ပှၤပၢဆှၢတၢ်ကမံးတံာ်န့ၣ် မ့ၢ်ပှၤတကရူၢ်လၢအအိၣ်ဝဲစှၤဂၤ. အဝဲသ့ၣ်တဖၣ်န့ၣ် မ့ၢ်ခရံာ်ဖိလၢအဒိၣ်တုာ်ခိၣ်ပှဲၤ ဒီးကွၢ်ထွဲဝဲယဟိဝၤပှၤအုၣ်အသး လၢဟီၣ်ခိၣ်ဒီဘ့ၣ်. ဒီးအဝဲသ့ၣ်အတၢ်မၤအိၣ်ခံမံၤ–

•   အဝဲသ့ၣ်ကွၢ်ထွဲဝဲ တၢ်ကတဲာ်ကတီၤ တၢ်သိၣ်လိနဲၣ်လိ လၢအသန့ၤထီၣ်သး လၢလံာ်စီဆှံ ခီဖျိလၢ လံာ်လဲၢ်တဖၣ်, တၢ်အိၣ်ဖှိၣ်ရိဖှိၣ် ဒီးကၠိလၢယဟိဝၤပှၤအုၣ်အသးတဖၣ် မၤဝဲ.—လူၤကၣ် ၁၂:၄၂.

•   အဝဲသ့ၣ်တီခိၣ်ရိၤမဲဝဲ ယဟိဝၤပှၤအုၣ်အသး အတၢ်မၤ လၢဟီၣ်ခိၣ်ဒီဘ့ၣ် ခီဖျိလၢအဝဲသ့ၣ်ပၢဆှၢဝဲဘီမုၢ်တၢ်သးခုကစီၣ်တၢ်မၤ, ကွၢ်ထွဲဝဲတၢ်မၤဘူၣ်လၢ တၢ်သူအီၤလၢတၢ်ကရၢကရိအဂီၢ်.

 ပှၤပၢဆှၢတၢ်ကမံးတံာ်န့ၣ် အဝဲသ့ၣ်မၤပိာ်ထွဲဝဲဒ် “တၢ်မၢဖိတဖၣ်ဒီး ပှၤသူၣ်က့သးပှၢ်တဖၣ် အိၣ်လၢယရူၤၡလ့ၣ်အပူၤ” လၢတၢယၤဖှိၣ်အစိၤ. အဝဲသ့ၣ်ဆၢတဲာ်ဝဲ ဘၣ်ဃးဒီးတၢ်ဂ့ၢ်တၢ်ကျိၤ လၢအရ့ဒိၣ်တဖၣ် လၢခရံာ်ဖိတၢ်အိၣ်ဖှိၣ်ခဲလၢာ်အဂီၢ်. (မၤတၢ် ၁၅:၂) ဒ်ဒီပုၢ်ဝဲၢ်လၢ အသးတီတဖၣ်အံၤအသိးန့ၣ် ပှၤပၢဆှၢတၢ်ကမံးတံာ် တပာ်လီၤအသးလၢ အဝဲသ့ၣ်မ့ၢ် ပတၢ်ကရၢကရိအခိၣ်အနၢ်တဖၣ်ဘၣ်. အဝဲသ့ၣ်မၤထွဲဝဲလံာ်စီဆှံအတၢ်နဲၣ်လိ ဒီးတူၢ်လိာ်ဝဲလၢ ယဟိဝၤယွၤပာ်လီၤဝဲ ယ့ၣ်ၡူးလၢတၢ်အိၣ်ဖှိၣ်အခိၣ်.—၁ ကရံၣ်သူး ၁၁:၃; အ့းဖ့းစူး ၅:၂၃.

 ပှၤပၢဆှၢတၢ်ကမံးတံာ်န့ၣ် ပၣ်ဃုာ်ဒီး ခဲနံး ခူၣ် ကၠ့ၤအၤ, က့ၣ် ဖလံကၢၤ, စဲမၠိၤ ဟၢၤ, ကၠဲဖၢၤရံၤ ကၠဲၣ်ကစၢၤ, ကၠိဒံၤ ကၠ့ၤဒလံၤ, စတံၤဖ့ၣ် လဲး, ကဲရံး လူး, ကၠဲးခီး ရၣ်ဖၢၤ, မး စဲဒဲၣ်စဲၣ်, ဒ့ဘ့း စပျ့ ဒီးကၠဲဖရံၤ ဝါဒၢၤ. အဝဲသ့ၣ်တဖၣ်န့ၣ် မၤတၢ်ဖဲ ဝဲၤလီၢ်ခိၣ်သ့ၣ်လၢ Warwick, New York, U.S.A.

 ပှၤပၢဆှၢတၢ်ကမံးတံာ်န့ၣ် ဒုးအိၣ်ထီၣ်ဝဲ ကမံးတံာ်အဂၤဃုခါလၢ ကကွၢ်ထွဲဝဲ ပတၢ်မၤတဖၣ် ဒီးပှၤပၢဆှၢတၢ်ကမံးတံာ်တဂၤဘၣ်တဂၤန့ၣ် ပၣ်ဃုာ်လၢကမံးတံာ်အဂၤတဖၣ်အံၤ အစှၤကတၢၢ်တခါ မ့တမ့ၢ် အါန့ၢ်တခါ.

•   ပှၤရဲၣ်ကျဲၤတၢ် ကမံးတံာ်– ကွၢ်ထွဲဝဲ တၢ်ဂ့ၢ်တၢ်ကျိၤလၢ အဘၣ်ထွဲဒီး ထံကီၢ်တၢ်သိၣ်တၢ်သီတကပၤ, မၤစၢၤတၢ်ဖဲ န့ဆၢၣ်တၢ်ဘၣ်ဒိဘၣ်ထံးကဲထီၣ်အသး မ့တမ့ၢ် ပကရၢဖိဘၣ်တၢ်မၤနးမၤဖှီၣ်အီၤ ဘၣ်ဃးဒီးအတၢ်စူၢ်တၢ်နာ်အခါ, ဒီးမၤစၢၤတၢ်စ့ၢ်ကီးဖဲတၢ်ဂ့ၢ်အဂၤတဖၣ် လၢအဘၣ်ဃးလိာ်သးဒီး ယဟိဝၤပှၤအုၣ်အသးတဖၣ် ဟဲကဲထီၣ်သးသတူၢ်ကလာ်အခါ.

•   ပှၤမၤတၢ်ဖိဂ့ၢ်ဝီ ကမံးတံာ်– ကွၢ်ထွဲဝဲတၢ်ရဲၣ်တၢ်ကျဲၤတဖၣ်လၢ ဘ့ၤသ့လးဟံၣ်ဖိဃီဖိတဖၣ်အဂီၢ်.

•   တၢ်ထုးထီၣ်ရၤလီၤ ကမံးတံာ်– ကွၢ်ထွဲဝဲတၢ်ထုးထီၣ်ရၤလီၤလံာ်လဲၢ်, တၢ်သူၣ်ထီၣ်တၢ်အိၣ်ဖှိၣ်လီၢ်, ပှၤကွဲးကျိာ်ထံတၢ်ဝဲၤဒၢး ဒီးဝဲၤတြၢ်အတၢ်သူၣ်ထီၣ်တဖၣ်.

•   ဘီမုၢ်တၢ်မၤ ကမံးတံာ်– ကွၢ်ထွဲဝဲ ပတၢ်စံၣ်တဲၤတဲလီၤ “ဘီမုၢ်အတၢ်သးခု အကစီၣ်” အတၢ်မၤ.—မးသဲ ၂၄:၁၄.

•   တၢ်သိၣ်လိနဲၣ်လိ ကမံးတံာ်– ပၢဆှၢဝဲ တၢ်ကတဲာ်ကတီၤ တၢ်သိၣ်လိနဲၣ်လိလၢ နီၢ်သးတခီ ခီဖျိလၢတၢ်အိၣ်ဖှိၣ်ရိဖှိၣ်, ကၠိတဖၣ် ဒီးတၢ်ထုးထီၣ်တၢ်ကလုၢ်ဒီးတၢ်ဂီၤမူ အတၢ်ရဲၣ်တၢ်ကျဲၤတဖၣ်.

•   တၢ်ကွဲးလံာ်ကွဲးလဲၢ် ကမံးတံာ်– ပၢဆှၢဝဲ တၢ်ကတဲာ်ကတီၤ တၢ်သိၣ်လိနဲၣ်လိလၢ နီၢ်သးတခီ ခီဖျိလၢလံာ်လဲၢ် ဒီးပှာ်ယဲၤသန့. ဒီးအဝဲသ့ၣ်ကွၢ်ထွဲဝဲ တၢ်ကွဲးကျိာ်ထံတၢ်မၤ.

 တကးဒံးဘၣ် ပှၤပၢဆှၢတၢ်ကမံးတံာ် အိၣ်ဖှိၣ်ရိဖှိၣ်ဝဲ တနွံတဘျီလၢ ကသမံသမိးဝဲ တၢ်ကရၢကရိအတၢ်လိၣ်ဘၣ်တဖၣ်. ဖဲအဝဲသ့ၣ်အိၣ်ဖှိၣ်ရိဖှိၣ်အဆၢကတီၢ်န့ၣ် တဲသကိးဝဲလံာ်စီဆှံအဆၢတဖၣ်, ပျဲဝဲယွၤအသးစီဆှံအတၢ်နဲၣ်လိ ဒီးဂုာ်ကျဲးစၢးဝဲဒ်သိးကဆၢတဲာ်တၢ်လၢတၢ်သးတဖျၢၣ်ဃီ.—မၤတၢ် ၁၅:၂၅.

 ပှၤသ့ၣ်တဖၣ်အံၤမ့ၢ်ဝဲ ခရံာ်ဖိလၢပနာ်န့ၢ်အီၤသ့လၢ အမၤစၢၤဝဲ ကမံးတံာ်ဃုခါလၢ ပှၤပၢဆှၢတၢ်ကမံးတံာ်ဒုးအိၣ်ထီၣ်ဝဲ. (၁ ကရံၣ်သူး ၄:၂) အဝဲသ့ၣ်အိၣ်ဒီး တၢ်သ့တၢ်ဘၣ် ဒီးတၢ်လဲၤခီဖျိလၢ အကဲဘျုးလၢ ကမံးတံာ်တခါခါလၢ အဝဲသ့ၣ်မၤစၢၤဝဲ. ဒီးကမံးတံာ်လၢ အဝဲသ့ၣ်မၤစၢၤဝဲန့ၣ် အိၣ်ဒီးတၢ်အိၣ်ဖှိၣ်ရိဖှိၣ် တနွံတဘျီ. ဖဲန့ၣ်အခါ အဝဲသ့ၣ်လဲၤထီၣ်ဝဲစ့ၢ်ကီး. လၢတၢ်ဆၢတဲာ်အဖီခိၣ်န့ၣ် အဝဲသ့ၣ်တပၣ်ဃုာ်ဝဲဘၣ်. ဘၣ်ဆၣ်အဝဲသ့ၣ်ဟ့ၣ်ထီၣ်ဝဲ တၢ်ဟ့ၣ်ကူၣ် ဒီးတၢ်ဂ့ၢ်တၢ်ကျိၤ လၢအဂ့ၤ လၢကမံးတံာ်အဂီၢ်, မၤထွဲဝဲ ကမံးတံာ်အတၢ်ဆၢတဲာ်တဖၣ် ဒီးကွၢ်ထွဲဝဲတၢ်လဲၤထီၣ်လဲၤထီ လၢအဟဲကဲထီၣ်အသးခီဖျိလၢ တၢ်ဆၢတဲာ်တဖၣ်အံၤအဃိ. ပှၤပၢဆှၢတၢ်ကမံးတံာ် ကမၢအဝဲသ့ၣ် လဲၤအိၣ်သကိး ဒီပုၢ်ဝဲၢ်လၢထံကီၢ်အဂၤ မ့တမ့ၢ်ကဘၣ်လဲၤ ဟ့ၣ်တၢ်စံၣ်တဲၤတဲလီၤလၢ တၢ်အိၣ်ဖှိၣ်ဖးဒိၣ် ဒ်သိးဒီးတနံၣ်တဘျီတၢ်အိၣ်ဖှိၣ်ရိဖှိၣ် မ့တမ့ၢ် ကံးလဧး တၢးထီခိးတၢ်လံာ်စီဆှံကၠိ.