တၢ်ဘူၣ်တၢ်ဘါခဲလၢာ်န့ၣ်​ တဒ်သိးဘၣ်. လၢလံာ်စီဆှံအပူၤ ပထံၣ်ဘၣ်လၢ တၢ်ဘူၣ်တၢ်ဘါလၢ ကစၢ်ယွၤ တဘၣ်သူၣ်ဘၣ်သးဝဲဘၣ်န့ၣ်​ အိၣ်ဝဲအါမး. ဘၣ်မနုၤအဃိ ကစၢ်ယွၤ တတူၢ်လိာ်ဝဲဘၣ်လဲၣ်န့ၣ်​ တၢ်ဂ့ၢ်အိၣ်ဝဲ ခံထံၣ်.

တၢ်ဂ့ၢ် ၁– တၢ်ဘူၣ်ထီၣ်ဘါထီၣ်​ ယွၤလၢအကမၣ်တဖၣ်

 ဘၣ်ဃးဒီး တၢ်ဘူၣ်ထီၣ်ဘါထီၣ်​ ယွၤလၢအကမၣ်တဖၣ်န့ၣ်​ လံာ်စီဆှံသူဝဲ တၢ်ကတိၤလၢအမ့ၢ် “တၢ်ကလီကလီ, ဒီးတၢ်လၢအတဂိာ်တသီၣ်ဘၣ်” လီၤ. (ယံးရမံယၤ ၁၀:၃-၅; ၁၆:၁၉, ၂၀) ယဟိဝၤယွၤ a မၤလိာ်ပှၤအံၣ်စရ့လးဖိ လၢပျၢၤတဖၣ်လၢ “အိၣ်ဒီးကစၢ်အဂုၤအဂၤတဖၣ်​ လၢယမဲာ်ညါတဂ့ၤ.” (၂ မိၤၡ့ ၂၀:၃, ၂၃; ၂၃:၂၄) ဖဲပှၤအံၣ်စရ့လးဖိတဖၣ်​ ဘူၣ်ထီၣ်ဘါထီၣ်ဝဲ ယွၤအဂၤတဖၣ်အခါ “ယွၤအသးထီၣ်ကဲၤထီၣ်” လီၤ.—၄ မိၤၡ့ ၂၅:၃; ၃ မိၤၡ့ ၂၀:၂; စံၣ်ညီၣ်ကွီၢ် ၂:၁၃, ၁၄.

 ကစၢ်ယွၤ အတၢ်ပာ်သူၣ်ပာ်သးလၢ ဘၣ်ဃးဒီး တၢ်ဘူၣ်ထီၣ်ဘါထီၣ်​ “တၢ်လၢပှၤကိးအီၤလၢ ကစၢ်တဖၣ်” န့ၣ်​ တဆီတလဲဒံးဘၣ်. (၁ ကရံၣ်သူး ၈:၅, ၆; ကလၤတံ ၄:၈) ကစၢ်ယွၤ မၤလိာ်ဝဲလၢ ပှၤလၢအအဲၣ်ဒိး ဘူၣ်ထီၣ်ဘါထီၣ်အီၤန့ၣ်​ တဘၣ်ရ့ဒီးပှၤလၢ အမၤဝဲ တၢ်ဘူၣ်တၢ်ဘါကမၣ်တဖၣ်​ အလုၢ်အလၢ်လၢၤဘၣ်. ကစၢ်ယွၤမၢပှၤ “ဟးထီၣ်လၢအကျါ, ဒီးအိၣ်လီၤဆီ” လီၤ. (၂ ကရံၣ်သူး ၆:၁၄-၁၇) တၢ်ဘူၣ်တၢ်ဘါခဲလၢာ် မ့ၢ်ဒ်သိးသိး ဒီးကစၢ်ယွၤ မ့ၢ်တူၢ်လိာ်အီၤန့ၣ်​ တမ့ၢ်လၢ ကစၢ်ယွၤ ကမၤလိာ်ဝဲဒ်န့ၣ်ဘၣ်.

တၢ်ဂ့ၢ် ၂– တၢ်ဘူၣ်ထီၣ်ဘါထီၣ်​ ယွၤလၢအမ့ၢ်အတီ လၢကျဲလၢအတတူၢ်လိာ်ဝဲဘၣ်

 တဘျီတခီၣ်​ ပှၤအံၣ်စရ့လးဖိတဖၣ်​ ဖဲအဝဲသ့ၣ်​ ဘူၣ်ထီၣ်ဘါထီၣ်​ ကစၢ်ယွၤအခါ အဝဲသ့ၣ်​ မၤထွဲဝဲတၢ်ဘူၣ်တၢ်ဘါလၢ အကမၣ်တဖၣ်​ အတၢ်စူၢ်တၢ်နာ် ဒီးအလုၢ်အလၢ်လီၤ. ဘၣ်ဆၣ်​ ယဟိဝၤယွၤ တတူၢ်လိာ် အဝဲသ့ၣ်​ အတၢ်ဘူၣ်ထီၣ်ဘါထီၣ်​ လၢအယီကျဲၣ်ကျီအသးဒီး တၢ်ဘူၣ်တၢ်ဘါ အကမၣ်တဖၣ်န့ၣ်ဘၣ်. (၂ မိၤၡ့ ၃၂:၈; ၅ မိၤၡ့ ၁၂:၂-၄) ယ့ၣ်ၡူးပာ်ဒ့ၣ်ပာ်ကမၣ်​ တၢ်ဘူၣ်တၢ်ဘါခိၣ်နၢ် ဖဲအစိၤတဖၣ်, မ့ၢ်လၢအဝဲသ့ၣ်​ ဘူၣ်ထီၣ်ဘါထီၣ်ကစၢ်ယွၤ ဒ်ကျဲလၢ တဘၣ်ကစၢ်ယွၤအသး အဃိလီၤ. အဝဲသ့ၣ်​ ပာ်မၤအသးဒ် အအဲၣ်ထူအဲၣ်ယွၤ ဘၣ်ဆၣ်​ အဝဲသ့ၣ်​ “ပာ်လီၤတဲာ်ကွံာ်” “တၢ်သိၣ်တၢ်သီလၢ အဃၢဒိၣ်တက့ၢ်တဖၣ်န့ၣ်, တၢ်စံၣ်ညီၣ်ဒီးတၢ်သးကညီၤ ဒီးတၢ်နာ်တဖၣ်” လီၤ.‏—မးသဲ ၂၃:၂၃.

 ဒ်န့ၣ်အသိး မုၢ်မဆါတနံၤအံၤ ကစၢ်ယွၤ ဘၣ်သူၣ်ဘၣ်သးဝဲ ထဲဒၣ်တၢ်ဘူၣ်တၢ်ဘါလၢ အဒိးသန့ၤထီၣ်အသး လၢတၢ်မ့ၢ်တၢ်တီလီၤ. ဒီးတၢ်မ့ၢ်တၢ်တီအံၤ ပထံၣ်ဘၣ်အီၤလၢ လံာ်စီဆှံပူၤလီၤ. (ယိၤဟၣ်​ ၄:၂၄; ၁၇:၁၇; ၂ တံၤမသ့း ၃:၁၆, ၁၇) တၢ်ဘူၣ်တၢ်ဘါ အတၢ်သိၣ်လိတဖၣ်လၢ အထီဒါလိာ်အသးဒီး လံာ်စီဆှံန့ၣ်​ မၤယံၤထီၣ်ဝဲ ပှၤဂၤဒီးကစၢ်ယွၤလီၤ. တၢ်ဘူၣ်တၢ်ဘါ အတၢ်သိၣ်လိ ဒ်သိးဒီး ယွၤသၢဂၤတဂၤဃီ, ပှၤကလၤလၢအသံတသ့ဘၣ် ဒီးတၢ်မၤနးမၤဖှီၣ်​ လီၤထူလီၤယိာ်န့ၣ်​ ပှၤအါဂၤ ဆိကမိၣ်ဝဲလၢ အမ့ၢ်လံာ်စီဆှံအတၢ်သိၣ်လိ ဘၣ်ဆၣ်သနာ်က့ တၢ်သိၣ်လိတဖၣ်အံၤန့ၣ်​ ဟဲလီၤစၢၤလၢ တၢ်ဘူၣ်တၢ်ဘါ အကမၣ်လီၤ. တၢ်ဘူၣ်တၢ်ဘါလၢ အဆီၣ်ထွဲဝဲ တၢ်သိၣ်လိတဖၣ်အံၤန့ၣ်​ အပာ်ဒိၣ်ဝဲ တၢ်ဘူၣ်တၢ်ဘါ အလုၢ်အလၢ် ဒိၣ်န့ၢ်ဒံး ကစၢ်ယွၤ အတၢ်ထံၣ်ဒံးအဃိ အဝဲသ့ၣ်မ့ၢ်ဝဲ “တၢ်ကလီကလီ” ဒီးအဘျုးတအိၣ်ဘၣ်.—မၢ်ကူး ၇:၇, ၈.

 ကစၢ်ယွၤသးဘၣ်အၢဝဲ တၢ်ဘူၣ်တၢ်ဘါလၢ အပာ်မၤအသးတဖၣ်လီၤ. (တံတူး ၁:၁၆) တၢ်ဘူၣ်တၢ်ဘါလၢ အမၤစၢၤပှၤဂၤ ဒ်သိး ကဘူၣ်ထီၣ်ဘါထီၣ်​ ကစၢ်ယွၤန့ၣ်​ ကဘၣ်မ့ၢ်ဝဲ တၢ်ဘူၣ်တၢ်ဘါလၢ အဟ့ၣ်ဂံၢ်ဟ့ၣ်ဘါပှၤဂၤ ဒ်သိးကအိၣ်မူဝဲ ဂ့ၤဂ့ၤဘၣ်ဘၣ်ကိးနံၤဒဲး ဒီးတမ့ၢ်ဝဲ တၢ်ဘူၣ်တၢ်ဘါလၢ အပာ်ဒိၣ်ဝဲ လုၢ်လၢ်ထူသနူတဖၣ်ဘၣ်. အဒိ, လံာ်စီဆှံတဲဝဲလၢ “ပှၤတဂၤဂၤ မ့ၢ်ဆိကမိၣ်လၢ အမ့ၢ်ပှၤဘါယွၤဖိဒီး, မ့ၢ်တမၤနၢၤဘၣ်အပျ့ၤဘၣ်, မ့မ့ၢ်အလီလီၤအသးဒီး, အဝဲဒၣ်​ အတၢ်ဘူၣ်ထီၣ်ဘါထီၣ်န့ၣ်​ မ့ၢ်တၢ်ကလီကလီလီၤ. တၢ်ဘူၣ်ထီၣ်ဘါထီၣ်​ အစီအဆှံ, ဒီးတဘၣ်အၢဘၣ်သီဘၣ်တမံၤ မ့ၢ်အအံၤ, တၢ်အိၣ်သကိး ပှၤဖိၣ်ဃဲဒီးမုၣ်ကမဲ လၢအဘၣ်တၢ်နးတၢ်ဖှီၣ်အပူၤ, ဒီးတၢ်ပလီၢ်အသးဒ်သိး အသုတဘၣ်တၢ်ဃံၣ်တၢ်ဃူးလၢ ဟီၣ်ခိၣ်တဂ့ၤန့ၣ်လီၤ.” (ယၤကိာ် ၁:၂၆, ၂၇) “တၢ်ဘူၣ်ထီၣ်ဘါထီၣ်​ အစီအဆှံ” န့ၣ်လံာ်စီဆှံ ခ့ကၠ့(မ်)ဘၢၡၢၤ ပာ်ဖျါထီၣ်ဝဲလၢ တၢ်ဘူၣ်တၢ်ဘါ လၢအကဆှီ, မ့ၢ်လၢတၢ်ဘူၣ်တၢ်ဘါအံၤန့ၣ်​ ကဆှီဝဲ ဒီးတၢ်ပာ်မၤသး တအိၣ်ဘၣ်အဃိလီၤ.