ယ့ၣ်ၡူးန့ၣ် အဒိၣ်တၢ်မၤသးဒ်လဲၣ်
လံာ်စီဆှံတဲဝဲဒ်လဲၣ်
ယ့ၣ်ၡူးဒိၣ်တၢ်မၤသးဒ်လဲၣ်န့ၣ် လံာ်စီဆှံ တပာ်ဖျါထီၣ်ဝဲဘၣ်အဃိ ပှၤတသ့ၣ်ညါ လီၤတံၢ်လီၤဆဲး နီတဂၤဘၣ်. လံာ်စီဆှံ တပာ်ဖျါထီၣ်ဝဲအဃိ ပသ့ၣ်ညါဘၣ်လၢ ယ့ၣ်ၡူးဒိၣ်တၢ်မၤသးဒ်လဲၣ်န့ၣ် တမ့ၢ်တၢ်လၢအရ့ဒိၣ်ဘၣ်. သနာ်က့ ဖဲပဖးလံာ်စီဆှံအခါ အဝဲဒိၣ်တၢ်မၤသးဒ်လဲၣ်န့ၣ် ပတယာ်ဘၣ်တစဲးတမွဲး.
အက့ၢ်အဂီၤ– ယ့ၣ်ၡူးအမိန့ၣ် မ့ၢ်ဝဲ ပှၤယူဒၤဖိ အဃိ ဖျါလီၤဂာ်လၢ ယ့ၣ်ၡူးနာ်က့ အကလီၤဂာ်လၢ ပှၤယူဒၤဖိတဖၣ်. (ဧ့ၤဘြံၤ ၇:၁၄) ဒီးလီၤဂာ်လၢ အဝဲတဖျါလီၤဆီန့ၢ်ဒံး ပှၤအဂၤတဖၣ်ဘၣ်. ဘၣ်တဘျီ ဖဲအဝဲအိၣ်လၢ ကၤလံၤလါ ဒီးလဲၤလၢ ဝ့ၢ်ယရူၤၡလ့ၣ်အခါ ပှၤတသ့ၣ်ညါအီၤ နီတဂၤဘၣ်. (ယိၤဟၣ် ၇:၁၀, ၁၁) ဒီးဖျါလီၤဂာ်လၢ အဝဲတဖျါလီၤဆီဒီး အပျဲၢ်အဘီၣ်တဖၣ် အါအါဘၣ်. ဖဲပှၤလၢ အဖီၣ်တၢ်စုကဝဲၤတဖၣ် ကဟဲဖီၣ်အီၤအနၤန့ၣ် ဒ်သိးပှၤကသ့ၣ်ညါအီၤအဂီၢ် စီၤယူဒၤ အံၣ်စကၤရံၤအိာ် ဘၣ်ပာ်ဖျါန့ၢ်ပှၤတၢ်ပနီၣ်.—မးသဲ ၂၆:၄၇-၄၉.
အခိၣ်ဆူၣ်– လံာ်စီဆှံတဲဝဲလၢ “ပိာ်ခွါခိၣ်ဆူၣ်မ့ၢ်ထီန့ၣ် မ့ၢ်တၢ်မဲာ်ဆှးလၢအဂီၢ်” အဃိ လီၤဂာ်လၢ ယ့ၣ်ၡူးန့ၣ် အခိၣ်ဆူၣ်တထီဘၣ်.—၁ ကရံၣ်သူး ၁၁:၁၄.
အခၣ်ဆူၣ်– ယ့ၣ်ၡူးန့ၣ် အပာ်ထီအခၣ်ဆူၣ်. ပှၤယူဒၤဖိ အတၢ်သိၣ်တၢ်သီ အိၣ်ဝဲလၢ ပှၤပိာ်ခွါတဖၣ်န့ၣ် ‘တဘၣ်တံာ် အခၣ်ဆူၣ် အနၢၣ်တဖၣ်’ ဘၣ်. အဃိ ယ့ၣ်ၡူးန့ၣ် မၤထွဲဝဲ တၢ်သိၣ်တၢ်သီအံၤ. (၃ မိၤၡ့ ၁၉:၂၇; ကလၤတံ ၄:၄) တကးဒံးဘၣ် ဝံအတၢ်စံးပာ် လၢယၡါယၤအပူၤန့ၣ် အပာ်ဖျါထီၣ်ဝဲ ဘၣ်ဃးဒီး ယ့ၣ်ၡူးအခၣ်ဆူၣ်အဂ့ၢ်စ့ၢ်ကီး.—ယၡါယၤ ၅၀:၆.
အနီၢ်ခိမိၢ်ပှၢ်– ဖဲယ့ၣ်ၡူးဟးစံၣ်တဲၤတဲလီၤတၢ်အခါ အဝဲလဲၤတၢ်လၢ အမံးလာ်အါမး. (မးသဲ ၉:၃၅) အဝဲမၤကဆှီဝဲ ပှၤယူဒၤဖိတဖၣ် အတၢ်လုၢ်ဟံၣ်ခံဘျီ. ဖဲန့ၣ်အဆၢကတီၢ် အဝဲမၤတကျၢၢ်ကွံာ်ဝဲ ပှၤခီလဲစ့တဖၣ် အစီၢ်နီၤခိၣ် ဒီးအနီဟးထီၣ်ကွံာ်ဝဲ ဆၣ်ဖိကီၢ်ဖိတဖၣ်လၢ နီၣ်ဖျ့. တၢ်သ့ၣ်တဖၣ်အံၤ ပာ်ဖျါထီၣ်ဝဲလၢ ယ့ၣ်ၡူးန့ၣ်အကဲပှၤလၢ အဂံၢ်ဆူၣ်. (လူၤကၣ် ၁၉:၄၅, ၄၆; ယိၤဟၣ် ၂:၁၄, ၁၅) ဒီးလံာ်တဘ့ၣ် ပာ်ဖျါထီၣ်ဝဲလၢ “လံာ်တၢ်သးခုကစီၣ်တဖၣ်န့ၣ် ပာ်ဖျါထီၣ်ဝဲလၢ ယ့ၣ်ၡူးအိၣ်ဒီး နီၢ်ခိမိၢ်ပှၢ်လၢ အဂံၢ်ဆူၣ်ဘါဆူၣ် ဒီးပှဲၤဒီးတၢ်အိၣ်ဆူၣ်အိၣ်ချ့.”—McClintock and Strong’s Cyclopedia, Volume IV, page.
အမဲာ်သၣ်– ယ့ၣ်ၡူးန့ၣ် အအိၣ်ဒီးတၢ်သးကညီၤ ဒီးအကဟုကယာ်တၢ်သ့ အဃိန့ၣ် အတၢ်ဂ့ၤတၢ်ဝါတဖၣ်အံၤ ကအိၣ်ဖျါလၢအမဲာ်. (မးသဲ ၁၁:၂၈, ၂၉) ဖဲပှၤလိၣ်ဘၣ် တၢ်မၤမုာ်ထီၣ် ဒီးတၢ်မၤစၢၤအခါန့ၣ် ပှၤဟဲလၢအအိၣ် ဒီဒူၣ်. (လူၤကၣ် ၅:၁၂, ၁၃; ၇:၃၇, ၃၈) ဖိသၣ်ဒၣ်လဲာ် တပျံၤအီၤဘၣ် ဒီးအိၣ်ဒီးအီၤမုာ်.—မးသဲ ၁၉:၁၃-၁၅; မၢ်ကူး ၉:၃၅-၃၇.
တၢ်နၢ်ပၢၢ်ကမၣ် ဘၣ်ဃးဒီး ယ့ၣ်ၡူးဒိၣ်တၢ် မၤသးဒ်လဲၣ်
တၢ်နၢ်ပၢၢ်ကမၣ်– ပှၤတနီၤန့ၣ် တဲဝဲလၢ ယ့ၣ်ၡူးန့ၣ် ဟဲလီၤစၢၤလီၤသွဲၣ်လၢ ပှၤအၤဖြံၤကၤဖိ, မ့ၢ်လၢ လံာ်လီၣ်ဖျါတဲဝဲလၢ ယ့ၣ်ၡူးအခိၣ်ဆူၣ်န့ၣ် လီၤဂာ်ဒ်သိးဒီး သိဆူၣ် ဒီးအခီၣ်လၣ်န့ၣ် လီၤဂာ်ဒ်သိးဒီး “တိၢ်ဘီလၢအဂ့ၤ” အဃိ.—လီၣ်ဖျါ ၁:၁၄, ၁၅.
တၢ်မ့ၢ်တၢ်တီ– တၢ်ဂ့ၢ်လၢ လံာ်လီၣ်ဖျါအပူၤန့ၣ် အကဲဝဲ “တၢ်ပနီၣ်တဖၣ်.” (လီၣ်ဖျါ ၁:၁) အဃိ လံာ်လီၣ်ဖျါ ပာ်ဖျါထီၣ်ဝဲ ဘၣ်ဃးဒီး ယ့ၣ်ၡူးအခိၣ်ဆူၣ် ဒီးအခီၣ်လၣ်န့ၣ် အကဲဝဲ တၢ်အဒိလၢ အဘၣ်ဃးဒီး ယ့ၣ်ၡူးအတၢ်ဂ့ၤတၢ်ဝါ ဖဲအဝဲဂဲၤဆၢထၢၣ်သမူထီၣ်က့ၤ ဝံၤအလီၢ်ခံ. အတတဲဝဲဘၣ်ဃးဒီး ယ့ၣ်ၡူးအက့ၢ်အဂီၤ ဖဲအအိၣ်မူလၢ ဟီၣ်ခိၣ်ချၢအခါန့ၣ်ဘၣ်. လီၣ်ဖျါ ၁:၁၄ တဲဝဲလၢ ယ့ၣ်ၡူး “အခိၣ်ဆူၣ်န့ၣ် ဝါဝဲဒ်သိအဆူၣ် လၢအဝါ ဒီးဝါဝဲဒ် မူခိၣ်ဖီအသိး.” လံာ်စီဆှံအဆၢအံၤန့ၣ် အတဲဝဲတၢ်အဒိ ဒီးအအဲၣ်ဒိးတဲဝဲ ယ့ၣ်ၡူးအခိၣ်ဆူၣ်လွဲၢ်, အတတဲဝဲ ဘၣ်ဃးဒီး အခိၣ်ဆူၣ်တကံန့ၣ်ဘၣ်. အအဲၣ်ဒိးတဲဝဲ ယ့ၣ်ၡူးန့ၣ် အသးပှၢ်အဃိ အအိၣ်ဒီးတၢ်ကူၣ်သ့.—လီၣ်ဖျါ ၃:၁၄.
ယ့ၣ်ၡူး အခီၣ်လၣ်န့ၣ် “လီၤဂာ်ဒ် တိၢ်ဘီလၢအဂ့ၤလၢ အကပီၤထီၣ်ဝဲ ဖဲအဘၣ်တၢ်ပှံၢ်အီၤဒီး မ့ၣ်အူအခါ.” (လီၣ်ဖျါ ၁:၁၅) ဒီးအမဲာ်န့ၣ် “မၤအသးဒ်မုၢ် ဖဲအကပီၤထီၣ် အဆူၣ်ကတၢၢ် အခါလီၤ.” (လီၣ်ဖျါ ၁:၁၆) ပှၤကလုာ်လၢ အညၣ်အလွဲၢ်ဒ်အံၤန့ၣ် တအိၣ်နီတကလုာ်ဘၣ်. အဃိ တၢ်ထံၣ်လၢညါခီ တခါအံၤန့ၣ် အအဲၣ်ဒိးတဲဝဲတၢ်အဒိ ဒီးအပာ်ဖျါထီၣ်ဝဲလၢ ယ့ၣ်ၡူးလၢ အဟဲက့ၤဂဲၤဆၢထၢၣ်သမူထီၣ်က့ၤ တဂၤန့ၣ် “အအိၣ်ဝဲဆိးဝဲလၢ တၢ်ကပီၤလၢ ပှၤသုးဘူးသးဆူအအိၣ် တသ့ဘၣ်အလီၢ်.”—၁ တံၤမသ့း ၆:၁၆.
တၢ်နၢ်ပၢၢ်ကမၣ်– ယ့ၣ်ၡူးန့ၣ် အကဲပှၤလၢ အဂံၢ်ဘါတဆူၣ်ဘၣ်.
တၢ်မ့ၢ်တၢ်တီ– ယ့ၣ်ၡူးန့ၣ် အကဲပိာ်ခွါလၢ အဘၣ်ဒုၣ်ဘၣ်ဒ့. အဒိ ဖဲပှၤဂီၢ်မုၢ်လၢ အဖီၣ်စုကဝဲၤတဖၣ် ဟဲဖီၣ်အီၤအခါ အဝဲပာ်ဖျါထီၣ်အသးဒူဒူ. (ယိၤဟၣ် ၁၈:၄-၈) ဒီးအဝဲမ့ၢ်ဝဲ ပှၤစုသ့ဖိအဃိ အကသူဝဲ ပှၤစုသ့ဖိ အတၢ်ပီးတၢ်လီတဖၣ်ထီဘိ အဃိ အကမ့ၢ်ပှၤလၢ အဂံၢ်ဆူၣ်တဂၤ.—မၢ်ကူး ၆:၃.
မ့မ့ၢ်ဒ်န့ၣ်န့ၣ် ဘၣ်မနုၤအဃိ ပှၤဘၣ်ယိးစၢၤယ့ၣ်ၡူးလၢ တၢ်မၤအၢမၤနး အသ့ၣ်တၢၣ်လဲၣ်. ဘၣ်မနုၤအဃိ ယ့ၣ်ၡူးန့ၣ် အသံဆိလၢ ပှၤလၢအဘၣ် တၢ်ပျၤထီဃုာ်ဒီးအီၤတဖၣ် အမဲာ်ညါလဲၣ်. (လူၤကၣ် ၂၃:၂၆; ယိၤဟၣ် ၁၉:၃၁-၃၃) တချုးလၢ ယ့ၣ်ၡူးသံဒံးဘၣ်န့ၣ် အဂံၢ်အဘါ တအိၣ်အါအါလၢၤဘၣ်. တချုးလၢ ပှၤဟဲဖီၣ်အီၤဒံးဘၣ်အနၤန့ၣ် အဝဲတမံဘၣ် ဒီတနၤကျၢၤ ဒီးအသးဘၣ်ဒိဒိၣ်မး. (လူၤကၣ် ၂၂:၄၂-၄၄) ဒီးဖဲနၤအဝဲန့ၣ် ပှၤယူဒၤဖိတဖၣ် မၤဒၢၣ်မၤဆါအီၤ ဒီးလၢခံတဂီၤန့ၣ် ပှၤရိမ့ၤဖိတဖၣ် မၤအၢမၤနးအီၤ. (မးသဲ ၂၆:၆၇, ၆၈; ယိၤဟၣ် ၁၉:၁-၃) လၢတၢ်ဂ့ၢ်သ့ၣ်တဖၣ်အံၤ အဃိ ယ့ၣ်ၡူးသံဝဲချ့ချ့.
တၢ်နၢ်ပၢၢ်ကမၣ်– ယ့ၣ်ၡူးန့ၣ် အဖျါသးအုးထီဘိ.
တၢ်မ့ၢ်တၢ်တီ– လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤမ့ၢ် “ကစၢ်ယွၤလၢ အသးခုတဂၤ.” ဒီးယ့ၣ်ၡူးန့ၣ် အကွၢ်လိမၤဒိးဝဲ အပၢ်အတၢ်ဂ့ၤတၢ်ဝါတဖၣ် ထီဘိ. (၁ တံၤမသ့း ၁:၁၁; ယိၤဟၣ် ၁၄:၉) တကးဒံးဘၣ် ယ့ၣ်ၡူးသိၣ်လိပှၤဂၤလၢ ပှၤကအိၣ်ဒီးတၢ်သးခုအဂီၢ် ပှၤကဘၣ်မၤဒ်လဲၣ်. (မးသဲ ၅:၃-၉; လူၤကၣ် ၁၁:၂၈) အဃိ ပသ့ၣ်ညါဘၣ်လၢ ယ့ၣ်ၡူးန့ၣ် အကဲပှၤလၢ အဖျါသးခုတဂၤ.
တၢ်ဂ့ၤအဂၤလၢ နကဘၣ်သး
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
လံာ်စီဆှံန့ၣ် အမ့ၢ်အတီဧါ
ကစၢ်ယွၤ မ့ၢ်ဒုးအိၣ်ထီၣ်ဝဲ လံာ်စီဆှံ သၢပျၢၤန့ၣ် လံာ်အံၤ ကလီၤဆီန့ၢ်ဒံး လံာ်အဂၤတဖၣ်လီၤ.
ဘၣ်ဃးဒီးပှၤ
တီၣ်ထီၣ်တၢ်ဂ့ၢ် လၢပှၤကလဲၤအိၣ်သကိးနၤအဂီၢ်
တဲသကိး လံာ်စီဆှံ မ့တမ့ၢ် ဃုသ့ၣ်ညါအါထီၣ် ယဟိဝၤပှၤအုၣ်အသးအဂ့ၢ်.