ဟီၣ်ခိၣ်ဒီဘ့ၣ် တၢ်လီၤမုၢ်လီၤဖး လၢထံဂ့ၢ်ကီၢ်ဂ့ၢ်တကပၤန့ၣ် အိၣ်အါထီၣ်ဝဲဒိၣ်မး. ပှၤဃုသ့ၣ်ညါတၢ်ကရူၢ် (Pew Research Center) ပာ်ဖျါထီၣ်ဝဲလၢ ဖဲ ၂၀၂၂ န့ၣ် ပှၤ ၆၅ မျးကယၤ လၢထံကီၢ် ၁၉ ဘ့ၣ်အပူၤန့ၣ် တဲဝဲလၢ အဝဲသ့ၣ် ပဒိၣ်ပပှၢ်တဖုဒီးတဖု တၢ်သးတလီၤပလိာ် ဒီးတၢ်ထံၣ်တဒ်သိးလိာ်သး ဘၣ်ဃးဒီးထံဂ့ၢ်ကီၢ်ဂ့ၢ်န့ၣ် အိၣ်ဝဲအါဒိၣ်မး.

 တၢ်လီၢ်လၢနအိၣ်န့ၣ် ပှၤကညီတဖၣ် အလီၤမုၢ်လီၤဖး လၢထံဂ့ၢ်ကီၢ်ဂ့ၢ်အဃိ အါထီၣ်ရုၢ်ရုၢ်န့ၣ် နပာ်သူၣ်ပာ်သးဘၣ်ဧါ. ဘၣ်မနုၤဃိ တၢ်လီၤမုၢ်လီၤဖး အိၣ်အါထီၣ် ဒ်န့ၣ်လဲၣ်. တၢ်ဂ့ၢ်ကီတခါအံၤ အဘၣ်ဂီၢ်ထီၣ် ကန့ၢ်ဒံးဧါ. ဆိမိၣ်ကွၢ် တၢ်လၢလံာ်စီဆှံတဲဝဲ.

 လံာ်စီဆှံ တဲဆိပာ်စၢၤဝဲလၢ “မုၢ်နံၤခံကတၢၢ်တဖၣ်” အဆၢကတီၢ်န့ၣ် ပှၤအါဂၤကအိၣ်ဒီး လုၢ်လၢ်သကဲာ်ပဝး လၢအတဂ့ၤ လၢအကဒုးအိၣ်ထီၣ် တၢ်လီၤမုၢ်လီၤဖး.

•   “လၢမုၢ်နံၤခံကတၢၢ်တဖၣ်အပူၤန့ၣ် တၢ်ဆၢကတီၢ်လီၤဆီလၢ အကီအခဲသပှၢ်တၢၢ်န့ၣ် ကဘၣ်ဝဲလီၤ. ပှၤဟီၣ်ခိၣ်ဖိ ကအဲၣ်လီၤထဲ အနီၢ်ကစၢ်အသး . . . ကမ့ၢ်ပှၤလၢအခိၣ်ကိၤ.”​—⁠၂ တံၤမသ့း ၃:​၁-၃.

 ထံကီၢ်ပဒိၣ်ပပှၢ်အါဂၤ ဂုာ်ကျဲးစၢးဝဲဆူၣ်ဆူၣ် လၢကဒုးအိၣ်ထီၣ် တၢ်ဃူတၢ်ဖိး ဘၣ်ဆၣ်အဝဲသ့ၣ်မၤဝဲ တန့ၢ်ဘၣ်. အဝဲသ့ၣ်တဒူၣ်ဒီးတဒူၣ်လၢအထီဒါလိာ်သးန့ၣ် အဝဲသ့ၣ်ကမၤသကိးတၢ်အဂီၢ်ကီ ဒီးတဘျီတခီၣ်မၤသကိးတၢ် တန့ၢ်နီတစဲးဘၣ်. တၢ်မၤသးဒ်အံၤန့ၣ် ပာ်ဖျါထီၣ်ဝဲလၢ တၢ်လၢလံာ်စီဆှံ တဲဆိပာ်စၢၤဝဲ ဖးယံာ်လံန့ၣ် အဘၣ်ဝဲတီတီလီၤ.

•   “ဖဲပှၤဟီၣ်ခိၣ်ဖိ ကဒဲကဒဲ ပၢလိာ်သး အဆၢကတီၢ်န့ၣ် ပှၤဘၣ်နးဘၣ်ဖှီၣ် ထီဘိလီၤ.”​—⁠စံၣ်တဲၤတဲလီၤတၢ် ၈:⁠၉.

 ဘၣ်ဆၣ် လံာ်စီဆှံတဲဝဲလၢ တၢ်ဂ့ၢ်ကီတခါအံၤ ကဘၣ်ဂီၢ်ထီၣ်က့ၤ ခီဖျိပဒိၣ်တဂၤ လၢအကမၤလီၤမၢ်န့ၢ် တၢ်ကီတၢ်ခဲလၢ ပှၤဟီၣ်ခိၣ်ဖိ ထံၣ်ဘၣ်ဝဲ လၢဆၢကတီၢ်ခဲအံၤ.

 လံာ်စီဆှံ ပာ်ဖျါထီၣ်န့ၢ်ပှၤလၢ ခိၣ်နၢ်တဂၤ လၢအမ့ၢ် ယ့ၣ်ၡူးခရံာ်န့ၣ် အအိၣ်ဒီး တၢ်သ့တၢ်ဘၣ်လီၤဆီ လၢကမၤလီၤမၢ်န့ၢ်ပှၤ တၢ်ကီတၢ်ခဲသ့ၣ်တဖၣ်အံၤ. ယ့ၣ်ၡူးန့ၣ် အိၣ်ဒီးတၢ်စိတၢ်ကမီၤ, ဒီးကစၢ်ယွၤ ဟ့ၣ်အီၤအခွဲး လၢအကပၢတၢ် ဒီးတကးဒံးဘၣ် အသးအိၣ် ဒုးအိၣ်ထီၣ် တၢ်ဃူတၢ်ဖိး ဒီးတၢ်မုာ်တၢ်ခုၣ် လၢပှၤဟီၣ်ခိၣ်ဖိခဲလၢာ်အဂီၢ်.

•   “ဖဲအဝဲပၢတၢ်အခါ ပှၤတီပှၤလိၤ ကဒိၣ်ထီၣ်ထီထီၣ် ဒီးတၢ်မုာ်တၢ်ခုၣ် ကအိၣ်ဝဲအါအါဂီၢ်ဂီၢ်.”​—⁠စံးထီၣ်ပတြၢၤ ၇၂:⁠၇.

•   “ပှၤကလုာ်ခဲလၢာ် ကမၤအတၢ်လီၤ.”​—⁠စံးထီၣ်ပတြၢၤ ၇၂:⁠၁၁.

 ယ့ၣ်ၡူးမ့ၢ်ဝဲ ခိၣ်နၢ်လၢအဂ့ၤတဂၤ လၢအသူၣ်အိၣ်သးအိၣ် ဒီးအဲၣ်ဒိးမၤစၢၤ ပှၤဟီၣ်ခိၣ်ဖိ လီၤဆီဒၣ်တၢ် ပှၤလၢပှၤရ့အီၤ တတီတလိၤတဖၣ်.

•   “ပှၤဖှီၣ်ဖိယာ်ဖိလၢ အကိးပသူထီၣ်လၢ တၢ်မၤစၢၤအဂီၢ်, ပှၤလၢအပတီၢ်ဖုၣ် ဒီးပှၤလၢ ပှၤမၤစၢၤအီၤ တအိၣ်နီတဂၤဘၣ်န့ၣ် အဝဲကမၤပူၤဖျဲးဝဲလီၤ. အဝဲကသးကညီၤ ပှၤလၢအပတီၢ်ဖုၣ် ဒီးပှၤဖှီၣ်ဖိယာ်ဖိ ဒီးအဝဲ ကမၤပူၤဖျဲး ပှၤဖှီၣ်ဖိယာ်ဖိ အသးသမူလီၤ. အဝဲကမၤပူၤဖျဲး အဝဲသ့ၣ်လၢ တၢ်ဆီၣ်တံၢ်မၤနၢၤ ဒီးတၢ်မၤဆူၣ်မၤစိး.”​—⁠စံးထီၣ်ပတြၢၤ ၇၂:​၁၂-၁၄.

 ဃုသ့ၣ်ညါအါထီၣ် ဘၣ်ဃး ကစၢ်ယွၤအဘီအမုၢ် လၢအအိၣ်လၢမူခိၣ် လၢယ့ၣ်ၡူးတီခိၣ်ရိၤမဲဝဲ. ကစၢ်ယွၤအဘီအမုၢ်အံၤ ကဲဘျုးလၢနဂီၢ် ကသ့ဒ်လဲၣ် ဒီးနဆီၣ်ထွဲ ကစၢ်ယွၤအဘီအမုၢ် ကသ့ဒ်လဲၣ်.

•   ကွၢ်တၢ်ဂီၤမူ လၢအခိၣ်တီမ့ၢ်ဝဲ ယွၤအဘီအမုၢ်န့ၣ် မ့ၢ်မနုၤလဲၣ်.

•   ဖးတၢ်ဂ့ၢ်လၢအမ့ၢ် “God’s Kingdom—A Government With No Corruption.”