Fondaŋ pum ma veelu ndu aa Padiŋtɔŋ o Lɔndɔŋ niŋ Iŋgilaŋ, loŋ nda velu ya ni. Nduyɛ waŋnda pila cho o fondaa hoo ni. Ya ni, kala nuu ni, a bɛndaa niaa yaa wa, naapilɛ naŋ wa ni. Muɛiyaŋ pila finya naa ndoo kol ni, nduyɛ ndoo buulaŋ a naa okɔɔ tau le.

Teleŋ ya wa o pɔmbɔ wo, mi kala nuu pɛɛku ya le mi wa piɛileŋ ichɔl o ichɔl. Yaa nɔ Baabui pɔmbɔɔ nduyɛ yau Sam ndo koni wa leniŋ ni. Mi tosa kɛɛsiaa le mi wa diomndaŋ veeloo leniŋ. I loonuŋ paale pilɛ mi veelu diomndaŋ o yaula nila sukuulaŋ niŋ, nduyɛ mi kɛsiŋ diomndaŋ ndaŋ o kɔl: “Paale wa niŋ, siɔdii ve lɛ niŋ te.” Mi diomndaŋ ndaŋ la tosa ichɔl koŋ pii I lɔl te, kanifuule I wa yiyaŋndo a chilaŋ okɔɔ. Mi yiyaŋ maa ‘sɔɔŋ cho tau a yoomoo okɔɔ.’ ‘Le sabu yɛɛ ya cho yɛ naŋ?’ Yaa yeema mi vi le!

Yaa yeema bɔɔ sinaa a walta nyinaa wɔɔŋnda okɔɔ. Le hei, mi kandu suukaŋndo a waŋvilɛiya, kɔlaŋ naa nda kumbu waŋvilɛiya wa naa chaaŋaa niaa sukuuwa, a vidueila nɔ walta nyinaa wɔɔŋnda laŋ tofaa. Te naŋ wa laŋ nuaa pɛ, mi nyɔɔ ndoo hɛnaŋ naa kɛ mi siooŋnde ndii bii naa vɛlɛ.

I wa wɔsilaŋ tɔ mi kandu laasiaŋndo. Mi kandu sikɛɛtiiyo kolɔɔ, nduyɛ haupa mi kaa hoo luɛi ya o koowaŋ niŋ. Okoŋ kɔɔli, mi kandu taŋ bɛndoo kolɔɔ. Mɛɛ ya fuuluu wɔsilaŋ 11, mi kandu muɛiyaŋ kolɔɔ. Mi che bɛɛ maa yeela ya o sondo le, kɛ nyɔɔ ndoo hɛnaŋ ya bɔɔ le mɛɛ ma bii yɛ. Yaa kaala bɔɔ vɛlɛ nyɛchaa a yolaŋ. Mi yaa kuɛ o dunyaŋ a o fondaŋnda kolaa mamuɛi laŋ. Nyumndaŋ maa tol dɔɔ pɛ, yaa fulaŋ chiɛiniŋ. Nduyɛ a ditɛɛŋ paale siaa, I miiŋguŋ o bɛɛ. Diimandɔɔ, yaa wa o saŋgɛi yɔkɔɔ kɛ mi yaa kuɛ pisultaŋ teleŋ o teleŋ naa chaaŋaa niaa o sukuu. Te yaa kuɛ yɛ pɛ o sukuu, teleŋnda bɔɔbɔɔ mi yaa kol muɛiyaŋ a teleŋ pɛŋgiaa.

Le hei, wɔsi ya wa sukuuwo chiiyo wo, I sɔla kona kɛndɛ le. Yoomu laasiɛi ya wa hoo niŋndo, kala nuu ve o sina choo le. Kɛ mɛɛ o che kona nuu, mbo tambu kɔl nduyɛ mbo duaunuŋ tumbe. Miŋ sɛɛŋgiaŋ naa ndu okoŋ, mi fulaŋ chiɛi niŋ. Le teleŋ tiŋ, mi kɔ waŋnuŋ o sama nuu lo diolaŋ aa Toni. Viinɔɔ o wa ni nduyɛ mi ndoo pisi kooma wana chua a ve o numpila niŋ te waŋ. Waŋnda ndaa sina ndu maa ndoo kaala bɔɔ sɔŋgɔlaŋ. O viu bɛɛ le, mi chua folioo nduyɛ I wa wɔsilaŋ 16 mi vialu wana pɔnɔɔ.

Kɔɔna pum ndoo nɔ fondaa, le wanaa velu chuauwa kɛ a nɔ ŋpiaandu a nda le wa. Ma ke ya lumuiyo o fondaa hoo le mi wa loŋ. Loŋ ya wa ni, miŋ chiikaŋ naa Seiyaa Chɛhowaa le teleŋ tasoo. Teleŋnda bɔɔbɔɔ, mi waŋ laanduaa Seiyaa Chɛhowaa a ŋiɔɔŋ ndaa hiŋ suukaŋndo a kalaŋ chuauwaa feleŋguaa apum. Paale pilɛ, mi sɔɔŋguu le suukaŋndo a nda. Yaa yeema mi yaa chɔm maa choolaŋ Seiyaa Chɛhowaa cho dimioo ni. Kɛ nyuna o nyuna yaa nɔ, ma soliŋ Baabuiyo kpeku ma mulul la laŋ nyɛkɛndɛi. Ndaa naŋ kaa nduyɛ ma bii ya nyɛkɛndɛi. Mi hei pilaŋ ya kɔllo tau. Le hei, mi chɛl le Baabuiyo pɛɛkoo a nda.

O viu bɛɛ le, mi pɛɛku nyɛ o Baabuiyo niŋ o siŋga yoomu nuu wo. Chɔŋ a teleŋ ya wa o pɔmbɔ wo, yaa nɔ siooŋnde le piɔmndo. Kɛ mi saaluŋ a pɛɛkula Chiisu laŋ okɔɔ maa wanaa vi wa cho vɛlɛ miiŋgu yoomu. (Chɔŋ 5:​28, 29) Mi pɛɛku vɛlɛ maa Mɛlɛka buulaŋ a ya. (1 Pitɛ 5:​7) Mi diomnda cho o Chɛluimaya 29:​11 niŋndaŋ la pilaŋ ya kɔllo tau. Loŋ mi Chɛhowa dimi aa: “Ya Mɛlɛka ya pilɛ kpe sina tuula ya I nɔ le nya laŋ ni. Tuula ya nɔ le nya laŋ, tuula chuu nya niŋ dɛnɛ kɛndɔɔ laŋ la cho ni, la cho tuula chuu nya kpundɛ le. Tuula tosa niŋ mi la nɔ tiindaŋndo o siɔdii nya lachioo niŋ ndaŋ la cho ni.” Mi kandu laalaŋndo maa I tiuba mi nɔ tiindaŋndo le waa achal lefafɛɛŋ o Kpele Hɛnɛkiɔɔ niŋ o chieeŋndo choo.—Sam 37:​29.

Mi Seiyaa Chɛhowaa chɔm ya kaala kpeekpeiyo. Paale tasele ya kuɛ o bɔŋaŋnda ndalaŋ ndeŋ, nyɔɔ ndoo hɛnaŋ ya bɔɔ. Kanifuule, mi wana o wana bii ya nyɛkɛndɛi. (Chɔŋ 13:​34, 35) Mi cha teŋgeŋ bɛndoo nda tɛɛŋ a mɛɛ ndaa bii ya o kaaŋnde yaa kua leŋ niŋ yɛ. A yoomu ya wa niŋndo kpou, mi Seiyaa Chɛhowaa bii ya nyɛkɛndɛi. Ma ke ya teleŋndo, ma yaŋ ya nilaŋ, nduyɛ ma ke ya mala yaa yeema wo. Mi sinaŋ maa o yuŋgu bɛndu bɛndoo niŋ ya cho ni, yuŋgu nɔ kaalaa wo.

Mɛɛ ya kandu Baabuiyo pɛɛkoo, mi sina maa I nɔ mi tosa siŋgaŋndaŋ o yoomu nuu niŋ, mbo chɛlaŋ a sawala filioŋnda Mɛlɛkalaŋ. I ve bɛɛŋ le mi mal sikɛɛtiiyo kolɔɔ le. Mi cha vɛlɛ maa nyɛchaa ya wa nilaŋ yaŋɔɔ wo, wa tosaa le mi yaa chɔɔlu yeemɛi nɔ le taŋ bɛndoo kolɔɔ. Le hei, mi siŋga nyɛchaa yaa yaŋ nilaŋ ndo. Yaa yeema mi biinuŋ bila. Le hei, mi pɛŋgi kɔlaŋ o dunyaŋ vɛlɛ a o fondaŋnda kolaala mamuɛi laŋ, naa yaa nɔ niŋ yeemɛi le mi kol muɛiyaŋ mi ma bii ya wa. Mi nuuviaa chaŋyaŋ sɛnɛiyoŋ, ŋ muŋ tiuba miŋ mala ya o yoomu ni sɛnɛiyo niŋndo.—Pulɔwaa 13:​20.

Kɛ Toni bɛɛ wa hiouwɔɔ lachi a Baabuiyo pɛɛkoo a Seiyaa Chɛhowaa. Mɛɛ Seiyaa Chɛhowaa wa nyunala ndɔlaŋ mulioo o Baabuiyo niŋ yɛ, mi hei tosa mbo sina kɛsɛ maa tonyaa o wa pɛɛkoo ni. Mbo tosa siŋgaŋnda bɛndu bɛndulaŋ o yoomu ndɔɔ niŋ. Mbo pɛŋgi holiaŋndo a chaaŋaa nduaa ndaa kei sɔŋgɔlaŋ mɛlioo wa, mbo mal kaa le viiyo, nduyɛ mbo mal taŋ bɛndoo kolɔɔ. Le miŋ nɛŋi Chɛhowa Mɛlɛka kɔl, miŋ cha maa ŋ nɔ miŋ kindiŋ o nɛi o nɛi niŋ miŋ siɛɛnduu yoomu naa, miŋ mal kaa nɔɔlɛi naŋ wa niŋndo. Nduyɛ miŋ cha maa hei wa po naa mala tau. Le hei, miŋ chal o nɔɔ niŋ a wɔsi 1982.

I loonuŋ yaasiaa tosaa o yaula Bandu Mɛŋgɛlaa a o “Tiondoo!” * niŋ, le buŋgaŋ wanaa sɔla batiuwaa ma tosa siŋgaŋnda yaa yeema mi tosa laŋ. Mi sɔla kɔl dɛɛniaa tau o tamaseliila ndalaŋ niŋ. Mi chɔɔlu kɔl dɛɛniaa sɔla maa I nɔ mi hiou lachi a kindiŋndo nduyɛ I nɔ mi vi ŋdial te. I wa piɛileŋ lɔɔlɔɔ o Chɛhowa lo maa o wu ŋdial a ya le. A Suɛɛsɔɔ 1982, mi Toni a ya sɔla yiŋɔɔ, okoŋ miŋ simnuŋ Seiyaa Chɛhowaa.

Chaŋyɛi kpɛɛluŋ ya kila a Chɛhowa Mɛlɛka ve piŋi yoomu nuu ni. Toni a ya sɔla niŋ malaa Chɛhowa o ba o bahawɛila kala kalala wa naa komallo laŋ niŋ. Ŋ pɛɛku niŋ le Mɛlɛka tiindaŋndo o teleŋ kala kalaa niŋ. Ŋ sina niŋ kɛsɛ maa mbo mala naa teleŋ o teleŋ, nduyɛ mbo ke yuŋgu naa nyɛm naŋ hauba woŋ.—Sam 55:​22.

I wa a kɔl kɛndɛ le po naa a chua naa malaa le ma sina Chɛhowa mɛɛ ya sina ndu yɛ. Nduyɛ, I cho a kɔl kɛndɛ suŋ suŋ le chɔɔ mɛɛ chuauwaa ndaa cho hiouwɔɔ lachi a pɛɛkoo a Chɛhowa Mɛlɛka okɔɔ yɛ.

I hini lɛ ichɔl mi wa buulaŋndo a chilaŋ ɔɔ a piɔmndo okɔɔ le. Mi Toni a ya kuɛ o kundala teŋgeŋ teŋgeŋnda Seiyaa Chɛhowaa niŋ lɔɔ o lɔɔ le nda kɔl dɛɛniaa kioo. Miŋ sɔɔŋguu nda machɛlu le waŋnda pɛɛkoo maa te a laalaŋ pɛ o Chiisu niŋ, nda bɛɛ tiuba ma huŋ sɔla yoomu fafɛɛŋndo.