လါမၢ်ၡး, ၂၀၂၀
ကီၢ်ရၢၡါ
ဒီပုၢ်ဝဲၢ် အံကီၤ အံဘၢၤၡ့ၤ လၢအိၣ်လၢ ကီၢ်ရၢၡါန့ၣ် ဘၣ်သ့ၣ်သ့ၣ် ကလီၤဘၣ်ဃိာ်နွံနံၣ်
ဘၣ်ဃးဒီး ဒီပုၢ်ဝဲၢ် အံကီၤ အံဘၢၤၡ့ၤန့ၣ် ကီၢ်စၤကၤ ရံၤဖၢဘျံး, လဲစကံ စံၣ်ညီၣ်ကွီၢ်အရူ ကဘိးဘၣ်သ့ၣ်ညါဝဲ အတၢ်ဆၢတဲာ် ဖဲ ၂၀၂၀, လါမၢ်ၡး ၃၁န့ၣ်လီၤ. ပဒိၣ်အပီၢ်ရီ ဃ့ဝဲလၢ ပှၤကထၢနုာ် ပဒီပုၢ်ဝဲၢ်လၢ ဃိာ်ပူၤနွံနံၣ်အဂီၢ်လီၤ.
ဖဲ ၂၀၁၈, လါဖ့ၤဘြူၤအါရံၤ, န့ၣ် ယၤကး အစံၣ်ညီၣ်ကွီၢ်ရူ ဟ့ၣ်ဝဲပလံးတဖၣ်အခွဲးလၢ ကဟုၣ်ကနၣ်ဝဲ ဒီပုၢ်ဝဲၢ် အံဘၢၤၡ့ၤ တဲတၢ်လၢ လီတဲစိအခါန့ၣ်လီၤ. ပူၤကွံာ်စှၤလါဝံၤအလီၢ်ခံ ပဒိၣ်အပှၤဘၣ်မူဘၣ်ဒါလၢ လီၢ်ကဝီၤပူၤတဖၣ် နုာ်လီၤကွၢ်ဃုတၢ်လၢ ဒီပုၢ်ဝဲၢ် အံဘၢၤၡ့ၤအဟံၣ် ဃုာ်ဒီးယဟိဝၤပှၤအုၣ်အသးအဟံၣ် ၈ ဖျၢၣ်န့ၣ်လီၤ. အဝဲသ့ၣ် က့ၤကိးဝဲ ဒီပုၢ်ဝဲၢ် အံဘၢၤၡ့ၤ ဒီးယဟိဝၤပှၤအုၣ်အသး ၂၁ ဂၤန့ၣ်ဆူ ပၢၤကီၢ်သန့ ဒီးသမံသမိးဝဲလီၤ. ပီၢ်ရီအပှၤမၤစၢၤတၢ် ပာ်ဒ့ၣ်ပာ်ကမၣ် ဒီပုၢ်ဝဲၢ် အံဘၢၤၡ့ၤလၢ အမ့ၢ်ပှၤရဲၣ်ကျဲၤတၢ်လၢ တၢ်ကရၢကရိလၢအ “တၢ်ထံၣ်တလၢကွံာ်အခၢး” အဂီၢ်န့ၣ်လီၤ.
ဖဲ ၂၀၁၉ လါနိၣ်ဝ့ဘၢၣ် ၂၀ န့ၣ် တၢ်မူးတၢ်ရၢ်အံၤ ဟဲက့ၤကဒါဆူ ပီၢ်ရီအရူ, မ့ၢ်လၢတၢ်အုၣ်အသး တအိၣ်လၢလၢပှဲၤပှဲၤလၢ ဒီပုၢ်ဝဲၢ် အံဘၢၤၡ့ၤ မၤကမၣ်တၢ်သိၣ်တၢ်သီန့ၣ်ဘၣ်. ပဒိၣ်အပီၢ်ရီ တီၣ်ထီၣ်ကဒီးတၢ်မူး ဒီးတၢ်မူးအံၤ ဘၣ်တၢ်ဆှၢလီၤဆူ ကီၢ်ရ့ၣ် စံၣ်ညီၣ်ကွီၢ်အရူ ဒ်သိးကဘၣ်တၢ်သမံသမိးအီၤအဂီၢ်န့ၣ်လီၤ. ၂၀၂၀ လါဖ့ၤဘြူၤအါရံၤအထီၣ်န့ၣ် တၢ်မူးအံၤ ကဘၣ်တၢ်စးထီၣ်သုးကျဲၤအီၤန့ၣ်လီၤ.
ဒီပုၢ်ဝဲၢ် အံဘၢၤၡ့ၤ ဒီးအမါ နၤတၤလံယၤန့ၣ် အိၣ်ဒီးအဖိမုၣ်ခံဂၤလီၤ. တၢ်မူးတၢ်ရၢ် ဘၣ်တၢ်သုးကျဲၤအီၤ ဘူးကဝံၤလံအဃိ ပဃ့ဘါထုကဖၣ်လၢ မ်ဒီပုၢ်ဝဲၢ် အံဘၢၤၡ့ၤ အဟံၣ်ဖိဃီဖိ ကအိၣ်ဒီး “တၢ်ဝံသးစူၤ, ဒီးတၢ်သူၣ်စူၤသးစူၤ အိၣ်ဒီးတၢ်သးခု” န့ၣ်တက့ၢ်.—ကလီးစဲ ၁:၁၁