Baabuiyo cho maa yaula yɔŋaa laŋ te. O nɔ silala fula wana naa toosiaa o ba laŋ leniŋ. (2 Timoti 3:​16) Yooŋgu cho leniŋndo nɔla mbo mala naa tau. Nduyɛ pɛŋ, Baabuiyo dimi aa: “Diom Mɛlɛkaa cho yoomu, nduyɛ kpaayaa pila o nɔ ni.” (Hibuluiya 4:​12) O nɔ kpaayaa le naa malaa mi yoomu naa wa o sɔvɛ o nɛilaŋ la tiɔɔŋ choo. Laŋ la cho ni, kioo naa sila naŋ yeema lepaa o lepaa wo, a naa malaa miŋ sina Mɛlɛka vɛlɛ a sɔɔŋ o dimi le hunɔɔ tosaa woŋ.—1 Timoti 4:​8; Chemisi 4:​8.

Baabuiyo mala num ma nɔ yoomu sɔviɔɔ suŋ suŋ. O nɔla mbo mala num le sinaa mɛɛ ŋ bii Bahawɛila numndaŋ yɛ. O nɔla mbo ke num sila sɔviɔɔ o nɛila yɛ yɛlaŋ niŋ. Laŋ la cho ni:

•   Mɛɛ ŋ nɔ ma bii acheleŋnda yɛ.​—Ɛfisiaŋnda 4:​31, 32; 5:​22, 25, 28, 33.

• Kɔl tambɛiyo a kɛndiaa lepɛŋndo.​—Sam 37:​8; Pulɔwaa 17:​22.

• Kaala kɛndɛlaŋ.​—1 Kɔliŋtiaŋ 6:​9, 10.

• Bala fondolaŋ.​—Pulɔwaa 10:​4; 28:​19; Ɛfisiaŋnda 4:​28. *

Mi pɔnɔɔ a lanɔ pilɛ o Eesiaa niŋ chɔm balika melaa tau le sila sɔvɛ cho o Baabuiyo niŋndo. Wanaa bɔɔbɔɔ chal o nɔɔ niŋ sɛnɛiya, mi i wa ikala le ma biinaŋ bila a le baltaŋ dɔwɔɔ fɛɛsɛŋ. Lende koni i wa a pɔnɔɔ a lanɔɔ hoo ni. Kɛ ma kandu nyɛ nda wa pɛɛkoo o Baabuiyo niŋndo dɔwɔɔ o wali niŋ. Yɛɛ wa yɛ fulamakɔɔlioo? Mi pɔnɔɔ diolaŋ Viŋsɛŋ dimi aa: “Mi nyɛ ya pɛɛku o Baabuiyo niŋndo mala ya le simulta wa naa komallo o nɔ naa niŋndaŋ biyɔɔ o nɛi kaalaa niŋ. Sila Baabuiyo tolɔɔ kɔɔli tosa ni miŋ wa a kɔl kɛndɛ o nɔ naa niŋ.” Mi laa ndɔ, Anelu chɛl nyɛ o dimi hoo wo. Mbo dimi aa: “Diomndaŋ veeloo a tamaseliila cho o Baabuiyo niŋndaŋ okɔɔ mala naa ni. I cho niŋ a kɔl kɛndɛ, nduyɛ I nɔ kɔl hiniaa o nɔ naa niŋ. Nduyɛ hei tosa miŋ bendal kpeleŋnda naalaŋ.”

Kindiŋ ma sina Mɛlɛka. O faŋaŋndɔ o nyɛ Viŋsɛŋ dimi a nɔ ndɔɔ okɔɔ wo kɔɔli, mbo dimi vɛlɛ aa: “Diomndaŋ veeloo o Baabuiyo niŋ mala ya niŋ mi chɔɔlu sɔɔŋguu Chɛhowa ikɛi kpɛɛluŋ mbo hiau maa paandu.” Nyɛ Viŋsɛŋ dimi hoo wo cho bɔɔ suɛi sɔvɛ. Baabuiyo nɔla mbo mala num ma sina Mɛlɛka nyɛkɛndɛi. O hei niŋ, a cho ko tɔnɔɔ sɔla o sila ndɔɔ niŋ te, kɛ a nɔla vɛlɛ ma sina Mɛlɛka nduyɛ mbo simnuŋ chaaŋ num. A cho vɛlɛ chɔ maa Mɛlɛka dimi sɔɔŋ tau a chila sɔvɛlaŋ okɔɔ, teleŋ ŋ cho “yoomu kpeekpeiyo” tueiyɔɔ yeela wo. Nduyɛ o cho wa le fɛɛŋ a fɛɛŋ. (1 Timoti 6:​19) Yau o yau cheleŋ nɔla mbo tosa keŋ le num te.

Te a kɛsi pɛ teleŋndo le diomndaŋ veeloo o Baabuiyo niŋ, nduyɛ ma vi ŋdial te, num bɛɛ nɔla ma sɔla tɔnɔlaŋ ndaŋ. O tosa mi yoomu numndo wa o sɔvɛ suŋ suŋ, nduyɛ ma sina Mɛlɛka. Kɛ te a wa pɛ diomndaŋ veeloo o Baabuiyo niŋ, nyunala bɔɔbɔɔ cho num hunɔɔ o kɔl. Nduyɛ te hei yɔŋnuŋ pɛ, kɛsiŋ tamasi po Itoopiaanɔɔ o kɔl. Poo hoo wa achal o cho niŋ hau suɛi wɔsila 2000. Ndoo nɔ nyunalaŋ tau a Baabuiyo okɔɔ. Mɛɛ nda nyuna ndu te o cho pɛ nyɛ o wa diomndaŋ veeloo wo biyɔɔ bila, mbo muli aa: “Vɛɛ ya looku yɛ mi bii bila te waŋndo pɛɛku ya le?” * Buɛi Chiisu wo Filipi wa ni, nduyɛ ndoo chaa waŋnda Baabuiyo pɛɛkoo. Mi poo hoo chɛl a kɔllo kpou le mi Filipi mala ndu. (Walta Kiilaa 8:​30, 31, 34) O nɛi pilɛ koŋ choo, te num bɛɛ yeema pɛ ma chɔɔlu sina a Baabuiyo okɔɔ, poonyiaa diola numndaŋ o www.pr418.com ɔɔ o fondaŋnda cho laŋ lebɛŋgu o yauwo hoo niŋndaŋ. Naapum a dimul Seiyaa Chɛhowaa cho num ikɛiya ɔɔ a kua o Toŋgo leMasa cho num ikɛi o tanda numndo niŋndo. Baa o bɛnda ma kandu Baabuiyo pɛɛkoo suŋ suŋ, nduyɛ ma chɛl sila ndɔɔ le mi yoomu numndo wa o sɔvɛ le?