O lɛŋnde ibuŋgale nda veelu aa Kulasao leŋ niŋ Kɛnɛt nda Felomina cho ichali ni. Paale pilɛ o Kuɛɛndoo choo ipalaa, ma kua pɔnɔɔ a lanɔ nda cho Baabuiyo pɛɛkoo wa yilɔɔ.

Mi Kɛnɛt dimi aa: “Mɛɛ naŋ fuuluu, ŋ komal dioo o kindaa. Nduyɛ mɔmbil ndaa ve loŋ te. Mi del kɔl le laa ndɔ veeloo o foŋndo choo.”

Mi laa ndɔ muli, mbo dimi maa pɔnɔ ndɔ kuɛ o wallo niŋ. Kɛ mɛɛ o sina maa Kɛnɛt nda Felomina cho o dio ni, mbo kumbi dioo okoŋ ma luɛi chiɛiniŋ.

Mɛɛ nda luɛi, ma saaluŋ maa chuaa hoo wa chaŋndo. Mɛɛ Kɛnɛt wa piɛileŋ le ma kandu Baabuiyo pɛɛkoo, mi chuaa buli vɛlɛ chaŋndo. Okoŋ, mi Kɛnɛt nda Felomina nyuna ndu o nɛi chaa niŋ le nyɛ yɔŋnuŋndo.

Mi chuaa tɛɛsial nda maa ndoo yeema mbo diinuŋ paaleleŋ kpeekpei. Nduyɛ maa teleŋ o wa pɔnɔ ndɔ poonyiallo le sabu o wa diinɔŋndo wo kinɛi Kɛnɛt veelu ndu ni. Mi hei tosa o hiu lɛ lachi a poonyiaa le. Mbo dimul nda maa o wa bɔɔ saŋgaa o kɔllo niŋ. Okoŋ ma soliŋ Baabuiyo kpeku le ndu kɔllo dɛɛniaa. Mi kɔl dɛɛniaa nda ke ndu koŋ ndo piŋi yoomu ndɔɔ.

Mi Kɛnɛt dimi aa: “Ŋ mel Chɛhowa balikaa le mɛɛ o chɛl naa miŋ mala chua wa hoo a kɔl tambɛiyo wo yɛ. Naapum maalikɛinɔɔ ɔɔ nyina ndɔ diandaa nyindu naa ni miŋ veelu ndu o foŋndo choo!” *

Baa Kɛnɛt nda Felomina nɔ pa ma laalaŋ maa Mɛlɛka mala nda ni sanaa a maalikɛinɔɔ, ɔɔ nyina ndɔ diandaa? Baa mbo wa maa veeloo ko nda veelu chuaa hoo a teleŋndo kinɛi ni?

Ŋ sina tau le. Kɛ o naŋ sina wo cho ni maa, mi mɛlɛka soliŋ maalikɛiya kpeku le waŋnda malaa ma sina ndu. Le tamaseliiyo, Baabuiyo dimi maa mi Mɛlɛka soliŋ maalikɛinɔɔ kpeku, le mi Filipi wana dimiaa yooŋgu kɛndɔɔ mala po Itoopiaanɔ ndoo yeema sinaa a Mɛlɛka okɔɔ wo.—Walta Kiilaa 8:​26-31.

Piɛiyii bɔɔbɔɔ laalaŋ o nyaa yoomaa cho o inyinaya ma nɔ kpaayaa wa niŋ. Waŋnda apum yiyaŋ maa nyaa yoomaa haa, apum cho le wali Mɛlɛkaa tosaa, ɔɔ le waŋnda mandaa. Wanaa bɔɔbɔɔ laalaŋ maa maalikɛiya cho, nduyɛ maa a tiuba ma mala nda o nɛilaŋ lapum niŋ. Kɛ wanaa bɔɔbɔɔ laalaŋ o maalikɛiya niŋ kposoŋ te.

Baa maalikɛiya cho pa kpeekpei? Te lende i cho ni, kuɛɛnɛ nda fula yɛ? Yɛɛ cho yɛ tonyaa a maalikɛiya okɔɔ? Baa maalikɛiya mala num pa? Ŋ yaasiaŋndɔ a hei okɔɔ.