လၢတၢ်ကစီၣ်ပူၤန့ၣ် ပနၢ်ဟူဘၣ်ထဲ ပှၤတဲဆါလိာ်သး, မၤဆူးမၤဆါလိာ်သး, ကလုာ်ဒူၣ် တၢ်ကွၢ်တလီၤလိာ်သး ဒီးပှၤဒုးလိာ်ယၤလိာ်သး ခီဖျိလၢ တၢ်သူၣ်ဟ့သးဟ့အဃိ.

•   ဖဲ လါနိၣ်ဝ့ဘၢၣ် ၁၅, ၂၀၂၃ န့ၣ် နူယီး တၢ်ကစီၣ် ပာ်ဖျါထီၣ်ဝဲလၢ “ခီဖျိလၢ ကၤစၤ ဒီးအံၣ်စရ့ အတၢ်ဒုး ဒီးပှၤလၢ အဒုးအိၣ်ထီၣ် တၢ်မၤဆူၣ်မၤစိး ဒီးပှၤသူၣ်ဟ့သးဟ့လိာ်သးတဖၣ် အဃိ လၢတၢ်ကစီၣ်ပူၤန့ၣ် ပနၢ်ဟူဘၣ် တၢ်သူၣ်ဟ့သးဟ့ ဒီးတၢ်တဲဆါလိာ်သး အါထီၣ်မၣ်အါထီၣ်.”—နူယီး တၢ်ကစီၣ်, လါနိၣ်ဝ့ဘၢၣ် ၁၅, ၂၀၂၃.

•   ဖဲ လါနိၣ်ဝ့ဘၢၣ် ၃, ၂၀၂၃ န့ၣ်ဒဲနံၤ ဖြဲးစံ လၢအမ့ၢ် UN တၢ်အိၣ်ဖှိၣ် အကရၢခိၣ်န့ၣ် တဲဝဲလၢ “ခီဖျိလၢ တၢ်ကွၢ်တလီၤလိာ်သးအဃိ စးထီၣ်လၢ လါအီးကထိဘၢၣ် ၇ သီလံၤလံၤန့ၣ် တၢ်သူၣ်ဟ့သးဟ့, တၢ်တဲဆါလိာ်သး ဒီးတၢ်မၤဆူၣ်မၤစိးလိာ်သး အါထီၣ်ဝဲ အါန့ၢ်ဒံးလၢညါ သတူၢ်ကလာ်.”

 တၢ်သူၣ်ဟ့သးဟ့, တၢ်တဲဆါလိာ်သး ဒီးတၢ်ဒုးတၢ်ယၤတဖၣ်န့ၣ် တမ့ၢ်တၢ်လၢ အလီၤဆီဘၣ်, အအိၣ်ပာ်စၢၤ ဖးယံာ်လံ. လံာ်စီဆှံ ပာ်ဖျါထီၣ်ဝဲ လၢညါပှၤလၢအ “ပညိၣ်ဝဲ အတၢ်ကတိၤလၢ အအၢအသီတဖၣ် ဒ်ပျၢ်တဖၣ်အသိး” ဒီးပှၤလၢအဒုးတၢ် ဒီးပှၤမၤဆူၣ်မၤစိးတၢ်တဖၣ်အဂ့ၢ်. (စံးထီၣ်ပတြၢၤ ၆၄:၃; ၁၂၀:၇; ၁၄၀:၁) သနာ်က့ တၢ်သူၣ်ဟ့သးဟ့လၢ ပထံၣ်ဘၣ်အီၤလၢ ပစိၤခဲအံၤန့ၣ် လံာ်စီဆှံ ပာ်ဖျါထီၣ်ဝဲလၢ အအိၣ်ဒီးအခီပညီလၢ အရ့ဒိၣ်.

 လၢပစိၤခဲအံၤ ဘၣ်မနုၤအဃိ တၢ်သူၣ်ဟ့သးဟ့ အိၣ်အါဝဲထဲအံၤလဲၣ်န့ၣ် လံာ်စီဆှံ ပာ်ဖျါထီၣ်ဝဲ တၢ်ဂ့ၢ်ခံမံၤ.

1.  ၁. လံာ်စီဆှံ တဲဆိပာ်စၢၤဝဲလၢ တၢ်ဆၢကတီၢ် ကအိၣ်ဝဲ လၢ “ပှၤအါတက့ၢ် အတၢ်အဲၣ်တၢ်ကွံ ကလီၤစှၤဝဲ.” (မးသဲ ၂၄:၁၂) လၢပှၤကပာ်ဖျါထီၣ် တၢ်အဲၣ်တၢ်ကွံအလီၢ်န့ၣ် ပှၤကပာ်ဖျါထီၣ် တၢ်ပာ်သူၣ်ပာ်သးလၢ ကဒုးအိၣ်ထီၣ် တၢ်သူၣ်ဟ့သးဟ့လိာ်သး.—၂ တံၤမသ့း ၃:၁-၅.

2.  ၂. ခီဖျိလၢ မုၣ်ကီၤလံၢ်လၢအမ့ၢ် ပှၤအၢပှၤသီတဂၤ ပၢဝဲဟီၣ်ခိၣ်အဃိ လၢပစိၤခဲအံၤန့ၣ် တၢ်အၢတၢ်သီ အါထီၣ်မၣ်အါထီၣ်. လံာ်စီဆှံ တဲဝဲလၢ “ဟီၣ်ခိၣ်ခဲလၢာ်န့ၣ် အိၣ်ဝဲလၢ မုၣ်ကီၤလံၢ် အစုပူၤလီၤ.”—၁ ယိၤ ၅:၁၉; လီၣ်ဖျါ ၁၂:၉, ၁၂.

 လံာ်စီဆှံ ပာ်ဖျါထီၣ်စ့ၢ်ကီးဝဲလၢ တယံာ်လၢၤဘၣ်န့ၣ် ကစၢ်ယွၤ ကမၤလီၤမၢ်ကွံာ် တၢ်လၢအဒုးအိၣ်ထီၣ် တၢ်သူၣ်ဟ့သးဟ့ခဲလၢာ်. တကးဒံးဘၣ် အကမၤလီၤမၢ်ကွံာ် တၢ်ကီတၢ်ခဲ လၢအဟဲကဲထီၣ်အသးလၢ တၢ်သူၣ်ဟ့သးဟ့အဃိ. လံာ်စီဆှံ အၢၣ်လီၤဝဲလၢ–

•   ကစၢ်ယွၤ “ကထွါကွံာ် အဝဲသ့ၣ် အမဲာ်ထံခဲလၢာ် ဒီးတၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ တအိၣ်လၢၤဘၣ်. တၢ်အလီၢ်လံၤလၢ အမၤသးအုးတ့ၢ်ပှၤန့ၣ် ဒံကွံာ်ဝဲလံ.”—လီၣ်ဖျါ ၂၁:၄.