Sela wa wallo, okoŋ mbo muliŋ mbo heelu hɔlla choo choo. O nɛi ndɔ chɔmaa bɛŋgu, buɛiyaa wa wallo le ndu wa a wa a kɔl kɛndɛ nduyɛ mi ndaa tosa waloo tau. Mi Sela bɛɛ ndoo tosa wali ndoo nɔ le tosaa wo. Yiyaŋndɔ mɛɛ Sela ndoo chiimiaa balaŋ le pultaŋ faŋaŋndo lekɔɔ yɛ. O tɛndiiyo niŋ ndaa lɔl ni. Naapum mi ndoo chua dɔɔ teleŋndo tau le naa ndoo buulu wa sondi sondioo. Mɛɛ paaleŋ a piɔɔ lee luaa kolala ndaa toosiaa a yiiŋii chuiŋndo laŋ fau yɛ, lende koni laa kua a deendiaa ni. Mi hei ndii yiyalaŋ Sela a mɛɛ kpɛ nda viou niŋ kuɛɛ dioo o kelaa niŋ yɛ. Yiyaŋndɔ maa paaleŋ le sɛ, mi Ebilaham mal mbo kua wallo. Mbo kɔ niilu kpɛŋ, nduyɛ mi paaleŋ le del doŋ. Laa ndɔ wa nuaa o nɛi le ndu nduyɛ mɛɛ o che ndu pembei helɔɔ, mbo mam muɛɛŋ o kaalaa niŋ.

O kpeekpei niŋ, diola pɔnɔɔ a lanɔɔ hoo la wa Ebilam a Seluai ni. Kɛ mi Mɛlɛka siŋga diola nda laŋ. O buŋgɛi hei niŋ, diola wanaa bɔɔbɔɔ sina laŋ naŋ cho soliŋ kpeku ni.

Wɔsila bɔɔbɔɔ laa hiou niŋ, chɔŋ a teleŋ Ebilaham mɛi yuŋgu ndɔɔ mbo taŋ Pioo Yufiluatii, mbo huŋ o lɛŋnde Keŋnaŋ ndeŋ niŋndo. Mi Sela toolu pɔnɔ ndɔ a kɔllo kpou le kɔlaŋ o fondaŋ ndaa sina hoo le wo. Kanifuule, ndoo sina maa pɔnɔ ndɔ Chɛhowa wa soliŋ kpeku ni le sabu dɔɔ peeloo. Nduyɛ maa o ndu niŋ sanaa Mɛlɛka wa po ndɔ sɔviɔɔ a kaaleŋ soli ni. Yɛɛ Sela ndoo nɔ yɛ le tosaa o hei niŋ? Sela ve wana vialaa le, nduyɛ o wa niŋ wɔsilaŋ 75. Kɛ mbo nyunaŋ dɔɔ aa, ‘Vɛɛ sabu Chɛhowa wo cho yɛ peelɔŋ te I wa pɛ lanɔɔ Ebilaham?’ Te Sela ndoo buulaŋ pɛ a hei okɔɔ ɔɔ mi kɔllo ndoo wa ndu pulaŋ pulaŋ, wanaa nɔla ma bii ndu bila.

Naa bɛɛ lepum miŋ nyunaŋ le teleŋ sɔɔŋ Mɛlɛka mɛi lediomndoŋ cho peelɔŋndo. Teleŋnda bɔɔbɔɔ, miŋ saŋga a chumndo taama taama te nyɛ naŋ cho kɔllo yala yɔŋnɔŋ te. Yɛɛ naŋ pɛɛku yɛ o tiindaŋ wana lanɔ sɔviɔɔ hoo chɔmndo niŋ?

Yuŋgoo hoo laŋga fula Ichipi. (Chɛnɛsee 13:​1-4) Ma kɔ kila dɔɔŋgɔɔ o pembei Bɛtɛɛl, ba paaleŋ le chaŋ ndo ɔɔ Lusi, a mɛɛ waŋnda Keŋnaŋ ndaa veelu ndu yɛ. O pembei hei choo, Sela ndoo nɔla mbo che lɛŋnde Mɛlɛka mɛi lediom le nda kioo leŋ. Sɔndɔkɔlta Kenanaitiiya la wa loŋ, vɛlɛ a nɛila waŋnda ndaa kei le kɔlaŋ o fondaŋnda levil taŋ nda. Nyɛ o nyɛ ve loŋ o wanaa tuu a chiee Sela fula wo le. Chiee Sela wo wa Ɔɔ ni nduyɛ ndaa kuɛ niŋ ndu levil le kilolaŋ 1,900. Lɔɔlaŋ la wa o chioo hoo niŋ, nduyɛ a nyɛm kɛndɛ kɛndɔŋ leniŋ. Chioo hoo wa o kpakioo niŋ, nduyɛ naapum ndoo nɔ pɛŋ mɛŋma pɔmpiiyaŋ! Kɛ mi Sela mɛɛ wanayaŋ ndɔŋ, chiɛi kɛndɛ ndoo nɔ wo, a nyɔɔŋ muŋ kpou kɔɔli. Te ŋ yiyaŋ pɛ maa Sela wa tofaa ba paaleŋ le chaŋ ndo mbo tambu kɔl a chiee ndɔ kɛndɛ o mɛi kɔɔli wo, mɛɛ ŋ sina chua ndoo nɔ hoo tiindaŋndo o Mɛlɛka niŋndo le.

Mɛɛ wɔsilaŋ la hiou le 2,000 okoŋ kɔɔli, mi nyina Mɛlɛkaa mala kiilanɔɔ Pɔɔl mbo poonyiaa nyɛ a hei okɔɔ. Mɛɛ o wa suɛi a tiindaŋ Ebilaham nda Sela wo okɔɔ, mbo dimi aa: “Te ndaa wa pɛ yiyaŋndo a fonda nda fula wo okɔɔ, a wa nɛilaŋ nuuviaa le miiŋgɔŋndo loŋ.” (Hibuluiya 11:​8, 11, 15) Ebilaham nda Sela ve yiyaŋ a naa nda fula wa okɔɔ kposoŋ te. Te yiyaŋ waa naa ndoo hiŋ nda o kɔl pɛ, naapum ndaa kɛɛsiaa le ma miiŋguŋ o nda lo. Te ndaa miiŋgu yɛ pɛ Ɔɔ, dikeŋnaŋ bɛndu Chɛhowa ndoo dimi le nda kioo wo wa nda hiɔlɔŋ. Te ndaa tosa lende pɛ, waŋnda wa puɛɛnɔŋ a nda okɔɔ. A ve simnɔŋ wanaa tamasi nɔ tiindaŋndo o Mɛlɛka niŋ, mi waŋnda o miiliɔŋndaŋ niŋ a wa hau nda tolɔɔ kɔɔli le.

Mi Sela kɛsi kɔllo o chilaŋ choo, kɛ o cho o sɔɔŋ o mɛi kɔɔli woŋ choo le. Le hei, mi Sela hiau lachi a pɔnɔ ndɔ tooloo o balɔɔ nda wa wo niŋ. Mi ndoo mala ndu tɛndiilaŋ puusiaa, balɔɔ a chɔluaa, nduyɛ a dɔɔŋgɔ cheleŋ kilaa. Mbo biuŋ vɛlɛ sɔɔŋ palaŋ cheleŋndoŋ a siŋgaŋnda wa ndu komallo laŋ. Mi Chɛhowa dimul vɛlɛ Ebilaham diomnde mɛyaaleŋ ndeŋ, kɛ o suu a Sela okɔɔ le!—Chɛnɛsee 13:​14-17; 15:​5-7.

O mɛɛlulaŋ kpɔŋ, mi Sela kɛɛsiaa maa teleŋndo cho hoo ni le Ebilaham dimullo nyɛ cho yiyaŋ ndɔɔ wo. Yiyaŋndɔ mɛɛ hɔlla wa ndu yɛ mɛɛ o wa Ebilaham diomndaŋ ndaŋ dimullo aa: ‘Mɛlɛka Yaawɛɛ ke ya violɔɔ le.’ Okoŋ, mbo dimul pɔnɔ ndɔ maa o hiviŋ chuaambɔ ndɔ chiɔɔ kɔɔli Hakaa mbo vilul ndu chuauwa. * Yiyaŋndɔ mɛɛ kɔllo wa Sela o tambɛiya mɛɛ o wa pɔnɔ ndɔ diomndaŋ ndaŋ dimullo. Mɛlɛka chɛllɛ hau mi i waa naa yɔŋnuŋ te. Kɛ i ve suɛi wɔɔŋ o teleŋ koŋ niŋ, le mi poo nɔ lanɔ diiŋ ndɔɔ ɔɔ samaa le mbo vilul ndu chuauwa le. Baa Sela ndoo yiyaŋ pa maa o nɛiyo hoo choo sabu Mɛlɛkaa le kaaleŋ solioo o pulale Ebilaham ndeŋ choo cho peelɔŋ ni? Sela wa o bɛɛndiaŋ a kɔl ndɔɔ kpou le mbo soliŋ sala o nɛi o nɛi niŋ. Yɛɛ Ebilaham ndoo tosa yɛ? Baabuiyo dimi aa: “Mi Ebilaham chɛl nyɛ [Sela] dimul ndu wo.”—Chɛnɛsee 16:​1-3.

Baa nyɛ yɔŋnuŋ hoo wo chɔm pa maa Chɛhowa ndoo dɔu Sela o kɔl ni le kɛɛsiaa waa naa tosaa? Pɛ pɛ bɛɛ. Kɛ mi kɛɛsiaa o tosa hoo wo chɔm yiyaŋ iwana chieeyaa. Mi Sela bii Mɛlɛka tɔɔyaŋ le bahawɛila wa ndu komallo laŋ. Nduyɛ o yiyaŋ lɛ naa maa Mɛlɛka nɔ nɛi cheleŋ o soli bahawɛilaŋ ndaŋ te. Mi kɛɛsiaa Sela pila tosa hoo wo chuu ndu kɔl tambɛiyo tau. Kɛ a koŋ kpou, mi kɛɛsiaa ndɔɔ hoo chɔm maa o ve wana ikaaye le. O chieeŋndo niŋ hau, teleŋnda bɔɔbɔɔ mi waŋnda kɛsiŋ yeemɛi ndɛi acheleŋnda lachi. Baa o cho kaa kɛndɔɔ le Sela chɔm hoo le kiɔɔ kaayei nɔɔ le? Te naa bɛɛ kɛsi pɛ hɛnaŋ Mɛlɛkaa yeemaŋ naŋ lachi, mɛɛ tamasi Sela wo naŋ cho koŋ tolɔɔ kɔɔli ni.

Nyɔɔ viu bɛɛ le, mi Ebilaham ke Hakaa folioo. Le mɛɛ Hakaa ndoo chua niŋ folioo yɛ, naapum mbo yiyaŋ maa o cho o sɔvɛ mbo hiau Sela. Le hei, mbo kandu Sela tɛɛŋndaŋ ndo. Nuawɔ se suɛi kɔl tambɛi bɛndu le Sela! Mi Ebilaham chɛl le mi Sela kandu Hakaa biyɔɔ wɔɔŋndo, nduyɛ mi Mɛlɛka toolu ndu. Okoŋ, mi Hakaa vialu poo ma ke ndu diolaŋ aa Isimɛɛl nduyɛ, mi wɔsilaŋ la tiŋ la hiau. (Chɛnɛsee 16:​4-9, 16) Mɛɛ Sela wa wɔsilaŋ 89 mi pɔnɔ ndɔ wa wɔsilaŋ 99, ma sɔla vɛlɛ yooŋgu cheleŋ Chɛhowa wa o ba. Nuawɔ se yooŋgu kɔl kɛndɛ bɛndu ndaa sɔla wo!

Mi Chɛhowa dimul vɛlɛ Ebilaham chaaŋndɔ maa o cho tosa mi chuauwaa nduaa kui. Haaa huŋ bii a boondei hei, diola ndɔlaŋ la wa ni aa Ebilam. Kɛ mi Mɛlɛka siŋga diola ndɔlaŋ. Mi Chɛhowa ke ndu niŋ diolaŋ aa Ebilaham. Ndu sim ni, “Finyaa le kaalaŋ tau tau.” Teleŋ tasoo wa hoo ni, mi Chɛhowa chɔm foofo Sela wo o suɛi hei niŋ. Diola ndoo nɔ paandu laŋ la wa Seluai ni, nduyɛ nyɛ diola laŋ laa sim dɔɔ wo wa ni, wana la sɛɛŋgiaŋndo. Kɛ mi Mɛlɛka siŋga laŋ a diola naa kpou sina hau laŋ aa Sela. Diolaŋ ndaŋ Sela, yɛɛ la sim yɛ? Nyɛ la sim ndo cho ni, Wana Lanɔ Fula o Yuŋgu leMasaa Choo Wo! Mi Chɛhowa pila tɛɛsiaa le sabu o hɛli diolaŋ ndaŋ le wana lanɔ o kaala hoo wo. Mbo dimi aa: “I cho ndu salaa dɔwɔɔ, nduyɛ o koŋ kɔɔli, mi tosa mbo vilul num poo. I cho ndu salaa dɔwɔɔ, nduyɛ mbo simnuŋ kalaa le kaalaŋ tau tau. Masaa bɛnduaa a fula niŋ o pulale ndɔleŋ choo.”—Chɛnɛsee 17:​5, 15, 16.

Kpema Chɛhowa yii le mi poo dɔu kaalaŋ kpou sala wo, ndoo nɔ le peelɔŋndo sanaa o po Sela wa violɔɔ wo niŋ! Diola Mɛlɛka hɛli le poombɔ koŋ ndaŋ la cho ni aa Aase. Nyɛ la sim ndo cho ni, “mamɔɔ.” Mɛɛ Ebilaham tuei maa Chɛhowa dɔu Sela sala maa o cho poo violɔɔ, mbo “tunduŋ, mbo baŋ hɔlla lɛŋ, mbo mam.” (Chɛnɛsee 17:​17) Mi kɔndɔfillo bii ndu, nduyɛ mbo duaunuŋ nyaale tau. (Luomaŋnda 4:​19, 20) Kɛ yɛɛ Sela ndu tosa yɛ?

Nyɔɔ viu bɛɛ le, mi puaa a yaa huŋ Ebilaham yilɔɔ o tɛndii ndɔɔ. A paale kalaleŋ nda hiŋ ni nduyɛ, mi pɔnɔɔ a lanɔ wa niŋ haa a yuwɛiya yiya nda chɔchɔ. Mi Ebilaham dimul Sela aa: “Tuu kolo toosiaa beediiyo o kɛndɛ kɛndɔɔ, nyɛ tuwaa le yaa, ma lom beediiyo chɔ chɔ.” O paandoo niŋ, wallo pila ndoo yeemaŋ ni le mialla yiyaa. Le hei, Ebilaham mel laa ndɔ wallo o ba ndupilɛ le. Mi ndu kua pɔɔ mbo kɔ dii nau fɔŋndɔɔ, ma toosiaa nyɛdiaa tau a muɛiyaŋ. (Chɛnɛsee 18:​1-8) Mi Ebilaham mɛɛlu sina maa maalikɛiyaa Chɛhowaa puaa haa wa ni. Naapum nyɛ yɔŋnuŋ hoo wo Pɔɔl ndoo nɔ o kɔl ni mɛɛ o poonyiaa diomndaŋ ndaŋ aa: “La mal mialla yiyaa le. Kanifuule, o hei tosaa niŋ, mi apum yiya maalikɛiya a ve o sina choo le.” (Hibuluiya 13:​2) Baa a nɔla pa ma tol tamasi kɛndɛ Ebilaham nda Sela kɛsi hoo le mialla yiyaa wo kɔɔli?

Mɛɛ maalikɛiya haa opilɛ wa Ebilaham dimullo a diomnde Mɛlɛka mɛi maa Sela cho poo violɔɔ wo okɔɔ, Sela ve o hɔlndɔ le. Kɛ, o wa o tɛndii ndɔɔ niŋ mbo wa nilaŋ yaŋɔɔ. Mɛɛ o yiyaŋ a wɔsiŋ ndɔŋ okɔɔ, mbo yiyaŋ maa o tiu lɛ ba mbo velu le. Mi kɔndɔfillo bii ndu tau, okoŋ mbo mam. Mbo dimi aa: “Ya yuuwa niŋ hoo wo, ya vialu vɛlɛ ni, ya yeema vɛlɛ suɛi wana pɔnɔɔ ni? Pɔnɔ ni kalaa bɛɛ ndu yuuwa niŋ.” Mi maalikɛinɔɔ miŋgi Sela o nɛi mbo dimul ndu aa: “Nyɛ o nyɛ cho mi Mɛlɛka Yaawɛɛ bumba tosa le.” O yiyaŋ iwana chieeyaa niŋ, mi siooŋnde bii Sela mbo viinuŋ aa: “I mem te!” Okoŋ mi maalikɛinɔɔ dimul ndu aa: “Ma mam.”—Chɛnɛsee 18:​9-15.

Baa mamɔɔ Sela mam koŋ ndo chɔm ni maa ndoo nɔ tiindaŋ te? Pɛ pɛ bɛɛ. Baabuiyo dimi aa: “Laalaŋndo tosa vɛlɛ ni mi Sela sɔla kpaayaa le poo violɔɔ, mi che bɛɛ ndoo hiou niŋ teleŋ vialaa. Kanifuule ndoo laalaŋ maa wana chuel ndu buŋgɛiyo cho wana lo o lediom.” (Hibuluiya 11:​11) Sela ndoo sina Chɛhowa. Ndoo sina maa buŋgɛi kɛ kɛ o chua pɛ, o nɔla mbo peelu ndi. O nɛɛnɛ cho yɛ o yeema mbo nɔ laalaŋ kala waa naa le? Ŋ nɔ miŋ kindiŋ miŋ sina Mɛlɛka nɔ Baabuiyo wo nyɛkɛndɛi. Te ŋ tosa lende pɛ, ŋ cho chɔ maa Sela ndoo nɔ di mbo nɔ tiindaŋ waa naa. Wana lo o lediomndo kɛsɛ Chɛhowa cho ni. Nduyɛ nyɛ o nyɛ o dimi pɛ le tosaa, tosaa o tosa ndu ni. Lepum pɛŋ, mbo tosa ndi o nɛila kɔndɔfilta naŋ ve bɛɛ kɔl te laŋ niŋ, okoŋ miŋ mam.

O mɛɛlulaŋ kpɔŋ, mɛɛ Sela wa niŋ wɔsilaŋ 90, mi yeemɛi ndoo nɔ o yoomu ndɔɔ niŋnde peeluŋ. Pɔnɔ ndɔ kaalaa wa niŋ wɔsilaŋ 100, mbo vilul ndu poo! A mɛɛ Mɛlɛka dimul ndu yɛ, mi Ebilaham ke poombɔɔ hoo diolaŋ aa Aase, ɔɔ “Mamɔɔ.” Yiyaŋndɔ mɛɛ Sela wa o saŋgɛi yɛ. Kɛ a koŋ kpou, hɔlla wa ndu mɛmɛlɛsɛɛ mɛɛ o wa diomndaŋ ndaŋ dimioo aa: “Mɛlɛka tosa mi mam. Wana o wana tuei pɛ maa I velu, mamɔɔ o mam ni.” (Chɛnɛsee 21:​6) Mi ke kaamaa Chɛhowa ke ndu hoo wo tosa mbo wa a kɔl kɛndɛ haaa mbo wu. Kɛ, mi kioo hoo huŋ vɛlɛ a kalaŋnda cheleŋ.

Mɛɛ Aase fuuluu wɔsilaŋ la ŋuɛɛnu, mi Ebilaham veelu bɔŋaŋndo le ndu mɛɛleŋ solioo o sondo. Kɛ o cho waŋnda kpou le ndaa naŋ kɔl te. Baabuiyo dimi maa mi Sela “cha” kaa wɔɔŋ wa yɔŋnɔŋndo wo. Mbo cha Isimɛɛl, po Hakaa wo, o wa niŋ wɔsila 19 wo Aase mamɔɔ. Hei ve mamɔɔ lapisul te. Mi kiilanɔɔ Pɔɔl poonyiaa a mamɔɔ koŋ okɔɔ maa nyɛpalaa o wa Aase tusioo choo ni. Mi Sela cha maa mamɔɔ hoo wa suɛi kpundɛ le po ndɔɔ. Sela ndoo sina maa Aase ve ko poo le poo leŋ te, kɛ maa o ndu niŋ sanaa Chɛhowa cho sabu ndɔɔ peelu ni. Le hei, mbo chɔm kɔl simulaa mbo dimul Ebilaham a ndi okɔɔ. Mbo dimul ndu maa o tou Hakaa nda po ndɔɔ ma kuɛ.—Chɛnɛsee 21:​8-10; Kaleesiaŋnda 4:​22, 23, 29.

Vɛɛ Ebilaham ndoo bii yɛ suɛi hei? Baabuiyo dimi aa: “Mi Ebilaham tambu kɔl tau o suɛi hei niŋ kani fondole, Isimɛɛl bɛɛ po ndɔɔ o wa ni.” Kaalaa pila ndoo kaala Isimɛɛl ni, nduyɛ mi hei tosa o bii suɛi hei bila le. Kɛ mi Chɛhowa cha suɛi hei kpendekele le hei, mbo luei balaŋ leniŋ. Baabuiyo dimi maa mi Mɛlɛka dimul Ebilaham aa: “Ebilaham, tambu kɔl le poombɔɔ a kala ndɔ le. Nyɛ o nyɛ [Sela] dimul num pɛ, a tosa. Kani fondole, o Aase niŋ pulale numndeŋ le fula niŋ ni.” Mi Chɛhowa ke Ebilaham tiindaŋndo maa Hakaa nda po ndɔɔ cho nyɛm nda hauba woŋ sɔla. Mi Ebilaham yaŋ Chɛhowa nilaŋ.—Chɛnɛsee 21:​11-14.

Lanɔ ndoo bɛnda le Ebilaham ndo kpeekpei Sela wa ni. O cho ko nyɛ pɔnɔ ndɔ ndoo yeema le tueiyɔɔ suei wo le ndoo dimul ndu le. Te ndoo che pɛ bahawɛi ndoo paaliaŋ niŋ yuŋgu ndaa o chilaŋ niŋndo, mi ndoo dimul pɔnɔ ndɔ kpendekele. Ŋ nɔ miŋ yiyaŋ maa mɛɛ ndoo suaa yɛ chɔm maa ndoo nɔ lebɛɛ kposoŋ te le. Kiilanɔɔ Pitɛ bɛɛ ndoo nɔ lanɔɔ. Mbo suaa pɛŋ a tamasi kɛndɛ Sela wo okɔɔ maa, lanɔ ndoo nɔ bɛɛle yiŋgoloŋndeŋ le pɔnɔ ndɔ wo o wa ni. (1 Kɔliŋtiaŋ 9:​5; 1 Pitɛ 3:​5, 6) O kpeekpei niŋ, te Sela ndoo meinuŋ pɛ a suɛi hei okɔɔ, ndoo nɔ niŋ lebɛɛ kposoŋ le Ebilaham te. Kanifuule, hei ndii wa niŋ suɛi kpundɛ bɛndu le ndu, vɛlɛ a yuŋgu ndɔɔ kpou. Mi Sela dimi nyɛ ndoo nɔ le dimioo wo o nɛi kaalaa niŋ.

Laanduaa bɔɔbɔɔ kaala bɔɔ tamasi Sela wo. Ma pɛɛku ndu o ba le suɛi o piaandaa ndaa lo a kɔl ndaa kpou o nɛi lebɛɛ niŋ. Teleŋndaŋ lapum, mi laanduaa apum yiyaŋ maa Chɛhowa luei ko balaŋ o sɔɔŋ ndaŋ niŋ mɛɛ o tosa a Sela yɛ. A koŋ kpou, ma pɛɛku le tiindaŋ Sela wo, kaala o chɔmndo, a biuwɔŋ ndɔɔ tolɔɔ kɔɔli.

Mi che bɛɛ Chɛhowa pila ke ndu diolaŋ ni maa wana lanɔ fula o yuŋgu lemasaa choo wo, kɛ o chueŋnuŋ maa o cho o sɔvɛ mbo hiau a tuaa le. Le saboo hoo, mɛɛ o chii wɔsilaŋ 127 mbo wu, mi Ebilaham chaŋ laa ndɔ. Mbo tambu kɔllo tau mɛɛ laa ndɔ kaalaa Sela * vi. (Chɛnɛsee 23:​1, 2) Mi Chɛhowa Mɛlɛka bɛɛ tambu kɔllo le chua ndoo nɔ hoo tiindaŋndo o ndu niŋndo. Chɛhowa nɔ yeemɛi le mbo huŋ miŋgi ndu yoomu o kpele hɛnɛkiɔɔ niŋ o chieeŋndo choo. Chila fafɛɛŋndaŋ la cho Sela chumndo, vɛlɛ a wana o wana cho tamasi ndɔɔ tolɔɔ kɔɔli.—Chɔŋ 5:​28, 29.