လါမၢ်ၡး ၂၀, ၂၀၂၀
ဟီၣ်ခိၣ်ဒီဘ့ၣ် တၢ်ကစီၣ်
ကံးလဧး တၢ်ပျၢ်ကၠိအမူးလၢ အလီၤဆီ
၁၄၈ ဘျီတဘျီ ကံးလဧး တၢ်ပျၢ်ကၠိအမူးန့ၣ် ဒ်သိးလိာ်အသးဒီး တၢ်ပျၢ်ကၠိအမူးလၢညါတဖၣ်အသိး သနာ်က့ တၢ်လီၤဆီအိၣ်ဝဲတခါလီၤ. မ့ၢ်လၢ ဘျီၣ်ဒိၣ်အပူၤန့ၣ် ကမျၢၢ်လၢအဟဲထီၣ်မူး တအိၣ်နီတဂၤဘၣ်အဃိလီၤ. ပှၤကိးဂၤဒဲးလၢ အဟဲထီၣ်မူးအံၤန့ၣ် ဘၣ်သူဝဲအ့ၣ်ထၢၣ်နဲး ဒီးကွၢ်ဝဲ တၢ်ရဲၣ်တၢ်ကျဲၤအံၤလီၤ. ဖဲတၢ်ဆူးတၢ်ဆါ ဟဲအိၣ်ထီၣ်လၢ ဟီၣ်ခိၣ်ဒီဘ့ၣ် အတီၢ်ပူၤ ကံးလဧး တၢ်ပျၢ်ကၠိအမူးအံၤ မ့ၢ်တၢ်အဒိအတဲာ် လီၢ်ခံကတၢၢ်တခါလၢ ယဟိဝၤယွၤ အတၢ်ကရၢကရိ မၤဝဲတၢ်ဆီတလဲ သ့သ့ဘၣ်ဘၣ်လၢ တၢ်အိၣ်သးအဖီခိၣ်န့ၣ်လီၤ.
တၢ်ရဲၣ်တၢ်ကျဲၤအံၤ ဘၣ်တၢ်မၤအီၤဖဲ ၂၀၂၀, လါမၢ်ၡး ၁၄ သီ, လၢယဟိဝၤပှၤအုၣ်အသးတဖၣ် အတၢ်ကူၣ်ဘၣ်ကူၣ်သ့ဝဲၤကျိၤ လၢအိၣ်လၢ ဖဲထစၢၤ, နူယီးန့ၣ်လီၤ. ဒီးပှၤပၢၤလီၢ်ဆ့ၣ်နီၤ မ့ၢ်ဝဲ ဒီပုၢ်ဝဲၢ် စတံၤဖ့ၣ် လဲးထ် လၢအမ့ၢ်ပှၤပၢဆှၢတၢ် ကမံးတံာ်တဂၤန့ၣ်လီၤ. ပှၤကၠိဖိခဲလၢာ် အိၣ်ဝဲ ၅၅ ဂၤလီၤ. *
ဘူးထီၣ်လၢ ကၠိကပျၢ်အနွံတဖၣ်န့ၣ် တၢ်ကစီၣ် ဘၣ်ဃးဒီးတၢ်ဆါ COVID-19 ဘၣ်ကူဘၣ်ဂာ်တၢ်အဂ့ၢ် ဟဲထီၣ်ဝဲလီၤ. ဒ်လၢ jw.org, Newsroom အပူၤပာ်ဖျါတ့ၢ်ဝဲအသိး ယဟိဝၤပှၤအုၣ်အသး အဝဲၤလီၢ်ခိၣ်သ့ၣ်န့ၣ် ခိးကွၢ်ဝဲ တၢ်အိၣ်အသးအံၤထီဘိ ဒီးဟ့ၣ်လီၤဝဲ တၢ်ဟံးစုနဲၣ်ကျဲတဖၣ် လၢအလီၤပလိာ်ဒီး ပဒိၣ်ပပှၢ်အတၢ်ဟ့ၣ်ကူၣ်တဖၣ် ဆူတၢ်အိၣ်ဖှိၣ်တဖၣ်အအိၣ်လီၤ.
တၢ်ဟ့ၣ်ကူၣ်တခါန့ၣ် မ့ၢ်ဝဲပကဘၣ်ဟးဆှဲး တၢ်ပာ်ဖှိၣ်လိာ်သးဒီး ပှၤအါအါဂီၢ်ဂီၢ်န့ၣ်လီၤ. ပှၤပၢဆှၢတၢ်ကမံးတံာ် ဆိကမိၣ်ထံက့ၤဝဲ တၢ်ဟ့ၣ်ကူၣ်အံၤ ဒီးတၢ်အဂၤတဖၣ်ဝံၤအလီၢ်ခံ အဝဲသ့ၣ်ဆၢတဲာ်ဝဲလၢ တကွဲဝဲပှၤတမှံၤတဖၣ်ဘၣ် ဒီးဘျီၣ်ဒိၣ်အပူၤန့ၣ် ပှၤကမျၢၢ်တဘၣ်အိၣ် နီတဂၤဘၣ်. ဘၣ်ဃးဒီး တၢ်ဒိကနၣ်တၢ်ဟံးစုနဲၣ်ကျဲန့ၣ် ပှၤဘ့ၤသ့လးဖိတဖၣ်ဒီး ကံးလဧးကၠိဖိတဖၣ် ပာ်လီၤဝဲတၢ်ဒိဂ့ၤတဲာ်ဘၣ်လီၤ.—ယိၤဟၣ် ၁၃:၃၄, ၃၅.
ဘၣ်ဆၣ် ဒ်သိးကံးလဧးကၠိဖိတဖၣ် အပှၤတမှံၤ ဒီးဘ့ၤသ့လး ဟံၣ်ဖိဃီဖိတဖၣ် ကွၢ်ဝဲတၢ်ရဲၣ်တၢ်ကျဲၤအံၤ တဘျီဃီကန့ၢ်အဂီၢ် ဘၣ်တၢ်ရဲၣ်ကျဲၤန့ၢ်အဝဲသ့ၣ်လီၤ. ပှၤကံးလဧးကၠိဖိတဖၣ် အဟံၣ်ဖိဃီဖိ, အပှၤတမှံၤတဖၣ်ဃုာ်ဒီး ဒီပုၢ်ဝဲၢ်လၢဟီၣ်ခိၣ်ဒီဘ့ၣ် အဂၤ ၁၀,၀၀၀ ဘျဲၣ်န့ၣ် ကွၢ်ဝဲတၢ်ရဲၣ်တၢ်ကျဲၤအံၤ တဘျီဃီလီၤ.
COVID-19 တၢ်ဆါကဲထီၣ်အသး သနာ်က့ ပှၤပၢဆှၢတၢ်ကမံးတံာ် အဲၣ်ဒိးလၢ ပကဆဲးမၤတၢ်အိၣ်ဖှိၣ် လီၤဆီဒၣ်တၢ် တနွံဘၣ်တနွံ တၢ်အိၣ်ဖှိၣ်န့ၣ်လီၤ. လၢတၢ်န့ၣ်အဃိ တယံာ်ဒံးဘၣ်န့ၣ် ပှၤပၢဆှၢတၢ်ကမံးတံာ် ဟ့ၣ်လီၤတၢ်ဟံးစုနဲၣ်ကျဲဆူ ဝဲၤတြၢ်လၢဟီၣ်ခိၣ်ဒီဘ့ၣ်အအိၣ် ဘၣ်ဃးဒီး ပှၤမၤတၢ်အိၣ်ဖှိၣ်တဖၣ် ဒ်လီၢ်ကဝီၤအတၢ်အိၣ်သးအသိး သ့ဒ်လဲၣ်အဂ့ၢ်န့ၣ်လီၤ. လၢတၢ်လီၢ်တနီၤန့ၣ် ပှၤစံၣ်တဲၤတဲလီၤတၢ်ဖိတဖၣ် အိၣ်ဖှိၣ်ဝဲလၢ ကရူၢ်ဆံးဆံးဖိသ့လီၤ. မ့တမ့ၢ် ဘျးစဲလိာ်အသးလၢ တၢ်ဂီၤမူဒီး “အိၣ်ဖှိၣ်” ဝဲသ့လီၤ. ပနာ်သပှၢ်ကတၢၢ်လၢ ဒီပုၢ်ဝဲၢ်လၢ ဟီၣ်ခိၣ်ဒီဘ့ၣ် ကဒိးန့ၢ်ဘၣ် တၢ်အဘျုးလၢ တၢ်ကရၢကရိ အတၢ်ဟံးစုနဲၣ်ကျဲ ဒီးတၢ်ဟ့ၣ်ဂံၢ်ဟ့ၣ်ဘါတဖၣ်လၢ ဘၣ်တၢ်ဟ့ၣ်လီၤဆူ တၢ်အိၣ်ဖှိၣ်ခဲလၢာ်အအိၣ်န့ၣ်လီၤ.
ဒ်သိးတၢ်ကရၢကရိ လဲၤခီဖျိတၢ်ကီတၢ်ခဲတဖၣ် ကန့ၢ်အဂီၢ် ယဟိဝၤယွၤ အစိကမီၤမၤစၢၤဝဲသ့လီၤ. တၢ်လၢအမၤပတုာ် ယဟိဝၤယွၤ အစိကမီၤသ့န့ၣ် တအိၣ်နီတမံၤဘၣ်.—စံးထီၣ်ပတြၢၤ ၁၈:၂၉.
^ ၁၄၈ ဘျီတဘျီ ကံးလဧး တၢ်ပျၢ်ကၠိအဂ့ၢ်လၢလၢပှဲၤပှဲၤန့ၣ် ကဘၣ်တၢ်ပာ်ထီၣ်အီၤလၢ jw.org အပူၤ ဖဲ ၂၀၂၀ လါယူၤန့ၣ်လီၤ.