အိၣ်ပလီၢ်သးထီဘိ
ထံဒိၣ်ထီၣ်အဃိ တၢ်ဟးဂူာ်ဟးဂီၤ—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်
ပှၤအါဂၤလၢ ဟီၣ်ခိၣ်ဒီဘ့ၣ်န့ၣ် အထံၣ်ဘၣ်ဒီး တၢ်ကီတၢ်ခဲ ခီဖျိလၢ ထံဒိၣ်ထီၣ်အဃိ. ပကကွၢ်သကိး တၢ်ပာ်ဖျါတနီၤ–
ဖဲလါအီကူး ၂, ၂၀၂၃ န့ၣ် အ့ၤဖံၤ တၢ်ကစီၣ် ပာ်ဖျါထီၣ်ဝဲလၢ “လၢအပူၤကွံာ် စှၤကိာ်သီန့ၣ် လၢတရူးကီၢ် အဝ့ၢ်ခိၣ်န့ၣ် မူခိၣ်စူၤဖးဒိၣ် အဃိ ဖဲမုၢ်ဃုနံၤ တုၤလၢမုၢ်သၢနံၤန့ၣ် ထံဒိၣ်ထီၣ်ဝဲ တုၤလၢ ၇၄၄.၈ မံလံၣ်မံထၢၣ် (၂၉.၃ လဲးမး). မူခိၣ်စူၤဒ်အံၤန့ၣ် ပတထံၣ်ဘၣ်အီၤဘၣ် န့ၢ်လံအနံၣ် ၁၄၀ လံ.
ဖဲ လါအီကူး ၃, ၂၀၂၃ န့ၣ် Deutsche Welle ပာ်ဖျါထီၣ်ဝဲလၢ “မုၢ်လွံၢ်နံၤန့ၣ် ကလံၤမုၢ်ဖးဒိၣ် ခၢ်နၢ်လီၤဝဲ ခံသီတသီလၢ ကီၢ်ယပၣ်အကလံၤစိးတခီ အဃိ မူခိၣ်စူၤဖးဒိၣ် ဒီးကလံၤဟဲဖးဒိၣ် ဒီးပှၤသံကအိၣ်ဝဲ အစှၤကတၢၢ်ခံဂၤ. . . . ပှၤတယာ်လၢ လၢထဲၣ်ဝၣ် ကစၢၢ်ကလိကျါန့ၣ် မူခိၣ်စူၤအဃိ ထံကဒိၣ်ထီၣ်ဝဲ ၀.၆ မံထၢၣ် (၂ ခီၣ်ယီၢ်).
ဖဲ လါယူၤလံ ၂၄, ၂၀၂၃ န့ၣ် ဘံၤဘံၤစံၤ အတၢ်ကစီၣ် ပာ်ဖျါထီၣ်ဝဲလၢ “မူခိၣ်စူၤဖးဒိၣ်လၢ အဲးတလဲတ့း ခဲနဒၣ် အဃိ ဖဲမုၢ်ဃုနံၤ ဒီးအိၣ်ဘှံးနံၤန့ၣ် ထံဒိၣ်ထီၣ်ဝဲဖးဒိၣ် (လၢ နိဘၤ စကိၡၤ). မူခိၣ်စူၤဖးဒိၣ် ဒ်အံၤန့ၣ် ပတထံၣ်ဘၣ်အီၤ အိၣ်အနံၣ် ၅၀ လံ.
ဘၣ်ဃးဒီး တၢ်မၤအသးသ့ၣ်တဖၣ်အံၤန့ၣ် လံာ်စီဆှံ တဲဝဲဒ်လဲၣ်.
“မုၢ်နံၤခံကတၢၢ်တဖၣ်” အတၢ်ပနီၣ်
လံာ်စီဆှံ ပာ်ဖျါထီၣ်ဝဲလၢ ပအိၣ်မူဘၣ်လၢ “မုၢ်နံၤခံကတၢၢ်တဖၣ်” အတီၢ်ပူၤ. (၂ တံၤမသ့း ၃:၁) ယ့ၣ်ၡူးတဲဆိပာ်စၢၤဝဲလၢ ဖဲပအိၣ်မူတၢ် အဆၢကတီၢ်န့ၣ် ပကထံၣ်ဘၣ် “တၢ်လၢ အလီၤပျံၤလီၤဖုးတဖၣ်.” (လူၤကၣ် ၂၁:၁၁) မူခိၣ်ကလံၤသီၣ်ဂီၤ တဘၣ်လီၢ်ဘၣ်စး အဃိ တၢ်မၤအသးလၢ အလီၤပျံၤလီၤဖုးတဖၣ် ဟဲကဲထီၣ်သတူၢ်ကလာ် အဘျီအါထီၣ် ဒီးနးထီၣ်.
ပတၢ်မုၢ်လၢ်အိၣ်ဒံး
လံာ်စီဆှံ တဲဝဲလၢ တၢ်လၢအလီၤပျံၤလီၤဖုးတဖၣ် ဟဲကဲထီၣ်ဝဲန့ၣ် အပာ်ဖျါထီၣ်ဝဲလၢ ပအိၣ်ဒီး တၢ်မုၢ်လၢ်. ဘၣ်မနုၤအဃိ ပတဲဒ်န့ၣ်လဲၣ်. ယ့ၣ်ၡူးတဲဝဲလၢ “ဖဲသုထံၣ်ဘၣ် တၢ်သ့ၣ်တဖၣ်န့ၣ် မၤအသးအခါ သုကဘၣ်သ့ၣ်ညါလၢ ကစၢ်ယွၤအဘီအမုၢ်န့ၣ် ဘူးထီၣ်လံ.”—လူၤကၣ် ၂၁:၃၁; မးသဲ ၂၄:၃.
တၢ်မၤအသးလၢ ပထံၣ်ဘၣ်အီၤတဖၣ်အံၤ ပာ်ဖျါထီၣ်ဝဲလၢ တယံာ်လၢၤဘၣ် ယွၤအဘီအမုၢ် ကပၢၤဃာ် န့ဆၢၣ်တၢ်မၤအသးတဖၣ် လၢအပၣ်ဃုာ်စ့ၢ်ကီးဒီး ထံအတၢ်လဲၤတရံး.—ယိၤဘး ၃၆:၂၇, ၂၈; စံးထီၣ်ပတြၢၤ ၁၀၇:၂၉.
ဒ်သိး နကသ့ၣ်ညါအါထီၣ် ဘၣ်ဃးဒီး ယွၤအဘီအမုၢ် ကမၤဘၣ်ဂီၢ်ထီၣ်က့ၤ န့ဆၢၣ်အတၢ်ကီတၢ်ခဲတဖၣ်အဂီၢ် ဖးကွၢ်တၢ်ဂ့ၢ် လၢအမ့ၢ် “မတဂၤ ကမၤဂ့ၤထီၣ်က့ၤ ဟီၣ်ခိၣ်လဲၣ်.”