ဘၣ်ဃးဒီး တၢ်အီသံးန့ၣ် လံာ်စီဆှံတဲဝဲဒ်လဲၣ်. ပှၤမ့ၢ်အီသံးန့ၣ် အကမၣ်ဧါ.
လံာ်စီဆှံတဲဝဲဒ်လဲၣ်
ပှၤမ့ၢ်အီသံး ဖဲအကြၢးအဘၣ်န့ၣ် တကမၣ်ဘၣ်. a ဒီးလံာ်စီဆှံတဲဝဲလၢ စပံးထံ န့ၣ်အကဲဝဲဒၣ် တၢ်ဟ့ၣ်လၢ ကစၢ်ယွၤဟ့ၣ်လီၤ ပှၤဟီၣ်ခိၣ်ဖိ. (စံးထီၣ်ပတြၢၤ ၁၀၄:၁၄, ၁၅; စံၣ်တဲၤတဲလီၤတၢ် ၃:၁၃; ၉:၇) ဒီးလံာ်စီဆှံ ပာ်ဖျါထီၣ်ဝဲလၢ စပံးထံန့ၣ် အဂ့ၤကသံၣ်ကသီစ့ၢ်ကီး.—၁ တံၤမသ့း ၅:၂၃.
ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဝဲအီစပံးထံစ့ၢ်ကီး. (မးသဲ ၂၆:၂၉; လူၤကၣ် ၇:၃၄) ဒီးဘၣ်တဘျီန့ၣ် ယ့ၣ်ၡူးလဲၤလၢ တၢ်ဖျီမူးအခါ အဝဲမၤကဲထီၣ်ထံလၢ စပံးထံ.—ယိၤဟၣ် ၂:၁-၁၀.
ပှၤမ့ၢ်အီသံးအါတလၢန့ၣ် တၢ်ဘၣ်ယိၣ်အိၣ်
စပံးထံန့ၣ် လံာ်စီဆှံ ပာ်ဖျါထီၣ်ဝဲလၢ အမ့ၢ်တၢ်လၢအဂ့ၤလီၤ. ဘၣ်ဆၣ် လံာ်စီဆှံတဲဝဲလၢ ပှၤမ့ၢ်အီအီၤအါတလၢ ဒီးမ့ၢ်အီမူၤသးန့ၣ် အကမၣ်လီၤ. အဃိ ခရံာ်ဖိတဂၤ မ့ၢ်အီသံးန့ၣ် ကြၢးအီဝဲဖဲ အကြၢးအဘၣ်လီၤ. (၁ တံၤမသ့း ၃:၈; တံတူး ၂:၂, ၃) ပှၤမ့ၢ်အီသံးအါတလၢန့ၣ် တၢ်လီၤဘၣ်ယိၣ်အိၣ်ဒ်လဲၣ်န့ၣ် လံာ်စီဆှံ ပာ်ဖျါထီၣ် တၢ်ဂ့ၢ်တဘျုးမံၤညါ.
ပှၤမ့ၢ်အီသံးအါတလၢန့ၣ် အဆိကမိၣ်ထံတၢ် တသ့ဂ့ၤဂ့ၤလၢၤဘၣ်. (ကတိၤဒိ ၂၃:၂၉-၃၅) လံာ်စီဆှံတဲဝဲလၢ “ဟ့ၣ်လုၢ်ထီၣ်သုနီၢ်ခိ ဒ်တၢ်လုၢ်လၢအမူဝဲ, စီဆှံဝဲ ဒီးကစၢ်ယွၤ တူၢ်လိာ်ဝဲ . . . ဒီးဖဲသုမၤ အတၢ်မၤစီဆှံအခါ သူသုတၢ်သ့တၢ်ဘၣ်လၢ သုကပဲာ်ထံနီၤဖးတၢ်” ဘၣ်ဆၣ် ပှၤလၢအမူၤသံးတဂၤန့ၣ် မၤထွဲတၢ်ဟ့ၣ်ကူၣ်အံၤ တသ့ဘၣ်.—ရိမ့ၤ ၁၂:၁.
ပှၤလၢအမူၤသံးန့ၣ် အတမဲာ်ဆှးလၢၤဘၣ် ဒီးအ “သးလၢအအဲၣ်ဒိးမၤ တၢ်အဘၣ်” တအိၣ်လၢၤဘၣ်.—ဟိၤၡ့ ၄:၁၁; အ့းဖ့းစူး ၅:၁၈.
ပှၤလၢအအီမူၤသံးန့ၣ် အကဖှီၣ်လီၤယာ်လီၤ ဒီးအတၢ်အိၣ်ဆူၣ်အိၣ်ချ့ ဘၣ်ဒိနးမးသ့.—ကတိၤဒိ ၂၃:၂၁, ၃၁, ၃၂.
ပှၤလၢအအီသံးအါတလၢ ဒီးအအီမူၤသံးန့ၣ် ကစၢ်ယွၤ တဘၣ်သူၣ်ဘၣ်သးအီၤဘၣ်.—ကတိၤဒိ ၂၃:၂၀; ကလၤတံ ၅:၁၉-၂၁.
ပှၤအီသံးအါတလၢဧါ တအါတလၢဧါန့ၣ် ပသ့ၣ်ညါအီၤသ့ဒ်လဲၣ်
ပှၤလၢအအီသံးအါတလၢန့ၣ် အကမၤဘၣ်ဒိ အနီၢ်ကစၢ်ဒီးပှၤဂၤ. တမ့ၢ်ထဲ ပှၤလၢအအီသံးဒီး အဟးလီၤဃံၢ်မၣ် ပတဲသ့လၢအမူၤသံးဘၣ်. ဒ်လံာ်စီဆှံတဲဝဲအသိး ပှၤလၢအအီသံးတုၤလၢ အသးဒံဝ့ၤဒံဝီၤ, အဟးကနူၤကပၤ, အဟးဃုအ့ၣ်လိာ်သး ဒီးအတဲတၢ်တလီၤလဲ (တလီၤဒဲ) လၢၤဘၣ်န့ၣ် အကဲဝဲ ပှၤမူၤသံးလီၤ. (ယိၤဘး ၁၂:၂၅; စံးထီၣ်ပတြၢၤ ၁၀၇:၂၇; ကတိၤဒိ ၂၃:၂၉, ၃၀, ၃၃) ပှၤလၢအတအီမူၤသံးဘၣ်သနာ်က့ အကဲထီၣ်ပှၤလၢ “အအီတၢ် အါတလၢ” သ့. ဒီးအကတူၢ်ဘၣ် တၢ်ကီတၢ်ခဲ ခီဖျိလၢ အအီသံးအဃိ.—လူၤကၣ် ၂၁:၃၄, ၃၅.
တၢ်ဆၢကတီၢ်လၢ ပှၤတကြၢးအီသံး နီတစဲးဘၣ်
ခရံာ်ဖိတဖၣ် တကြၢးအီသံးလၢ တၢ်ဆၢကတီၢ်ဖဲလဲၣ်. လံာ်စီဆှံ တဲဝဲလၢ-
မ့ၢ်ကဲထီၣ်တၢ်တံာ်တာ်လၢ ပှၤဂၤအဂီၢ်န့ၣ် အဝဲသ့ၣ် တကြၢးအီသံးဘၣ်.—ရိမ့ၤ ၁၄:၂၁.
ပဒိၣ်တၢ်သိၣ်တၢ်သီ မ့ၢ်အိၣ်လၢ ပှၤတဘၣ်အီသံးဘၣ်န့ၣ် အဝဲသ့ၣ် တကြၢးအီသံးဘၣ်.—ရိမ့ၤ ၁၃:၁.
ပှၤတဂၤ မ့ၢ်စွဲသံး ဒီးအမ့ၢ်တအီသံးဘၣ် အအိၣ်မ့ၢ်တကဲဘၣ်န့ၣ် အတကြၢးအီသံး နီတစဲးလၢၤဘၣ်.—မးသဲ ၅:၂၉, ၃၀.
[တၢ်ဂ့ၢ်အဘျဲၣ်]
a လၢတၢ်ဂ့ၢ်တခါအံၤအပူၤ တၢ်ကတိၤလၢအမ့ၢ် “သံး” န့ၣ်အဲၣ်ဒိးတဲစ့ၢ်ကီး တၢ်ထံတၢ်နိလၢ အပၣ်ဃုာ်ဒီးသံး ဒ်သိးဒီး ဘံၤယၤဒီးစပံးထံ.
တၢ်ဂ့ၤအဂၤလၢ နကဘၣ်သး
တၢ်ဆီဟံၣ်ဆီဃီ ဒီး ဟံၣ်ဖိဃီဖိ
တၢ်အီသံးအါတလၢန့ၣ် အမၤဘၣ်ဒိ နတၢ်ဆီဟံၣ်ဆီဃီသ့
နတၢ်အီသံး မ့ၢ်မၤဘၣ်ဒိ နတၢ်ဆီဟံၣ်ဆီဃီန့ၣ် နမၤတၢ်မနုၤသ့လဲၣ်.
ဘၣ်ဃးဒီးပှၤ
တီၣ်ထီၣ်တၢ်ဂ့ၢ် လၢပှၤကလဲၤအိၣ်သကိးနၤအဂီၢ်
တဲသကိး လံာ်စီဆှံ မ့တမ့ၢ် ဃုသ့ၣ်ညါအါထီၣ် ယဟိဝၤပှၤအုၣ်အသးအဂ့ၢ်.