လၢကီၢ်ဟ့းထံၣ်န့ၣ် ပှၤအၢပှၤသီတဖၣ် ပာ်ဖှိၣ်ထီၣ်အသး ဒီးမၤတၢထီၣ်တၢလီၤတၢ် ဒီးမၤတၢ်အၢတၢ်သီ အါမး. ဒီးလၢကလံၤထံး အၤဖြံၤကၤ, မဲးကစံၣ်ကိၣ် ဒီးထံကီၢ်လၢ အအိၣ်လၢ လဲထၢၤ အမဲရကၤ အပူၤတဖၣ်န့ၣ် ပှၤထံၣ်ဘၣ် တၢ်ကီတၢ်ခဲ ခီဖျိလၢ တၢ်အၢတၢ်သီတဖၣ်အဃိ. လၢတၢ်လီၢ်တနီၤန့ၣ် တၢ်အၢတၢ်သီ မ့ၢ်တအိၣ် ဒ်လၢညါဘၣ် သနာ်က့ ခီဖျိလၢ အဝဲသ့ၣ် ထံၣ်ဘၣ်တၢ်ကစီၣ်လၢ ဘၣ်ဃးဒီး တၢ်ဟုၣ်တၢ်ဘျၣ် ဒီးပှၤဟးမၤဂုာ်ဟးဂီၤတၢ် အဃိ အဝဲသ့ၣ် ဘၣ်ယိၣ်တၢ် ဒီးတူၢ်ဘၣ်ဝဲလၢ တၢ်ဘံၣ်တၢ်ဘၢ တအိၣ်ဘၣ်.

 ဘၣ်ဃးဒီး တၢ်အၢတၢ်သီ အါထီၣ်လၢ တၢ်လီၢ်ဝးဝးန့ၣ် လံာ်စီဆှံ တဲဝဲဒ်လဲၣ်

 လံာ်စီဆှံ တဲဆိပာ်စၢၤဝဲလၢ တၢ်အၢတၢ်သီတဖၣ်န့ၣ် အကဲဝဲ တၢ်ပနီၣ်တမံၤလၢ အပာ်ဖျါထီၣ်ဝဲ ပအိၣ်မူဘၣ်လၢ “တၢ်အစိၤလၢ အလီၢ်ခံကတၢၢ်.” (မးသဲ ၂၄:၃) ဖဲယ့ၣ်ၡူးတဲဝဲ ဘၣ်ဃးဒီး တၢ်အစိၤလၢ အလီၢ်ခံကတၢၢ် အတၢ်ပနီၣ်တဖၣ်အခါ အတဲဝဲလၢ

•   “မ့ၢ်လၢ တၢ်အၢတၢ်သီ ကအိၣ်အါထီၣ်ဝဲအဃိ ပှၤအါတက့ၢ် အတၢ်အဲၣ်တၢ်ကွံ ကလီၤစှၤဝဲလီၤ.”—မး ၂၄:၁၂.

 လံာ်စီဆှံ တဲဆိပာ်စၢၤဝဲလၢ “လၢမုၢ်နံၤခံကတၢၢ်တဖၣ်အပူၤ” န့ၣ်ပှၤအါဂၤ “တအိၣ်ဒီး တၢ်ပၢၤသူၣ်ပၢၤသးဘၣ်, ကမ့ၢ်ပှၤလၢ အမၤဆူၣ်မၤစိးတၢ်, တအဲၣ်တၢ်လၢအဂ့ၤဘၣ်.” (၂ တံၤ ၃:၁-၅) ခီဖျိလၢ ပှၤအိၣ်ဒီး တၢ်ပာ်သူၣ်ပာ်သး ဒ်အံၤတဖၣ်အဃိ တၢ်အၢတၢ်သီ အါထီၣ်ဝဲ.

 ဘၣ်ဆၣ် ပတၢ်မုၢ်လၢ် အိၣ်ဝဲဒံး. လံာ်စီဆှံ တဲဝဲလၢ တယံာ်လၢၤဘၣ်န့ၣ် တၢ်အၢတၢ်သီ တအိၣ်လၢၤဘၣ်.

•   “တစိၢ်ဖိဒီးန့ၣ် ပှၤအၢပှၤသီ တအိၣ်လၢၤဘၣ်. နကဃုကွၢ်တၢ်ဖဲအဝဲသ့ၣ် အိၣ်တ့ၢ်အလီၢ် ဘၣ်ဆၣ် နတထံၣ် အဝဲသ့ၣ်လၢၤဘၣ်. မ့မ့ၢ် ပှၤလၢအဆီၣ်လီၤသးန့ၣ် ကန့ၢ်သါဘၣ် ဟီၣ်ခိၣ်လီၤ. အဝဲသ့ၣ် ကသးခုဝဲဒိၣ်မး မ့ၢ်လၢ တၢ်ဃူတၢ်ဖိး ကအိၣ်ဝဲအါမးအဃိလီၤ.”—စံး ၃၇:၁၀, ၁၁.

 မၤလိအါထီၣ် ဘၣ်ဃးဒီး တၢ်မုၢ်လၢ်လၢ လံာ်စီဆှံ ပာ်ဖျါထီၣ်န့ၢ်ပှၤတဖၣ် ဒီးတၢ်မၤအသးလၢ ပစိၤခဲအံၤတဖၣ် ပာ်ဖျါထီၣ်လၢ ဝံအတၢ်စံးပာ်တဖၣ် ဟဲလၢထီၣ်ပှဲၤထီၣ်ဝဲ. ဒီးဘၣ်မနုၤအဃိ ပတဲဒ်န့ၣ်သ့လဲၣ်. နမ့ၢ်အဲၣ်ဒိးသ့ၣ်ညါန့ၣ် ဖးကွၢ် တၢ်ဂ့ၢ်လၢ တၢ်ဖီလာ်တဖၣ်အံၤ.

 “တၢ်မုၢ်လၢ်လၢ ကဟဲလၢပှဲၤထီၣ်နီၢ်ကီၢ် လၢခါဆူညါအဂီၢ်”

 “မုၢ်နံၤခံကတၢၢ်တဖၣ်အပူၤ’ လၢအမ့ၢ် ‘တၢ်အကတၢၢ် အဆၢကတီၢ်’ အတၢ်ပနီၣ်န့ၣ် မ့ၢ်မနုၤလဲၣ်”

 “ပှၤလၢပစိၤခဲအံၤတဖၣ် အကအိၣ်ဒီး တၢ်ထံၣ်ဒ်လဲၣ် ဒီးအကမ့ၢ် ပှၤဒ်လဲၣ်န့ၣ် လံာ်စီဆှံ တဲဆိပာ်စၢၤဝဲဧါ.”