လၢဟီၣ်ခိၣ်ဒီဘ့ၣ်န့ၣ် ပှၤလၢအတနၢ်ဟူတၢ်တဖၣ် ကအိၣ်ဝဲ အကကွဲၢ် ၇၀ ညါ. အဝဲသ့ၣ်တဲတၢ်လၢ စုပနီၣ်ကျိာ်. ဒီးစုပနီၣ်ကျိာ်န့ၣ် အိၣ်ဝဲ ၂၀၀ ဘျဲၣ်ညါ. ပှၤလၢအတနၢ်ဟူတၢ်တဖၣ်န့ၣ် အါတက့ၢ် ပှၤတရ့ဒီးအဝဲသ့ၣ် ဂ့ၤဂ့ၤဘၣ်. အဒိ–

•    National Association of the Deaf (U.S.) တဲဝဲလၢ “လၢဟီၣ်ခိၣ်ဒီဘ့ၣ်န့ၣ် ပှၤလၢအတနၢ်ဟူတၢ် ဒီးအနၢ်ဃၢတဖၣ်န့ၣ် ညီနုၢ်န့ၣ် အဝဲသ့ၣ် တအိၣ်ဒီးတၢ်ခွဲးတၢ်ယာ် ဒ်သိးဒီးပှၤဂၤဘၣ်.”

•    World Federation of the Deaf တဲဝဲလၢ “ပှၤတနၢ်ဟူတၢ် လၢအအိၣ်လၢ ထံကီၢ်လၢ အတလဲၤထီၣ်လဲၤထီ အါအါဒံးဘၣ်တဖၣ်အပူၤန့ၣ် ညီနုၢ်အဝဲသ့ၣ် ကဲဝဲပှၤလၢ အဖှီၣ်ဒိၣ်ကတၢၢ်. ဒီးအဝဲသ့ၣ် ကထီၣ်ဘၣ်ကၠိ, ကန့ၢ်ဘၣ်တၢ်ဖံးတၢ်မၤ ဒီးကန့ၢ်ဘၣ် တၢ်ဂ့ၢ်တၢ်ကျိၤအဂီၢ် တညီဝဲဘၣ်.”

 ပှၤလၢအတနၢ်ဟူတၢ်တဖၣ် ယဟိဝၤယွၤ ထံၣ်အဝဲသ့ၣ်ဒ်လဲၣ်. ဘၣ်ဃးဒီး ပှၤတနၢ်ဟူတၢ်ဘၣ်န့ၣ် လံာ်စီဆှံတဲဝဲဒ်လဲၣ်. မုၢ်မဆါတနံၤအံၤ ယဟိဝၤပှၤအုၣ်အသးတဖၣ် မၤစၢၤဝဲ ပှၤတနၢ်ဟူတၢ်တဖၣ်ဒ်လဲၣ်.

ကစၢ်ယွၤထံၣ်ဝဲ ပှၤလၢအတနၢ်ဟူတၢ်ဘၣ်တဖၣ် ဒ်လဲၣ်

 လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤ a သူၣ်အိၣ်သးအိၣ်ဝဲ ပှၤလၢအတနၢ်ဟူတၢ်ဘၣ်တဖၣ်. ဒီးကစၢ်ယွၤအဲၣ်ဒိးလၢ ပှၤကရ့အဝဲသ့ၣ် ဂ့ၤဂ့ၤ ဒီးအဝဲသ့ၣ် ကမၤလိဘၣ် တၢ်သိၣ်လိနဲၣ်လိလၢ ကစၢ်ယွၤ ကတဲာ်ကတီၤဝဲတဖၣ်.

 လံာ်စီဆှံဆၢ– “သုတဘၣ်ဆိၣ်အၢ ပှၤလၢ အတနၢ်ဟူတၢ်တဂ့ၤ.”—၃ မိၤၡ့ ၁၉:၁၄.

 လံာ်စီဆှံဆၢ– “ကစၢ်ယွၤ တကွၢ်ဒိၣ်ဆံး အါစှၤတၢ်ဘၣ်.”—မၤတၢ် ၁၀:၃၄.

 လံာ်စီဆှံဆၢ– “ယ့ၣ်ၡူးလဲၤ . . . ဒီးစံၣ်တဲၤတဲလီၤ ဘီမုၢ်တၢ်သးခုကစီၣ်လီၤ.”—မးသဲ ၉:၃၅.

 လံာ်စီဆှံဆၢ– ယ့ၣ်ၡူး “ဒုးနၢ်ဟူထီၣ်က့ၤ ပှၤလၢ အတနၢ်ဟူတၢ်တဖၣ် ဒီးအဝဲဒုးတဲထီၣ်က့ၤ ပှၤလၢ အတဲတၢ်တသ့ဘၣ်တဖၣ်လီၤ.”—မၢ်ကူး ၇:၃၇.

 လံာ်စီဆှံဆၢ– “ပှၤလၢ အတနၢ်ဟူတၢ်ဘၣ်န့ၣ် ကနၢ်ဟူထီၣ်က့ၤတၢ်.”—ယၡါယၤ ၃၅:၅.

 အခီပညီ– ယဟိဝၤယွၤ တဲဆိပာ်စၢၤဝဲလၢ ပှၤလၢတနၢ်ဟူတၢ်ဘၣ်န့ၣ် ကနၢ်ဟူထီၣ်က့ၤတၢ်.—ယၡါယၤ ၂၉:၁၈.

ဆၢကတီၢ်ခဲအံၤ ယဟိဝၤပှၤအုၣ်အသးတဖၣ် မၤစၢၤပှၤလၢ အတနၢ်ဟူတၢ်တဖၣ်ဒ်လဲၣ်

 လၢဟီၣ်ခိၣ်ဒီဘ့ၣ်န့ၣ် ပဝဲယဟိဝၤပှၤအုၣ်အသးတဖၣ် တဲဘၣ်ဝဲ ပှၤလၢအတနၢ်ဟူတၢ်တဖၣ်လၢ ကစၢ်ယွၤ အတၢ်အၢၣ်လီၤလၢ အဟ့ၣ်အဝဲသ့ၣ် တၢ်မုၢ်လၢ်. ပစံၣ်တဲၤတဲလီၤ အဝဲသ့ၣ် ဒ်လဲၣ်. ပထုးထီၣ် လံာ်စီဆှံ ဒီးတၢ်ဂီၤမူ လၢပှၤကမၤလိလံာ်စီဆှံအဂီၢ် လၢစုပနီၣ်ကျိာ်န့ၣ် ကအိၣ်ဝဲ အကျိာ် ၁၀၀ ဘျဲၣ်ညါ. ပသိၣ်လိ ပှၤဂၤလၢ လံာ်စီဆှံ ဒီးအိၣ်ဒီးတၢ်အိၣ်ဖှိၣ်လၢ စုပနီၣ်ကျိာ်စ့ၢ်ကီး. ပဒုးအိၣ်ထီၣ် စုပနီၣ်ကျိာ် တၢ်ရဲၣ်တၢ်ကျဲၤတဖၣ်အံၤ လၢပှၤလၢအအဲၣ်ဒိးသ့ၣ်ညါ ကစၢ်ယွၤအဂ့ၢ်အဂီၢ် ဒီးပတဃ့ အဝဲသ့ၣ်အပှ့ၤဘၣ်. မ့ၢ်လၢ ယ့ၣ်ၡူးတဲဝဲလၢ “သုန့ၢ်ဘၣ်ကလီတၢ်အဃိ ဟ့ၣ်ကလီတၢ်တက့ၢ်” အဃိ ပမၤဒ်န့ၣ်လီၤ.—မးသဲ ၁၀:၈.

 နလဲၤလၢ အဲး (app) လၢတၢ်ဖီလာ်တဖၣ်အံၤ ဒီးနကွၢ်တၢ်ဂ့ၢ်တၢ်ကျိၤတဖၣ်အံၤ လၢအ့ထၢၤနဲၣ် အပူၤ မ့တမ့ၢ် နဒီလိးအီၤလၢ အံၣ်လဲးထြီနံး တၢ်ပီးတၢ်လီအပူၤသ့.

 JW.ORG. လၢပှာ်ယဲၤသန့ (ဝဲးပဆဲး) အံၤအပူၤန့ၣ် နဃုထၢ စုပနီၣ်ကျိာ် လီၤလီၤဆီဆီတခါ လၢနအဲၣ်ဒိးဃုအီၤသ့.

 JW Library Sign Language app. ဒီလိး အဲး တခါအံၤ. နဒီလိး အဲးအံၤ မ့ၢ်ဝံၤန့ၣ် နဒီလိး မ့တမ့ၢ် နကွၢ် တၢ်ဂီၤမူလၢ စုပနီၣ်ကျိာ် လၢအဲးအံၤအပူၤသ့.

ဒ်သိး ပှၤကနၢ်ပၢၢ် လံာ်စီဆှံအဂီၢ် ပဒုးအိၣ်ထီၣ် တၢ်မနုၤတဖၣ်လဲၣ်

 လံာ်စီဆှံ လၢစုပနီၣ်ကျိာ်. လၢဟီၣ်ခိၣ်ဒီဘ့ၣ်န့ၣ် ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ လၢအမဲရကၤ စုပနီၣ်ကျိာ်န့ၣ် မ့ၢ်ဝဲစုပနီၣ်ကျိာ် အလံာ်စီဆှံ အဆိကတၢၢ်တဘ့ၣ် လၢပှၤကွဲးကျိာ်ထံဝဲဝံၤ. ခဲအံၤပဒိးန့ၢ်ဘၣ် ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ လၢစုပနီၣ်ကျိာ် ဒီတဘ့ၣ်မ့ၢ်ဂ့ၤ လၢအကတြူၢ်တနီၤမ့ၢ်ဂ့ၤ သ့ဝဲလၢ ကျိာ်အါမး. ဒီးတနံၣ်ဘၣ်တနံၣ်န့ၣ် ပှၤကွဲးကျိာ်ထံအီၤလၢ စုပနီၣ်ကျိာ်လၢအဂၤ အိၣ်အါထီၣ်ဝဲ. (နမ့ၢ်အဲၣ်ဒိး သ့ၣ်ညါဘၣ်ဃး ပှၤကွဲးကျိာ်ထံဝဲ ဝံၤလၢကျိာ်မနုၤတဖၣ်လဲၣ် မ့တမ့ၢ် နမ့ၢ်အဲၣ်ဒိးကွၢ် လံာ်စီဆှံလၢ online န့ၣ် ကွၢ်တၢ်လွံၢ်နၢၣ် လၢအမ့ၢ် “ ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ လၢ စုပနီၣ်ကျိာ်.”)

•    နမ့ၢ်အဲၣ်ဒိး သ့ၣ်ညါဘၣ်ဃးဒီး ပှၤထုးထီၣ် လံာ်စီဆှံလၢ စုပနီၣ်ကျိာ် ဒ်လဲၣ်န့ၣ် ကွၢ်တၢ်ဂီၤမူလၢအမ့ၢ် The Complete New World Translation Is Available in ASL.

•    နမ့ၢ်အဲၣ်ဒိး ကၠီးလိသးလၢ တၢ်ဖးလံာ်စီဆှံလၢ စုပနီၣ်ကျိာ်န့ၣ် ဒီလိး JW Library Sign Language app လၢ အဲးအံၤအပူၤန့ၣ် နဃုထၢ လံာ်စီဆှံ အဆၢဖိတဖၣ်လၢ စုပနီၣ်ကျိာ် လၢနအဲၣ်ဒိးဖးအီၤသ့.

•    ဘံထၤ ဒီးဒမံထြိၤန့ၣ် မ့ၢ်ဝဲ မိပါလၢ အတနၢ်ဟူတၢ်ဘၣ် ဘၣ်ဆၣ် အဖိတဖၣ်န့ၣ် နၢ်ဟူတၢ်. ဃုသ့ၣ်ညါ ဘၣ်ဃးဒီး အဝဲသ့ၣ် အဟံၣ်ဖိဃီဖိ ဖးလံာ်စီဆှံလၢ စုပနီၣ်ကျိာ် ကိးနံၤဒဲးအဃိ အဒိးန့ၢ်ဘၣ် အဘျုးဒ်လဲၣ်.

 တၢ်ဂီၤမူလၢ အသိၣ်လိပှၤ လံာ်စီဆှံတဖၣ်. ယဟိဝၤပှၤအုၣ်အသးတဖၣ် ထုးထီၣ်တၢ်ဂီၤမူလၢ စုပနီၣ်ကျိာ် ဒ်သိးကမၤစၢၤ ပှၤဂၤလၢကနၢ်ပၢၢ် ဒီးမၤထွဲဝဲ လံာ်စီဆှံ အတၢ်ဟံးစုနဲၣ်ကျဲအဂီၢ်. ဒီးတၢ်ဂီၤမူတဖၣ်အံၤ ကမၤစၢၤဝဲ ပှၤလၢတၢ်ဖီလာ်တဖၣ်အံၤ–

•    ပှၤဒီမိၢ်ဝၤ ဒီးဟံၣ်ဖိဃီဖိ

•    ပှၤဒိၣ်ထီၣ်သီ ဒီးပှၤသးစၢ်တဖၣ်

•    ဖိသၣ်

 တၢ်မၤလိသကိး လံာ်စီဆှံဒီး ပှၤတဂၤ. မၤလိလံာ်စီဆှံဒီး ပှၤတဂၤလၢ စုပနီၣ်ကျိာ် ဒ်နတၢ်ဆၢကတီၢ် အိၣ်ဝဲအသိး. ပအိၣ်ဒီး တၢ်မၤလိလံာ်စီဆှံ တၢ်ရဲၣ်တၢ်ကျဲၤ လၢတလိၣ်ဟ့ၣ်စ့ဘၣ်. ပှၤမၤအီၤဒ်လဲၣ်န့ၣ် မၢပှၤမၤပၠးနၤ.

 ကၠ့စၢၤ စံနၤဟိနၤန့ၣ် အိၣ်လၢ ကီၢ်ဖံးလံးပံ. ဃုသ့ၣ်ညါ ဘၣ်ဃးဒီး ဒ်သိး ကၠ့စၢၤ စံနၤဟိနၤ ကအိၣ်ဒီးတၢ်ရ့လိာ်သးဒီး ကစၢ်ယွၤဘူးဘူးတံၢ်တံၢ်အဂီၢ် တၢ်မၤလိလံာ်စီဆှံ မၤစၢၤအီၤဒ်လဲၣ်.

 မၤရံၤအိၤ အဲၤထိၤနံၤ န့ၣ်မ့ၢ်ဝဲ တၢ်အိၣ်ဖှိၣ်သရၣ်လၢ ဟီၣ်ဒူရး. ဃုသ့ၣ်ညါ ဘၣ်ဃးဒီး အဝဲဃုထံၣ်န့ၢ်ဝဲ အတၢ်သံကွၢ်တဖၣ် အတၢ်စံးဆၢ လၢလံာ်စီဆှံပူၤဒ်လဲၣ်အဂ့ၢ်. အတၢ်လဲၤခီဖျိ အခိၣ်တီမ့ၢ်ဝဲ “ယတၢ်သံကွၢ် အိၣ်အါန့ၢ်ဒံး ယတၢ်စံးဆၢတဖၣ်.”

 တၢ်အိၣ်ဖှိၣ် ဒီးတၢ်အိၣ်ဖှိၣ်လီၤဆီတဖၣ်. လၢဟီၣ်ခိၣ်ဒီဘ့ၣ်န့ၣ် ပအိၣ်ဒီး စုပနီၣ်ကျိာ် တၢ်အိၣ်ဖှိၣ်တဖၣ် ဒီးကရူၢ်တဖၣ်. ဖဲန့ၣ်န့ၣ် ပှၤလၢတနၢ်ဟူတၢ်တဖၣ် မၤလိလံာ်စီဆှံ ဒီးဘူၣ်ထီၣ်ဘါထီၣ်တၢ် ကိးနွံဒဲး. ဒီးတနံၣ်ဘၣ်တနံၣ်န့ၣ် ပအိၣ်ဒီး တၢ်အိၣ်ဖှိၣ်လီၤဆီ လၢစုပနီၣ်ကျိာ် ဒ်သိး ပှၤကနၢ်ပၢၢ်အါထီၣ် လံာ်စီဆှံအဂီၢ်. ဒီးလၢတၢ်အိၣ်ဖှိၣ်န့ၣ် ပှၤလၢအကျိာ်ထံန့ၢ်တၢ်လၢ ပှၤတနၢ်ဟူတၢ် ဒီးတထံၣ်တၢ်တဖၣ်အဂီၢ် အိၣ်ဝဲစ့ၢ်ကီး. ပအိၣ်ဒီး လံာ်လဲၢ်လၢ အဝဲသ့ၣ်အဂီၢ်အါမး ဒီးပှၤဟံးန့ၢ်ဖးအီၤသ့ ဒီးတလိၣ်ဟ့ၣ်စ့ဘၣ်.

•    ဃုတၢ်အိၣ်ဖှိၣ်လီၢ် လၢအဘူးဒီးနၤ.

•    ဃုသ့ၣ်ညါ ဘၣ်ဃးဒီး တနံၣ်တဘျီ တၢ်အိၣ်ဖှိၣ်ဖးဒိၣ် ဒီးကဝီၤအတၢ်အိၣ်ဖှိၣ်တဖၣ်အဂ့ၢ်.

•    လဲၤထီၣ် တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး လၢအမ့ၢ် တၢ်အိၣ်ဖှိၣ်လၢ အရ့ဒိၣ်ကတၢၢ်လၢ ဒီတနံၣ်ကျၢၤအတီၢ်ပူၤ.

 ဟိၤစ့ လူဝံး အၤယ့လၤ လၢအအိၣ်လၢ မဲးကစံၣ်ကိၣ်န့ၣ် အဝဲတနၢ်ဟူတၢ်ဘၣ်လၢ အအိၣ်ဖျဲၣ်ခါလံၤလံၤ ဒီးလၢခံန့ၣ် အဝဲတထံၣ်တၢ်လၢၤဘၣ်. ဖးကွၢ်ဘၣ်ဃးဒီး ဒ်သိး ဒီပုၢ်ဝဲၢ် ဟိၤစ့ လူဝံး အၤယ့လၤ သိၣ်လိပှၤဂၤ လံာ်စီဆှံ ကသ့ဂ့ၤဂ့ၤအဂီၢ် အဝဲန့ၢ်ဘၣ် တၢ်မၤစၢၤဒ်လဲၣ်.