Ei, maalikɛiyaa dɛnɛ wɔɔŋnda cho. Kuɛɛnɛ nda fula yɛ? Loonuŋ maa mɛɛ Mɛlɛka toosiaa Maalikɛiya, mbo ke nda hɛnɛkɛyɛi. Mɛɛ Mɛlɛka toosiaa wana pɔnɔɔ a wana lanɔ tasoo, nda cho yɛ Adam nda Ifi ni, nyɔɔ viu bɛɛ le, mi maalikɛiyaa walaŋaa Mɛlɛka toosiaa wa opilɛ tosa chuaŋ chuaŋ wɔɔŋndo. Nduyɛ mbo huŋ a nila kalulaŋ o chieeŋndo choo. Mbo tosa mi Adam nda Ifi tosal Mɛlɛka nila kalulaŋ. (Chɛnɛsee 3:​1-7; Sɔɔŋ Chɔɔmaŋndoŋ 12:​9) Baabuiyo chɔm diola maalikɛinɔɔ hoo, ɔɔ kunda o wa choo o choo choo niŋ tuupa mbo tosa nila kalulaŋ ndo le. Kɛ mɛɛ o tosa nila kalulaŋ, mi Baabuiyo veelu ndu aa Setana. Koŋ cho ni, “Wana Nilakaloo.” Ndu nɔ vɛlɛ diolaŋ ni aa Masa Nyinaa Wɔɔŋnda. Koŋ cho ni, “Wana Lachoowaa.”—Maatiu 4:​8-11.

I cho suɛi imɔnɔ le sinaa maa nila kalula laŋ la mɛɛlu loŋ te. O palɛi Nuuwa ve niŋ, mi maalikɛiya apum mal fondaŋ nda wa o choo choo niŋ o yuŋgu Mɛlɛkaa niŋndo. Ma huŋ o chieeŋndo choo, nduyɛ ma chua dialuŋ ŋwana chieeyaŋ. Okoŋ ma luei balaŋ o kaala nɔɔlɛilaŋ niŋ. Nduyɛ o cho le kaalaŋ ndaŋ te Mɛlɛka toosiaa nda le.—Chudi 6; Chɛnɛsee 6:​1-4; 1 Pitɛ 3:​19, 20.

Yɛɛ ndoo yɔŋnuŋ yɛɛ a maalikɛiyaa dɛnɛ wɔɔŋnda haa? Mɛɛ Mɛlɛka hiŋ a mɛŋma koŋgima bɛnduaŋ le chieeŋndo dindioo, ma mal dialuŋ ndaŋ ŋwana chieeyaŋ, okoŋ ma miiŋguŋ o inyinaya. Mɛlɛka chɛl lɛ maalikɛiyaa dɛnɛ wɔɔŋnda haa ma miiŋgu o fondaŋ nda wa wo le. Kɛ, mi Mɛlɛka mal nda o nyumma kpiŋgbi bɛnduaŋ niŋ. Ndu cho yɛ Tatalɔɔ ni. (Chudi 6; 2 Pitɛ 2:​4) Nyinaa wɔɔŋnda haa yɛ, o kpaaya Setana, o cho “masa nyinaa wɔɔŋnda” wo ba bɛŋgu nda cho ni. O “cho hiouwɔɔ lachi a chɔmndo maa maalikɛinɔ nyɛ teŋgaa o cho ni.”—Maatiu 12:​24; 2 Kɔliŋtiaŋ 11:​14.

Baabuiyo pɛɛku maa a wɔsi 1914 * Chiisu kandu Masaleŋ o choo choo niŋ ni. Okoŋ kɔɔli, mbo soli Setana a nyinaa nduaa wɔɔŋnda o choo choo niŋ, mbo nyindu nda o lɛŋndeŋ choo. Dɛnɛ wɔɔŋ a kaala nɔɔlɛila kui niŋ hau o chieeŋndo choo laŋ, la chɔm kɛsɛ sɔɔŋ wɔɔŋ nda cho hau tosaa woŋ.—Sɔɔŋ Chɔɔmaŋndoŋ 12:​9-12.

Kaala nɔɔlɛilaŋ a sɔŋgɔla cho hau hiouwɔɔ lachi a yɔŋnuŋndo laŋ la chɔm kɛsɛ maa mɛɛlula ndalaŋ la cho niŋ kpɛɛluŋ. O lo niŋ chobe mi nyaa yoomaa dɛnɛ wɔɔŋaa cho haa o inyinaya wa huŋ faŋaŋ bau o chieeŋndo choo. Te Masale Mɛlɛkaleŋ le huŋ chii pɛ wɔsilaŋ 1,000 o kpele hɛnɛkiɔɔ niŋ o chieeŋndo choo, maalikɛiyaa dɛnɛ wɔɔŋnda haa cho vɛlɛ teleŋ biŋgi sɔla, le waŋchieeya tɔɔndaŋndo. Okoŋ kɔɔli, mi Mɛlɛka tɛɛmbuu nda le fɛɛŋ a fɛɛŋ.—Maatiu 25:​41; Sɔɔŋ Chɔɔmaŋndoŋ 20:​1-3, 7-10.