ခီဖျိလၢ တၢ်ဒုးကဲထီၣ်လၢ ကီၢ်ယူၣ်ခြ့ ဒီးမူခိၣ်ကလံၤသီၣ်ဂီၤ တဘၣ်လီၢ်ဘၣ်စးဘၣ်အဃိ လၢဟီၣ်ခိၣ်ဒီဘ့ၣ်န့ၣ် ပှၤထုးထီၣ်တၢ်အီၣ်တၢ်အီ တန့ၢ်ဒ်သိး လၢညါလၢၤဘၣ်. လီၤဆီဒၣ်တၢ် ထံကီၢ်လၢ အတလဲၤထီၣ်လဲၤထီ အါအါဒံးဘၣ်န့ၣ် အကီဒိၣ်ထီၣ်လၢ အဝဲသ့ၣ် ကဒိးန့ၢ်ဘၣ် တၢ်အီၣ်တၢ်အီ လၢလၢလီၢ်လီၢ်.

•   ဖဲ လါယူၤလံ ၁၇, ၂၀၂၃ န့ၣ် ဘီမုၢ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ် အဲၤထိနံၤယိၤ ကူထါရဲၤ တဲဝဲလၢ “ခီဖျိလၢ တၢ်ထီဒုၣ်ထီဒါလိာ်သး, မူခိၣ်ကလံၤသီၣ်ဂီၤ တဘၣ်လီၢ်ဘၣ်စးဘၣ်, မ့ၣ်အူလဲထီၣ် ဒီးတၢ်ဂ့ၢ်အဂၤတဖၣ်အဃိ ပှၤထုးထီၣ်တၢ်အီၣ် န့ၢ်စှၤလီၤ ဒီးတၢ်အီၣ်တအိၣ် ဒ်သိးဒီးလၢညါလၢၤဘၣ်.”

•   ဖဲ လါယူၤလံ ၂၃, ၂၀၂၃ န့ၣ် Atalayar.com ပာ်ဖျါထီၣ်ဝဲလၢ “ကီၢ်ရၢၡါ တမၤသကိးတၢ် ဒ်သိး ပှၤကဆှၢဟးထီၣ်ဘုလၢ ကီၢ်ယူၣ်ခြ့အပူၤလၢၤဘၣ်. အဃိ ပှၤကူၣ်ဘၣ်ကူၣ်သ့တဂၤ တဲဝဲလၢ ခီဖျိလၢ တၢ်ဂ့ၢ်တခါအံၤအဃိ တၢ်အီၣ်တၢ်အီ အပှ့ၤကဒိၣ်ထီၣ် နးန့ၢ်အလီၢ် ဒီးထံကီၢ်လၢ အဖှီၣ်တဖၣ် လီၤဆီဒၣ်တၢ် ကလံၤစိး အၤဖြံၤကၤ ဒီးမုၢ်ထီၣ်တၢ်ခၢၣ်သးလီၢ်ကဝီၤန့ၣ် တၢ်အီၣ်တၢ်အီ အပှ့ၤကဒိၣ်ထီၣ်ဒိၣ်မး.”

 ဘၣ်ဃးဒီး တၢ်အီၣ်တၢ်အီ ကကၤထီၣ် ဒီးခါဆူညါ တၢ်ကမၤအသးဒ်လဲၣ်န့ၣ် လံာ်စီဆှံ တဲဝဲဒ်လဲၣ်.

•   ယ့ၣ်ၡူး တဲဆိပာ်စၢၤဝဲလၢ “ပှၤကလုာ် တဒူၣ်ဒီးတဒူၣ် ကဒုးလိာ်အသး ဒီးဘီမုၢ်တဘ့ၣ်ဒီးတဘ့ၣ် ကဒုးလိာ်အသးလီၤ. တၢ်သၣ်ဝံၤလီၤဒိ ကအိၣ်ထီၣ်ဝဲ.”—မးသဲ ၂၄:၇.

•   လံာ်လီၣ်ဖျါ ပာ်ဖျါထီၣ်ဝဲ ပှၤဒိးကသ့ၣ် လွံၢ်ဂၤအဂ့ၢ်. ပှၤဒိးကသ့ၣ် လွံၢ်ဂၤအကျါ တဂၤန့ၣ် ဒိလီၤဝဲ တၢ်ဒုးတၢ်ယၤ. ဝံၤဒီး ပှၤဒိးကသ့ၣ်လၢ အဂၤတဒုန့ၣ် ဒိလီၤဝဲ တၢ်သၣ်ဝံၤလီၤဒိ လၢအမ့ၢ်ဝဲ တၢ်အီၣ်တၢ်အီကၤ ဒီးတၢ်အပှ့ၤဒိၣ်ထီၣ်ဒိၣ်မး. လံာ်စီဆှံ တဲဝဲလၢ “ယထံၣ် ကသ့ၣ်သူတဒု ဒီးပှၤလၢအဒိးအီၤတဂၤန့ၣ် စိာ်ဝဲဒီးစီၤပီၢ်လီၤ. ယနၢ်ဟူတၢ်လၢ အလီၤဂာ်ဒီးတၢ်အကလုၢ် ဟဲသီၣ်ထီၣ် . . . ဒီးအတဲဝဲလၢ ‘ဘုကၠူၣ်တသလိး လၢစ့ဒန့ၤရံၤတဘ့ၣ် အဂီၢ် ဒီးဘုမုယီၤသၢသလိးလၢ စ့ဒန့ၤရံၤတဘ့ၣ်အဂီၢ်လီၤ. ဒီးတဘၣ်ပျဲ သ့ၣ်စၤယံးအသိ ဒီးစပံးထံတဖၣ် လၢာ်ကွံာ်တဂ့ၤ.’”—လီၣ်ဖျါ ၆:​၅, ၆.

 ဝံအတၢ်စံးပာ်လၢ ဘၣ်ဃးဒီး တၢ်အီၣ်တၢ်အီ ကကၤထီၣ်အဂ့ၢ်န့ၣ် လၢထီၣ်ပှဲၤထီၣ်ဝဲလၢ “မုၢ်နံၤခံကတၢၢ်တဖၣ်” လၢအမ့ၢ် ပစိၤခဲအံၤ. (၂ တံၤမသ့း ၃:၁) ဒ်သိး နကသ့ၣ်ညါအါထီၣ် တၢ်ဂ့ၢ်ဘၣ်ဃးဒီး “မုၢ်နံၤခံကတၢၢ်တဖၣ်” ဒီးပှၤဒိးကသ့ၣ် လွံၢ်ဂၤလၢလံာ်လီၣ်ဖျါ တဲဝဲအဂီၢ် ကွၢ်တၢ်ဂီၤမူလၢအမ့ၢ် “ဟီၣ်ခိၣ်တၢ်အိၣ်သး ဆီတလဲအသး စးထီၣ်လၢ ၁၉၁၄ နံၣ်လံၤလံၤလံ” ဒီးဖးကွၢ်တၢ်ဂ့ၢ် လၢအမ့ၢ် “ပှၤဒိးကသ့ၣ်လွံၢ်ဂၤန့ၣ် လံာ်စီဆှံဒိလီၤဝဲလၢ မနုၤလဲၣ်”

•   ဒ်သိး ပလဲၤခီဖျိ တၢ်အိၣ်သးလၢ အကီအခဲတဖၣ်, တၢ်အီၣ်တၢ်အီ အပှ့ၤဒိၣ်ထီၣ် ဒီးတၢ်သၣ်ဝံၤလီၤဒိ ကန့ၢ်အဂီၢ် လံာ်စီဆှံ ပာ်ဖျါထီၣ်ဝဲ တၢ်ဟ့ၣ်ကူၣ်လၢအဂ့ၤဒိၣ်မးတဖၣ်. အဒိ, ဖးကွၢ် တၢ်ဂ့ၢ်လၢအမ့ၢ် “ပတၢ်မ့ၢ်တအိၣ်အါအါဘၣ်န့ၣ် ပကဘၣ်မၤဒ်လဲၣ်.”

•   လံာ်စီဆှံ ဟ့ၣ်ပှၤတၢ်မုၢ်လၢ် လၢခါဆူညါန့ၣ် တၢ်အိၣ်သးကဂ့ၤထီၣ်. လံာ်စီဆှံ အၢၣ်လီၤဝဲလၢ “လၢဟီၣ်ခိၣ်ချၢန့ၣ် ဘုကအါဟုကအါဝဲ” ဒီးပှၤကိးဂၤဒဲး ကဒိးန့ၢ်ဘၣ် တၢ်အီၣ်အါအါဂီၢ်ဂီၢ်. (စံးထီၣ်ပတြၢၤ ၇၂:၁၆) နမ့ၢ်အဲၣ်ဒိး သ့ၣ်ညါအါထီၣ် တၢ်မုၢ်လၢ်လၢ ခါဆူညါအံၤအဂ့ၢ် ဒီးဘၣ်မနုၤအဃိ နနာ်န့ၢ် တၢ်ဂ့ၢ်အံၤ သ့လဲၣ်န့ၣ် ဖးကွၢ်တၢ်ဂ့ၢ် လၢအမ့ၢ် “တၢ်မုၢ်လၢ်လၢ ကဟဲလၢပှဲၤထီၣ်နီၢ်ကီၢ် လၢခါဆူညါအဂီၢ်.”