ဖဲတၢ်နးတၢ်ဖှီၣ်ဖးဒိၣ် အဆၢကတီၢ် ပှၤကထံၣ်ဘၣ်ဒီး တၢ်ကီတၢ်ခဲဖးဒိၣ် လၢအတကဲထီၣ်အသး နီတဘျီဒံးဘၣ်. လံာ်စီဆှံ တဲဆိပာ်စၢၤဝဲလၢ တၢ်နးတၢ်ဖှီၣ်ဖးဒိၣ်အံၤ ကကဲထီၣ်အသး ဖဲ “မုၢ်နံၤခံကတၢၢ်တဖၣ်” လၢအမ့ၢ်စ့ၢ်ကီးဝဲ “တၢ်အကတၢၢ် အဆၢကတီၢ်.” (၂ တံၤမသ့း ၃:၁; ဒၤနံးယ့လး ၁၂:၄) ဒီးတၢ်နးတၢ်ဖှီၣ်ဖးဒိၣ်န့ၣ် မ့ၢ်ဝဲ “တၢ်နးတၢ်ဖှီၣ် အဆၢကတီၢ်လီၤ. စးထီၣ်လၢ ကစၢ်ယွၤတ့လီၤတၢ် တုၤလီၤလၢ ဆၢကတီၢ်ဖဲန့ၣ်န့ၣ် တၢ်နးတၢ်ဖှီၣ် တဟဲကဲထီၣ်အသး နးထဲန့ၣ် နီတဘျီဘၣ်. ဒီးလၢခံစ့ၢ်ကီး တကဲထီၣ်အသး နီတဘျီလၢၤဘၣ်.”—မၢ်ကူး ၁၃:၁၉; ဒၤနံးယ့လး ၁၂:၁; မးသဲ ၂၄:၂၁, ၂၂.

တၢ်လၢကမၤအသး ဖဲတၢ်နးတၢ်ဖှီၣ်ဖးဒိၣ် အဆၢကတီၢ်

•   တၢ်ဘူၣ်တၢ်ဘါကမၣ်န့ၣ် ကဘၣ်တၢ်မၤဟးဂီၤကွံာ်အီၤ. တၢ်ဘူၣ်တၢ်ဘါကမၣ်န့ၣ် ကဘၣ်တၢ်မၤဟးဂီၤကွံာ်အီၤ ချ့ချ့. (လီၣ်ဖျါ ၁၇:၁, ၅; ၁၈:၉, ၁၀, ၂၁) ဘီမုၢ်စၢဖှိၣ်ကရၢလၢ အခၢၣ်စးဝဲ ထံကီၢ်ပဒိၣ်ပပှၢ်တဖၣ်န့ၣ် ကမၤဟးဂီၤဝဲ တၢ်ဘူၣ်တၢ်ဘါကမၣ်တဖၣ် ဒ်ကစၢ်ယွၤအဲၣ်ဒိးလၢ အဝဲသ့ၣ်မၤဝဲအသိး.—လီၣ်ဖျါ ၁၇:၃, ၁၅-၁၈. a

•   ပှၤကဒုး တၢ်ဘူၣ်တၢ်ဘါလၢအမ့ၢ်အတီ. ဝံယဃ့းစက့လး တဲဆိပာ်စၢၤဝဲလၢ “စီၤကိးလၢကီၢ်မါကူး” လၢအမ့ၢ် ထံကီၢ်လၢ အပာ်ဖှိၣ်ထီၣ်သးတဖၣ်န့ၣ် ကဂုာ်ကျဲးစၢး မၤဟးဂီၤဝဲ ပှၤလၢအအိၣ်လၢ တၢ်ဘူၣ်တၢ်ဘါအမ့ၢ်အတီအပူၤ. ဘၣ်ဆၣ် ကစၢ်ယွၤ ကဒီသဒၢဝဲ ပှၤလၢအဘူၣ်ထီၣ်ဘါထီၣ်အီၤတဖၣ်.—ယဃ့းစက့လး ၃၈:၁, ၂, ၉-၁၂, ၁၈-၂၃.

•   ပှၤဟီၣ်ခိၣ်ဖိတဖၣ် ကဘၣ်တၢ်စံၣ်ညီၣ်အီၤ. ယ့ၣ်ၡူး ကစံၣ်ညီၣ်ဝဲ ပှၤဟီၣ်ခိၣ်ဖိတဖၣ် ဒီး “အကနီၤဖးဝဲ ပှၤခံဒူၣ် ဒ်ပှၤကွၢ်သိနီၤဖး သိဒီးမဲာ်တဲးလဲး အသိးလီၤ.” (မးသဲ ၂၅:၃၁-၃၃) ဖဲန့ၣ်အဆၢကတီၢ် ပှၤကဘၣ်တၢ်ပာ်ပနီၣ်အီၤလၢ သိဧါ မဲာ်တဲးလဲးဧါန့ၣ် အဒိးသန့ၤထီၣ်အသးလၢ အဝဲသ့ၣ် ဆီၣ်ထွဲ ယ့ၣ်ၡူး အ “ဒီပုၢ်ဝဲၢ်” ဧါ တဆီၣ်ထွဲဘၣ်ဧါ အဖီခိၣ်. ယ့ၣ်ၡူး အဒီပုၢ်ဝဲၢ်တဖၣ်အံၤန့ၣ် အကဲဝဲ ပှၤလၢကပၢဃုာ်တၢ်ဒီး ယ့ၣ်ၡူးလၢမူခိၣ်.—မးသဲ ၂၅:၃၄-၄၆.

•   ပှၤလၢအကပၢတၢ်လၢ ယွၤအဘီအမုၢ်ပူၤတဖၣ် ကဘၣ်တၢ်ပာ်ဖှိၣ်ထီၣ်အီၤ. ပှၤလၢအဘၣ်တၢ်ဒိးဖှူအီၤလၢ ကပၢဃုာ်တၢ်ဒီး ယ့ၣ်ၡူး လၢအအိၣ်ဒီး တၢ်သးတီတဖၣ်န့ၣ် အဝဲသ့ၣ်ကသံ ဒီးကဘၣ်တၢ်မၤဂဲၤဆၢထီၣ်သမူထီၣ်က့ၤအီၤ လၢမူခိၣ်.—မးသဲ ၂၄:၃၁; ၁ ကရံၣ်သူး ၁၅:၅၀-၅၃; ၁ သ့းစၤလနံ ၄:၁၅-၁၇.

•   အၢ်မက့းဒိၣ်. အၢ်မက့းဒိၣ်န့ၣ် အမ့ၢ်ဝဲ “တၢ်ဒုးလၢ အကမၤအသး ဖဲသ့တၢ်လၢာ်ကစၢ်ယွၤ အမုၢ်နံၤဖးဒိၣ်အခါ” ဒီးလံာ်စီဆှံ ကိးစ့ၢ်ကီးဝဲလၢ “ယဟိဝၤယွၤ အမုၢ်နံၤ.” (လီၣ်ဖျါ ၁၆:၁၄, ၁၆; ယၡါယၤ ၁၃:၉; ၂ ပ့းတရူး ၃:၁၂) ဖဲန့ၣ်အဆၢကတီၢ် ယ့ၣ်ၡူး ကမၤဟးဂီၤကွံာ်ဝဲ ပှၤလၢအဘၣ်တၢ်ပာ်ပနီၣ်အီၤ ဒ်ပှၤအၢပှၤသီတဖၣ်. (စဖါနယၤ ၁:၁၈; ၂ သ့းစၤလနံ ၁:၆-၁၀) ဒီးအကမၤဟးဂီၤကွံာ်စ့ၢ်ကီး ဟီၣ်ခိၣ် အတၢ်ပၢတၢ်ပြးခဲလၢာ် လၢလံာ်စီဆှံဒိလီၤဝဲလၢ ဆၣ်ဖိကီၢ်ဖိအအၢတဒု လၢအအိၣ်ဒီးအခိၣ်သၣ်ဃံ နွံဖျၢၣ်.—လီၣ်ဖျါ ၁၉:၁၉-၂၁.

တၢ်လၢကမၤအသး ဖဲတၢ်နးတၢ်ဖှီၣ်ဖးဒိၣ် ဝံၤအလီၢ်ခံ

•   မုၣ်ကီၤလံၢ် ဒီးအတၢ်ဝံတၢ်နါတဖၣ် ကဘၣ်တၢ်စၢဃာ်အီၤ. မူခိၣ်ကလူးဖးဒိၣ်တဂၤ ကတၢၤလီၤကွံာ် မုၣ်ကီၤလံၢ် ဒီးအတၢ်ဝံတၢ်နါတဖၣ်လၢ “တၢ်ပူၤယိာ်.” ဒီး “တၢ်ပူၤယိာ်” အံၤန့ၣ် အဲၣ်ဒိးတဲဝဲ တၢ်အိၣ်သးလၢ ပှၤမၤတၢ်တသ့ နီတမံၤဘၣ်. (လီၣ်ဖျါ ၂၀:၁-၃) အဃိ မုၣ်ကီၤလံၢ် အိၣ်လၢ တၢ်ပူၤယိာ်န့ၣ် အလီၤဂာ်ဒ်သိးဒီး အမၤတၢ်တသ့ နီတမံၤဘၣ်.—လီၣ်ဖျါ ၂၀:၇.

•   အနံၣ်တကထိ ကစးထီၣ်အသး. ယွၤအဘီအမုၢ် အတၢ်ပၢ အနံၣ်တကထိ ကစးထီၣ်အသး ဒီးပှၤဟီၣ်ခိၣ်ဖိတဖၣ် ကဒိးန့ၢ်ဘၣ် တၢ်ဆိၣ်ဂ့ၤ ခီဖျိလၢ ဘီမုၢ်အံၤ. (လီၣ်ဖျါ ၅:၉, ၁၀; ၂၀:၄, ၆) ဖဲ “ပှၤဂီၢ်မုၢ်ဖးဒိၣ်” “လဲၤခီဖျိ တၢ်နးတၢ်ဖှီၣ်ဖးဒိၣ်” ဝံၤအလီၢ်ခံ ယွၤအဘီအမုၢ် တၢ်ပၢ အနံၣ်တကထိ ကစးထီၣ်အသး.—လီၣ်ဖျါ ၇:၉, ၁၄; စံးထီၣ်ပတြၢၤ ၃၇:၉-၁၁.