လၢဟီၣ်ခိၣ်ချၢန့ၣ်​ တၢ်မၤဆူၣ်မၤစိးတဖၣ်​ အိၣ်အါမး ဒီးတၢ်မၤဆူၣ်မၤစိးတနီၤန့ၣ်​ မ့ၢ်တၢ်မၤပျံၤမၤဖုး ပှၤဂၤဒ်သိး ကဒုးအိၣ်ထီၣ်​ တၢ်ဆီတလဲလၢ ထံဂ့ၢ်ကီၢ်ဂ့ၢ် မ့တမ့ၢ် တၢ်ဘူၣ်တၢ်ဘါ တကပၤ. ဖဲနထံၣ်ဘၣ်​ တၢ်မၤဆူၣ်မၤစိးတဖၣ်အံၤ ဝံၤအလီၢ်ခံ နကသံကွၢ်ဘၣ်လၢ– ‘မ့ၢ်ကစၢ်ယွၤ သးအိၣ်ပှၤ နီၢ်ကီၢ်ဧါ. ဘၣ်မနုၤအဃိ တၢ်ကဲထီၣ်အသးဒ်အံၤလဲၣ်, တၢ်မၤဆူၣ်မၤစိးတဖၣ်​ ကကတၢၢ်ကွံာ်ဝဲဧါ. ယအိၣ်မူလၢ တၢ်ပျံၤတၢ်ဖုးအပူၤ ကကဲဒ်လဲၣ်. လံာ်စီဆှံပူၤ အိၣ်ဒီး တၢ်သံကွၢ်တဖၣ်အံၤ အတၢ်စံးဆၢလၢ အမၤသးခုပသးလီၤ.

 ကစၢ်ယွၤ သးဟ့ဝဲ တၢ်မၤဆူၣ်မၤစိး. (စံးထီၣ်ပတြၢၤ ၁၁:၅; ကတိၤဒိ ၆:၁၆, ၁၇) ယ့ၣ်ၡူးခရံာ်လၢ အမ့ၢ်ပှၤခၢၣ်စး ကစၢ်ယွၤန့ၣ်​ ဖဲအပျဲၢ်အဘီၣ်တဖၣ်​ မၤဆါပှၤဂၤအခါ အဝဲတြီဝဲလီၤ. (မးသဲ ၂၆:၅၀-၅၂) ပှၤတနီၤန့ၣ်​ သူဝဲကစၢ်ယွၤအမံၤဒီး မၤဝဲတၢ်မၤဆူၣ်မၤစိး သနာ်က့ ကစၢ်ယွၤ တဟ့ၣ်အခွဲးလၢ အဝဲသ့ၣ်ကမၤဝဲဒ်န့ၣ်ဘၣ်. ဒီးကစၢ်ယွၤ တဒိကနၣ်​ အဝဲသ့ၣ်​ အတၢ်ထုကဖၣ်စ့ၢ်ကီးဘၣ်.—ယၡါယၤ ၁:၁၅.

 ပှၤလၢအတူၢ်ဘၣ်​ တၢ်နးတၢ်ဖှီၣ်​ ဃုာ်ဒီးပှၤလၢအဘၣ်​ တၢ်မၤဆူၣ်မၤစိးအီၤတဖၣ်​ ကစၢ်ယွၤသးအိၣ်အဝဲသ့ၣ်ခဲလၢာ်လီၤ. (စံးထီၣ်ပတြၢၤ ၃၁:၇; ၁ ပ့းတရူး ၅:၇) လံာ်စီဆှံ ပာ်ဖျါစ့ၢ်ကီးဝဲလၢ ကစၢ်ယွၤ ကမၤလီၤမၢ်ကွံာ် တၢ်မၤဆူၣ်မၤစိးတဖၣ်လီၤ.—ယၡါယၤ ၆၀:၁၈.

 ဘၣ်မနုၤအဃိ တၢ်မၤဆူၣ်မၤစိး ကဲထီၣ်အသးလဲၣ်န့ၣ်​ လံာ်စီဆှံ ပာ်ဖျါထီၣ်ဝဲလၢ— “ပှၤပၢပှၤဂၤလၢအတၢ်အၢအဂီၢ်.” (စံၣ်တဲၤတဲလီၤ ၈:၉) လၢတၢ်စံၣ်စိၤတဲစိၤအပူၤ ပှၤလၢအိၣ်ဒီးတၢ်စိတၢ်ကမီၤတဖၣ်န့ၣ်​ သူဝဲတၢ်မၤဆူၣ်မၤစိး လၢကဆီၣ်တံၢ်မၤနၢၤပှၤဂၤအဂီၢ်. အဃိ ပှၤဂၤစ့ၢ်ကီး သူဝဲတၢ်မၤဆူၣ်မၤစိးဒီး က့ၤမၤဆၢက့ၤဝဲလီၤ.—စံၣ်တဲၤတဲလီၤတၢ် ၇:၇.

 ကစၢ်ယွၤ အတၢ်အၢၣ်လီၤအိၣ်လၢ ကမၤလီၤမၢ်ကွံာ် တၢ်သူၣ်ပျံၤသးဖုး, တၢ်မၤဆူၣ်မၤစိး ဒီးကဒုးအိၣ်ထီၣ်​ တၢ်မုာ်တၢ်ခုၣ်လၢ ဟီၣ်ခိၣ်အံၤလီၤ. (ယၡါယၤ ၃၂:၁၈; မံကၤ ၄:၃, ၄)

•   ကစၢ်ယွၤ ကမၤဟးဂီၤကွံာ် တၢ်လၢအဒုးအိၣ်ထီၣ်​ တၢ်မၤဆူၣ်မၤစိး. ကစၢ်ယွၤ ကမၤဟးဂီၤကွံာ် ပှၤဟီၣ်ခိၣ်ဖိ အတၢ်ပၢတၢ်ပြး ဒီးကဒုးအိၣ်ထီၣ်​ အတၢ်ပၢတၢ်ပြးလၢ ဟီၣ်ခိၣ်လီၤ. ပှၤလၢကပၢတၢ်လၢ ယွၤအတၢ်ပၢတၢ်ပြးအပူၤန့ၣ်​ မ့ၢ်ယ့ၣ်ၡူး ဒီးအဝဲကရ့ပှၤဂ့ၤဂ့ၤဘၣ်ဘၣ်​ ကိးဂၤဒဲး ဒီးအဝဲ ကမၤလီၤမၢ်ကွံာ် တၢ်ဆီၣ်တံၢ်မၤနၢၤဒီး တၢ်မၤဆူၣ်မၤစိးတဖၣ်လီၤ. (စံးထီၣ်ပတြၢၤ ၇၂:၂, ၁၄) ဖဲန့ၣ်အဆၢကတီၢ် ပှၤတမၤဆူၣ်မၤစိးတၢ် နီတဂၤလၢၤဘၣ်. ပှၤ “ကမုာ်လၤတၢ်လၢ တၢ်ဃူတၢ်ဖိးအါအါကလဲာ်အပူၤလီၤ.”—စံးထီၣ်ပတြၢၤ ၃၇:၁၀, ၁၁.

•   ကစၢ်ယွၤ ကမၤဂ့ၤထီၣ်က့ၤ တၢ်ဘၣ်ဒိဘၣ်ထံးလၢ အဟဲကဲထီၣ်​ ခီဖျိ တၢ်မၤဆူၣ်မၤစိးအဃိ. ကစၢ်ယွၤ ကမၤဘျါက့ၤ ပှၤလၢအဘၣ်​ တၢ်မၤဆူၣ်မၤစိးအီၤတဖၣ်​ အနီၢ်ခိ မ့ၢ်ဂ့ၤ, အသးအတၢ်တူၢ်ဘၣ်မ့ၢ်ဂ့ၤလီၤ. (ယၡါယၤ ၆၅:၁၇; လီၣ်ဖျါ ၂၁:၃, ၄) အဝဲအၢၣ်လီၤစ့ၢ်ကီးဝဲလၢ ကမၤသမူထီၣ်က့ၤ ပှၤသံဒီး ကဒုးအိၣ်မူက့ၤဝဲလၢ ဟီၣ်ခိၣ်လၢအအိၣ်ဒီး တၢ်မုာ်တၢ်ခုၣ်.— ယိၤဟၣ်​ ၅:၂၈, ၂၉.

 လံာ်စီဆှံ ပာ်ဖျါထီၣ်န့ၢ်ပှၤ တၢ်ဂ့ၢ်တၢ်ကျိၤတဖၣ်လၢ ဒုးနာ်န့ၢ်ပှၤလၢ တယံၤလၢၤဘၣ်​ ကစၢ်ယွၤကမၤတၢ်လီၤ. သနာ်က့ နကဆိကမိၣ်ဘၣ်လၢ ‘ဘၣ်မနုၤအဃိ ကစၢ်ယွၤ တမၤလီၤမၢ်ကွံာ် တၢ်မၤဆူၣ်မၤစိးဒံးဘၣ်လဲၣ်. နကသ့ၣ်ညါ အတၢ်စံးဆၢအဂီၢ် ကွၢ်တၢ်ဂီၤမူလၢအမ့ၢ် ဘၣ်မနုၤအဃိ ယွၤပျဲတၢ်နးတၢ်ဖှီၣ်အခွဲးလဲၣ်.