ဖဲ​တၢ်ဆါ​သံသတြိာ် novel coronavirus (COVID-19) ကဲထီၣ်​အဆၢ​ကတီၢ် ယဟိဝၤ​ပှၤအုၣ်​အသး​တဖၣ်​ ဒိကနၣ်​ဝဲ လီၢ်ကဝီၤ ပဒိၣ်​ပပှၢ်​တဖၣ်​ အ​တၢ်​ဟံးစု​နဲၣ်ကျဲ ဒီး​တ​ကတီၢ်ဃီ​န့ၣ်​ အဝဲသ့ၣ်​ဆဲး​မၤ​စ့ၢ်ကီး​ဝဲ နီၢ်သး​အ​တၢ်ဖံး​တၢ်မၤ​တဖၣ်​လီၤ. ဒီပုၢ်ဝဲၢ်​မုၣ်​ခွါ​လၢ အ​အိၣ်​လၢ​ထံကီၢ်​လၢ တၢ်ဆါ​အဃၢ်​အရၤ​အသး​အါ​တဖၣ်​န့ၣ်​ အဝဲသ့ၣ်​သူဝဲ တၢ်​စံၣ်တဲၤ​တဲလီၤ​တၢ် အကျိၤ​အကျဲ​အ​ကလုာ်​ကလုာ် ဒ်သိး​က​ဆဲး​စံၣ်တဲၤ​တဲလီၤ​တၢ်​အဂီၢ်​လီၤ.

ဒီပုၢ်ဝဲၢ်​ခွါ​တဂၤ​လၢ အ​အိၣ်​လၢ ကီၢ်အံးထလံၣ်​ ဝ့ၢ်​ဖံၣ်​စၣ်​အ​ပူၤ​န့ၣ်​ တဲဝဲ​လၢ “ပ​တၢ်​စံၣ်တဲၤ​တဲလီၤ​တၢ်မၤ​န့ၣ်​ ဂ့ၤဒိၣ်​မး. ပှၤ​အါတက့ၢ်န့ၣ်​ ဘၣ်​အိၣ်​လၢ​ဟံၣ်​ပူၤ​အဃိ ယ​ဃု လီတဲစိ​နီၣ်ဂံၢ်​လၢ တၢ်ကွဲးနီၣ်​ပာ်​လၢ​ တၢ်​ဆဲးကျိး​အဂီၢ်​တဖၣ်​ လၢ​ယ​လီတဲစိ​အ​ပူၤ ဒီး ပ​တဲသကိး​တၢ်​ဒီး ပှၤ​အါဂၤ​လၢ တၢ်ဂီၤမူ videoconferences လၢ​လီတဲစိ​အ​ပူၤ​လီၤ. ပ​တဲသကိး​ဘၣ်​တၢ်​ဒီး ပှၤလၢ​အ​ပူၤကွံာ် ပ​တဲဘၣ်​တၢ်​ဒီး​အီၤ​တဖၣ်​ ဒီး​ပှၤ​အသီ​တဖၣ်​ ဖးယံာ်​ညါ​အဃိ ပ​အိၣ်ဒီး​ပှၤ​မၤလိ​လံာ်စီဆှံ​ဖိ ဒီး​တၢ်​က့ၤကဒါက့ၤ​အါမး.”

လၢ​ခိၣ်ရံယါ ကလံၤထံး​န့ၣ်​ ခီဖျိ​လၢ တၢ်ဆါ​သံသတြိာ်​အဃိ ဒီပုၢ်ဝဲၢ်​လၢ​အ​သူဝဲ jw.org website ဒီး JW Library app တဖၣ်​အါထီၣ်​ဝဲ​လီၤ. အဒိ ပှၤ​မၤလိ​လံာ်စီဆှံ​ဖိ​လၢ အ​ပတုာ်​မၤလိ​လံာ်စီဆှံ အိၣ်​သၢ​နံၣ်​လံ​တဂၤ ဆှၢ​လံာ်​လၢ​လီတဲစိ လၢ​ဒီပုၢ်ဝဲၢ်​ခွါ​တဂၤ​အ​အိၣ်​လီၤ. အဝဲ​တဲဝဲ​လၢ ခီဖျိ​လၢ​တၢ်ဆါ​အဃၢ်​ရၤလီၤ​အသး​အဃိ အဝဲ​ဆိကမိၣ်​ထီၣ်ဘၣ်​ဝဲ မုၢ်နံၤခံကတၢၢ် အ​တၢ်​ပနီၣ်​တဖၣ်​အဂ့ၢ်​လီၤ. အဃိ ဒီပုၢ်ဝဲၢ်​အံၤ​သူဝဲ “Share Link” လၢ​အိၣ်​လၢ JW Library app အ​ပူၤ​ဒီး​ဆှၢန့ၢ်​အီၤ တၢ်ဂ့ၢ်​တၢ်ကျိၤ​လၢ အ​ဘၣ်ဃး​ဒီး​မုၢ်နံၤခံကတၢၢ်​တဖၣ်​လီၤ. ဒီပုၢ်ဝဲၢ်​ခွါ​အံၤ တဲဝဲ​လၢ “ခီဖျိ​လၢ​မုၢ်နံၤခံကတၢၢ် အ​တၢ်​ပနီၣ်​တဖၣ်​အဃိ ယ​ထံၣ်ဘၣ်​လၢ ပှၤ​အဲၣ်ဒိး​သ့ၣ်ညါ​အါထီၣ်​ ကစၢ်​ယွၤ​အဂ့ၢ်​အဃိ ကဲထီၣ်​တၢ်ဂံၢ်​တၢ်ဘါ​လၢ ယ​ဂီၢ်​ဒိၣ်မး.”

တၢ်ဂ့ၢ်​တၢ်ကျိၤ​လၢ ပ​ဒိးန့ၢ်​ဘၣ်​လၢ ဝဲၤတြၢ်​လၢ​အ​အိၣ်​လၢ ဟီၣ်ခိၣ်​ဒီဘ့ၣ်​န့ၣ်​ ပာ်ဖျါ​ထီၣ်ဝဲ​လၢ ဒီပုၢ်ဝဲၢ်​မုၣ်​ခွါ​တဖၣ်​ ပာ်လုၢ်​ပာ်​ပှ့ၤ​ဝဲ တၢ်​စံၣ်တဲၤ​တဲလီၤ​တၢ်မၤ​လီၤ. ပ​ထံၣ်ဘၣ်​လၢ အဝဲသ့ၣ်​ဆဲး​စံၣ်တဲၤ​တဲလီၤ တၢ်သးခု​ကစီၣ်​လၢ “တၢ်ကူၣ်သ့” အ​ပူၤ​အဃိ ပ​သးခု​ဒိၣ်မး​လီၤ.—မံကၤ ၆:၉, ခ့ခါစှီၤကျိာ်