ပတူၢ်လိာ်လီၤ. ယဟိဝၤပှၤအုၣ်အသးတဖၣ် တူၢ်လိာ်ဝဲ ကသံၣ်ဖီၣ် ဒီးတၢ်ကူစါယါဘျါလၢကသံၣ်ကသီလီၤ. ဖဲပကျဲးစၢးကတီၤ ပနီၢ်ခိဒီးပတၢ်အိၣ်ဆူၣ်အိၣ်ချ့အခါ, တဘျီဘျီ ပ “လိၣ်ဘၣ်ကသံၣ်သရၣ်” လီၤ. (လူၤကၣ် ၅:၃၁, Easy–to–Read Version ) နီၢ်နီၢ်, ဒ်နံၣ်တၢကယၤအပူၤ ပှၤခရံာ်ဖိ လူၤကၣ်အသိး, ယဟိဝၤပှၤအုၣ်အသးတနီၤန့ၣ် မ့ၢ်ကသံၣ်သရၣ်တဖၣ်လီၤ.—ကလီးစဲ ၄:၁၄.

 တၢ်ကူစါယါဘျါတနီၤန့ၣ် ထီဒါလိာ်သးဒီး လံာ်စီဆှံတၢ်သိၣ်တၢ်သီတဖၣ်အဃိ ပဂ့ၢ်လိာ်အီၤလီၤ. အဒိ, မ့ၢ်လၢလံာ်စီဆှံတြီဝဲ တၢ်ဟံးန့ၢ်သွံၣ် လၢနီၣ်ခိပူၤအဃိ ပတတူၢ်လိာ် တၢ်သွီသွံၣ်ဘၣ်. (မၤတၢ် ၁၅:၂၀) ဒ်န့ၣ်အသိး, လံာ်စီဆှံတြီဃာ် တၢ်ကူစါယါဘျါ တၢ်အိၣ်ဆူၣ်အိၣ်ချ့လၢ ပာ်ဃုာ်ဒီး တၢ်ဟိၣ်တၢ်ယီတၢ်မၤန့ၣ်လီၤ.—ကလၤတံ ၅:၁၉–၂၁.

 ဘၣ်ဆၣ်, တၢ်ကူစါယါဘျါ ဘၣ်ဃးကသံၣ်ကသီအါမးန့ၣ် တထီဒါလိာ်သးဒီး လံာ်စီဆှံတၢ်သိၣ်တၢ်သီဘၣ်. လၢတၢ်န့ၣ်အဃိ, ပှၤတဂၤအနီၢ်ကစၢ်ဒၣ်ဝဲ ကဘၣ်ဃုထၢဝဲလီၤ. ပှၤအုၣ်အသးတဂၤ ပာ်လီၤအသးလၢကတူၢ်လိာ် ကသံၣ်ဖီၣ် မ့တမ့ၢ် တၢ်ကူစါယါဘျါတမံၤသ့, သနာ်က့ ပှၤအုၣ်အသးအဂၤတဂၤ ဂ့ၢ်လိာ်ဝဲ တၢ်ကူစါယါဘျါဒ်သိးအံၤသ့လီၤ.—ကလၤတံ ၆:၅.