အိၣ်ပလီၢ်သးထီဘိ
ခရံာ်ဖိတဖၣ် ဒီးတၢ်ဒုးတၢ်ယၤ—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်
ဒ်ပထံၣ်ဘၣ်အသိး ဖဲတၢ်ဒုး ကဲထီၣ်လၢ ကီၢ်ယူၣ်ခြ့ အခါ ခရံာ်ဖိတၢ်ဘူၣ်တၢ်ဘါခိၣ်နၢ်တဖၣ် ဟ့ၣ်ဂံၢ်ဟ့ၣ်ဘါပှၤဂၤ ဒ်သိး ကဆီၣ်ထွဲဝဲ သုးတဖုဖု. အဃိ ပထံၣ်ဘၣ်လၢ ခရံာ်ဖိ တၢ်ဘူၣ်တၢ်ဘါခိၣ်နၢ်တနီၤန့ၣ် ဆီၣ်ထွဲဝဲ သုးဖိလၢအံၤတဖု ဒီးအဂၤတနီၤန့ၣ် ဆီၣ်ထွဲဝဲသုးဖိလၢအဂၤတဖု.
ဖဲ ၂၀၂၂, လါမၢ်ၡး ၁၆ လၢ ယရူၤၡလ့ၣ် တၢ်ကစီၣ် အပူၤန့ၣ် Metropolitan Epiphanius I of Kyiv တဲဝဲလၢ “သုဝဲကီၢ်ယူၣ်ခြ့သုးဖိတဖၣ်န့ၣ် သုဒီသဒၢလီၤ သုပှၤကလုာ်လၢ ဒုၣ်ဒါတဖၣ် အစုပူၤအဃိ ပပာ်လုၢ်ပာ်ပှ့ၤသု ဒီးစံးဘျုးဘၣ်သုဒိၣ်မး . . . ပအိၣ်လၢသုအိၣ်တခီ, ပဃ့ထုကဖၣ်လၢသုဂီၢ် ဒီးဆီၣ်ထွဲသုထီဘိ.”
၂၀၂၂, လါအ့ဖြ့ၣ် ၃, ရီထၢၤ အတၢ်ကစီၣ် ပာ်ဖျါထီၣ်ဝဲလၢ ‘ဖဲကီၢ်ရၢၡါ ဒုးဝဲကီၢ်ယူၣ်ခြ့အခါ ရၢၡါ အီသဒီးခရံာ်ဖိ အခိၣ်အနၢ် မၤဝဲတၢ်အိၣ်ဖှိၣ်လီၤလီၤဆီဆီလၢ ကီၢ်ရၢၡါအသုးဖိတဖၣ်အဂီၢ် ဖဲမုၢ်အိၣ်ဘှံးနံၤ. ဒီးအဟ့ၣ်ဂံၢ်ဟ့ၣ်ဘါ ပှၤသုးဖိတဖၣ်လၢ ကဒီသဒၢဝဲ အထံအကီၢ် လၢအဂ့ၤကတၢၢ်.’
ခရံာ်ဖိတဖၣ် ကြၢးပၣ်ဃုာ်လၢ တၢ်ဒုးတၢ်ယၤဧါ, တကြၢးပၣ်ဃုာ်ဧါန့ၣ် လံာ်စီဆှံတဲဝဲဒ်လဲၣ်.
လံာ်စီဆှံတဲဝဲလၢ
လံာ်စီဆှံတဲဝဲလၢ ပှၤလၢအပိာ်ခရံာ်အခံနီၢ်ကီၢ်န့ၣ် အဝဲသ့ၣ်တဒုးတၢ်ဘၣ်.
“ဒၢနုာ်လီၤက့ၤ နနးလၢအလီၢ်တက့ၢ်. ကယဲၢ်ပှၤလၢ အဟံးထီၣ်နးန့ၣ် ကသံလၢနးလီၤ.”—မးသဲ ၂၆:၅၂.
ပှၤတဂၤ မ့ၢ်ဆီၣ်ထွဲဝဲတၢ်ဒုး မ့တမ့ၢ် မ့ၢ်ဒုးတၢ်န့ၣ် ပတဲလၢ အကနၣ် ယ့ၣ်ၡူးအကလုၢ် ကသ့ဧါ.
“ယဟ့ၣ်သု တၢ်မၤလိာ် အသီတထံၣ်လၢ အဲၣ်လိာ်သုသး တဂၤဒီးတဂၤတက့ၢ်. ဒ်ယအဲၣ်သုအသိးန့ၣ် သုဝဲစ့ၢ်ကီး အဲၣ်လိာ်သုသး တဂၤဒီးတဂၤတက့ၢ်. သုမ့ၢ် အဲၣ်လိာ်ကွံလိာ် သုသးကဒဲကဒဲန့ၣ် ပှၤခဲလၢာ် ကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်လီၤ.”—ယိၤဟၣ် ၁၃:၃၄, ၃၅.
ပှၤတဂၤ မ့ၢ်ဆီၣ်ထွဲဝဲ တၢ်ဒုးတၢ်ယၤန့ၣ် ပတဲလၢ အပာ်ဖျါထီၣ်ဝဲ တၢ်အဲၣ်လၢ ယ့ၣ်ၡူးအပျဲၢ်အဘီၣ်တဖၣ် ပာ်ဖျါထီၣ်ဝဲန့ၣ် ကသ့ဧါ.
ဒ်သိး နကသ့ၣ်ညါအါထီၣ် တၢ်ဂ့ၢ်အဂီၢ် ဖးကွၢ်တၢ်ဂ့ၢ်လၢ အခိၣ်တီမ့ၢ်ဝဲ “ခရံာ်ဖိတဖၣ် ကြၢးဒုးတၢ်ဧါ.”
ခရံာ်ဖိတဖၣ် ဒီးတၢ်ဒုးတၢ်ယၤ လၢပစိၤခဲအံၤ
ပမ့ၢ်တဲလၢ ခရံာ်ဖိတဖၣ် တဘၣ်ပၣ်ဃုာ်လၢ တၢ်ဒုးတၢ်ယၤဘၣ်န့ၣ် မ့ၢ်အကဘၣ်ဧါ. လံာ်စီဆှံ တဲဆိပာ်စၢၤဝဲလၢ “ဖဲမုၢ်နံၤခံကတၢၢ်တဖၣ်” လၢအကဲဝဲ ပစိၤခဲအံၤန့ၣ် ပှၤကလုာ်လၢ အ “တမၤလိအသး လၢတၢ်ဒုးလၢၤဘၣ်” န့ၣ်ကအိၣ်ဝဲ. အဝဲသ့ၣ် ဒိကနၣ်ဝဲ ယ့ၣ်ၡူးအတၢ်သိၣ်လိ.—ယၡါယၤ ၂:၂, ၄.
ဒ်သိး နကသ့ၣ်ညါအါထီၣ် တၢ်ဂ့ၢ်အဂီၢ် ဖးကွၢ်တၢ်ဂ့ၢ်လၢ အခိၣ်တီမ့ၢ်ဝဲ “ဘၣ်ဃးဒီး တၢ်ဒုးတၢ်ယၤန့ၣ် ကစၢ်ယွၤထံၣ်ဝဲဒ်လဲၣ်” လၢတၢးထီခိးတၢ်အပူၤ.
တယံာ်လၢၤဘၣ်န့ၣ် ယဟိဝၤယွၤ a လၢအမ့ၢ် “ကစၢ်လၢအဟ့ၣ်လီၤ တၢ်သူၣ်မံသးမုာ်” တဂၤန့ၣ် ကသူဝဲ အဘီမုၢ်လၢမူခိၣ် ဒ်သိး ကမၤပူၤဖျဲးဝဲ ပှၤလၢအဘၣ် “တၢ်ဆီၣ်တံၢ်မၤနၢၤ ဒီးတၢ်မၤဆူၣ်မၤစိး” အီၤတဖၣ်.—ဖံလံးပံၤ ၄:၉; စံးထီၣ်ပတြၢၤ ၇၂:၁၄.
ဒ်သိးနကသ့ၣ်ညါအါထီၣ်အဂီၢ် ကွၢ်တၢ်ဂီၤမူလၢအမ့ၢ် ယွၤအဘီအမုၢ်န့ၣ်မ့ၢ်မနုၤလဲၣ်.
a ယဟိဝၤန့ၣ် မ့ၢ်ဝဲ ကစၢ်ယွၤအမံၤ.—စံးထီၣ်ပတြၢၤ ၈၃:၁၈.