ကၠၢမနံၣ်အကီၢ်ခိၣ် လၢအမ့ၢ် အဲကၠလၤ မၤခၢၤန့ၣ် တဲဝဲလၢ “ပအဲၣ်ဒိးလၢ ပတၢ်အိၣ်မူ ကက့ၤအိၣ်ကဒါက့ၤ ဒ်သိးလၢညါ.”

 ခိၤရိၤနၤတၢ်ဆါအံၤ (COVID-19) ရၤလီၤအသးလၢ ဟီၣ်ခိၣ်ဒီဘ့ၣ် ဒီးမၤဘၣ်ဒိတၢ် နးမးအဃိ နၤစ့ၢ်ကီး နကဆိကမိၣ်ဘၣ်ဒ် အဲကၠၢၤလၤ မၤခၢၤ အသိး. ဘၣ်ဆၣ် တၢ်ကတိၤလၢအမ့ၢ် “တၢ်အိၣ်မူ ဒ်သိးလၢညါ” န့ၣ်အဲၣ်ဒိးတဲဝဲ တၢ်မနုၤလဲၣ်. ပှၤဟီၣ်ခိၣ်ဖိတဖၣ် အဲၣ်ဒိးမၤဝဲ တၢ်မနုၤလဲၣ်.

•   ပအဲၣ်ဒိးလၢ ပတၢ်အိၣ်မူ ကက့ၤအိၣ်ကဒါက့ၤ ဒ်သိးလၢညါ. ပှၤတနီၤနီၤ အဲၣ်ဒိးက့ၤရ့လိာ်သး ဒ်လၢညါအသိး. အဒိ, ဖဲပှၤတနီၤနီၤ ဆၢဂ့ၤဆၢဝါလိာ်သးအခါ ကအဲၣ်ဒိးဖီၣ်လိာ်အစု (နိးဆဲးလိာ်သး) ဒီးဖိးဟုလိာ်သး, တကးဒံးဘၣ် အဲၣ်ဒိးလဲၤတၢ်က့ၤတၢ် ဒ်သိးလၢညါ. ကသံၣ်သရၣ် အဲသနံၤ ဘီခၠံၤ တဲဝဲလၢ “ပဝဲသ့ၣ်တဖၣ် ပကအဲၣ်ဒိး က့ၤအိၣ်ကဒါက့ၤ ဒ်သိးလၢညါ ဒီးလဲၤအီၣ်တၢ် လၢတၢ်အီၣ်ကျး, လဲၤကွၢ်တၢ်ဂီၤမူ ဒီးမၤတၢ်ဒ်သိးလၢညါ.

•   ကဲဘျုးလၢ အတၢ်အိၣ်မူအဂီၢ်. ပှၤတနီၤနီၤထံၣ်ဝဲလၢ ဖဲတၢ်ဆါဟဲကဲထီၣ်သး ဝံၤအလီၢ်ခံန့ၣ် အဝဲသ့ၣ်အတၢ်အိၣ်မူ လဲၤအသးဘၣ်ဂီၢ် ဒိၣ်န့ၢ်ဒံး အတၢ်အိၣ်မူလၢညါဒံး. ဒီးအဝဲသ့ၣ် လီကီဝဲလၢ အဝဲသ့ၣ် ကမၤဘၣ်က့ၤတၢ်လၢ အနၣ်ရံၣ်စှၤ, အဝဲသ့ၣ် လီကီစ့ၢ်ကီးလၢ တၢ်ပာ်ဆံးကလုာ်ဒူၣ်တဖၣ် ဒီးတၢ်သးဟးဂီၤ ကလီၤစှၤဝဲ. စံပွါယ့တၢ်ကရၢကရိအခိၣ်တဂၤ လၢအမ့ၢ် ခီစကွၢ်(ဘ်)န့ၣ် တဲဝဲလၢ “တၢ်ကဲထီၣ်သးသ့ၣ်တဖၣ်အံၤန့ၣ် ဟ့ၣ်ပှၤတၢ်ခွဲးတၢ်ယာ်လၢ ပကက့ၤ ဆိကမိၣ်ထံလီၤက့ၤ ပတၢ်အိၣ်မူ. တကးဒံးဘၣ် ပအဲၣ်ဒိးလၢ ဟီၣ်ခိၣ်တဘ့ၣ်အံၤ ကမုာ်ထီၣ်အဃိ ပကဘၣ် မၤတၢ်ဆီတလဲတမံၤမံၤ ဒ်သိး ဟီၣ်ခိၣ်တၢ်အိၣ်သး ကဂ့ၤထီၣ်က့ၤအဂီၢ်. ဒီးပကဘၣ်မၤလၢ အဆိအချ့ မ့ၢ်လၢ တၢ်ခွဲးတၢ်ယာ်ဒ်အံၤ တအိၣ်ထီဘိဘၣ်အဃိ.”

 မ့မ့ၢ် ပှၤအဂၤတနီၤအဂီၢ်ဒု တၢ်ဆါသံသတြိာ်အံၤ ဒုးအိၣ်ထီၣ် တၢ်ကီတၢ်ခဲရးမး. အဒိ လၢတၢ်ဆါအံၤအဃိ အဝဲသ့ၣ် တၢ်မၤတအိၣ်လၢၤဘၣ်, အဟံၣ်အဃီစ့ၢ်ကီး တအိၣ်လၢၤဘၣ်. ထဲန့ၣ်တကးဒံးဘၣ် အဝဲသ့ၣ် အတၢ်အိၣ်ဆူၣ်အိၣ်ချ့ဘၣ်ဒိ ဒီးပှၤလၢအဝဲသ့ၣ် အဲၣ်ဘၣ်ဝဲတဖၣ်သံဝဲ.

 ဖဲတၢ်ဆါလီၤဝံၤအလီၢ်ခံ ပတၢ်အိၣ်မူ ကမၤအသးဒ်လဲၣ်န့ၣ် ပတသ့ၣ်ညါဆိ နီတဂၤဘၣ်. (စံၣ်တဲၤတဲလီၤ ၉:၁၁) ဘၣ်ဆၣ် ခါဆူညါ တၢ်မ့ၢ်ကဲထီၣ်အသး ဒ်လဲၣ်ဂ့ၤဒ်လဲၣ်ဂ့ၤ လံာ်စီဆှံ ကမၤစၢၤပှၤ ဒ်သိးပကလဲၤခီဖျိ ပတၢ်ကီတၢ်ခဲသ့. ထဲန့ၣ်တကးဒံးဘၣ် လံာ်စီဆှံ ပာ်ဖျါထီၣ်န့ၢ်ပှၤလၢ ခါဆူညါ တၢ်ကမၤအသးလၢ ပတမုၢ်လၢ်ဘၣ်တဖၣ် ကဟဲကဲထီၣ်ဝဲနီၢ်ကီၢ်.

 လံာ်စီဆှံ တဲဆိပာ်ဝဲလၢ ဖဲ “တၢ်အစိၤလၢ အလီၢ်ခံကတၢၢ်” န့ၣ် “တၢ်ဆါသံသတြိာ် တဖၣ်” ကအိၣ်ထီၣ်ဝဲ. (လူၤကၣ် ၂၁:၁၁; မးသဲ ၂၄:၃) လံာ်စီဆှံ တဲဆိပာ်ဝဲ တၢ်အစိၤလၢ အလီၢ်ခံကတၢၢ် တၢ်လၢပကထံၣ်ဘၣ်တဖၣ်န့ၣ် ကမ့ၢ်ဝဲ တၢ်ဒုးတၢ်ယၤ, ဟီၣ်ခိၣ်ဟူးဖးဒိၣ် ဒီးတၢ်သၣ်ဝံၤလီၤဒိ ကအိၣ်ထီၣ်ဝဲ. ထဲန့ၣ်တကးဒံးဘၣ် ခိၤရိၤနၤတၢ်ဆါ (COVID-19) စ့ၢ်ကီး ပၣ်ဃုာ်လၢ တၢ်ပနီၣ်အံၤအကျါ.

 ပသ့ၣ်ညါဘၣ် တၢ်ဂ့ၢ်သ့ၣ်တဖၣ်အံၤအဃိ ကဲထီၣ်တၢ်မၤစၢၤလၢ ပဂီၢ်ဒ်လဲၣ်. ခိၤရိၤနၤတၢ်ဆါအံၤ (COVID-19) မ့ၢ်လီၤစှၤသနာ်က့ လံာ်စီဆှံ ပာ်ဖျါထီၣ်န့ၢ်ပှၤလၢ ပအိၣ်မူဘၣ်ဒံးလၢ “တၢ်ဆၢကတီၢ်လီၤဆီလၢ အကီအခဲ” (၂ တံၤမသ့း ၃:၁) ပဝဲသ့ၣ်တဖၣ် ပသ့ၣ်ညါဆိဘၣ် တၢ်ဂ့ၢ်တဖၣ်အံၤအဃိ ပအိၣ်ကတဲာ်ကတီၤ ပသးလၢ ခါဆူညါအဂီၢ်သ့.

 လံာ်စီဆှံမၤစၢၤပှၤလၢ ပကအိၣ်ဒီး တၢ်ထံၣ်လၢအဂ့ၤ- ဖဲပအိၣ်မူလၢ ဟီၣ်ခိၣ်ချၢ အဆၢကတီၢ်အံၤ ပထံၣ်ဘၣ်ဒီး တၢ်ကီတၢ်ခဲတဖၣ် ဒံးယံာ်ဒံးအါထီၣ်. ဘၣ်ဆၣ် တယံာ်လၢၤဘၣ်န့ၣ် တၢ်ဆီတလဲဖးဒိၣ် ကအိၣ်ထီၣ်ဝဲတခါ. တၢ်ဆီတလဲဖးဒိၣ် မနုၤကအိၣ်ထီၣ်လဲၣ်.

 လံာ်စီဆှံ တဲဆိပာ်ဝဲလၢ ပဝဲသ့ၣ်တဖၣ် ပကထံၣ်ဘၣ် တၢ်ကီတၢ်ခဲအါမး ဘၣ်ဆၣ် တယံာ်လၢၤဘၣ်န့ၣ် တၢ်မုာ်တၢ်ခုၣ်စ့ၢ်ကီး ကအိၣ်ထီၣ်ဝဲ. လံာ်စီဆှံ တဲဆိပာ်ဝဲလၢ ဒ်သိးတၢ်မုာ်တၢ်ခုၣ် ကအိၣ်ထီၣ်လၢ ဟီၣ်ခိၣ်ချၢအဂီၢ် ဟီၣ်ခိၣ်ပဒိၣ်ပပှၢ်တဖၣ် မၤဝဲတသ့နီတဂၤဘၣ်. ထဲဒၣ်ကစၢ်ယွၤ လၢအမ့ၢ်အတီတဂၤ မၤဝဲသ့. ကစၢ်ယွၤကမၤ တၢ်မနုၤလဲၣ်န့ၣ် လံာ်စီဆှံ ပာ်ဖျါထီၣ်ဝဲလၢ “ဒီးကစၢ်ယွၤကထွါကွံာ် အဝဲသ့ၣ် အမဲာ်ထံခဲလၢာ် ဒီးတၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ တအိၣ်လၢၤဘၣ်.”—လီၣ်ဖျါ ၂၁:၄.

 ယဟိဝၤယွၤ a အၢၣ်လီၤဝဲလၢ “ကွၢ်မီၤ, ယမၤကဲထီၣ် တၢ်အသီခဲလၢာ်လီၤ.” (လီၣ်ဖျါ ၂၁:၅) ကစၢ်ယွၤန့ၣ် ကမၤဘၣ်ဂီၢ်ထီၣ်က့ၤ ကယဲၢ် တၢ်ကီတၢ်ခဲသ့ၣ်တဖၣ်လၢ ပှၤဟီၣ်ခိၣ်ဖိထံၣ်ဘၣ်ဝဲ လၢအပၣ်ဃုာ်ဒီး ခိၤရိၤနၤတၢ်ဆါ (COVID-19). တၢ်လၢ ကစၢ်ယွၤကမၤန့ၢ်ပှၤန့ၣ် မ့ၢ်ဝဲ—

•   တၢ်အိၣ်ဆူၣ်အိၣ်ချ့ ကဂ့ၤထီၣ် ဒီးတၢ်ဆူးတၢ်ဆါဒီး တၢ်သံတၢ်ပှၢ် တအိၣ်လၢၤဘၣ်.—ယၡါယၤ ၂၅:၈; ၃၃:၂၄.

•   တၢ်မၤလၢပမၤအီၤမုာ် ဒီးဟ့ၣ်ပှၤတၢ်သူၣ်မံသးမုာ်. တမ့ၢ်တၢ်မၤလၢ အနးတလၢ ဒီးမၤလီၤဘှံးပနီၢ်ခိ ဒီးပသူၣ်ပသးဘၣ်.—ယၡါယၤ ၆၅:၂၂, ၂၃.

•   ပှၤခဲလၢာ် ကမၤန့ၢ်အီၣ်ကဲ. တၢ်ဖှီၣ်တၢ်ယာ် ဒီးတၢ်သၣ်ဝံၤလီၤဒိ တအိၣ်လၢၤဘၣ်—စံးထီၣ်ပတြၢၤ ၇၂:၁၂, ၁၃; ၁၄၅:၁၆.

•   တၢ်သူၣ်ဟးဂီၤသးဟးဂီၤ ကလီၤမၢ်ကွံာ်ခဲလၢာ် ဒီးပှၤလၢပအဲၣ်ဘၣ်အီၤ လၢအသံသဒၣ်ပှၤန့ၣ် ပကထံၣ်ဘၣ်ကဒါက့ၤအဝဲသ့ၣ်.—ယၡါယၤ ၆၅:၁၇; မၤတၢ် ၂၄:၁၅.

 ပသ့ၣ်ညါဘၣ် တၢ်ဂ့ၢ်အံၤအဃိ ကဲထီၣ်တၢ်မၤစၢၤ လၢပဂီၢ်ဒ်လဲၣ်. လံာ်စီဆှံ တဲဝဲလၢ “ပတၢ်မုၢ်လၢ်အံၤ လီၤဂာ်ဒ်သိးဒီး ပသးသမူ အနီၣ်သက့ၤလီၤ.” (ဧ့ၤဘြံၤ ၆:၁၉) ပအိၣ်ဒီးတၢ်မုၢ်လၢ် ဒ်အံၤတကလုာ်အဃိ မၤမုာ်ထီၣ်ပသး တကးဒံးဘၣ် အမၤစၢၤပှၤလၢ ပကလဲၤခီဖျိ တၢ်ကီတၢ်ခဲ လၢပထံၣ်ဘၣ်လၢ မုၢ်မဆါတနံၤအံၤကန့ၢ်အဂီၢ်. ဒီးတၢ်မုၢ်လၢ်အံၤ အကမၤစၢၤပှၤဒ်သိး ပတၢ်သူၣ်ကိၢ်သးဂီၤ ကလီၤစှၤ ဒီးပပာ်ပသး ဂၢၢ်ဂၢၢ်ကသ့အဂီၢ်.

 မ့ၢ်နနာ် တၢ်အၢၣ်လီၤလၢ လံာ်စီဆှံအပူၤအံၤ ဘၣ်ကသ့ဧါ. ဝံသးစူၤ နုာ်လီၤကွၢ်လၢ တၢ်ဂ့ၢ်တၢ်ကျိၤလၢအမ့ၢ် “လံာ်စီဆှံ—တၢ်မ့ၢ်တၢ်တီ အဂံၢ်ခီၣ်ထံး လၢပနာ်န့ၢ်အီၤသ့.”

•   ပာ်လုၢ်ပာ်ပှ့ၤသးသမူ

   လံာ်စီဆှံတဲဝဲလၢ “ပှၤလၢအအိၣ်ဒီး တၢ်ကူၣ်သ့န့ၣ် အတၢ်ကူၣ်သ့ ကမၤပူၤဖျဲးအီၤ.”— စံၣ်တဲၤတဲလီၤတၢ် ၇:၁၂.

   လံာ်စီဆှံတဆၢအံၤ ကဲဘျုးလၢနဂီၢ်ဒ်လဲၣ်. နမ့ၢ်ပလီၢ်သး ဂ့ၤဂ့ၤန့ၣ် နတဘၣ်တၢ်ဆါညီညီဘၣ်. ဃုသ့ၣ်ညါလၢ နအိၣ်တၢ်လီၢ်န့ၣ် တၢ်လီၤဘၣ်ယိၣ်အိၣ်ထဲလဲၣ်. ဒီးကသံၣ်သရၣ်တဖၣ် အတၢ်ဟ့ၣ်ကူၣ်ဟ့ၣ်ဖး အိၣ်ဒ်လဲၣ်. ဒီးပှၤဘၣ်တၢ်ဆူးတၢ်ဆါ အိၣ်အါထဲလဲၣ်. ဘၣ်ဃးဒီး တၢ်သ့ၣ်တဖၣ်အံၤန့ၣ် ဃုသ့ၣ်ညါအီၤတက့ၢ်. ဒီးပှၤဖဲနလီၢ်ကဝီၤန့ၣ် ဆဲးကသံၣ်ဒီသဒၢ ခိၤရိၤနၤတၢ်ဆါဃၢ်န့ၣ် အမျးကယၤ အိၣ်ထဲလဲၣ်လံလဲၣ်.

•   အိၣ်ဒီးတၢ်ပလီၢ်ပဒီထီဘိ

   လံာ်စီဆှံတဲဝဲလၢ “ပှၤကူၣ်တၢ်သ့န့ၣ် ပလီၢ်အသး ဒီးဃၣ်ကွံာ်အသးလၢ တၢ်အၢ, မ့မ့ၢ် ပှၤဟးဂီၤဖိန့ၣ် အတပလီၢ်အသးဘၣ် ဒီးနာ်န့ၢ်လီၤအသး အါတလၢလီၤ.”—ကတိၤဒိ ၁၄:၁၆.

   လံာ်စီဆှံတဆၢအံၤ ကဲဘျုးလၢနဂီၢ်ဒ်လဲၣ်. ဆဲးဒိကနၣ် ကသံၣ်သရၣ်တဖၣ် အတၢ်ဟ့ၣ်ကူၣ်. မ့ၢ်လၢ ကသံၣ်သရၣ်တဖၣ် တဲဝဲလၢ ခိၤရိၤနၤတၢ်ဆါ (COVID-19) အံၤန့ၣ် ကအိၣ်ဒံးဖးယံာ်ညါ.

•   မၤထွဲ တၢ်ဟံးစုနဲၣ်ကျဲတဖၣ်လၢ ပနာ်အီၣ်အီၤသ့

   လံာ်စီဆှံတဲဝဲလၢ “ပှၤလၢ အတၢ်လဲၤခီဖျိ အိၣ်စှၤန့ၣ် နာ်တၢ်ကတိၤ ကိးထံၣ်ဒဲးလီၤ. မ့မ့ၢ် ပှၤကူၣ်တၢ်သ့န့ၣ် ဆိကမိၣ်ထံ အခီၣ်ခါ ကိးခါဒဲးလီၤ.”—ကတိၤဒိ ၁၄:၁၅.

   လံာ်စီဆှံတဆၢအံၤ ကဲဘျုးလၢနဂီၢ်ဒ်လဲၣ်. လံာ်စီဆှံတဆၢအံၤ ဟ့ၣ်ကူၣ်ပှၤလၢ ပကဘၣ်ဒိကနၣ် တၢ်ဟ့ၣ်ကူၣ် ဖဲလဲၣ်တခါလဲၣ်န့ၣ် ပကဘၣ်ဃုသ့ၣ်ညါအီၤ လီၤတံၢ်လီၤဆဲး. ပကမၤဒ်န့ၣ်အဂီၢ် မ့ၢ်တၢ်လၢ အရ့ဒိၣ်ဒိၣ်မး. ဘၣ်မနုၤအဃိလဲၣ်. ပမ့ၢ်တသ့ၣ်ညါ တၢ်ဂ့ၢ်လီၤတံၢ်လီၤဆဲးဘၣ် ဒီးပမ့ၢ်မၤတၢ်ဆၢတဲာ်န့ၣ် ပတၢ်ဆၢတဲာ် ကကမၣ် ဒီးမၤဘၣ်ဒိ ပတၢ်အိၣ်ဆူၣ်အိၣ်ချ့သ့.

•   ဆဲးအိၣ်ဒီးတၢ်ထံၣ်လၢအဂ့ၤ

   လံာ်စီဆှံတဲဝဲလၢ တဘၣ်တဲလၢ “မုၢ်နံၤလၢအပူၤကွံာ်န့ၣ် အဂ့ၤဒိၣ်န့ၢ်ဒံး မုၢ်နံၤခဲအံၤ” တဂ့ၤ. နမ့ၢ်တဲဒ်န့ၣ်န့ၣ် နတမ့ၢ်ပှၤလၢ အကူၣ်တၢ်သ့ဘၣ်.—စံၣ်တဲၤတဲလီၤတၢ် ၇:၁၀.

   လံာ်စီဆှံတဆၢအံၤ ကဲဘျုးလၢနဂီၢ်ဒ်လဲၣ်. နတၢ်အိၣ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ ဆဲးအိၣ်ဒီးတၢ်ထံၣ်လၢအဂ့ၤ. ဒီးတဘၣ်က့ၤဆိမိၣ်ကဒါက့ၤ တၢ်လၢအပူၤကွံာ် တချုးလၢ တၢ်ဆါလီၤဒံးဘၣ် အဆၢကတီၢ်န့ၣ် အမုာ်ဒိၣ်န့ၢ် အခါခဲအံၤတဂ့ၤ. တကးဒံးဘၣ် ခီဖျိလၢ တၢ်ဆါလီၤအဃိ တၢ်လၢနကအဲၣ်ဒိးမၤ ဘၣ်ဆၣ် နမၤအီၤတန့ၢ်ဘၣ်အဃိ တဘၣ်က့ၤလီကီအီၤ လၢၤတဂ့ၤ.

•   ယူးယီၣ်ပာ်ကဲပှၤဂၤ

   လံာ်စီဆှံတဲဝဲလၢ “ယူးယီၣ်ပာ်ကဲ ပှၤအကလုာ်ကလုာ်တက့ၢ်.”—၁ ပ့းတရူး ၂:၁၇.

   လံာ်စီဆှံတဆၢအံၤ ကဲဘျုးလၢနဂီၢ်ဒ်လဲၣ်. ဘၣ်ဃးဒီး ခိၤရိၤနၤတၢ်ဆါ (COVID-19) အံၤန့ၣ် ပှၤအါဂၤ အတၢ်ထံၣ်အိၣ်ဝဲ အါမံၤအါမၠိဘၣ်ဆၣ် ပာ်ကဲအဝဲသ့ၣ်အတၢ်ထံၣ်. တကတီၢ်ဃီန့ၣ် ဒ်နဆၢတဲာ်ပာ်စၢၤအသိးန့ၣ် မၤထွဲအီၤတက့ၢ်. တကးဒံးဘၣ် ဆိကမိၣ်န့ၢ်တၢ်လၢ ပှၤလၢအတဆဲး ကသံၣ်တဖၣ်အဂီၢ်, ပှၤသူၣ်က့သးပှၢ်တဖၣ်အဂီၢ် ဒီးပှၤလၢအအိၣ်ဒီး တၢ်ဆါယံာ်ယံာ်ထၢထၢတဖၣ် အဂီၢ်စ့ၢ်ကီး.

•   အိၣ်ဒီးတၢ်ဝံသးစူၤတက့ၢ်

   လံာ်စီဆှံတဲဝဲလၢ “တၢ်အဲၣ်တၢ်ကွံန့ၣ် ဝံသးစူၤတၢ် ဒီးအသူၣ်ဂ့ၤသးဝါလီၤ.”—၁ ကရံၣ်သူး ၁၃:၄.

   လံာ်စီဆှံတဆၢအံၤ ကဲဘျုးလၢနဂီၢ်ဒ်လဲၣ်. တၢ်ဖံးတၢ်မၤတနီၤနီၤ တချုးလၢ တၢ်ဆါလီၤဒံးဘၣ် အဆၢကတီၢ်န့ၣ် ပမ့ၢ်မၤန့ၣ် တၢ်ဘၣ်ယိၣ်အလီၢ် တအိၣ်ဘၣ်. ဘၣ်ဆၣ် မ့မ့ၢ်ခဲအံၤ တၢ်ဖံးတၢ်မၤတဖၣ်န့ၣ် ပှၤတနီၤနီၤ မၤဝဲတဘူၣ်လၢၤဘၣ်. ဖဲအဝဲသ့ၣ်တဖၣ် ပာ်ဖျါထီၣ်အတၢ်ထံၣ် ဒ်န့ၣ်အခါ နၢ်ပၢၢ်စၢၤအဝဲသ့ၣ်. နၤစ့ၢ်ကီး နမ့ၢ်အဲၣ်ဒိးက့ၤမၤက့ၤ တၢ်လၢနမၤတ့ၢ် အပူၤကွံာ်လၢညါတဖၣ် ဘၣ်ဆၣ် အခဲအံၤ ပဒိၣ်မ့ၢ်တဟ့ၣ် အခွဲးဒံးဘၣ်န့ၣ် ဆဲးအိၣ်ခိးလၢ တၢ်ဝံသးစူၤအပူၤ တက့ၢ်.

 ယဟိဝၤပှၤအုၣ်အသးတဖၣ်န့ၣ် န့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ လၢလံာ်စီဆှံပူၤ. ဒီးအဝဲသ့ၣ် အိၣ်ဒီးတၢ်မုၢ်လၢ်တခါလၢ ခါဆူညါန့ၣ် တၢ်အိၣ်သးကဂ့ၤထီၣ်က့ၤဝဲ. ထဲန့ၣ်တကးဒံးဘၣ် ယဟိဝၤပှၤအုၣ်အသးတဖၣ် ဆီၣ်ထွဲမၤစၢၤလိာ်သး တဂၤဒီးတဂၤ ဒီးဒိကနၣ်ဝဲ လံာ်စီဆှံ အတၢ်ဟံးစုနဲၣ်ကျဲ လၢအမ့ၢ် အိၣ်ဖှိၣ်ရိဖှိၣ်တပူၤဃီ. (ဧ့ၤဘြံၤ ၁၀:၂၄, ၂၅) ပှၤတဂၤဂ့ၤတဂၤဂ့ၤ လၢအမ့ၢ်အဲၣ်ဒိး ဟဲထီၣ်တၢ်အိၣ်ဖှိၣ်ဒီး ယဟိဝၤပှၤအုၣ်အသးန့ၣ် ဟဲထီၣ်ဝဲသ့. ဘၣ်ဆၣ် ဖဲခိၤရိၤနၤတၢ်ဆါ (COVID-19) လီၤအဆၢကတီၢ်ဒု ပဝဲသ့ၣ်တဖၣ် ပထီၣ်တၢ်အိၣ်ဖှိၣ်လၢ Zoom ပူၤ.

 ပှၤအါဂၤထံၣ်ဝဲလၢ ဖဲတၢ်ကီတၢ်ခဲ အဆၢကတီၢ်အံၤန့ၣ် အဝဲသ့ၣ် ဟဲထီၣ်တၢ်အိၣ်ဖှိၣ်ဒီး ယဟိဝၤပှၤအုၣ်အသးတဖၣ်အဃိ ကဲထီၣ်တၢ်မၤစၢၤ လၢအဝဲသ့ၣ်ဂီၢ်. အဒိ ပိာ်မုၣ်တဂၤ လၢအဘၣ် ခိၤရိၤနၤတၢ်ဆါ (COVID-19) န့ၣ်အဝဲတူၢ်လိာ် လံာ်ကွဲမုာ်လၢ ယဟိဝၤပှၤအုၣ်အသးတဖၣ် အအိၣ်အဃိ အဝဲဟဲထီၣ်တၢ်အိၣ်ဖှိၣ်လၢ Zoom ပူၤ. ဒီးတၢ်အိၣ်ဖှိၣ်န့ၣ် မၤစၢၤအီၤဒ်သိး အလဲၤခီဖျိ အတၢ်ဆူးတၢ်ဆါ ကန့ၢ်အဂီၢ်. လၢခံန့ၣ် အတဲဝဲလၢ “ယတူၢ်ဘၣ်ဒ်သိး အဝဲသ့ၣ်တဖၣ်န့ၣ် မ့ၢ်ယဟံၣ်ဖိဃီဖိ ဒီးယဖးလံာ်စီဆှံန့ၣ် ဟ့ၣ်ယၤတၢ်သူၣ်မံသးမုာ် သပှၢ်ကတၢၢ်. ဒီးမၤစၢၤစ့ၢ်ကီးယၤလၢ ခါဆူညါန့ၣ် ယတၢ်ကီတၢ်ခဲသ့ၣ်တဖၣ်အံၤ ကလီၤမၢ်ကွံာ်ဝဲ. ယၤန့ၣ် လၢယတၢ်အိၣ်မူ ဒီတစိၤန့ၣ် ယဟးဃုကစၢ်ယွၤ ဖးယံာ်လံ ဘၣ်ဆၣ်ခဲအံၤ ခီဖျိလၢ သုမၤစၢၤယၤအဃိ ယသ့ၣ်ညါဘၣ် ကစၢ်ယွၤအဂ့ၢ် ဂ့ၤဂ့ၤလံ. အဃိ တၢ်ဘျုးဒိၣ်မး.”