Baabuiyo chɔm kpendekele maa maalikɛiya mala Kilisiɔŋaa tonyaa teleŋndaŋ lapum ni, le ma tiuba wali Mɛlɛka ke nda wo tosaa. (Sam 34:​7) Nuawɔ tamaseliilaŋ ndaŋ:

• Mɛɛ Chɛhowa wa Sodɔm a Komoolua tɛɛmbuu wo le dɛnɛ nda wɔɔŋndo, mi maalikɛiya mala wana sakpoo hoo Lɔtu le ma faŋaŋ ndoŋ.—Chɛnɛsee 19:​1, 15-26.

• Mɛɛ nda dɔu puaa Hibuluiyaa yaa wa o yiŋnde tondoleŋ niŋ o Babilɔŋ niŋ sindɛ, mi Mɛlɛka yɔŋ “kiilanɔ ndɔɔ le buɛiyaa nduaa” baŋaa.—Daaniɛɛ 3:​19-28.

• Mɛɛ Daaniɛɛ lɔl o sooŋ kpɔkuŋnda niŋ pii, mbo dimi maa nyɛ o nyɛ yɔŋnuŋ ya le kanifuule, ‘Mɛlɛka yɔŋgu kiilanɔ ndɔɔ, mbo huŋ kiindiaa kpɔkuŋnda sondo laŋ.’—Daaniɛɛ 6:​16, 22.

Teleŋnda bɔɔbɔɔ, mi maalikɛiya ndaa mala Kilisiɔŋnda o wɔsiŋ kɛmɛ tasoŋ niŋ o walta ndaa tosalaŋ niŋ, le sabu Mɛlɛkaa peeloo. Tofawɔ tamaseliilaŋ ndaŋ:

• Mi maalikɛinɔɔ kumbi diola chiɛi manyumndo mbo dimul kiilaa wa loŋ nda maa, a hiou lachi a yooŋgu kɛndɔɔ dimioo o chiɛi Mɛlɛkaa niŋ.—Walta Kiilaa 5:​17-21.

• Mi maalikɛinɔɔ dimul Filipi maa o kɔ o nɛi keeku o pollo niŋ chɔŋ Chulusalɛm le kɔlaŋ Kaasa wo, nduyɛ mbo kɔ dimul po Itoopiaanɔɔ ndoo kuɛ Chulusalɛm le Mɛlɛka piɛiyo wo yooŋgu kɛndɔɔ.—Walta Kiilaa 8:​26-33.

• Mɛɛ teleŋ Mɛlɛkaa fuuluu le mi wanaa cho ŋChuu le wa simnuŋ Kilisiɔŋnda, mi maalikɛinɔɔ chɔɔmuŋ sovɛinɔ maLuomaŋndo o hɔl o yilaŋndo niŋ. Nduyɛ, mbo dimul ndu maa o veelu kiilanɔɔ Pitɛ o ndu lo chiɛi niŋ.—Walta Kiilaa 10:​3-5.

• Mɛɛ kiilanɔɔ Pitɛ wa o chiɛi manyumndo niŋ, mi maalikɛinɔɔ fula ndu o hɔl nduyɛ mbo soli ndu o chiɛi manyum koŋ niŋ.—Walta Kiilaa 12:​1-11.

Nyɛ o nyɛ cho o chɔm maa, Mɛlɛka cho hau maalikɛiya soliŋndo kpeku le waŋnda malaa o nɛi kɔndɔfili niŋ, a mɛɛ i cho i tɛɛsiaa o Baabuiyo niŋ yɛ le. Kɛ mi Chiisu dimi a teleŋ naa hoo okɔɔ aa: “Nduyɛ, yooŋgu kɛndɔɔ hoo a Masale Mɛlɛkaleŋ okɔɔ cho dimiŋ ba o ba fee o chieeŋndo choo, le mi waŋnda kpou tuei. Okoŋ, mi mɛɛlula chieeŋndo la fuuluu.” (Maatiu 24:​14) Baa a sina pa maa buɛiyaa Kiliti wa cho wallo hoo tosaa o nɛi chɔmaa maalikɛiya bɛŋgu?

Yau Sɔɔŋ Chɔɔmaŋndoŋ chɔm kpendekele maa maalikɛiya cho wa waŋchieeya malaa chieeŋndo balɔɔ silɔ le ma pɛɛku a Chɛhowa Mɛlɛka okɔɔ vɛlɛ a sabu ndɔɔ le waŋchieeya. Mi kiilanɔɔ Chɔŋ poonyiaa aa: “Mi cha maalikɛinɔ cheleŋ balɔɔ choo choo. Ndoo nɔ yooŋgu kɛndɛ cho le fɛɛŋ a fɛɛŋndo le mbo dimul waŋnda lekaa o lekaa, a lelɛŋ o lelɛŋ, a isɔɔ o isɔɔ maŋgalaa, a waŋnda suu o suu o chieeŋndo choo. O wa dimioo choo choo kpeleŋ aa: ‘La nɔ siooŋii Mɛlɛkɛi, nduyɛ mi la ke ndu bɛɛleŋ. Kanifuule, boondii o cho waŋnda yamɛi kilul le i fuuluu. Lelaŋ, la piɛi Wana toosiaa choo choo, a lɛŋndeŋ, a pee mɛŋma ihɛllo, a peela pɔmbɔlaŋ kpou wo.’” (Sɔɔŋ Chɔɔmaŋndoŋ 14:​6, 7) Sɔɔŋ yɔŋnaŋndoŋ o teleŋ naa hoo niŋ chɔm kpendekele maa maalikɛiya cho wali dimiaa yooŋgu kɛndɛ cho tosaŋndo chieeŋndo balɔɔ silɔ wo tooloo. A tonya, te wana yɔŋ wɔɔŋndo opilɛ bɛɛ mal pɛ yɔŋ ndɔ wɔɔŋndo mbo muliŋ o Chɛhowa lo, “mi maalikɛiyaa Mɛlɛkaa dɔɔnuŋ nyaale.”—Luku 15:​10.

Yɛɛ cho yɛ yɔŋnɔŋ te wali dimiaa yooŋgu kɛndɔɔ huŋ chuu pɛ? “Puaa chɔuwaa cho o choo choo niŋnda” cho Chiisu Kiliti toolu o cho Masaa le masaa kpou wa, “le chɔu nɔ le yɔŋnɔŋndo o paale Mɛlɛka Kpaaya Kpou Kpou Wo choo wo,” a teleŋ chɔu Amakɛdɔŋndo. (Sɔɔŋ Chɔɔmaŋndoŋ 16:​14-16; 19:​14-16) Maalikɛiyaa kpaaya bɛnduaa haa Mɛlɛka cho soliŋ kpeku ni, le “wanaa . . . kɛɛ yooŋgu kɛndɔɔ a Masanɔ naa Chiisu okɔɔ wa nyɛpalaa tusi choo.”—2 Tɛsaloniaŋ 1:​7, 8.

Kɛsiŋ o kɔl maa maalikɛiya nɔ yeemɛi kpeekpeiye o num niŋ. A buulaŋ tau le wanaa yeema Mɛlɛka piɛiyo wa. Nduyɛ mi Chɛhowa soliŋ nda kpeku teleŋ o teleŋ, le buɛiyaa nduaa laalaŋaa cho o chieeŋndo choo wa mandaa a nda yoomuaŋ lueiyo.—Hibuluiya 1:​14.

Naa pilɛŋ pilɛŋnda kpou nɔ kɛɛsiaa kala kalaa le tosaa. Baa ŋ cho pa nilaŋ yaŋɔɔ o yooŋgu kɛndɛ cho hau dimiŋndo chieeŋndo balɔɔ silɔ wo nduyɛ miŋ diikuŋ ndu? Seiyaa Chɛhowaa o tanda numndo niŋ cho wa a kɔl kɛndɛ le num malaa, ma sɔla tɔnɔɔ o mala maalikɛiya yɔŋgu wo niŋ.