Teleŋ pilɛ, Chiisu wa o pɛŋgulaŋ Isɔluɛi a o tanda maLuomaŋndo o Siiliaa niŋ, mi chua Kilikiinɔ pilɛ huŋ dimul ndu maa o mala ndu. Le chuaa hoo mulullo, mi Chiisu soliŋ taloo kpeku le tuuwo wanaa cho ŋChuu le wa tɛɛŋ a tuŋaa chuauwa. O Sawa Mɛlɛka ke Muuse wo bɛŋgu, visiaa nɔɔlɛiya tuŋnda wa ni. (Lɛvitikɔɔ 11:​27) Baa yeiyo Chiisu wa chua Kilikiinɔɔ hoo a wanaa cheleŋaa ve ŋChuu le wa ni?

Sako bɛɛ. Kɛ a mɛɛ Chiisu tɛɛsial buɛiyaa nduaa yɛ, nyɛ ndoo kɛsi kɔllo choo a teleŋ koŋ ndo wa le Chuuwa malaa ni. Le hei, mbo mulul chua Kilikiinɔɔ hoo o taloo niŋ aa, “O bɛnda mi wana chua nyɛdiaa cho le chuaambuaa pɔmbuaa wo ma dou tuŋaa chuauwa le.” (Maatiu 15:​21-26; Maki 7:​26) Kaalaa pila Kilikiiya a Luomaŋnda ndaa kaala tuŋnda ni. Le hei, mi ndaa kɛsi tuŋnda o chiɛila nda laŋ niŋ, nduyɛ mi chuaambuaa ndaa pisul a nda. Lelaŋ, mɛɛ Chiisu dimi aa tuŋaa chuauwa, naapum a kaalaa okɔɔ ndoo yiyaŋ ni. Mi chua Kilikiinɔɔ hoo kɛsiŋ nyɛ Chiisu dimul ndu wo o kɔl, mbo dimi aa, “Tonya i cho ni Masanɔɔ, kɛ nduyɛ, tuŋaa chuauwa bɛɛ, te wana nɔ nda wo wa nyɛdiaa dioo pɛ, kuwuŋ deli lɛŋ ndoŋ, muŋ nda bɛɛ dia ni.” Mi Chiisu chandu chuaa hoo le laalaŋ ndɔɔ, nduyɛ mbo siŋgi chua ndɔɔ.—Maatiu 15:​27, 28.

Dɛndɛ mamɛŋ wa kɔlaŋ a Pɔɔl Itali wo, hueiye wa ndu paaliaŋndo kpeekpei. Mɛɛ nda simi dɛndɔɔ o foŋndaŋ pum, mi Pɔɔl sila chaaŋaa nduaa maa a hiau wɔ lachi a kɔlaŋ te. (Walta Kiilaa 27:​9-12) Baa sila kɛndɔɔ pa ndoo wa hoo ni?

Wanaa ndaa kua a dɛndɛlaŋ o pee Mɛditalueeniaŋndo choo wa ndaa sina maa, suɛi kpundɛi pilɛ i wa ni le nda a boondii keŋ. Chɔŋ Bɛŋgufɔnɔɔ 15 kɔ bii Fuoo 15, ndaa chɛl lɛ dɛndɛlaŋ mi laa kuɛ o mɛŋndaŋ choo le. Kɛ kɔla Pɔɔl soo a laŋ okɔɔ laŋ laa nɔ mi la kanduŋ a Tapioo ɔɔ Saa. Mi wana poonyiaa maLoumaŋnɔ pilɛ diolaŋ Vɛkitiɔɔ (naapum o wɔsi 400 o faŋaŋ Chiisu wo kɔɔli) tɛɛsiaa o yau pum niŋ a dɛndɛla kua o pee koŋ choo laŋ okɔɔ aa, “Paŋgoŋ pum muŋ naŋ bɔɔ le kɔlaŋ o pee koŋ choo o dɛndɔɔ niŋ. Paŋgoŋ pum yɛ, mi sikaa ndoo wa waŋnda, nduyɛ ŋ pum yɛ, wanaa piiliaa bɛɛ le.” Mi Vɛkitiɔɔ dimi maa teleŋ ndoo bɛnda tau le kɔlaŋ o pee koŋ choo wo wa ni, chɔŋ Bukuloo 27 haaa Tapioo 14. Kɛ paŋguŋ sikaa ndoo wa waŋnda, ɔɔ teleŋ wanaa piiliaa bɛɛ kposoŋ te wo wa ni, chɔŋ Tapioo 15 haaa Bɛŋgufɔnɔɔ 11, a chɔŋ Fuoo 11 haaa Bukuloo 26. Balɔɔ pila Pɔɔl ndoo balu ni, nduyɛ ndoo sina a sɔɔŋ muŋ okɔɔ kpou. Naapum wana wa kɔlaŋ a dɛndɔɔ wo, nduyɛ a wana dɛndɔɔ bɛɛ ndaa sina a sɔɔŋ muŋ okɔɔ okɔɔ, kɛ a yeŋ Pɔɔl lani le. A lo kɔlaŋ haaa mi dɛndɔɔ kɔɔlu.—Walta Kiilaa 27:​13-44.