ဘၣ်ဃးဒီး ပှၤကုၢ်ပှၤသံအစိၣ်န့ၣ် လံာ်စီဆှံတဲဝဲဒ်လဲၣ်

အိးထီၣ်

လံာ်စီဆှံတဲဝဲလၢ

ဘၣ်ဃးဒီး ပှၤကုၢ်ပှၤသံအစိၣ် အလုၢ်အလၢ်န့ၣ် လံာ်စီဆှံ တပာ်ဖျါထီၣ်ဝဲ လီၤတံၢ်လီၤဆဲးဘၣ်. ပှၤကဘၣ်ခူၣ်လီၤ ပှၤသံအစိၣ်ဧါ ပှၤကဘၣ်ကုၢ်ဝဲဧါန့ၣ် လံာ်စီဆှံပူၤ တအိၣ်ဘၣ်.

လံာ်စီဆှံ ပာ်ဖျါထီၣ်ဝဲလၢ ကစၢ်ယွၤ အခ့အပှၤ လၢအသးတီတဖၣ် ခူၣ်လီၤပှၤသံအစိၣ်. အဒိ စီၤအၤဘြၤဟၣ် ဂုာ်ကျဲးစၢးဝဲဒ်သိး ပှၤကခူၣ်လီၤ အမါနီၢ်စၤရါ အစိၣ်ဂ့ၤဂ့ၤ.—၁ မိၤၡ့ ၂၃:၂-၂၀; ၄၉:၂၉-၃၂.

လံာ်စီဆှံ ပာ်ဖျါထီၣ်ဝဲလၢ ပှၤတီပှၤလိၤ လၢညါတဖၣ် ကုၢ်ဝဲပှၤသံအစိၣ်. အဒိ ဖဲပှၤအံၣ်စရ့လးဖိ အစီၤပၤစီလူး ဒီးအဖိခွါသၢဂၤန့ၣ် သံဝဲလၢတၢ်ဒုးပျီအခါ အဝဲသ့ၣ်အစိၣ် အိၣ်တ့ၢ်လၢ တၢ်ဒုးပျီအပူၤ. ဒီးဖဲပှၤအံၣ်စရ့လးဖိ လၢအသးတီတဖၣ် နၢ်ဟူဝဲလၢ ဒုၣ်ဒါတဖၣ်မၤဝဲ စီၤစီလူးဒီးအဖိခွါအစိၣ် လၢတၢ်တပာ်ကဲဘၣ်အပူၤခါ အဝဲသ့ၣ် လဲၤဟံန့ၢ်က့ၤဝဲ စီၤစီလူးဒီးအဖိခွါအစိၣ် ဒီးဟဲက့ၤကုၢ်ထီၣ်ဝဲ ဝံၤဒီး အဃံလၢ အအိၣ်တ့ၢ်တဖၣ်န့ၣ် အဝဲသ့ၣ်ခူၣ်လီၤကွံာ်ဝဲ. (၁ ၡမူၤအ့လး ၃၁:၈-၁၃) အဃိ လံာ်စီဆှံ ပာ်ဖျါထီၣ်ဝဲလၢ ပှၤကုၢ် စီၤစီလူးဒီးအဖိခွါသၢဂၤ အစိၣ်ဒ်အံၤန့ၣ် ကြၢးဝဲဘၣ်ဝဲလီၤ.—၂ ၡမူၤအ့လး ၂:၄-၆.

တၢ်နၢ်ပၢၢ်ကမၣ် ဘၣ်ဃးဒီး ပှၤကုၢ်ထီၣ် ပှၤသံအစိၣ်အဂ့ၢ်

တၢ်နၢ်ပၢၢ်ကမၣ်– ပှၤမ့ၢ်ကုၢ်ပှၤသံအစိၣ်န့ၣ် အလီၤဂာ်ဒ်သိးဒီး ပှၤတပာ်ကဲ ပှၤတဂၤန့ၣ် အစိၣ်ဘၣ်.

တၢ်မ့ၢ်တၢ်တီ– လံာ်စီဆှံတဲဝဲလၢ ပှၤမ့ၢ်သံန့ၣ် အကဲထီၣ်ဟီၣ်ခိၣ်ကမူၣ်အဃိ ပှၤသံအစိၣ်န့ၣ် လီၤအုၣ်လီၤကျၣ် ဒီးက့ၤကဲထီၣ်ကဒါက့ၤ ဟီၣ်ခိၣ်ကမူၣ်. (၁ မိၤၡ့ ၃:၁၉) ဘၣ်ဆၣ် မ့မ့ၢ်ပှၤကုၢ်ထီၣ် ပှၤသံအစိၣ်န့ၣ် အကဲထီၣ်ဖၣ်ဆါ မ့တမ့ၢ် ဟီၣ်ခိၣ်ကမူၣ် ချ့န့ၢ်ဒံး ပှၤခူၣ်လီၤပှၤအစိၣ်.

တၢ်နၢ်ပၢၢ်ကမၣ်– လၢပျၢၤန့ၣ် ပှၤလၢကစၢ်ယွၤ မ့ၢ်တဘၣ်သးအီၤတဖၣ်မၣ် ပှၤကုၢ်ထီၣ်အစိၣ်.

တၢ်မ့ၢ်တၢ်တီ– စီၤဧၤကၣ် ဒီးအဟံၣ်ဖိဃီဖိန့ၣ် တအိၣ်ဒီး တၢ်သးတီဘၣ်အဃိ ပှၤကုၢ်အဝဲသ့ၣ်အစိၣ်. (ယိၤၡူ ၇:၂၅) ဘၣ်ဆၣ် တၢ်သိၣ်တၢ်သီ တအိၣ်လၢ ပှၤကဘၣ်မၤဝဲ ဒ်န့ၣ်ဘၣ်, ပှၤကမၤဝဲ ဒ်လဲၣ်ဒ်လဲၣ်န့ၣ် ပှၤဃုထၢဝဲသ့. (၅ မိၤၡ့ ၂၁:၂၂, ၂၃) ဒ်ပသ့ၣ်ညါပာ်စၢၤအသိး ပှၤတီပှၤလိၤ စီၤယိနၤသၣ် လၢအမ့ၢ် စီၤပၤစီလူးအဖိခွါန့ၣ် ပှၤကုၢ်အစိၣ်စ့ၢ်ကီးလီၤ.

တၢ်နၢ်ပၢၢ်ကမၣ်– ပှၤသံအစိၣ်လၢ ပှၤကုၢ်ထီၣ်ဝဲန့ၣ် ကစၢ်ယွၤ မၤသမူထီၣ်ဝဲ တသ့လၢၤဘၣ်.

တၢ်မ့ၢ်တၢ်တီ– ပှၤသံအစိၣ်တဖၣ် ပှၤမ့ၢ်ခူၣ်လီၤဝဲမ့ၢ်ဂ့ၤ, ကုၢ်ဝဲမ့ၢ်ဂ့ၤ, မ့ၢ်လီၤဘျၢလၢ ပီၣ်လဲၣ်ပူၤမ့ၢ်ဂ့ၤ, ဆၣ်ဖိကီၢ်ဖိ မ့ၢ်အီၣ်ကွံာ်ဝဲမ့ၢ်ဂ့ၤ ကစၢ်ယွၤ မၤဂဲၤဆၢထၢၣ် သမူထီၣ်က့ၤဝဲ သ့ခဲလၢာ်လီၤ. (လီၣ်ဖျါ ၂၀:၁၃) သ့တၢ်လၢာ်ကစၢ်န့ၣ် တ့ထီၣ်ကဒါက့ၤ ပှၤတဂၤ အနီၢ်ခိက့ၢ်ဂီၤ သ့ညီညီဖိလီၤ.—၁ ကရံၣ်သူး ၁၅:၃၅, ၃၈.

ပှၤသံအစိၣ်န့ၣ် နကကုၢ်အီၤဧါ နကခူၣ်လီၤကွံာ်အီၤဧါ နကဘၣ်ဆၢတဲာ်ဒ်လဲၣ်

နကခူၣ်လီၤ ပှၤသံအစိၣ်ဧါ နကကုၢ် ပှၤသံအစိၣ်ဧါန့ၣ် ဒ်သိးနဆၢတဲာ်တၢ် ကဘၣ်အဂီၢ် ပကကွၢ်တၢ်ဂ့ၢ် လၢလာ်တဖၣ်အံၤ

ပှၤသံတဂၤအတၢ်အဲၣ်ဒိး. လံာ်စီဆှံ ပာ်ဖျါထီၣ်ဝဲ ဘၣ်ဃးဒီး ပှၤတဂၤ တချုးလၢအသံဒံးဘၣ်အခါ အတဲဆိပာ်စၢၤ အဟံၣ်ဖိဃီဖိလၢ အအဲၣ်ဒိးလၢ ပှၤကမၤအစိၣ်ဒ်လဲၣ်. အဃိ ဖဲအသံဝံၤအလီၢ်ခံ အဟံၣ်ဖိဃီဖိတဖၣ် မၤဝဲဒ်န့ၣ်လီၤ.—၁ မိၤၡ့ ၅၀:၄, ၅; ၂ မိၤၡ့ ၁၃:၁၉.
လီၢ်ကဝီၤအလုၢ်အလၢ်. ညီနုၢ်န့ၣ် ပှၤကမၤ ပှၤသံအစိၣ်ဒ်လဲၣ်န့ၣ် လီၢ်ကဝီၤအလုၢ်အလၢ် အိၣ်ဝဲ. (ယိၤဟၣ် ၁၉:၄၀) အဒိ လၢပျၢၤန့ၣ် လုၢ်လၢ်အိၣ်ဝဲလၢ ပှၤသံန့ၣ် အဝဲသ့ၣ်ခူၣ်လီၤဝဲ. (၁ မိၤၡ့ ၄၉:၃၁; ၁ ၡမူၤအ့လး ၂၈:၃) ဒ်န့ၣ်အသိး ဘၣ်ဃးဒီး တၢ်လဲၤခူၣ်လီၤပှၤသံ မ့တမ့ၢ် တၢ်လဲၤကုၢ်ပှၤသံန့ၣ် လီၢ်ကဝီၤအလုၢ်အလၢ်တဖၣ် မ့ၢ်တထီဒါလိာ်သးဒီး လံာ်စီဆှံ အတၢ်ဟံးစုနဲၣ်ကျဲဘၣ်န့ၣ် ပမၤထွဲအီၤသ့.
ပဒိၣ်ပပှၢ် အတၢ်သိၣ်တၢ်သီ. လံာ်စီဆှံတဲပှၤ လၢပကဘၣ်ဒိကနၣ် ပဒိၣ်ပပှၢ် အတၢ်သိၣ်တၢ်သီ. (ရိမ့ၤ ၁၃:၁) လၢတၢ်လီၢ်တနီၤန့ၣ် ပဒိၣ်ပပှၢ် အတၢ်သိၣ်တၢ်သီ အိၣ်ဝဲလၢ ပှၤကဘၣ်မၤပှၤသံအစိၣ်ဒ်လဲၣ်. အဒိ တၢ်လီၢ်တနီၤန့ၣ် တၢ်သိၣ်တၢ်သီ အိၣ်ဝဲလၢ ပှၤမ့ၢ်သံန့ၣ် ပှၤကဘၣ်ကုၢ်ဝဲ. ဘၣ်ဆၣ် လၢတၢ်လီၢ် အဂၤတနီၤန့ၣ် ပှၤကဘၣ်မၤ ပှၤသံအချါ (ပှၤကုၢ်ပှၤသံဝံၤ အကမူၣ်အိၣ်တ့ၢ်) ဒ်လဲၣ်န့ၣ် တၢ်သိၣ်တၢ်သီအိၣ်ဒံး.
ဆိကမိၣ်န့ၢ်တၢ်လၢ ပှၤဂၤအဂီၢ်. လံာ်စီဆှံတဲပှၤလၢ ပကဘၣ် ဆိကမိၣ်န့ၢ်တၢ်လၢ ပှၤဂၤအဂီၢ်. (ဖံလံးပံၤ ၂:၄) အဃိ ဖဲပဆၢတဲာ်လၢ ပကမၤ ပှၤသံအစိၣ်ဒ်လဲၣ်အခါ ပကဘၣ် ဆိကမိၣ်ထံ တၢ်သံကွၢ် လၢတၢ်ဖီလာ်တဖၣ်အံၤ. ဘၣ်ဃးဒီး ပကခူၣ်လီၤပှၤသံအစိၣ်ဧါ ပကကုၢ်အီၤဧါန့ၣ် အဟံၣ်ဖိဃီဖိ အတၢ်ထံၣ်အိၣ်ဒ်လဲၣ်. ပှၤလၢအခိၣ်အဃၢၤတဖၣ် ထံၣ်ဝဲဒ်လဲၣ်.