ဘၣ်ဃးဒီးနတၢ်အီသံးန့ၣ် နသးသမူတံၤသကိး ဘၣ်ယိၣ်တၢ်ဧါ. မ့မ့ၢ်ဒ်န့ၣ်န့ၣ် ဆိကမိၣ်ကွၢ် တၢ်ဂ့ၢ်တဖၣ်အံၤ.

တၢ်မၤလိတခါအံၤ ကပာ်ဖျါထီၣ်ဝဲ

•  တၢ်အီသံးအါတလၢန့ၣ် ကမၤဘၣ်ဒိ နတၢ်ဆီဟံၣ်ဆီဃီ

•  နကဲပှၤလၢ အစွဲသံးဧါ

•  သ့ၣ်ညါလီၤနသး ဒီးတူၢ်လိာ်လၢ နအိၣ်ဒီးတၢ်ဂံၢ်စၢ်ဘါစၢ်

•  တၢ်လၢနမၤအီၤသ့

 သံးန့ၣ် အမၤဘၣ်ဒိ နတၢ်အိၣ်ဆူၣ်အိၣ်ချ့သ့. နမ့ၢ်အီသံးအါတလၢန့ၣ် နကဲထီၣ် သးတၢ်ဆါ, သူၣ်ဃ့ထီ မ့တမ့ၢ် ခဲစၢၤသ့. ဘၣ်ဆၣ် သံးန့ၣ် အတမၤဘၣ်ဒိထဲ နတၢ်အိၣ်ဆူၣ်အိၣ်ချ့ဘၣ် အမၤဘၣ်ဒိစ့ၢ်ကီး နတၢ်ဆီဟံၣ်ဆီဃီသ့. အဒိ အဒုးအိၣ်ထီၣ် တၢ်စုဆူၣ်ခီၣ်တကး လၢဟံၣ်ပူၤ, ကျိၣ်စ့ တၢ်ကီတၢ်ခဲ, တၢ်အဲၣ်အၢမါ အဲၣ်ဘၢဝၤ ဒီးနီၢ်ဒီမိၢ်ဝၤ မၤလီၤဖးသး.

 လံာ်စီဆှံတဲဝဲလၢ နမ့ၢ်အီသံးအါတလၢန့ၣ် “ကအ့ၣ်နၤ ဒ်ဂုၢ်အသိး ဒီးကပျၢ်လီၤတၢ်စုၣ် ဒ်ဂုၢ်ဘၣ်အၢအသိးလီၤ.” (ကတိၤ ၂၃:၃၂) နကဲပှၤလၢအစွဲသံးဧါ. နကသ့ၣ်ညါလီၤနသးအဂီၢ် သံကွၢ်လီၤနသးဒ်အံၤ.

  နကသ့ၣ်ညါလီၤနသးအဂီၢ် သံကွၢ်လီၤနသးဒ်အံၤ–

•   ဖဲယအီသံးအခါ ယကပတုာ်အဂီၢ် ကီဧါ.

•   ယဆိကမိၣ်ထဲ ယကဘၣ်အီသံး လၢခံတဘျီ ဆံးယံာ်လဲၣ်ဧါ.

•   ခီဖျိလၢယအီသံးအဃိ ယထံၣ်ဘၣ်ဒီးတၢ်ကီတၢ်ခဲလၢ ယတၢ်အိၣ်မူအပူၤ ဒီးလၢယတၢ်ဆီဟံၣ်ဃီအပူၤ သနာ်က့ မ့ၢ်ယအီသံးဒံးဧါ.

•   ယမ့ၢ်တအီဘၣ်သံးဘၣ်န့ၣ် မ့ၢ်ယတူၢ်ဘၣ်လၢ ယအိၣ်တမုာ်ဘၣ်ဧါ.

•   ခီဖျိလၢ ယအီသံးအဃိ ယဘၣ်တဲအါလိာ်သးဒီး ယသးသမူတံၤသကိးဧါ.

•   ယအီသံး အါန့ၢ်ဒံး အပူၤကွံာ် သနာ်က့ ယတမူၤညီညီ လၢၤဘၣ်ဧါ.

•   မ့ၢ်ယအီခူသူၣ်သံး လၢဟံၣ် မ့တမ့ၢ် လၢတၢ်မၤလီၢ်ဧါ.

 နတၢ်အိၣ်သး မ့ၢ်ကဲဒ်သိးဒီး တၢ်သံကွၢ်တဖၣ်အံၤ တခါ မ့တမ့ၢ် အါန့ၢ်ဒံးတခါန့ၣ် လီၤဂာ်လၢ နကဲပှၤလၢ အစွဲသံးလံ.

 မ့ၢ်နသးသမူတံၤသကိး ဘၣ်ယိၣ်တၢ် ဘၣ်ဃးဒီး နတၢ်အီသံးဧါ. မ့မ့ၢ်ဒ်န့ၣ်န့ၣ် ဘၣ်သ့ၣ်သ့ၣ် နကတဲပူၤဖျဲးသး ဒီးထံၣ်အီၤလၢ တဘၣ်နီတမံၤဘၣ်. ဘၣ်သ့ၣ်သ့ၣ် နကပာ်တၢ်ကမၣ် လၢပှၤဂၤ ဒီးနသးသမူ တံၤသကိးအဖီခိၣ် ဒီးနကတဲအဝဲသ့ၣ်လၢ

•   “နမ့ၢ်ရ့ယၤဂ့ၤဂ့ၤန့ၣ် တမ့ၢ်လၢယကအီသံးဘၣ်.”

•   “နမ့ၢ်ထံၣ်ဘၣ် တၢ်ကီတၢ်ခဲလၢ တၢ်မၤအပူၤ ဒ်သိးဒီးယၤန့ၣ် နကအီသံးကၠ့ၤလီၤ.”

•   “ပှၤလၢအအီသံးအါန့ၢ်ယၤန့ၣ် အိၣ်ဒံးဒီဒူၣ်.”

 နမ့ၢ်ဆိကမိၣ်ဒ်န့ၣ်န့ၣ် ဖျါလီၤဂာ်လၢ သံးန့ၣ် အရ့ဒိၣ်န့ၢ်ဒံး နတၢ်ဆီဟံၣ်ဆီဃီဒံး. အဃိ ဆိကမိၣ်ကွၢ် အရ့ဒိၣ် ဖဲလဲၣ်တခါလဲၣ်.

 လံာ်စီဆှံတၢ်ဟံးစုနဲၣ်ကျဲ– “ပိာ်ခွါလၢ အအိၣ်ဒီးအမါန့ၣ် မ့ၢ်လၢအဝဲအဲၣ်ဒိး မၤသးခုအမါအသးအဃိ အဝဲသူၣ်ကိၢ်သးဂီၤတၢ်” လီၤ.—၁ ကရံၣ်သူး ၇:၃၃.

•   ဒိကနၣ် ဒီးဆိကမိၣ်ထံ နသးသမူတံၤသကိး အတၢ်ထံၣ်. နမ့ၢ်တကဲ ပှၤလၢအအီသံးအါ တလၢဘၣ်သနာ်က့ နသးမူတံၤသကိး မ့ၢ်ဘၣ်ယိၣ်တၢ် အါတလၢန့ၣ် နဆီတလဲသး ဒီးမၤဂ့ၤထီၣ် တၢ်အိၣ်သးသ့. နမ့ၢ်တဆီတလဲသး ဒီးဆဲးအီသံး ဒ်အလီၢ်လီၢ်န့ၣ် ကဖျါလၢသံးန့ၣ် အရ့ဒိၣ်န့ၢ်ဒံး နသးသမူတံၤသကိးဒံး.

   လံာ်စီဆှံ အတၢ်ဟံးစုနဲၣ်ကျဲ– “ပတဘၣ်ကွၢ်တၢ်လၢ ပနီၢ်ကစၢ်အဂီၢ်ဘၣ်. ကွၢ်တၢ်လၢ ပှၤဂၤအဂီၢ်တက့ၢ်.”—၁ ကရံၣ်သူး ၁၀:၂၄.

•   ဃုသ့ၣ်ညါ အါထီၣ် တၢ်ဂ့ၢ်တၢ်ကျိၤ. ဒ်သိး ပှၤသုးဖိတဂၤ မၤနၢၤအဒုၣ်အဒါ ကသ့အဂီၢ် အဝဲကဘၣ်သ့ၣ်ညါ အဒုၣ်အဒါ အတၢ်ကူၣ်ထီၣ်ဖးလီၤ. ဒ်န့ၣ်အသိး နကဘၣ် ဃုသ့ၣ်ညါ ဘၣ်ဃးဒီး ပှၤလၢအစွဲသံးန့ၣ် မၤသးဒ်လဲၣ်. ပှၤတဂၤ ကဲထီၣ်ပှၤလၢ အစွဲသံးသ့လၢ ကျဲဒ်လဲၣ်. ဒီးနကဘၣ်ဃုသ့ၣ်ညါ ဘၣ်ဃးဒီး နကဘၣ်ဖၠးသံး ဒ်လဲၣ်. ဒီးနတအီဘၣ်က့ၤအဂီၢ် နကဘၣ်မၤဒ်လဲၣ်. နမ့ၢ်သ့ၣ်ညါ တၢ်ဂ့ၢ်သ့ၣ်တဖၣ်အံၤန့ၣ် အကမၤစၢၤနၤ ဒ်သိးဒီး နတကဲထီၣ် ပှၤလၢအစွဲသံးဘၣ်.

   လံာ်စီဆှံ အတၢ်ဟံးစုနဲၣ်ကျဲ– “ဆဲးဟးဆှဲး တၢ်ဖံးတၢ်ညၣ် အတၢ်သူၣ်လီသးကွံတဖၣ် လၢအဒုးလိာ်သးဒီး သုန့ၣ်တက့ၢ်.”—၁ ပ့းတရူး ၂:၁၁.

•   ဃ့တၢ်မၤစၢၤ. တၢ်အိၣ်ဆူၣ်အိၣ်ချ့ကရၢ ဒီးတၢ်ဆါဟံၣ်လၢ အမၤစၢၤတၢ် ဘၣ်ဃးဒီး ပှၤကဖၠးသံးန့ၣ် အိၣ်ဝဲဒီဒူၣ်, နလဲၤလၢ တၢ်လီၢ်တဖၣ်အံၤသ့. တကးဒံးဘၣ် နဃ့တၢ်မၤစၢၤလၢ နသကိးတဖၣ်အအိၣ်သ့. တဲသကိးတၢ်ဒီး နသကိး ဒ်သိး နကသ့ၣ်ညါလီၤနသးလၢ ဘၣ်မနုၤအဃိ နအီသံး ဒီးဖၠးသံး တန့ၢ်ဘၣ်လဲၣ်. ဒီးဖဲနဘၣ်သးအီသံးအခါ ဃ့နသကိးတဂၤန့ၣ် အတၢ်မၤစၢၤ ဒ်သိး နတက့ၤမၤဘၣ်တၢ် ဒ်လီၢ်လီၢ်တဂ့ၤအဂီၢ်.

   လံာ်စီဆှံ အတၢ်ဟံးစုနဲၣ်ကျဲ– “တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး ဒီးဖဲတၢ်ကိၢ်တၢ်ဂီၤ အိၣ်ဝဲအခါ အကဲထီၣ်ဝဲ နဒီပုၢ်ဝဲၢ်လီၤ.”—ကတိၤ ၁၇:၁၇.

 နကဖၠးသံးအဂီၢ် တမ့ၢ်တၢ်လၢအညီဘၣ်. ထဲဒၣ်နဖးဘၣ်ဃးဒီး တၢ်ဖၠးသံးအဂ့ၢ် ဒီးတဲလၢ နကအီစှၤလီၤန့ၣ် တမ့ၢ်လၢ နဖၠးသံးကန့ၢ် တဘျီဃီဘၣ်. နဘၣ်သ့ၣ်ညါလၢ တၢ်အီသံးအါတလၢန့ၣ် အကမၤဘၣ်ဒိ နတၢ်အိၣ်ဆူၣ်အိၣ်ချ့ တကးဒံးဘၣ် အကမၤဘၣ်ဒိ နတၢ်ဆီဟံၣ်ဆီဃီစ့ၢ်ကီး.

 နမ့ၢ်အဲၣ်ဒိး သ့ၣ်ညါအါထီၣ်န့ၣ် ဖးကွၢ်တၢ်ဂ့ၢ်လၢ တၢ်ဖီလာ်တဖၣ်အံၤ. နကသ့ၣ်ညါဘၣ်လၢ အဝဲသ့ၣ် တအီသံး အါတလၢ လၢၤတဂ့ၤအဂီၢ် အဝဲသ့ၣ်မၤဝဲဒ်လဲၣ်.

 “ယတမ့ၢ်ပှၤသးအၢ ဒ်သိးလၢညါလၢၤဘၣ်”

 “ယတလိၣ် မဲာ်ဆှးလီၤသးလၢၤဘၣ်”

 “ယဘၣ်အိၣ်လၢ ကျဲကပၤ”

 ကွၢ်စ့ၢ်ကီး တၢ်ဂီၤမူ လၢအမ့ၢ်‘ယတအဲၣ်ဒိးအိၣ်မူဒ်သိးလၢညါလၢၤဘၣ်’