1, 2. A yɛɛ okɔɔ kɔndɔfillo bii yɛ naa teleŋndaŋ lapum? Nduyɛ tamasila Baabui kuɛɛ huŋ yɛ naa o kɔl?

KANI bɛɛ a nyunaŋ niŋ pa aa, ‘I cho pa sioŋgɔɔ a naa hoo?’ Te koŋ te mi kɔndɔfillo bii num te wana nya cho o yuŋgoo niŋndo ɔɔ chaaŋ num cho pɛ sioŋgɔɔ a naa. O koowaŋ niŋ o cho naa ni le miŋ buulaŋ te waŋndo wa pɛ a naa. O palɛi Ilaicha nda Ilaisia ve niŋ, mi masaa a ŋiɔɔŋ chɔm buulaŋ suu waa naa. Paale pilɛ mɛɛ Masaa Ahasaya, po Ehabi a Chɛsibɛɛ wo del delɔɔ pila, mbo nyuna te o cho kinda ɔɔ o cho kinda le. O koŋ kɔɔli, mi Masaa Bɛnihadadi o Siiliaa niŋ naa lakalu tei, mbo nyuna te o cho pɛ kinda a naa koŋ.

² Ŋ laalaŋ maa fulamakɔɔli kɛndɔɔ cho wa le naa, vɛlɛ a wanaa naŋ buulaŋ le nda wa. Kɛ a koŋ kpou, kɔndɔfillo cho wanaa bɔɔbɔɔ le nyɛ Mɛlɛka cho tosa le nda malaa wo. Teleŋ masaa kaŋ wa yoomu wo, mi Mɛlɛka ndoo tosa kaamaalaŋ lepum a kɛndiaa waŋchieeya okɔɔ a sɔɔŋ cheleŋ o yoomu ndaa niŋ. Mi Chɛhowa soliŋ pɛŋ wanaa ndaa suaa le ndu wa kpeku le waŋnda miŋgioo yoomu. (1 Masaa. 17:17-24; 2 Masaa. 4:17-20, 32-35) Saboo cho pa le miŋ wa kɔl maa o cho suɛi waa lende tosa o chilaŋ niŋ?

3-5. Kpaaya kuɛɛ Mɛlɛka nda Chiisu nɔ yɛ, nduyɛ nyunala kuɛɛ la fula yɛ?

³ Kɔndɔfili nɔ mbo bii naa maa Mɛlɛka nɔ kpaayaa le waŋndo naa  dɔuwɔɔ choo le. I cho o Baabuiyo niŋ. Teleŋndaŋ lapum, mbo duau waŋnda apum naa choo, mɛɛ Felo o palɛi Ebilahamnde niŋ wa naa yɛ a Meeliaŋ, yemaa Muuse. (Chɛ. 12:17; Nɔm. 12:9, 10; 2 Saam. 24:15) Mi Mɛlɛka sila Isɔluɛiya maa te a mal ndu pɛ, o cho tosa mi ‘naala wɔɔŋ wɔɔŋnda bɛndulaŋ la bii nda, mi la simnuŋ naala ŋkɔŋja.’ (Ditɔnɔ. 28:58-61) O baa pilɔɔ choo, Chɛhowa ndoo tiuba mbo faŋa naalaŋ ɔɔ mbo kuuna laŋ. (Ɛsɔ. 23:25; Ditɔnɔ. 7:15) Nduyɛ, ndoo nɔla mbo siŋgi waŋnda. Mɛɛ Choobu naa tei mbo yeema piɔmndo, mi Mɛlɛka siŋgi ndu!—Choobu 2:7; 3:11-13; 42:10, 16.

⁴ A tonya, Mɛlɛka nɔ kpaayaa kɛsɛ le waŋndo siŋgioo a naa. Po ndɔɔ bɛɛ nɔ kpaaya koŋ. Ŋ pɛɛku niŋ o Baabuiyo niŋ maa mi Chiisu siŋgi wanaa ndaa nɔ lɛlɔŋ nda, wanaa naala wovɛiya, wanaa sumɛiya, a wanaa bɛvɛiya. (Nuawɔ Maatiu 4:23, 24; Chɔŋ 9:1-7) Hei cho suɛi kindi laalaŋ naa le yiyaŋndo maa naala Chiisu siŋgi waŋnda laŋ la chɔm maa o chieeŋ sɛnɛiyo niŋ, o cho tosa mbo hiou koŋ. Okoŋ, “waŋndo bɛɛ dimi niŋ maa nyɛ waa nuaa cho ndu nɛi le.”—Aisaya 33:24.

⁵ Kɛ ŋ nɔ pa miŋ tofa Mɛlɛka ɔɔ Chiisu le naa siŋgioo a kaamaa? Vɛɛ naŋ nɔ yɛ miŋ che naala wɔɔŋ wɔɔŋndaŋ ɔɔ naala ŋkɔŋjalaŋ? Nduyɛ yɛɛ naŋ nɔ yɛ miŋ tosa a laŋ okɔɔ?

6. Yɛɛ naŋ sina yɛ a kioo le “wanaa lanaawa siŋgioo” okɔɔ, o Kilisiɔŋnda apum sindɛ ndaa nɔ wo?

⁶ Ŋ che o Baabuiyo niŋ maa o wɔsiŋ kɛmɛ tasoŋ niŋ, mi Mɛlɛka ke Kilisiɔŋaa pɔyaŋnda apum kpaayaa le ma tosa kaamaalaŋ. (Walta. 3:2-7; 9:36-42) O kela yɛ yɛla nyina Mɛlɛkaa tɛɛŋ, kioo le “wanaa lanaawa siŋgioo” cho opilɛ. Kɛ kela waa lende a la cheleŋndaŋ, mɛɛ kioo le suɛi o sɔɔŋ maŋgalaŋ cheleŋndoŋ niŋ a sɔɔŋ nɔ le yɔŋnɔŋndo o chilaŋ niŋndoŋ wa naa yɛ, o viu le mi la mɛɛlu. (1 Kɔliŋ. 13:8) Kelaŋ ndaŋ la cho lɛ hau le. Lelaŋ, ŋ nɔ tiindaŋ o tiindaŋ le miŋ wa kɔl maa Mɛlɛka cho kaamaa tosa le miŋ seŋgu le.

7. Tiindaŋ kɔl dɛɛniaa kuɛɛ Sam 41:3 ke yɛ naa?

⁷ Kɛ a koŋ kpou, te ŋ naa pɛ, ŋ tofa Mɛlɛka le kɔl dɛɛniaa, taasioo, a malaa, mɛɛ wanaa ndaa piɛi Mɛlɛka o sindɔɔ niŋnda ndaa tosa yɛ. Mi Masaa Deeve poonyiaa aa, “Wana mala hoo wana cho o nyɛ palaa niŋ ndo wo o pɛl tɔnɔɔ. Wana waa nuaa, baŋaa Mɛlɛka Yaawɛɛ o baŋa ndu a teleŋ kpundɔɔ ni. Mandaa Mɛlɛka Yaawɛɛ manda ndu ni, o koŋ, mbo tosa mi wana koŋ o wa yoomu.” (Sam 41:1, 2) Ŋ sina maa wana ndoo mala wana wa o nyɛpalaa niŋ o palɛi Deevei niŋndo ve lo yoomu lefɛɛŋ a fɛɛŋ te. Deeve dimi naa maa wana waa lende cho wa achal o kaamaa niŋ, okoŋ, mbo sɔla yoomu fafɛɛŋndo le. Nyɛ diomndaŋ ndaŋ la simndo cho ni maa, Mɛlɛka mala wana chɔm koŋ lo lechoo wo le chaaŋ ndɔ malaa wo. O nɛi kuɛɛ choo o mala yɛ ndu? Mi Deeve tɛɛsiaa aa, “Te o del a naa pɛ, Mɛlɛka Yaawɛɛ o siŋgi ndu. Naa o naa wa ndu, mbo siŋgi laŋ kpou.” (Sam 41:3) Tonya, wana mala hoo wana cho o nyɛpalaa niŋndo laalaŋ maa Mɛlɛka che nyɛ o tosa wo. Nduyɛ dialuŋ Mɛlɛka ke ndu le miŋ nɔla siŋgiŋndo a ba ndɔ woŋ cho ndu mala mbo sinaŋ tiŋ, nduyɛ mbo seŋgu a naa ndɔɔ.

8. A mɛɛ Sam 41:4 dimi yɛ, yɛɛ Deeve nyuna yɛ Chɛhowa le mbo tosal ndu?

⁸ Mi Deeve dimi a nyɛ keeku ndu choo wo okɔɔ aa, “Mi dimi aa, ‘Oo Mɛlɛka Yaawɛɛ, tuinuŋ ya inyɛɛ, ma siŋgi ya. I tosa yɔŋ wɔɔŋndo ma tambu kɔl a ya.’” (Sam 41:4) Kɛlɛŋgaa teleŋ o wa a naa mi Abisalɔm kindiŋ le ndu masaleŋ poondaa o ba, nduyɛ ndoo tiuba le nyɛ tosa le wo o poonyiaa diomnda ndaŋ ni. Mi che bɛɛ mi Mɛlɛka mal Deeve haki, kɛ Deeve puɛɛnuŋ a haki o tosa a Basiba nduyɛ a fulamakɔɔli wɔɔŋ o sɔla wo le. (2 Saam. 12:7-14) Kɛ a koŋ kpou, masaa  Deeve ndoo nɔ tiindaŋndo maa Mɛlɛka cho ndu siŋgi. Baa le mi Mɛlɛka tosa kaamaa le mbo seŋgu, ɔɔ mbo bandu yoomu o wa piɛileŋ ni?

9. (a) Vɛɛ suɛi Deevei cho yɛ teŋgeŋ a i Hɛsikaya ve? (b) Yɛɛ Deeve wa yɛ dɔɔ kɔl le mi Chɛhowa tosal ndu?

⁹ Mɛɛ wɔsioŋ hiou ŋtiŋ, mi Mɛlɛka siŋgi Masaa Hɛsikaya a naa. “Ndu oo lo niŋ chobe mi ndu oo vi.” Mi Mɛlɛka luei balaŋ le Hɛsikaya siŋgioo nduyɛ mbo viau yoomu le wɔsilaŋ 15. O cho kaamaa ndoo yɔŋnuŋ chuɛi chuɛi le wa hoo le. (2 Masaa. 20:1-6) O baa pilɔɔ choo, Deeve ndu piɛi maa Mɛlɛka tosa kaamaa le mbo seŋgu le. Nyɛ dimiŋ o bolle Baabuile leŋ niŋndo chɔm maa mi Deeve piɛi maa Chɛhowa mala ndu mɛɛ o mala wana chɔm kɔl inyɛiyo le waŋndo yɛ. Nyɛ koŋ cho ni, le mbo mala ndu mbo seŋgu. Le mɛɛ Deeve sɔla niŋ malɔɔ hakioo yɛ, lelaŋ ndoo nɔ kuee mbo nyuna Mɛlɛka le mbo dɛɛniaa ndu nduyɛ mbo mala ndu, le mi kpaaya dialuŋ ndɔŋ nɔ wo tosa mbo seŋgu. (Sam 103:3) Naa bɛɛ tosa nyɛ pilɛ koŋ kpe.

10. Yɛɛ naŋ nɔ yɛ niko miŋ dimi a nyɛ yɔŋnuŋ Tofimɔɔ a Ɛpafulodaitɔɔ wo?

¹⁰ Deeve ndoo sɔla siŋgi kaamaa a yoomu vilɛi le. Nduyɛ Tofimɔɔ bɛɛ, po ndaa tosa wallo nda kiilanɔɔ Pɔɔl latulu wo ndoo sɔla siŋgi kaamaa le. Ŋ sina maa mi Pɔɔl ndoo sɔla kpaayaa teleŋndaŋ lapum le waŋnda siŋgioo. (Nuawɔ Walta. 14:8-10.) Mi Pɔɔl tosa lende a ‘Pɔbiliɔɔ finya ndɔ del a naa wo. O wa ihini. Dialloŋ wa ndu nɛiyo kpeekpei. Pulii wɔɔŋnde bɛɛ ndi wa vɛlɛ ndu. Mi Pɔɔl kua ndu yilɔɔ. Mɛɛ Pɔɔl kuɛ, mbo piɛi Mɛlɛka. Mbo handu ndu baa choo, mbo siŋgi ndu.’ (Walta. 28:8) Kɛ, Pɔɔl tosa lende a Tofimɔɔ le, o ndaa kela o lɛŋnde niŋ yooŋgu kɛndɔɔ dimioo wo. (Walta. 20:3-5, 22; 21:29) Mɛɛ Tofimɔɔ del a naa, o tiu lɛ ba le mbo hiou lachi a kelaa nda Pɔɔl te. Pɔɔl siŋgi ndu le. Mbo mɛi ndu Miletɔɔ le mbo koma sioŋgu. (2 Timo. 4:20) Lende koni, mɛɛ Ɛpafulodaitɔɔ del a naa, “ndu oo lo niŋ chobe mi ndu oo vi.” Nyɛ o nyɛ chɔm maa mi Pɔɔl sɔla kpaayaa le mbo tosa kaamaa le mbo siŋgi chaaŋ ndɔ kɛndɛ koŋ te.—Filipi. 2:25-27, 30.

11, 12. Le yɛɛ Luku nɔla yɛ mbo wa wana kɛndɛ le Pɔɔl malaa, nduyɛ yɛɛ naŋ nɔ yɛ miŋ dimi a suiliŋnda Luku laŋ okɔɔ?

¹¹ “Luku, o cho wana chiɔu waŋnda wo,” poonyiaa yau Walta Wanaa Chiisuaa ni. Ndu bɛɛ ma kela nda Pɔɔl. (Kolo. 4:14; Walta. 16:10-12; 20:5, 6) I cho tonya le miŋ laalaŋ maa mi Luku ke Pɔɔl silaa a chiɔuwo okɔɔ, nduyɛ mbo chiɔu ndu nda wanaa nda wa kelaa yooŋgu kɛndɔɔ dimioo o lɛŋii cheleŋnde niŋnda. Le yɛɛ Luku ndoo tosa yɛ keŋ? Kanifuule, Pɔɔl bɛɛ mbo naa teleŋ o wa kelaa wo. (Kalee. 4:13) Mi Luku mala le waŋnda chiɔuwo a mɛɛ i cho i chɛlaŋ a nyɛ Chiisu dimi wo yɛ. Ndu cho ni, “Wanaa cho kɛndiaa wa, a heu ba a wana chiɔu waŋnda wo le, mɛɛ wanaa cho a naalaŋ nda.”—Luku 5:31.

¹² Baabuiyo chɔm naa Luku pɛɛku a chiɔuwo okɔɔ wa ɔɔ teleŋ o pɛɛku ndu wo le. I cho tonya maa mi Pɔɔl chɔm Kilisiɔŋnda o Kolosee niŋ maa wana chiɔuwaa Luku wa ni. Kanifuule, ndaa sina ndu. Nduyɛ sukuu chiɔuwaa wa pɛŋ nda ikɛi o Lawodisiaa niŋ. Kɛ o nɛi o nɛi niŋ, Luku ve wana chiɔuwaa yɔŋaa le. O ve wana ndoo chɔm waŋnda dandalaŋ suuwo opum ndo le. Wana chiɔuwaa kɛsɛ o wa ni. Hei cho kpendekele a mɛɛ ndoo soliŋ diomnda chiɔuwaala kpeekpeilaŋ kpeku o yau Walta Wanaa Chiisuaa niŋ yɛ, nduyɛ mbo suaa tau a mɛɛ Chiisu ndoo siŋgi waŋnda yɛ.

13. Yɛɛ naŋ nɔ yɛ miŋ tosa te o hiŋ pɛ a kɛɛsiaala dandaa okɔɔ?

¹³ Ŋ cho o teleŋ chaaŋ naa Kilisiɔŋnɔɔ soliŋ ke siŋgiaa kpeku le naa chiɔuwo wo le. Kɛ mi puaapiliaa yiyaŋ nɔ kɛndɔɔ wa apum dimul num le ma dɔunuŋ danda bɛnda le wo.  I cho tonya maa mi waŋnda apum ke naa kɛɛsiaa kɛndɔɔ o waŋnda tau sina wo. Mi Pɔɔl tosa lende mɛɛ Timoti ndoo nɔ naa demboo. Kɛlɛŋgaa mɛŋma ndaa kollaŋ maa niŋ te. * (Nuawɔ 1 Timoti 5:23.) Kɛ, keŋ cho teŋgeŋ a chaaŋ naa Kilisiɔŋnɔɔ dɛɛniaa le soliŋndo biltaŋ suuwo opum kpeku, chiɔuwo, ɔɔ nyɛdiaa bɛnda le wo ɔɔ o cho chuu wana kpundɔɔ lepum ndo. Lepum, te waŋnda apum wa pɛ wanaa cheleŋnda tɛɛsiallo a danda suuwo opum okɔɔ, ma dimi aa, ‘Wanayɛi nii bɛɛ ndii nɔ naa suuwo hoo, nduyɛ mɛɛ o chua koowaŋ maŋ, mbo siaŋgu.’ O yɔŋ bɛɛ a kɛɛsiaa kɛndɔɔ o cho ni, o bɛnda miŋ kɛsiŋ o kɔl maa fulamakɔɔli wɔɔŋndo wa lepum, o wa bɛɛ mi waŋnda sina kooma maŋ ɔɔ danda koŋ tau.—Nuawɔ Pulɔwaa 27:12.

14, 15. (a) Le yɛɛ waŋnda apum soliŋ yɛ naala acheleŋnda kpeku? (b) Vɛɛ Pulɔwaa 14:15 mala yɛ naa le kɛɛsiaalaŋ tosaa a dandaa okɔɔ?

¹⁴ Naa Kilisiɔŋnda nɔ yeemɛi le miŋ wa kɛndiaa halikpeŋ miŋ tuei yoomoo yeela nduyɛ miŋ tosa tau o wali Mɛlɛkaa niŋ. O baa opilɔɔ choo, o hakioo niŋ naŋ veluŋ ni. Lelaŋ, naa cho naa kuee. Te ŋ naa pɛ, nɛilaŋ la cho tau le dandaa dɔunɔŋndo. Wana o wana nɔ dioo le mbo hɛli danda o yeema wo. Kɛ i cho suɛi imɔnɔ maa o chieeŋ ikaayioo hoo niŋ, te waŋndo naa pɛ, mi waŋnda soliŋ naa ndɔɔ kpeku le ndu nyɛsɔlaa nanɔɔ o ba. Mi apum pisi “koowaŋ” ɔɔ ma bii kanioŋ le “chiɔuwo.” Ma dimul nda choolaŋ maa wanaa chiɔuwaa nda cho ni ɔɔ ma lɔɔ pɛŋ seiyaa lachoowaa. Mi waŋnda apum ɔɔ kɔɔnalaŋ lapum lisa koowaŋ ma pum tau le miŋ soliŋ maŋ kpeku, nduyɛ ma kindi maŋ baa tau le waŋnda kanioŋ nanɔɔ o ba. Wana cho yɛ hoo a naa wo yeema sioŋgɔɔ chɔ chɔ le mbo viou yoomu. Le hei, mbo che “chiɔuwo” hoo maa o bɛnda. Kɛ ŋ puɛɛnuŋ te, Diom Mɛlɛkaa sila naa aa, “Diɔmndo, nyɛ o nyɛ wana dimul ndu, laalaŋndo o laalaŋ ni. Kɛ wana kɔl kaloo ndu, lɔɔ pa mbo tosa nyɛ o nyɛ, mɛɛ mbo yiyaŋ nyɛ kɛndɛi.”—Pulɔ. 14:15.

¹⁵ “Wana kɔl kaloo” o wa yekeŋ a nyɛ nda dimul ndu wo ɔɔ naa danda waŋndo kɛɛsiaa le ndu wo fula wa, o bii fau te o kiisaŋ pɛ a suiliŋnda wana koŋ okɔɔ. Mi “wana kɔl kaloo” yiyaŋ dɔɔ aa, ‘O dimi maa koowaŋ maŋ, billo hoo, ɔɔ nyɛdiaa hoo mala niŋ waŋndo paandu, kɛ seiyaa kpeekpeiya cho pa le chɔmndo maa tonya i cho ni? Waŋchieeya cho a suulaŋ. Sabu kpeekpeiyo cho pa le mi laalaŋ maa koowaŋ ma cho ya mala? I chɔɔlu yaasiaa tosa ɔɔ mi nyuna wanaa ya sina maa a pɛɛku ɔɔ a suiliŋ o wallo hoo niŋndo?’—Ditɔnɔ. 17:6.

16. Nyuuniaala kuɛɛ la mala yɛ naa miŋ wa “wanaa kɛsiŋ lebɛɛ” te ŋ wa pɛ kɛɛsiaa tosaa a dandaa okɔɔ?

¹⁶ Diom Mɛlɛkaa sila naa “le mi ŋ wa wanaa kɛsiŋ lebɛɛ . . . o chieeŋndo hoo choo.” (Taitɔɔ 2:12) Ŋ chɔm maa ŋ cho “wanaa kɛsiŋ lebɛɛ” te o wa pɛ ma tɛɛsial naa a koowaŋ suuwo opum okɔɔ ɔɔ danda naŋ sina paale pilɛ bɛɛ le wo. Baa wana chiɔuwaa ɔɔ wana cho koowaŋ maŋ lisaa wo nɔla pa mbo tɛɛsiaa maŋ nyɛkɛndɛi le ma hini kɔl a mɛɛ ma tosa wallo yɛ? Ma chɛlaŋ pa a tonya cho a koowaŋ okɔɔ wo? Nduyɛ wanaa pɛɛkaa bɔɔbɔɔ che maŋ pa maa ma bɛnda? (Pulɔ. 22:29) Ɔɔ nyɛ kpeekpei cho a maŋ okɔɔ wo yusa pa wana kɔllo? Kɛlɛŋgaa naa levil nda saaluŋ maŋ ni, nduyɛ wanaa yaasiaa a koowaŋ okɔɔ wa tuiyɔ a maŋ okɔɔ le. Baa nyɛ nda dimi hoo a maŋ okɔɔ wo cho pa nyɛ wana tiindaŋ? Nyɛm nda tofa wana woŋ ŋpum ɔɔ dandalaŋ lapum, a tɛɛsiaa laŋ maa ‘naa manyumndo’ ɔɔ ‘naa lekueiyo.’ Hei chɔm maa a nɔ ma wa yekeŋ kanifuule, Mɛlɛka sila  maa yawalaŋ viomɔɔ a suɛi o waŋ vilɛiya lo bɛnda le.—Aisaya 1:13; Ditɔnɔ. 18:10-12.

17. Yeemɛi kɛndɛi kuɛɛ bɛnda yɛ miŋ nɔ?

¹⁷ Mi dialii kuumbaŋ choo ve o wɔsiŋ kɛmɛ tasoŋ niŋ yɔŋ yau sɔviɔɔ o kundalaŋ lo. Mɛɛ nda chii poonyiaa sɔɔŋ Kilisiɔŋnda nɔ ma kpakpala woŋ, ma mɛɛlu poonyiaa kpɔŋ aa, “Te la chua silaa hoo pɛ, mɛɛ o nɛi tonyaa choo nya sim ni. Mɛɛ la idii.” (Walta. 15:29) O sɔɔŋ maŋgalaŋ pum niŋ, a hivi diomnda mɛɛlaalaŋ ndaŋ aa, “La waŋnuŋ kɛndiaa.” La sim vɛlɛ aa, “waŋnuŋ kpeŋgbeleŋ.” Ŋ yeema kɛsɛ miŋ “waŋnuŋ kɛndiaa” nduyɛ miŋ wa kpeŋgbeleŋ o wali Mɛlɛka naa bɛndoo tosaa niŋ.

18, 19. Yɛɛ naŋ cho yɛ lehɔl o nɛi o chieeŋ sɛnɛiyo niŋ?

¹⁸ Te ŋ cho wɔ pɛ o chieeŋ wɔɔŋndo hoo niŋ nduyɛ miŋ wa wanaa lahaki, naalaŋ la nɔ mi la komal naa. Ŋ nɔŋnuŋ o kɔl suŋsuŋ le miŋ sɔla siŋgioo o kaamaa niŋ te. Kɛ, Sɔɔŋ Chɔɔmaŋndoŋ 22:1, 2 chɔm teleŋ naŋ cho sioŋgɔɔ kpɛlɛkɛ wo. Mi kiilanɔɔ Chɔŋ cha “pioo” o yilaŋnde niŋ o nɔ mɛŋma yɔŋgu yoomoo waŋ ndo a “yɔmii yɔŋgu yoomoo ve” a pei i nɔ ve. “A ndi nda siŋgi waŋnda o lɛŋnde niŋ kpou o chieeŋndo choo ni.” O cho a bil kpeekpeiyo le nda cho naa siŋgi suŋsuŋ ɔɔ o chilaŋ niŋ te. Kɛ, o chɔm nyɛm Chɛhowa cho naa kioo o Chiisu niŋ sanaa woŋ le mi wanaa tuisiŋ nda sɔla yoomu fafɛɛŋndo. A tonya kpeekpei, nyɛ naŋ nɔ miŋ wa lehɔl o nɛiyo cho hoo ni.—Aisaya 35:5, 6.

¹⁹ Mɛɛ naŋ cho naa chila tɔɔmalaŋ ndaŋ chumndo yɛ, ŋ sina maa Chɛhowa nɔ yeemɛi o wana o wana niŋ, o yɔŋ bɛɛ miŋ wa a naa. Maa Deeve, ŋ nɔ tiindaŋndo maa Mɛlɛka naa cho naa mala miŋ seŋgu teleŋ o teleŋ naŋ naa pɛ. Maa Deeve, ŋ dimi aa, “A cho ya mala, kani fuule, le mɛɛ ya I tosa sɔɔŋ cho sakpo num o hɔl le yɛ. Nduyɛ, I cho wa a num latulu le fɛɛŋ a fɛɛŋ.”—Sam 41:12.