Dayokilisiaŋ, Masa Luomaŋnda wa kindi kindiŋndo le Diom Mɛlɛkaa tɛɛmboo. Kɛ mi Baabuiyo hivioo o sɔɔŋ maŋgalaŋ bɔɔbɔɔ niŋ kuuna ndu. A wa Diom Mɛlɛkaa a wanaa wa ndu hivioo le ndu piɔuwo wa chiŋalaŋndo tau a sɔŋgɔɔ. O wɔsiŋ 1,600 niŋ, mi Wiliam Tindal kandu Baabui maHibuluiyo a o maKilikiiyo soliŋndo kpeku le ndu hivioo o Iŋkilisiiye (Aŋkilɛɛ ve) niŋ. Nduyɛ mbo dimul po ndoo sina yauwo tau wo aa,  “Te Mɛlɛka chɛl pɛ mi viou yoomu, I cho tosa mi poombɔ tosa wallo o chiɛi niŋndo sina Baabuiyo mbo hiou wana soli salaa le Mɛlɛka wo.” Mi Tindal fula Iŋkilaŋ mbo nyaanuŋ Yulopi le hiouwɔɔ lachi a Baabuiyo hivioo mbo soli ndu. Mi che bɛɛ simlachiaa lekaaŋnda wa Baabuila nda wa saalɔŋndo laŋ lomɔɔ o luŋ kpendekele, kɛ Baabuilaŋ la wa hiouwɔɔ lachi a kuiyo tau. O mɛɛlulaŋ kpɔŋ, ma pisi Tindal, ma bii ndu, ma yii ndu o yɔmndo, ma lo ndu lɔɔ tei mbo wu, okoŋ, ma luam ndu. Kɛ mi Baabui o hivi wo lo achal. Nduyɛ waŋnda wa ndu soliŋndo kpeku tau le Baabui “King James version” ndaa piɔu tau wo hivioo.—Nuawɔ Timoti Diiŋ Ndɔɔ 2:9.

13. Yɛɛ pɛɛkoo o yaula masindɛ laŋ niŋ chɔm yɛ?

¹³ Biondɔŋndaŋ a teŋgeŋndo nyɛɛmbɔ koni Baabuila masindɛla kinda laŋ laa nɔ ni. Kɛ i wa bɔɔ ikala le mi wanaa sinaa dɛniaa pɛɛku vɛlɛvɛlɔŋ, a yaula Baabuila ndaa hivi o waalaŋ niŋndaŋ. Nduyɛ mi pɛɛku ndaa hoo chɛlaŋ a sɔɔŋ bɔɔbɔɔ o Baabuiyo niŋ. Bolii Baabui ndaa bii bila tau le ve siŋga yooŋgu cho o Diom Mɛlɛkaa niŋndo le. Sukuwaa tonyaa Baabuiya, a pɛɛku yaula masindɛlaŋ nda laalaŋ maa a nɔ nyɛ Chɛhowa ndoo dimul wanaa poonyiaa Baabuiyo wa wo.—Aisaya 40:8. *

14. Vɛɛ kpɛ Baabuiyo tiu yɛ niŋ hau?

¹⁴ A simul kala kala Diom Mɛlɛkaa sɔla yaamɔɔwa o ba wo fau, mi Chɛhowa tosa a sabu le chɔɔ maa Baabuiyo hiou yau o yau fee hiviŋ o chieeŋndo choo. Nduyɛ a teleŋ wanaa bɔɔbɔɔ ndaa nɔ tiindaŋ bɔɔ o Mɛlɛka niŋ te wo, Baabuiyo waŋnda ndaa hiou piondɔɔ poloŋ. Nduyɛ o cho niŋ o sɔɔŋ maŋgalaŋ niŋ hiouwɔɔ 2,800. Lapum la cho la chiŋaa, lapum yɛ la cho la chiŋaa le. Yau o yau cho hau o chieeŋndo choo mbo sulaŋ a Baabuiyo le. O cho Baabuilaŋ kpou le nda hivi nyɛkɛndɛi le laŋ tiindaŋndo le. Kɛ a koŋ kpou, ŋ nɔla miŋ pɛɛku o laŋ niŋ yooŋgu kpeekpei cho a tiindaŋndo nduyɛ a pioŋɔɔ okɔɔ wo.

15. (a) Vɛɛ ndaa soli yɛ bahawɛi suɛi maŋgalɛi waŋnda dimi hau ve? (b) Vɛɛ Iŋkilisiiye looku yɛ simnɔŋ suɛi maŋgalɛi nda soliŋ kpeku le nyɛdiaa iMɛlɛkayaa toosiaa wo?

¹⁵ O wɔsi 1919 ve niŋ, mi Chiisu yulu “buɛi cho sakpo, nduyɛ, mbo wa buɛi kɔl kalu wo” iso le wanaa nduaa nyɛdiaa iMɛlɛkayaa kioo. Nduyɛ o Iŋkilisiiye niŋ kunda pɔmbɔɔ hoo ndoo suukaŋ a “chaaŋaa nduaa buɛiya” ni. (Maa. 24:45) “Buɛi” koŋ cho kindiŋndo tau le nyɛdiaa iMɛlɛkayaa toosiaa o sɔɔŋ maŋgalaŋ niŋ tau. Nduyɛ o sɔɔŋ maŋgalaŋ 700 niŋ buɛi koŋ cho hei tosaa ni. Mɛɛ Kilikii ndii nɔ diolaŋ aa Kuɛnee ve wa o wɔsiŋ kɛmɛ tasoŋ niŋ yɛ, lende koni Iŋkilisiiye simnuŋ hau  suɛi maŋgalɛi leyulɛi, a i waŋnda pɛɛku leniŋnde ni.

16, 17. (a) Yeemɛi yɛɛ wanaa Mɛlɛkaa ndaa nɔ yɛ? (b) Nduyɛ vɛɛ yeemɛi hei ndii peeluŋ yɛ? (c) Tiindaŋ kuɛɛ nda dimi yɛ maa “New World Ttranslation” cho yɔŋgu o wɔsi 1950 ve niŋ?

¹⁶ O Baabuiyo choo yaula naalaŋ kpou la tɔlnuŋ ni. O tase ndɔ, Baabui “King James Version” nda hivi o Iŋkilisiiye niŋ o wɔsi 1611 ve niŋndo waŋnda ndaa soliŋ kpeku tau ni. Kɛ a teleŋndo opum, waŋnda ndaa dimi lɛ Iŋkilisii nda poonyiaa o Baabui koŋ niŋnde le. A poonyiaa diola Mɛlɛkalaŋ tau o Baabui koŋ niŋ te. Nduyɛ, diola Mɛlɛkalaŋ la wa la poonyiaa o yaula masindɛla Baabuilaŋ niŋ o waalaŋ niŋ. Ma tosa biondɔŋndaŋ tau o Baabui “King James Version” koŋ hivioo niŋ. Nduyɛ bolii Baabui lachoowɛi wa leniŋ, i ve o yaula masindɛla tonyalaŋ niŋ te wo. O Baabuila cheleŋnda nda hivi laŋ niŋ bɛɛ, biondɔŋndaŋ la wa.

¹⁷ Yeemɛi wa le Baabui nda cho hivi sakpo o suɛi maŋgalɛi waalioo niŋndo, a mɛɛ Mɛlɛka ndoo poonyiaa Diom ndɔɔ o tase ndɔ yɛ. Le hei tosaa, ma kila Kundaa le hivioo “New World Bible Translation.” Nduyɛ o wɔsioŋ tɔ bɛŋgu, ma soli Baabui nda hivi wo, chɔŋ a wɔsi 1950 ve mbo kɔ bii a wɔsi 1960. Ndoo wa le yaula bɛndulaŋ la ŋɔmpum. Mɛɛ Ŋgɔɔ Netaŋ Nɔɔ wa yau tasoo solioo o yaula ŋɔmpumnda bɛndulaŋ ndaŋ tɛɛŋ a Naanɔɔ 2, 1950 ve, mbo dimul wanaa wa o bɔŋaŋ koŋ nda aa, “Yeemɛi wa le lɔɔlɔɔ le Baabuiyo hivioo o suɛi maŋgalɛi waalioo niŋ, i chɛlaŋ a tonyaa ve. Nduyɛ i ke naa saboo le tonyaa chɔɔloo sinaa wo, a loo o laalaŋndo choo le ndu chɔmndo mɛɛ o cho o poonyiaa masindɔɔ niŋ yɛ. Hivi waŋnda nɔla ma veelu diomndaŋ waalioo ma bii bila wo, a mɛɛ waŋnda sindɛ ndaa bii bila yaula buɛiyaa Chiisuaa poonyiaalaŋ yɛ. O waŋnuŋ tɛtɛlɛ, vɛlɛ walaŋ le wanaa ndaa chiee bɛɛ diomndaŋ veeloo lapi o palɛi nduɛi niŋ te wa.” Ndoo nɔ tiindaŋndo maa Baabui nda hivi koŋ ndo cho waŋnda mala o miiliɔŋndaŋ niŋ le pɛɛkoo a Mɛlɛka okɔɔ.

18. Kɛɛsiaa kuɛɛ mala yɛ mi Baabuiyo keŋela hiviŋ?

¹⁸ Mi tiindaŋ koŋ peeluŋ o nɛi teŋgeŋndo niŋ o wɔsi 1963 ve niŋ. Mɛɛ nda hivi “New World Translation of the Christian Greek Scriptures” o sɔɔŋ maŋgalaŋ ŋɔmpum niŋ, Chamaniiye (Alemaŋnde), Dɔchiiye, Fɛlɛŋsiei, Itaaliaŋnde, Panisiiye, a Pɔtikiiye. O wɔsi 1989 ve niŋ, mi Dialii Kuumbaŋ Choo Seiyaa Chɛhowaa kila kunda hiviaa Baabuiyo o fondaŋnda lebolta ndalaŋ. O wɔsi 2005 ve niŋ, ma kɛsi Baabuiyo hivioo nyɛ tase o sɔɔŋ nda cho yau Bandu Mɛŋgɛlaa hoo poonyiaa wo niŋ. Nduyɛ fulamakɔɔlioo cho ni maa, “New World Translation” cho niŋ o sɔɔŋ maŋgalaŋ niŋ hiouwɔɔ 130. Lapum la cho la chiŋaa, lapum yɛ la cho la chiŋaa le.

19. Bɔŋaŋ tɔɔma bɛndu kuɛɛ ndaa bii yɛ o wɔsi 2013 ve niŋ? A yɛɛ okɔɔ buŋgɛi cho lachi ve cho yɛ isɔɔ?

¹⁹ Mɛɛ Iŋkilisiiye siŋgaŋ chɔŋ a teleŋ nda soli “New World Translation” tasoo wo, bahawɛiyo wa le Baabuiyo hoo siŋgaa o Iŋkilisii sɛnɛi niŋ. Mi Kɔɔna Bandu Mɛŋgɛlaa bii bɔŋaŋ iwɔsi 129 o Pɛŋsiliveeniaa niŋ o lɔɔ mɛɛlulaŋ a paŋgii Saa 5 a 6, 2013 ve niŋ. Nduyɛ waŋnda 1,413,676, o lɛŋnde 31 niŋ ndaa bii bɔŋaŋ koŋ ni, ɔɔ yaŋ nilaŋ o yuei mapuuluei choo ni. Nda kpou wa a kɔlkɛndɛ bɛndoo pila mɛɛ waŋndo opilɛ o Dialii Kuumbaŋ Choo ve tɛɛŋ chɔm nda “New World Translation” sɛnɛiyo o Iŋkilisiiye niŋ. Mi wanaa bɔɔbɔɔ mɛli mɛmiaŋ kpasu kpasu a kɔlkɛndɔɔ mɛɛ nda piɔu nda Baabui sɛnɛiyo hoo. Mɛɛ nda wa diomndaŋ veeloo o Baabui sɛnɛiyo hoo niŋ, mi waŋnda saaluŋ maa Diom Mɛlɛkaa poonyiaŋ ndɔ o Iŋkilisiiye niŋ mbo bɛnda maa koŋ te. Buŋgɛi cho lachi ve cho isɔɔ nyɛkɛndɛi a Baabui sɛnɛiyo hoo okɔɔ, vɛlɛ a hivi ndɔɔ o sɔɔŋ maŋgalaŋ cheleŋndoŋ niŋ.