ပထံၣ်ဘၣ်လၢ ပှၤအါဂၤလၢအိၣ်တ့ၢ်လံဒီးအတၢ်ဘူၣ်တၢ်ဘါ တဖၣ်န့ၣ်အသးခုလၢ တၢ်ကတိၤသကိးလံာ်စီဆှံအဂ့ၢ်လီၤ. မ့ၢ်လီၤ, ပပာ်ကဲပှၤတဂၤအတၢ်ဟံးဃာ်တၢ်နာ်လၢ တလီၤဂာ်ဒီးပှၤလီၤ. ဒီးပတမၤဆူၣ်ပှၤဂၤလၢ ပတၢ်ကစီၣ်ဘၣ်. ဖဲပကတိၤသကိးတၢ်ဘူၣ်တၢ်ဘါအဂ့ၢ်အခါ, ပကျဲးစၢးမၤထွဲလံာ်စီဆှံအတၢ်ဟ့ၣ်ကူၣ်လၢ အိၣ်ဒီး “တၢ်သူၣ်စူၤသးစူၤ” ဒီးပပာ်ဖျါ “တၢ်ပျံၤတၢ်ဖုး” ပှၤဂၤလီၤ. (၁ ပ့းတရူး ၃:၁၅) ပမုၢ်လၢ်လၢ ပှၤတနီၤကဂ့ၢ်လိာ် တၢ်ကစီၣ်လၢ ပတဲဘၣ်အီၤန့ၣ်လီၤ. (မးသဲ ၁၀:၁၄) ဘၣ်ဆၣ်, ပှၤကစံးဆၢက့ၤဒ်လဲၣ်န့ၣ် ပတသ့ၣ်ညါဒၣ်လဲာ် ပကတိၤတၢ်ဒီးအဝဲသ့ၣ်လီၤ. ပနၢ်ပၢၢ်စ့ၢ်ကီးလၢ ပှၤကညီအတၢ်အိၣ်သးန့ၣ် လဲလိာ်အသးလီၤ. အဒိ, ပှၤတဂၤ အတၢ်မၤအါဒိၣ်မးလၢ ကတိၤတၢ်ဒီးပှၤတချုးအနံၤကအိၣ်လီၤ. ဘၣ်ဆၣ် ကကတိၤသကိးတၢ်ဒီးပှၤလၢ တၢ်သးခုလၢ ဆၢကတီၢ်အဂၤလီၤ. ပှၤကညီတဖၣ် မ့ၢ်ကွၢ်ဆၢၣ်မဲာ်ဘၣ်ဒီး တၢ်ကီတၢ်ခဲ ဒီးတၢ်အိၣ်သးအသီတဖၣ်လၢ အဝဲသ့ၣ်ကဘၣ်သုးကျဲၤဝဲအခါ, တၢ်အံၤကထိၣ်ဂဲၤအဝဲသ့ၣ်လၢ ကသးစဲထီၣ်လံာ်စီဆှံအတၢ်ကစီၣ်လီၤ. လၢတၢ်န့ၣ်အဃိ ပဂုာ်ကျဲးစၢးကတိၤတၢ်ဒီးပှၤလၢ ကိးဆၢကတီၢ်ဒဲးလီၤ.