Mɛɛ naŋ pɛɛku a suliŋnda kɛndɛla waŋndo okɔɔ fau yɛ, lende koni naŋ sina ndu ni, nduyɛ mi chaŋyɛi nɛi kendu poŋ. O nɛi pilɛ koŋ choo, mɛɛ naŋ sina a suliŋnda Chɛhowa laŋ okɔɔ fau yɛ, lende koni naŋ sina wana suu o cho wo ni, nduyɛ mi chaŋyɛi nɛi naa ndaa kendu poŋ. O suliŋnda Mɛlɛkalaŋ tɛɛŋ, la hiɔɔlu cho mi la hiau la tɔ laŋ kpou. Laŋ la cho ni, kpaayaa, taasioo, sakpoyɛi, a kaalaa.

“Oo Mɛlɛka Yaawɛɛ Kpuluŋguma bɛndoo, num toosiaa halaa choo choo a chieeŋndo a kpaaya num bɛndoo . . . ni.”—CHƐLUIMAYA 32:​17.

Miŋ che kpaaya Mɛlɛkaa kpendekele o nyɛm o toosiaa woŋ niŋ. Le tamaseliiyo, te a sim pɛ o bɛɛ a wɔɔleŋ teleŋ paaleŋ le wa fulaa wo, yɛɛnɛ ŋ sinaŋ yɛ o dialloŋ? Ma sinaŋ kɛsɛ maa paaleŋ le cho num tuuloo. O kpeekpei niŋ, kpaaya Chɛhowa wo o nyɛm o toosiaa woŋ niŋ ŋ wa koŋ sinaŋndo ni. Vɛɛ kpɛ paaleŋ le nɔ yɛ kpaayaa? Le sinaa mɛɛ kpɛ paaleŋ le nɔ kpaayaa yɛ, o yɔŋ bɛɛ mi mɛŋndaŋ ma ŋol le bɛmbɔɔ 150,000, paaleŋ le hiou tuulu poloŋ. Kpaaya fula o paaleŋ niŋ o kpɛkpɛle kɛ kɛ bɛŋgu wo, o wa a yiŋnde fula o bɔmnda wɔɔŋ wɔɔŋndaŋ niŋ le miiliɔŋndaŋ o kɛmɛlaŋ niŋndo.

Kɛ a koŋ kpou, te ŋ tuu pɛ paaleŋ a looŋ cho o miiliɔŋndaŋ niŋ o choo choo niŋndoŋ, ŋ bɔɔbɔɔ cho ŋ hiou paaleŋ poloŋ. Wanaa sinaa dɛniaa bɛnduaa dimi maa, luei hiou looŋ kpou ve nɔ diolaŋ ni aa UY Sikuti. Nduyɛ luei hei hiou paaleŋ le bɛmbɔɔ 1,700. Luei hei hiu waa. Te o yɔŋ pɛ ma handu ndi o fondaŋ paaleŋ le cho wo, paaleŋ, chieeŋ naa hoo, vɛlɛ a fondaŋnda cheleŋ la nɔla mi la luɛi leniŋ, nduyɛ mi fondaa lo wɔ kɛ. Naapum hei mala naa miŋ bii bila diomnda Chɛluimaya dimi laŋ maa, Chɛhowa Mɛlɛka toosiaa choo choo a chieeŋndo a kpaaya ndɔ bɛndoo ni.

Vɛɛ naŋ sɔla yɛ tɔnɔɔ o kpaaya Mɛlɛka wo niŋ? Nyɛm Mɛlɛka toosiaa woŋ mɛɛ paaleŋ, a nyɛm cheleŋ cho o chieeŋndo choo woŋ cho naa yɛ tosa ni miŋ wa yoomu. Le handɔɔ lechoo, mi Mɛlɛka soliŋ kpaaya ndɔɔ kpeku le mi naa pilɛŋ pilɛŋnda sɔla tɔnɔɔ leniŋ. O nɛi kuɛɛ choo? O wɔsiŋ kɛmɛ tasoŋ niŋ, mi Mɛlɛka ke Chiisu kpaayaa le walta kɔndɔfiltaŋ tosaa. Baabuiyo dimi aa: “Wanaa sumɛiya cho niŋ chɔɔ, mi wanaa bɛvɛiya wa kɔlaŋ. Wanaa ŋlɛliaa cho sioŋgɔɔ, mi wanaa nila baŋulɛiya wa niŋ tueiyɔɔ. Wanaa vi wa cho miiŋgoo yoomu, mi wanaa bala fonduaa wa yooŋgu kɛndɔɔ tueiyɔɔ.” (Maatiu 11:​5) O teleŋ naa hoo niŋ yɛ? Baabuiyo dimi aa: “Wanaa cho a yɔkpɛi ya, mbo ke nda dialuŋ kalaŋ sɛnɛiyoŋ.” Mbo chɔɔlu dimi aa: “Kɛ wanaa dɔu tiindaŋ ndaa o Mɛlɛka Yaawɛɛ niŋ nda, a cho hunɔɔ dialuŋ kalaŋ sɛnɛiyoŋ sɔla.” (Aisaya 40:​29, 31) “Kpaaya fula Mɛlɛka o ba wo” mala naa miŋ biunuŋ simulta komal naa o yoomoo niŋndaŋ. (2 Kɔliŋtiaŋ 4:​7) Ŋ nɔla miŋ nɔ chaŋyɛi kpɛɛluŋnde a Mɛlɛka kanifuule, o kaala naa tau, nduyɛ mbo wa kpaaya ndɔ bɛndoo soliŋndo kpeku le naa malaa a bahawɛila naalaŋ.

“Oo Mɛlɛka Yaawɛɛ, walta ŋ tosa laŋ la cho la bɔɔ. A kɔl kalu [taasi] numndo ŋ lo o koŋ ni, ma toosiaa nyɔɔŋ muŋ kpou.”—SAM 104:​24.

Mɛɛ naŋ hiau lachi a pɛɛkoo a nyɛm Mɛlɛka toosiaa woŋ okɔɔ fau yɛ, lende koni naŋ cha taasi ndɔɔ o nɛi kɔndɔfili bɛndu niŋ ni. Nduyɛ pɛŋ, nyɛm Chɛhowa toosiaa woŋ wanaa sinaa dɛniaa bɛnduaa pɛɛku ni, ma tual nɛi ndɔɔ kɔɔli le nyɔɔŋ toosiaa. Le tamaseliiyo, ŋ nɔla miŋ che hei a mɛɛ nda toosiaa nyɛ chuaa la fotueiyo ɔɔ dɛndɛ choo yɛ.

Ŋ cha taasi bɛndu Mɛlɛkaa a mɛɛ o toosiaa dialuŋ wanachioo yɛ. Le tamaseliiyo, tofawɔ mɛɛ dialuŋ chɛlɛkpɛ lendoo kandu kilaŋndo yɛ. O nyɛ yoomaa taaniŋndo opilɛ niŋ kpe o kanduŋ ni. Nduyɛ nyɛ yoomaa taaniŋndo hoo nɔ nyɛ o nyɛ cho a wanachioo okɔɔ. Mi nyɛ yoomaa taaniŋndo hoo simnuŋ nyaa yoomaa taaniŋaa bɔɔbɔɔ, nduyɛ nyɛ pilɛ kpe nda wa ni. A teleŋ bɛnda wo kinɛi, mi nyaa yoomaa taaniŋnda haa kilaŋ kundalaŋ yɛ yɛ o kɛmɛlaŋ niŋ. O nyaa yoomaa taaniŋnda haa tɛɛŋ, apum cho le koowaŋ yɔŋgoo, apum cho le sinaŋndo, nduyɛ apum cho le paalaŋ. Te hei yɔŋnuŋ pɛ, faluŋ yɛ yiɔɔŋ o dialloŋ niŋ kilaŋ nduyɛ ŋ kandu wallo. O paŋguŋ ŋɔmahiɔɔlu bɛŋgu, mi nyɛ yoomaa taaniŋ koŋ simnuŋ chɛlɛkpɔɔ, a nyaa yoomaa taaniŋaa cheleŋ o dialloŋ niŋ o biiliɔŋndaŋ niŋ. Taasi Mɛlɛka naŋ cha o nyɛm o toosiaa woŋ niŋndo nyindu wanaa bɔɔbɔɔ ni ma chɛl nyɛ Baabuiyo dimi wo aa: “I saŋgala num Mɛlɛka, kani fondole, le mɛɛ ŋ toosiaa ya toosiaa kɔndɔfili waa nuaa yɛ, mi wa teŋgeleŋ nyaa yoomaa a piliaa tɛɛŋ.”—Sam 139:​14.

Vɛɛ naŋ sɔla yɛ tɔnɔɔ o taasi Mɛlɛka wo niŋ? Wana toosiaa naa wo sina nyɛ naŋ yeema le miŋ wa a kɔl kɛndɛ wo. Le mɛɛ o nɔ kɔl kalu bɛndoo a sinapɛŋgoo yɛ, o nɔla mbo ke naa sila taasioo o Diom ndɔɔ niŋ, Baabuiyo. Le tamaseliiyo, Baabuiyo dimi aa: “La wa biuwaŋndo vellaa velle. . . . La malnaŋ haki fasɛi.” (Koloosiaŋnda 3:​13) Baa sila taasioo pa cho hoo ni? Ei. Wanaa chiɔuwaa saaluŋ maa wanaa mal waŋnda haki wa, te a hini pɛ a lɔl nyɛkɛndɛi. Nduyɛ hei nɔla mi i dɔɔna naa kooma helaa, kɔl tambɛi bɛndoo, a naala cheleŋ ndaŋ. Mɛlɛka cho ko maa chaaŋ naa, o nɔ taasioo nduyɛ mbo wa o bɛɛndiaŋ lɔɔlɔɔ le naa malaa a silala ke naa taasioo laŋ. (2 Timoti 3:​16, 17) Baa a yeema chaŋyɛi suu waa naa le?

“Mɛlɛka Yaawɛɛ . . . kaala sakpoyɛi.”—SAM 37:​28.

Nyɛ cho o kɛndɔɔ wo Mɛlɛka tosa lɔɔlɔɔ ni. Nduyɛ pɛŋ, Baabuiyo dimi aa: “Mɛlɛka nɔ kpaayaa kpou wo o cho wana lakafa le. O cho wana dɛnɛ wɔɔŋ te.” (Choobu 34:​10) O nɛi sakpoo choo Mɛlɛka kialu yamaŋ ni. Lelaŋ, mɛɛ wana ŋchondoo wa suɛi a Chɛhowa okɔɔ, mbo dimi aa: “O nɛi sakpoo choo ŋ kilul waŋnda yamaŋ . . . ni.” (Sam 67:​4) Baabuiyo dimi aa: “Ya Mɛlɛka o kɔllo niŋ di ya tofa ni.” Le hei, wana nɔla ma hui ndu a kaa mulu muluaŋndo le. O nɔla mbo sina tonyaa teleŋ o teleŋ, nduyɛ mbo kelu yamaŋ o nɛi sakpoo choo. (Saamiɛɛ Tasoo 16:​7) Le handɔɔ lechoo, Mɛlɛka sina kafala kɛ kɛ cho hau tosaŋndo o chieeŋndo choo. Nduyɛ, o mɛi lediom maa o lo niŋ chobe mbo huŋ faŋa “wanaa dɛnɛ wɔɔŋnda” o chieeŋndo choo.—Pulɔwaa 2:​22.

Mɛlɛka kilul waŋnda yamaŋ ŋuasu ŋuasu le, nduyɛ o yala waŋnda nyɛpalaa tusi choo le. Mbo chɔm nyiɛɛye a teleŋ bɛnda wo. Baabuiyo dimi aa: “Mɛlɛka Yaawɛɛ o cho wana inyiɛɛ, nduyɛ mbo wa wana ikɛndɛ.” Nduyɛ pɛŋ, te wanaa dɛnɛ wɔɔŋnda mal pɛ yɔŋ nda wɔɔŋndo ma muliŋ, mi Chɛhowa tuiinuŋ nda inyiɛɛ. Baa o cho sakpoyɛi kpeekpeiye le cho hei le?—Sam 103:​8; 2 Pitɛ 3:​9.

Vɛɛ naŋ sɔla yɛ tɔnɔɔ o sakpoyɛi Mɛlɛka ve niŋ? Mi kiilanɔɔ Pitɛ dimi aa: “Mɛlɛka hɛli ŋwaŋnda chiee le. Kɛ o lekaa o lekaa niŋ, wana nɔ pɛ siooŋii nduɛi, nduyɛ mbo tosa nyɛ cho sakpo wo, chɛlɔɔ Mɛlɛka chɛl wana koŋ ni.” (Walta Kiilaa 10:​34, 35) Miŋ sɔla tɔnɔɔ o sakpoyɛi Mɛlɛka ve niŋ kanifuule, o hɛli ŋwaŋnda chiee le. Mi Mɛlɛka chɛl naa miŋ wa buɛiyaa nduaa kanifuule, o cho kaale naa leŋ, lɛŋnde naa leŋ, dɛnɛ naa sinaa ɔɔ wanaa suu naŋ cho wa le o tofa le.

Le mɛɛ Mɛlɛka yeema maa miŋ bii bila, nduyɛ miŋ sɔla tɔnɔɔ o sakpoyɛi nduɛi niŋ yɛ, mbo ke naa kɔl iyamaa. Baabuiyo tɛɛsiaa kɔl iyamaa maa sawa cho o poonyiaa naa o lakɔl lo. Nduyɛ ndu tɛndal naa seileŋ ni le sinaa te kaa naa cho o kɛndɛ ɔɔ o wɔɔŋ. (Luomaŋnda 2:​15) Vɛɛ naŋ sɔla yɛ tɔnɔɔ o hei niŋ? Te ŋ pɛɛku pɛ kɔl iyama naa nyɛkɛndɛi, o mala naa miŋ fafaŋ sɔɔŋ chuu naa kpundɔɔ woŋ ɔɔ kafalaŋ. Nduyɛ te ŋ benduŋ pɛ, o mala naa miŋ mulul yɔŋ naa wɔɔŋndo kɔɔ, nduyɛ miŋ siɛɛnduu siɔwuŋ naŋ. A tonya, sinaa mɛɛ Mɛlɛka bii sɔɔŋ o nɛi sakpoo choo yɛ mala naa miŋ sɔɔŋguu ndu ikɛi kpɛɛluŋ!

“Kaalaa Mɛlɛka cho ni.”—1 CHƆŊ 4:​8.

Mi Mɛlɛka chɔm kpaayaa, taasioo, a sakpoyɛi. Kɛ Baabuiyo dimi naa aa kpaayaa, taasioo, ɔɔ sakpoyɛi le Mɛlɛka cho le. Kɛ naa Baabuiyo dimi ni aa kaalaa o cho ni. Le yɛɛnɛ? Kanifuule, ŋ dimi maa a kpaaya Mɛlɛka nɔ wo o tosa sɔɔŋ ni, nduyɛ maa sakpoyɛi a taasi ndɔɔ o soliŋ kpeku ni le muŋ tosaa. Kɛ kaala Mɛlɛka nɔ wo nyindu ndu ni le sɔɔŋ tosaa. Nyɛ o nyɛ Mɛlɛka tosa, a kaalaa o tosa ni.

Mi che bɛɛ Chɛhowa heuba le nyɛ o nyɛ le, kɛ mi kaalaa nyindu ndu mbo toosiaa waŋchieeya o chieeŋndo choo, a nyaa yoomaa cho o inyinaya wa o choo choo niŋ. Nduyɛ nda kpou nɔla ma sɔla tɔnɔɔ, ma tuei kaala ndɔɔ yeela. Okoŋ mbo toosiaa chieeŋndo a kɔllo kpou le mbo wa fondaŋ chalaa kɛndɛ kɛndɛ le waŋchieeya. Mɛlɛka cho hiouwɔɔ lachi a waŋchieeya kpou kaalaa chɔmndo “kanifuule, . . . o wa wana kɛndɛ, o wa wana wɔɔŋ, nda fau mbo ke nda paaleŋ. Nduyɛ wanaa cho sakpo wa a wanaa cho sakpo le wa, mbo yɔŋgu piɔɔ le nda kpou.”—Maatiu 5:​45.

Le handɔɔ lechoo, “wana inyiɛɛyo a wana ikɛndɔɔ Chɛhowa cho ni.” (Chemisi 5:​11) Wanaa cho kindiŋndo le ndu sinaa nduyɛ ma sɔɔŋguu ndu ikɛiya, mbo chɔm nda kaalaa. Mi Mɛlɛka tofa waŋnda haa a pilɛŋ pilɛŋnda kpou. Nduyɛ pɛŋ, Baabuiyo dimi maa “o buulaŋ le nya.”—1 Pitɛ 5:​7.

Vɛɛ naŋ sɔla yɛ tɔnɔɔ o kaala Mɛlɛka wo niŋ? Te paaleŋ le wa delɔɔ pɛ, le naŋ bɔɔ nua. Te ŋ tuei pɛ chɛlɛkpɔɔ mamɔɔ, mi nyɔɔ hɛnaŋ naa. Te wana naŋ cho o yuŋgoo niŋndo chɔm naa pɛ kaalaa, miŋ naŋ kɔl. Naapum sɔɔŋ muŋ cho sɔɔŋ sɔvɛ le, kɛ ŋ tosa miŋ wa a nyaale tau o yoomoo niŋ.

Ŋ sɔla vɛlɛ tɔnɔɔ o nɛi cheleŋ Mɛlɛka chɔm naa kaalaa wo niŋ. Ndu cho piɛileŋ ni. Baabuiyo dimi aa: “La buulaŋ le nyɛ o nyɛ le. Kɛ o nyɛ o nyɛ niŋ, la nyuna Mɛlɛka lɔɔlɔɔ o piɛileŋ niŋ, nduyɛ mi la chɔm ndu ba nya hawɛiyo. La wa ndu nyɔɔloo o piɛileŋ niŋ, mi la mel ndu balikaa.” Maa finya kaalaa, Mɛlɛka yeema naa miŋ muliŋ o ndu lo te bahawɛilaŋ la komal naa pɛ. Chɛhowa cho naa kaalaa chɔm. O mɛi lediom maa o cho naa ke “kɔl nyulu . . . wanachiee nɔla bɛɛ mbo sina pɛŋgu le wo.”—Filipiaŋnda 4:​6, 7.

Baa suukaŋ biŋgi naŋ tosa hoo a suliŋnda hiɔɔlula Mɛlɛkalaŋ okɔɔ, mɛɛ kpaayaa, taasioo, sakpoyɛi, a kaalaa cho naa yɛ, mala num pa ma sina wana suu kpeekpei o cho wo? Le ma chɔɔlu balika melaa nɔ le Mɛlɛka, ŋ yeema num ma pɛɛku le ma sina nyɛm Mɛlɛka tosa niŋndoŋ vɛlɛ a nyɛm o cho hunɔɔ tosa o chilaŋ niŋ le tɔnɔ numndo wo.